ANO ANG BUOT SILINGON SINI?

Kon nagabuligay ang mag-asawa, daw pareho sila sa duha ka piloto nga nagapalupad sang isa lang ka eroplano. Bisan pa may mga kabudlayan, nagapensar sila sing “kami” imbes nga “ako.”

PRINSIPIO SA BIBLIA: “Indi na sila duha, kundi isa ka unod.”—Mateo 19:6.

“Ang mag-asawa dapat magbuligay para magmadinalag-on ang ila pag-asawahay.” —Christopher.

NGAA IMPORTANTE INI?

Kon may mga problema, ang mag-asawa nga wala nagabuligay masami nga nagabasulay sa baylo nga solbaron ini. Amo nga nagadaku ang gamay nga problema.

“Importante gid ang pagbuligay sa pag-asawahay. Kon wala kami nagabuligay sang akon bana, daw mga mag-roommate lang kami kag indi mag-asawa—nagaupdanay lang pero wala nagahilisugot sa paghimo sing importante nga mga desisyon.”—Alexandra.

ANO ANG MAHIMO MO?

TILAWI INI

  • “Akon lang gid” bala ang akon kuarta?

  • Kon gusto ko magrelaks sing maayo, wala ko bala ginaupod ang akon bana ukon asawa?

  • Wala bala ako nagapakigsuod sa pamilya sang akon bana ukon asawa bisan pa suod sia sa ila?

ISTORYAHI NINYO NGA MAG-ASAWA

  • Sa ano nga mga butang nga nagabuligay gid kami?

  • Ano pa ang mapauswag namon?

  • Ano ang puede namon himuon subong para magbuligay pa gid kami?

MGA PANUGDA

  • Imadyina nga nagahampang kamo nga mag-asawa sing tennis kag kontrahanay kamo. Ano ang puede mo himuon para mag-updanay kamo sa isa lang ka team?

  • Indi magpensar, ‘Paano ako magdaug?’ kundi ‘Paano kami magdaug?’

“Indi na pagpensara kon sin-o ang husto kag sala. Mas importante ang kalinong kag paghiusa sa inyo pag-asawahay.”—Ethan.

PRINSIPIO SA BIBLIA: Pangitaa ninyo indi lamang ang inyo personal nga kaayuhan, kundi ang iya man sang iban.’—Filipos 2:3, 4.