Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Num. 3 2016

 ANG PAGTAMOD SANG BIBLIA

Pagtuo

Pagtuo

Nagapangangkon ang pila ka tawo nga relihioso sila, pero nabudlayan sila sa paghangop sang kahulugan sang “pagtuo.” Ano ang pagtuo, kag ngaa importante ini?

Ano ang pagtuo?

ANG GINASILING SANG IBAN

Madamo ang nagahunahuna nga ang tawo nga may pagtuo nagapati lang bisan wala sing mabakod nga ebidensia. Halimbawa, ang isa ka relihioso nga tawo magsiling, “Nagapati ako sa Dios.” Kon pamangkuton ina nga tawo, “Ngaa nagapati ka?” mahimo sia magsabat, “Amo na ina ang namat-an ko” ukon, “Amo na sina ang gintudlo sa amon halin sadto.” Base sa sini nga mga sabat, mahimo daw diutay lang ang kinalain sang isa nga may pagtuo kag sang isa nga ilintuon.

ANG GINASILING SANG BIBLIA

“Ang pagtuo amo ang masaligan nga pagpaabot sa kon ano ang ginalauman. Amo ini ang pamatuod nga ang imo ginapatihan matuod, bisan wala mo pa ini makita.” (Hebreo 11:1) Agod masaligan ang ginapaabot sang isa, dapat nga may mabakod sia nga rason sa sina nga pagpaabot. Ang matuod, sa orihinal nga lenguahe, ang kahulugan sang prase nga “masaligan nga pagpaabot” indi lang isa ka balatyagon ukon pagdalamguhanon. Gani, ang pagtuo nagalakip sang pagsalig nga nabase sa ebidensia.

“Ang . . . indi makita nga mga kinaiya [sang Dios], ang iya wala katapusan nga gahom kag pagka-Dios, maathag nga makita halin pa sang pagtuga sa kalibutan, bangod makita ini sa mga butang nga gintuga.”Roma 1:20.

Ngaa importante nga makatigayon sing pagtuo?

ANG GINASILING SANG BIBLIA

“Kon wala sing pagtuo imposible nga mapahamut-an ang Dios, kay ang nagapalapit sa Dios dapat magpati nga nagaluntad sia kag nagapadya sa mga hanuot nga nagapangita sa iya.”—Hebreo 11:6.

Subong sang ginsambit kaina, madamo ang nagapati sa Dios bangod lang amo ina ang gintudlo sa ila. ‘Amo na ina ang namat-an ko,’ mahimo sila magsiling. Pero gusto sang Dios nga ang mga nagasimba sa iya may matuod nga pagpati nga nagaluntad sia kag nagasalig nga ginahigugma niya sila. Amo ina ang isa ka rason kon ngaa ginapadaku sang Biblia nga kinahanglan nga pangitaon sia sing hanuot, agod nga makilala gid naton sia.

“Magpalapit kamo sa Dios, kag magapalapit sia sa inyo.”Santiago 4:8.

 Paano mo matigayon ang pagtuo?

ANG GINASILING SANG BIBLIA

“Ang tawo nagatuo lang pagkatapos niya mabatian ang pulong,” siling sang Biblia. (Roma 10:17) Gani ang una nga himuon agod magbakod ang pagtuo sa Dios amo ang ‘pagpamati’ sa ginatudlo sang Biblia parte sa iya. (2 Timoteo 3:16) Mabuligan ka sang pagtuon sa Biblia nga makita ang masaligan nga mga sabat sa importante nga mga pamangkot, pareho sang: Sin-o ang Dios? Ano ang pamatuod nga nagaluntad sia? Nagaulikid gid bala ang Dios sa akon? Ano ang katuyuan sang Dios sa palaabuton?

Ang pamatuod nga may Dios makita sa aton palibot

Nalipay ang mga Saksi ni Jehova sa pagbulig sa imo nga tun-an ang Biblia. Subong sang ginasiling sa amon website nga jw.org/hil, “Gusto gid sang mga Saksi ni Jehova nga tudluan ang mga tawo parte sa Biblia, pero wala namon ginapilit ang bisan sin-o nga mangin miembro sang amon relihion. Sa baylo, matinahuron namon nga ginapakita kon ano gid ang ginatudlo sang Biblia. Nahibaluan namon nga ang kada isa may kinamatarong nga magpili sang gusto niya patihan.”

Gani, ang imo pagtuo dapat nabase sa mga ebidensia nga imo naobserbahan samtang ginabinagbinag mo kon daw ano ka matuod ang imo nabasa sa Biblia. Sa sina nga paagi, ginasunod mo ang halimbawa sang mga nagatuon sang unang siglo nga “nalangkag gid . . . sa pagbaton sa pulong sang Dios, nga ginausisa sing maayo ang Kasulatan sa adlaw-adlaw kon bala matuod gid ini nga mga butang.”—Binuhatan 17:11.

“Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.”Juan 17:3.

Magtuon sing Dugang Pa

MAAYONG BALITA HALIN SA DIOS!

Paano Ka Mangin Suod sa Dios?

Hibalua kon ginapamatian bala sang Dios ang tanan nga pangamuyo, kon paano kita dapat mangamuyo, kag kon ano pa ang aton himuon agod mangin suod sa Dios.

LIBRO KAG BROSYUR

Diin Makita ang Sabat sa Importante nga mga Pamangkot sa Kabuhi?

Ara bala ini sa siensia, pilosopiya, ukon sa Biblia?

PIRME GINAPAMANGKOT

Ano ang Pagtuon sa Biblia?

Hibalua ang mga sabat sa mga pamangkot parte sa amon libre nga programa sa pagtuon sa Biblia.