Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NUM. 4 2016

 ANG PAGTAMOD SANG BIBLIA

Pisikal nga Katahom

Pisikal nga Katahom

Ang balanse nga panan-aw sa pisikal nga katahom may epekto kon bala mangin malipayon ang isa ukon indi.

Ngaa ginaapresyar naton ang katahom?

Sa makatilingala nga paagi, ang utok sang tawo makaapresyar sang katahom. Wala sing ginasiling ang Biblia kon paano ini nagakatabo, pero ginasugid sini sa aton kon ngaa nagaapresyar kita sang katahom: Gintuga kita sang Dios nga may mga kinaiya nga pareho sa iya. (Genesis 1:27; Manugwali 3:11) Gintuga man niya ang tama ka komplikado nga lawas sang tawo. Ginhimo niya ini nga may dalayawon nga porma kag ikasarang sa pagpanghikot. Parte sa sini, ang manugkomposo sang ambahanon sang una nagsiling: “Dayawon ko [ang Dios] kay sa makahalawhaw nga paagi ginhimo ako sing makatilingala.”—Salmo 139:14.

Apang sa karon, indi na balanse ang panan-aw sang madamo sa katahom nga ginapasanyog sang mga nagahimo kag nagabaligya sang uso nga mga bayo kag sang media. Suno sa libro nga Body Image, ginapakita sang pila ka pagtuon sa mga kultura sa Nakatundan nga “ang pisikal nga katahom amo lang gid ang pinakaimportante nga basihan para masiling nga maayo ang bug-os nga pagkatawo sang isa.” Pero ining makitid nga panan-aw nagabalewala sang mas importante nga butang—ang tagipusuon sang isa.—1 Samuel 16:7.

Madamo nga kultura ang nagahatag sing sobra nga importansia sa pisikal nga katahom

Magluwas sa pagpokus sa pisikal nga katahom, mas ginahatagan man subong sing importansia ang makapukaw sang seksuwal nga balatyagon, kag sa masami ginagamit ang mga babayi. “Sang gintun-an ang halos tanan nga porma sang media,” suno sa 2007 nga report sang American Psychological Association (APA), nakita nga ‘madamo sing pamatuod nga ang mga babayi ginagamit bangod lamang makagalanyat sila tan-awon.’ May maayo gid nga rason ang Biblia sa paglaygay sa aton nga indi magpaimpluwensia sa sini!—Colosas 3:5, 6.

“Ang inyo pagpatahom indi dapat sa panggua lamang, . . . sa baylo dapat patahumon ninyo ang inyo tagipusuon, ang inyo nasulod nga pagkatawo, paagi sa pagsuksok sang indi madinulunton nga bayo, ang malinong kag malulo nga espiritu, nga may daku nga balor sa mga mata sang Dios.”—1 Pedro 3:3, 4.

Ngaa maalamon nga mangin balanse?

Parte sa pisikal nga katahom, ang iban nagasiling: “Kon guapa ka, ipadayawdayaw ini!” Sa mga kultura nga kinaandan ini nga panghunahuna, ang mga tin-edyer kag bisan ang mga bata pa nga babayi nagakabig na sang ila kaugalingon “subong palantasyahan sang iban . . . , kag gusto nila nga tulukon sila kag kilalahon bangod sa ila hitsura,” suno sa report sang APA. Makahalalit gid ini. Ang matuod, nangin panguna ini nga kabangdanan sang problema sa panglawas kag kaangtanan sa iban, nga suno sa APA  mahimo tunaan sang “madamo nga problema sa emosyon.” Mahimo nalakip sa sini ang kabalaka kag “kaugot sa kaugalingon . . . , problema sa pagkaon, manubo nga pagtan-aw sa kaugalingon, kag depresyon ukon kapung-aw.”

“Kuhaa ang mga butang nga makapagamo sa imo tagipusuon; kag isikway ang mga butang nga makahalalit sa imo lawas, kay ang pagkapamatan-on kag ang paghingurusgan wala sing pulos.”Manugwali 11:10.

Ano nga panimuot ang nagapakita sang kaligdong sang panghunahuna?

Ginapakita sang Biblia nga may kaangtanan ang kaugdang sa ‘kaligdong sang hunahuna,’ ukon kaalam. (1 Timoteo 2:9) Binagbinaga ini: Ang maugdang nga mga tawo wala nagapokus sa ila hitsura, kundi balanse ang ila panan-aw sa ila kaugalingon. Ginahatagan man nila sing konsiderasyon ang balatyagon sang iban, gani ginadayaw sila, ginatahod sang iban, kag labaw sa tanan, ginakahamut-an sang Dios. (Miqueas 6:8) Dugang pa, daku ang tsansa nga makakita sila sing matuod nga mga abyan kag maluyagan sila sang tawo nga interesado indi lang sa pisikal nga kaangtanan kundi sa malipayon kag nagadugay man nga pag-asawahay.

Gani, may maayo gid nga mga rason ang Biblia sa pagpalig-on sa aton nga magpokus sa aton nasulod nga pagkatawo—ang aton “tagipusuon.” (1 Pedro 3:3, 4) Ang manami nga batasan wala nagalubad. Ang matuod, naganami pa gid ini pagligad sang tion! “Ang ubanon nga ulo isa ka korona sang katahom kon yara ini sa dalanon sang pagkamatarong,” siling sang Hulubaton 16:31. Gani bata man kita ukon tigulang, kon pamatian naton ang mapuslanon nga laygay sang Biblia, makita naton indi lamang ang katahom nga wala nagalubad kundi matigayon man naton ang pagkakontento kag pagtahod sang iban.

“Ang kaalikaya makadaya kag ang katahom mahimo nga umalagi lang, apang ang babayi nga nagakahadlok kay Jehova pagadayawon.”Hulubaton 31:30.

Magtuon sing Dugang Pa

Paano ang mga Prinsipio sa Biblia Makabulig sa Aton?

Ginpaathag ni Jesus kon ngaa kinahanglan naton ang panuytoy kag kon ano ang duha ka panguna kag pinakaimportante nga prinsipio sa Biblia.