Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NUM. 5 2016

 ANG PAGTAMOD SANG BIBLIA

Pagpasalamat

Pagpasalamat

Ang pagpasalamat napamatud-an na nga madamo sing kaayuhan—sa pisikal, mental, kag emosyonal—gani dapat mangin bahin ini sang matag-adlaw nga pagkabuhi sang kada isa.

Paano makahatag sa imo sing kaayuhan ang pagpasalamat?

ANG GINASILING SANG MGA EKSPERTO SA MEDISINA

Suno sa artikulo sa Harvard Mental Health Letter, “ang pagpasalamat pirme gid naangot sa daku nga kalipay. Ang pagpasalamat nagabulig sa mga tawo nga mangin mas positibo sa ila emosyon, makatigayon sing maayo nga mga eksperiensia, maayo nga panglawas, makaatubang sa kabudlayan, kag mabakod nga mga kaangtanan.”

ANG GINASILING SANG BIBLIA

Ginapalig-on kita sang Biblia nga mangin batasan naton ang pagpasalamat. “Ipakita nga mapinasalamaton kamo,” sulat ni apostol Pablo, nga nagpakita mismo sini nga kinaiya. Halimbawa, ‘padayon niya nga ginapasalamatan ang Dios’ sa pagbaton sang iban sang iya mensahe. (Colosas 3:15; 1 Tesalonica 2:13) Ang matuod nga kalipay mabatyagan indi kon talagsa ka lang magpasalamat, kundi kon may mapinasalamaton ka nga panimuot. Nagabulig ini sa aton nga malikawan ang pagbatyag sing bugal, kahisa, kag kaakig, nga nagapahilayo sa mga tawo sa aton kag makadula sang aton kalipay.

Ang aton Manunuga nagpakita sing maayo nga halimbawa sa pagpasalamat—bisan sa mga tawo! Ang Hebreo 6:10 nagasiling: “Ang Dios matarong kag indi niya pagkalimtan ang inyo binuhatan kag ang gugma nga ginpakita ninyo para sa iya ngalan.” Ginakabig sang aton Manunuga nga indi matarong, ukon indi makatarunganon, ang indi pagpasalamat.

“Magkasadya kamo pirme. Magpasalamat kamo tungod sa tanan nga butang.”1 Tesalonica 5:16, 18.

 Paano ang pagpasalamat makabulig para mangin maayo ang aton kaangtanan sa iban?

ANG GINAPAKITA SANG EKSPERIENSIA

Kon sinsero kita nga nagapasalamat sa regalo, sa mainayuhon nga hambal, ukon sa praktikal nga bulig, ginapabatyag naton sa naghatag nga ginapabaloran kag ginaapresyar naton sia. Bisan ang mga indi kilala sang mga tawo nalipay gid kon pasalamatan sila bangod sang ila maayo nga ginhimo, pareho sang pagbukas sang puertahan.

ANG GINASILING SANG BIBLIA

“Himua nga kinabatasan ang paghatag sa iban,” siling ni Jesucristo, “kag sila magahatag sa inyo. Ibubo nila sa inyo sabak ang bug-os nga sukob nga nadasok, nauyog, kag nagaawas.” (Lucas 6:38) Ari ang eksperiensia ni Rose, nga isa ka apa sa Vanuatu, nga isa ka isla nga pungsod sa South Pacific.

Si Rose nagtambong sa Cristianong mga miting sang mga Saksi ni Jehova pero wala sia nakabenepisyo sing maayo sa sini, bangod sia ukon ang tanan sa kongregasyon indi makahibalo sing sign language. Sang nagtambong sa ila kongregasyon ang mag-asawa nga maayo mag-interpret sa sign-language, nahibaluan nila ini nga problema, gani ginsugdan nila ang pagtudlo sing sign language. Grabe gid ang pagpasalamat ni Rose. “Nalipay gid ako kay madamo ako sing mga abyan nga nagapalangga sa akon,” siling niya. Ang iya pagpasalamat kag ang iya pagpakigbahin sa mga miting nagpahalipay gid sa mag-asawa nga nagbulig sa iya. Nagapasalamat gid si Rose sa mga panikasog sang iban nga magtuon sing sign language agod makakomunikar sa iya.—Binuhatan 20:35.

“Ang isa nga nagahalad sing pasalamat sa [Dios] nagahimaya sa [iya].”Salmo 50:23.

Paano mo mangin batasan ang pagpasalamat?

ANG GINASILING SANG BIBLIA

Ang aton ginabatyag amo man ang aton ginahunahuna. Ang manunulat sang Biblia nga si David nagsiling sa iya pangamuyo sa Dios: “Ginapamalandungan ko ang tanan mo nga binuhatan; ginabinagbinag ko gid ang imo mga hinimuan.” (Salmo 143:5) Si David nagapokus kag nagapamensar gid sing maayo. Ang iya pagkamapinasalamaton resulta sang iya regular nga pagpamalandong sa mga dalanon sang Dios, ang batasan nga ginpauswag niya sa bilog niya nga kabuhi.—Salmo 71:5, 17.

Maayo gid ang laygay sang Biblia sa aton: ‘Padayon ninyo nga hunahunaa ang bisan ano nga butang nga matuod, hiligugmaon, dungganon, maayo, kag dalayawon.’ (Filipos 4:8) Ang mga tinaga nga “padayon ninyo nga hunahunaa” nagapakita nga kinahanglan naton ang regular nga pagpamalandong, nga makabulig sa aton nga mangin mapinasalamaton.

“Ang ginapamalandungan sang akon tagipusuon magapakita sing paghangop.”Salmo 49:3.