Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NUM. 1 2017

Ginapamatian sang maalam nga babayi ang iya konsiensia

 ANG PAGTAMOD SANG BIBLIA

Aborsion

Aborsion

Minilyon ka wala pa mabun-ag nga lapsag ang hungod nga ginapahulog kada tuig—mas madamo pa ini sangsa populasyon sang iban nga pungsod.

Personal bala ini nga desisyon ukon isyu parte sa husto kag sala?

ANG GINASILING SANG IBAN

Lainlain ang rason sang mga babayi kon ngaa nagapahulog sila. Lakip sa sini amo ang kapigaduhon, indi maayo nga relasyon, gusto pa magkuha sing edukasyon ukon karera, ukon indi gusto nga mangin nagasolo nga iloy. Pero para sa iban, sala ang aborsion ukon pagpahulog—pagguba ini sang pagsalig nga ginhatag sang Dios sa nagabusong nga babayi.

ANG GINASILING SANG BIBLIA

Para sa Dios, ang kabuhi sagrado, ilabi na ang kabuhi sang tawo. (Genesis 9:6; Salmo 36:9) Maaplikar ini nga prinsipio sa lapsag sa sulod sang taguangkan, ang lugar nga gindesinyo sang Dios nga magaamlig sa lapsag nga wala pa mabun-ag. “Ginputos mo ako sa taguangkan sang akon iloy,” siling sang manunulat sang Biblia. Nagsiling pa sia: “Nakita mo na ako sang wala pa ako mabun-ag; nasulat sa imo libro ang tanan ko nga bahin sang mga adlaw nga ginhimo ini.”—Salmo 139:13, 16.

Ang pagtamod sang Dios sa wala pa mabun-ag nga lapsag makita man sa iya Kasuguan sa pungsod sang Israel kag sa ginhatag sang Dios sa aton nga konsiensia. Ang Kasuguan sang Dios nagasiling nga kon mahalitan sang isa ka tawo ang nagabusong kag napatay ang iya wala pa mabun-ag nga lapsag, silutan sia sing kamatayon—ibayad niya ang iya kabuhi sa kabuhi nga nadula. (Exodo 21:22, 23) Siempre, dapat binagbinagon anay sang mga hukom ang mga motibo kag ang mga kahimtangan.—Numeros 35:22-24, 31.

Ginhatagan man ang mga tawo sing konsiensia. Kon pamatian sang babayi ang iya konsiensia paagi sa pagpabalor sa kabuhi sang iya wala pa mabun-ag nga lapsag, mangin matinlo ang iya konsiensia. * Kon indi niya pagpamatian ang iya konsiensia, tublagon sia sini ukon pakamalauton pa gani. (Roma 2:14, 15) Ginapakita sang mga pagtuon nga nagadugang man ang kabalaka kag depresyon sang mga babayi nga nagpahulog.

Pero, ano abi kon mabudlay gid ang pagpadaku sang bata, ilabi na kon wala sa plano ang pagbusong? Talupangda ang pasalig sang Dios sa mga nagasunod sa iya mga pagsulundan: “Mainunungon ka sa tawo nga mainunungon sa imo; matarong ka sa tawo nga matarong.” (Salmo 18:25) Mabasa man naton: “Si Jehova mahigugmaon sa katarungan, kag indi niya pagbiyaan ang mga mainunungon sa iya.”—Salmo 37:28.

“Ginapahibalo sila sang ila konsiensia kon ang ila ginahimo husto ukon indi, kag ang ila panghunahuna nagasumbong ukon nagapakamatarong sa ila.”Roma 2:15.

 Ano abi kon nagpahulog ka na sang una?

ANG GINASILING SANG IBAN

Si Ruth, nga nagasolo nga iloy, nagsiling: “Tatlo na ang bata ko sadto kag indi ko na masarangan ang isa pa. Pero sa tapos ako magpahulog, pamatyag ko, may malain gid ako nga nahimo.” * Pero ang iya bala ginhimo indi na gid mapatawad sang Dios?

ANG GINASILING SANG BIBLIA

Ginpakita ni Jesucristo ang panghunahuna sang Dios parte sa sini sang nagsiling sia: “Wala ako nagkari sa pagtawag sa mga matarong, kundi sa mga makasasala agod maghinulsol sila.” (Lucas 5:32) Gani kon sinsero kita nga maghinulsol sa aton mga sala kag mangayo sing kapatawaran sa Dios, handa sia nga patawaron kita—bisan pa mabug-at ang aton mga sala. (Isaias 1:18) “Ang nagakalisod kag mahinulsulon nga tagipusuon, O Dios ko, indi mo pagsikwayon,” siling sang Salmo 51:17.

Lakip sa matinlo nga konsiensia, hatagan man sang Dios sing kalinong sa hunahuna ang mahinulsulon kon mapainubuson sia nga mangamuyo sa iya. “Paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna,” siling sang Filipos 4:6, 7. * Sa tapos sang pagtuon sa Biblia kag pagpangamuyo sa Dios, nabatyagan ni Ruth ang kalinong. Natun-an niya nga may “matuod nga kapatawaran” halin sa Dios.—Salmo 130:4.

“Wala [kita sang Dios] ginsilutan sang nagakabagay sa aton mga sala, wala niya ginhimo sa aton ang nagakadapat sa aton bangod sang aton mga kasaypanan.”Salmo 103:10.

^ par. 8 Kon nabutang sa katalagman ang kabuhi sang iloy ukon sang lapsag, indi ini rason para masiling nga husto ang aborsion. Kon sa tion sang pagbata kinahanglan magpili ang mag-asawa kon sin-o ang mabuhi, ang iloy bala ukon ang lapsag, dapat ini desisyunan sang mag-asawa. Pero sa madamo nga manggaranon nga pungsod, talagsa lang ini nagakatabo bangod sa pag-uswag sang medisina.

^ par. 12 Gin-islan ang ngalan.

^ par. 14 Ang paglaum nga pagkabanhaw nagahatag man sing kalinong sa isa ka tawo. Tan-awa ang “Pamangkot sang Amon mga Bumalasa” sa Abril 15, 2009, nga Ang Lalantawan, nga nagabinagbinag sang mga prinsipio sa Biblia parte sa posibilidad nga banhawon ang wala pa mabun-ag nga lapsag nga napatay.