Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NUM. 1 2017

“Natandog Gid Kami sa Gugma nga Ila Ginpakita”

“Natandog Gid Kami sa Gugma nga Ila Ginpakita”

SANG Sabado, Abril 25, 2015, ang 7.8 nga kabaskugon sang linog nagtay-og sa Nepal, nga isa ka pungsod nga halos kabukiran sa aminhan sang India. Ang sentro sang linog ara sa mga 80 kilometros sa aminhan-katundan halin sa siudad sang Kathmandu, nga amo ang kapital. Makapasubo gid nga sobra sa 8,500 ka tawo ang napatay, gani suno sa rekord, amo ini ang pinakamadamo nga napatay bangod sa kalamidad sa Nepal. Sobra sa tunga sa milyon ka balay ang naguba. May 2,200 ka Saksi ni Jehova sa Nepal kag ang kalabanan sa ila nagaistar sa apektado nga mga lugar. Makapasubo nga napatay ang isa ka Saksi kag ang duha niya ka bata.

“Natabo ang linog sa tion nga ang mga kongregasyon sa apektado nga mga lugar nagahiwat sang ila mga miting,” siling sang Saksi nga si Michelle. “Kon natabo ini sa tion nga madamo ang ara sa ila mga balay, sigurado gid nga mas madamo ang napatay.” Ngaa wala maano ang mga nagtambong sa mga miting? Nakabulig gid ang desinyo sang Kingdom Hall.

“NAKITA NA NAMON SUBONG ANG MGA BENTAHA!”

Ang bag-o nga mga Kingdom Hall sa Nepal gindesinyo nga makasarang sa linog. Si Man Bahadur, nga nagapakigbahin sa pagpatindog sang mga Kingdom Hall, nagsiling: “Pirme kami ginapamangkot kon ngaa amo gid sini kabakod ang pundasyon kay gamay man lang ang tinukod. Nakita na namon subong ang mga bentaha!” Pagkatapos sang linog, gintugutan nga gamiton ang mga Kingdom Hall bilang mga dalayunan. Bisan pa may mga linog gihapon pagkatapos sini, nagabatyag ang mga Saksi ni Jehova kag ang ila mga kaingod nga nagadayon sa mga Kingdom Hall nga luwas na sila sa katalagman.

Ang mga Saksi ni Jehova kag ang ila mga kaingod nagdayon sa mga Kingdom Hall

Ginpangita dayon sang Cristianong mga gulang ang mga miembro sang kongregasyon nga wala didto. “Gin-una sang mga gulang ang kaayuhan sang kongregasyon sangsa ila kaugalingon,” siling sang Saksi nga si Babita. “Natandog gid kami sa gugma nga ila ginpakita.” Pagkaaga sa tapos sang linog, ang tatlo ka miembro sang komite nga nagadumala sa hilikuton sang mga Saksi ni Jehova sa Nepal, upod ang nagalakbay nga mga ministro, ukon manugtatap sang sirkito, nagbisita sa mga kongregasyon para mahibaluan ang ila mga kinahanglanon kag mabuligan ang mga gulang sa sina nga lugar.

Si Gary Breaux, halin sa ulong talatapan sang mga Saksi ni Jehova, nagbisita sa mga biktima sang linog sa Nepal

Pagligad sang anom ka adlaw sa tapos sang linog, si Gary Breaux, halin sa ulong talatapan sang mga Saksi sa Estados Unidos, nagkadto sa Nepal upod sa iya asawa nga si Ruby. “Bangod sang kagamo sa Kathmandu, kag sa mga linog sa tapos sini,” siling ni Reuben, nga miembro sang komite nga ginsambit kaina, “indi kami sigurado kon makaabot gid man si Utod Breaux. Pero determinado sia nga magkadto—kag nag-abot gid man sia! Gin-apresyar gid sang mga Saksi sa Nepal ang iya pagbisita.”

“MAS SUOD KAMI SUBONG”

Si Silas, nga nagatrabaho sa opisina sang mga Saksi sa Nepal, nagsiling: “Sang nagbalik ang serbisyo sang telepono, adlaw kag gab-i nga sige tunog ang telepono! Nabalaka gid sa amon ang mga Saksi sa bilog nga kalibutan. Bisan indi namon maintiendihan ang  ila ginahambal, nabatyagan namon ang ila pagpalangga kag ang handum nila nga magbulig.”

Ang medical team sang mga Saksi halin sa Europa nagbulig sa mga biktima

Sa sulod sang pila ka adlaw, ang lokal nga mga Saksi nagadala sing pagkaon sa mga Kingdom Hall para sa mga nagakinahanglan. Nagtukod man sing Disaster Relief Committee, kag dayon nag-abot ang mga bulig, kalabanan halin sa Bangladesh, India, kag Japan. Pagligad sang pila ka adlaw, nag-abot ang isa ka medical team sang mga Saksi halin sa Europa kag nagplastar sa isa ka Kingdom Hall. Ginsugdan dayon nila ang pagbulig, indi lang sa pisikal nga kahimtangan sang mga biktima kundi sa pag-atubang man sa trauma.

Pareho sa ginabatyag sang madamo, ang babayi nga si Uttara nagsiling: “Ang linog makahaladlok kag makakululba. Pero pagkatapos sini, nangin mas suod kami subong sa amon espirituwal nga pamilya.” Ang linog wala nagpaluya sa pagpalangga sang katawhan ni Jehova sa iya kag sa isa kag isa. Kundi ginpabakod pa gid sini ang ila gugma.

Magtuon sing Dugang Pa

Nagabulig Bala ang mga Saksi ni Jehova sa Tion sang Kalamidad?

Hibalua kon paano kami nagabulig sa tion sang kalamidad sa mga Saksi kag sa iban.