Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NUM. 1 2017

 GINDESINYO BALA INI?

Ang Panagang sa Init sang Saharan Silver Ant

Ang Panagang sa Init sang Saharan Silver Ant

ANG subay nga ginatawag Saharan silver ant (Cataglyphis bombycina) amo ang isa sa mga sapat sa duta nga makasarang sa grabe nga kainit. Kon udto, nagapanago ang mga nagatukob sa ila bangod sa grabe nga kainit sa Sahara. Gani nagadalidali gua ini nga mga subay sa ila buho para mangita sing pagkaon, pareho sang mga insekto nga napatay sa grabe nga kainit.

[50] μm

Binagbinaga: Ang isa nga nakabulig sa silver ant amo ang iya panagang sa init nga pinasahi nga balahibo nga nagatabon sa ibabaw kag sa kilid sang iya lawas, pero sa idalom nga bahin sini wala sing balahibo. Ang mga balahibo sini, amo ang rason nga daw pilak ini tan-awon. Magagmay ini katama nga mga tubo nga korte trianggulo. Ang duha ka nagua nga bahin sang balahibo may tama gid ka gamay nga mga kudolkudol halin sa puno asta sa punta, pero mahining ang idalom nga bahin sini. May duha ka katuyuan ini nga desinyo. Una, ginapabanda sini nga mga balahibo ang kainit sang silak sang adlaw. Ikaduha, nagabulig ini sa subay nga mapahaganhagan sa iya lawas ang init nga halin sa palibot. Ginapabanda naman sang idalom nga bahin sang lawas sang subay nga wala sing balahibo ang init nga nagausbong halin sa balas. *

[10] μm

Ang panagang sa init sang Saharan silver ant nagabulig para mamentinar sa iya lawas ang temperatura nga masarangan lang niya—53.6 degrees Celsius (128.5°F). Ginatinguhaan sang mga researcher nga ilugon ining gamay nga sapat para makahimo sing pinasahi nga pinta nga wala nagainit, kag indi na kinahanglan sang bentilador ukon iban pa nga kagamitan para magbugnaw.

Ano sa banta mo? Ang panagang sa init sang Saharan silver ant resulta bala sang ebolusyon? Ukon gindesinyo ini?

^ par. 4 Ang iban pa nga nakabulig sa subay amo ang pinasahi nga protina sa iya lawas nga indi dali mabungkag sang grabe nga kainit. Ang iya malaba nga mga tiil amo ang rason kon ngaa indi magdapat ang iya lawas sa mainit nga balas kag makadalagan sia sing madasig. Ang iya naman tumalagsahon nga ikasarang sa pagtultol sang lugar nagabulig sa iya nga makabalik dayon sa iya buho.

Magtuon sing Dugang Pa