“SANG BATA PA AKO, PIRME AKO MAKABATI SANG INSULTO KAG SININGGITANAY,” siling ni Patricia. “Wala ko gid matun-an ang pagpatawad. Bisan adulto na ako, ginapamensar ko gid ang sala sang iban sa akon, amo nga indi ako makatulog.” Kon ang isa pirme na lang akig kag may paghinakit, indi gid sia magmalipayon kag makahalit ini sa iya panglawas. Ang matuod, suno sa mga pagtuon, ang mga wala nagapatawad mahimo . . .

  • Makaguba sang mga relasyon bangod sang kaakig kag paghinakit, nga nagaresulta sa kasubo kag pagpain sa kaugalingon

  • Madali maakig, madali magkabalaka, ukon magbatyag pa gani sing depresyon

  • Magtan-aw lang pirme sa sala amo nga indi sila malipayon

  • Magbatyag nga wala nila ginahimo ang husto

  • Ma-stress kag madali magbalatian, lakip na ang high blood, balatian sa tagipusuon, arthritis, kag pagsakit sang ulo *

ANO ANG PAGPATAWAD? Ang pagpatawad amo ang pagpasaylo sa nakasala kag wala na nagakaakig, nagahinakit, kag nagahunahuna nga magbalos. Indi ini pagkunsinti sa sala, pagpakadiutay sini, ukon paghunahuna nga daw wala lang ini natabo. Kundi personal ini nga desisyon sang isa bangod sa gugma, amo nga gusto gid niya nga makighidait kag makatigayon sang maayo nga relasyon sa nakasakit sa iya.

Ang pagpatawad nagapakita man sang paghangop. Ang mapinatawaron nga tawo nakahangop nga kita tanan makasala sa hambal kag sa buhat. (Roma 3:23) Gani ang Biblia nagasiling: “Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa.”—Colosas 3:13.

Ginapakita sini nga ang pagpatawad importante nga bahin sang gugma, nga amo ang “himpit nga higot sang paghiusa.” (Colosas 3:14) Ang matuod, suno sa website sang Mayo Clinic, ang pagpatawad nagaresulta sa . . .

  • Mas mabakod nga relasyon, lakip ang pagbatyag sang empatiya, paghangop, kag kaluoy sa nakasala

  •   Mas maayo nga panghunahuna kag kaangtanan sa Dios

  • Indi sobra nga kabalaka, stress, kag paglikaw sa gamo

  • Mas diutay nga posibilidad nga makabatyag sing depresyon

PAGPATAWAD SA KAUGALINGON. Ang pagpatawad sa kaugalingon mahimo “amo ang pinakamabudlay himuon,” pero amo ini “ang pinakaimportante sa panglawas”—sa mental kag pisikal—suno sa dyurnal nga Disability & Rehabilitation. Ano ang makabulig sa imo nga mapatawad ang imo kaugalingon?

  • Indi magpaabot nga mangin perpekto ka, kundi batuna nga kita tanan makasala gid.—Manugwali 7:20

  • Magtuon sa imo mga sala para indi na ini masulit

  • Mangin mapinasensiahon sa imo kaugalingon; ang iban mo nga kaluyahon kag indi maayo nga batasan mahimo indi dayon madula.—Efeso 4:23, 24

  • Makig-upod sa mga abyan nga nagapabakod sa imo, positibo, maayo, kag nagasugid sing matuod.—Hulubaton 13:20

  • Kon nakasakit ka, akua ini kag mangayo dayon sing pasaylo. Kon makighidait ka, makabatyag ka sing kalinong.—Mateo 5:23, 24

MAKABULIG GID ANG MGA PRINSIPIO SA BIBLIA!

Sang nagtuon sang Biblia si Patricia, nga ginsambit sa umpisa, natun-an niya ang pagpatawad. “Pamatyag ko indi na ako ulipon sang kaakig nga nagguba sang akon kabuhi,” sulat niya. “Wala na ako nabudlayan kag wala ko naman ginapabudlayan ang iban. Ang mga prinsipio sa Biblia nagapamatuod nga ginahigugma kita sang Dios kag gusto niya ang pinakamaayo para sa aton.”

Si Ron nagsiling: “Indi ko makontrol ang ginapensar kag ginahimo sang iban. Pero makontrol ko ang akon ginapensar kag ginahimo. Kon gusto ko sang kalinong, indi ako dapat maghinakit. Para sa akon, ang kalinong kag paghinakit wala gid nagatabuay. Indi ko sila puede dunganon. Subong, may maayo na ako nga konsiensia.”

^ par. 8 Reperensia: Website sang Mayo Clinic kag Johns Hopkins Medicine kag dyurnal nga Social Psychiatry and Psychiatric Epidemiology.