Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NUM. 1 2016

Ano ang Nahibaluan Mo Parte sa mga Saksi ni Jehova?

Ano ang Nahibaluan Mo Parte sa mga Saksi ni Jehova?

Makita mo kami sa publiko nga nagaministeryo. Mahimo nakabasa ka sa mga pamantalaan ukon nakabati sa iban parte sa amon. Pero daw ano kadamo ang nahibaluan mo nga matuod parte sa mga Saksi ni Jehova?

ANO ANG NAHIBALUAN MO?

Tseke ang tagsa ka dinalan kon husto ukon sala.

HUSTO SALA

  1. Ang mga Saksi ni Jehova mga Cristiano.

  2. Ang mga Saksi ni Jehova mga creationist.

  3. Ang mga Saksi ni Jehova wala sing salig sa mga doktor.

  4. Ang mga Saksi ni Jehova nagapati sa bilog nga Biblia.

  5. Ang mga Saksi ni Jehova nagagamit lang sang ila kaugalingon nga bersion sang Biblia.

  6. Ang mga Saksi ni Jehova nagabag-o sang ila Biblia agod magsanto sa ila mga pagpati.

  7. Ang mga Saksi ni Jehova wala nagapakigbahin sa buluhaton sa komunidad.

  8. Ang mga Saksi ni Jehova nagapakanubo sa mga tawo nga may lain nga relihion.

Para sa sabat, basaha ang masunod.

  1.  1 HUSTO. Ginatinguhaan gid namon nga sundon ang mga panudlo kag paggawi ni Jesucristo. (1 Pedro 2:21) Pero, madamo kami sing kinatuhayan sa iban nga relihion nga ginatawag Cristiano. Halimbawa, natun-an namon nga ginatudlo sang Biblia nga si Jesus amo ang Anak sang Dios, kag indi sia bahin sang Trinidad. (Marcos 12:29) Wala kami nagapati nga ang kalag imortal ukon may basihan sa Kasulatan nga magsiling nga ginasilutan sang Dios ang mga tawo sa wala katapusan nga impierno. Wala man kami nagapati nga ang mga lider sang relihion dapat may titulo nga nagahimo sa ila nga labaw sangsa iban.—Manugwali 9:5; Ezequiel 18:4; Mateo 23:8-10.

  2. 2 SALA. Nagapati kami nga gintuga sang Dios ang tanan nga butang. Pero wala kami nagaugyon sa madamo nga nagapati sa creationism. Ngaa? Bangod ang pila ka pagpati sang mga creationist nagasumpakil sa Biblia. Halimbawa, ang pila nagasiling nga ang anom ka adlaw sang pagpanuga literal nga mga adlaw nga may 24 ka oras. Pero ang tinaga nga “adlaw” sa Biblia mahimo magpatuhoy sa malawig nga tion. (Genesis 2:4; Salmo 90:4) Ang pila ka creationist nagatudlo man nga ang duta nagaluntad sing pila pa lang ka libo ka tuig. Pero ginapakita sa Biblia nga ang duta kag ang uniberso nagluntad na antes pa sang anom ka adlaw sang pagpanuga. 1Genesis 1:1.

  3. 3 SALA. Nagapabulong kami. Ang matuod, ang iban sa amon mga doktor man pareho sang Cristiano sang unang siglo nga si Lucas. (Colosas 4:14) Pero, wala namon ginabaton ang mga pagbulong nga supak sa mga prinsipio sang Biblia. Halimbawa, wala kami nagapatughong sang dugo, bangod ginadumilian sang Biblia ang pagpasulod sang dugo sa lawas.—Binuhatan 15:20, 28, 29.

    Nagapangita man kami sing pinakamaayo nga pagbulong para sa amon kaugalingon kag sa amon pamilya. Ang matuod, ang mga pagbulong nga wala nagausik sang dugo nahimo agod buligan ang Saksi nga mga pasyente nga sa karon nagabulig man sa iban sa komunidad. Sa madamo nga pungsod karon, ang bisan sin-o nga pasyente makadesisyon na nga indi magpatughong sang dugo agod malikawan ang mga risgo sini, pareho sa paglaton sang balatian, reaksion sang immune system, kag pagsala sang mga nagatughong.

  4. 4 HUSTO. Nagapati kami nga ang bilog nga Biblia “gintuytuyan sang Dios kag mapuslanon.” (2 Timoteo 3:16) Lakip sa sini ang Daan nga Testamento kag Bag-ong Testamento, nga amo ang kinaandan nga pagtawag sini. Sa masami, ini nga mga bahin sang Biblia ginatawag namon nga Hebreong Kasulatan kag Cristianong Griegong Kasulatan. Sa sini nga paagi, indi maggua nga ang pila ka bahin sang Biblia indi na maaplikar kag indi importante.

  5.  5 SALA. Nagagamit kami sing madamo nga bersion sa amon pagtuon sang Biblia. Pero sa mga lenguahe nga may Bag-ong Kalibutan nga Badbad sang Balaan nga Kasulatan, ginagamit namon ini bangod nagagamit ini sang ngalan sang Dios, maathag ini basahon, kag sibu. Binagbinaga ang paggamit sa ngalan sang Dios nga Jehova. Sa introduksion sang isa ka badbad sang Biblia, nalista ang ngalan sang 79 ka tawo nga nakabulig sa paghimo sini. Pero wala gid sini ginsambit ang ngalan sang Awtor, si Jehova nga Dios! Sa pihak nga bahin, ginbalik sa Bag-ong Kalibutan nga Badbad ang ngalan sang Dios sing linibo ka beses sa kon diin ini makita sa orihinal nga mga sinulatan. 2

  6. 6 SALA. Kon matukiban namon nga ang amon mga pagpati wala nagasanto sa Biblia, ginapasibu namon ang amon paghangop sa sini. Antes pa namon ginsugdan ang paghimo sang Bag-ong Kalibutan nga Badbad sang Balaan nga Kasulatan sang 1950, gingamit namon ang bisan ano nga bersion sang Biblia kag ginapahisuno sa sini ang amon pagpati.

  7. 7 SALA. Ang amon ministeryo nagabulig sa madamo sa komunidad. Nakabulig kami sa madamo nga tawo nga mauntatan nila ang makahalalit nga pagkaadik, pareho sang pag-abuso sa droga kag alkohol. Linibo sa bilog nga kalibutan ang nabuligan namon nga makatuon sa pagbasa kag pagsulat. Nagabulig man kami sa tion sang kalamidad paagi sa paghatag sing praktikal nga bulig sa mga Saksi kag indi Saksi. Nagahatag man kami sing emosyonal kag espirituwal nga suporta sa mga biktima nga nagakinahanglan gid sini. 3

  8. 8 SALA. Ginasunod namon ang laygay sang Biblia nga ‘tahuron ang tanan nga tawo’—bisan ano man ang ila relihion. (1 Pedro 2:17, Ang Biblia, Philippine Bible Society, HIL) Halimbawa, bisan ginatos ka libo kami sa pila ka pungsod, wala namon ginaimpluwensiahan ang mga pulitiko ukon ang mga nagahimo sing kasuguan nga dumilian ang hilikuton sang iban nga relihion. Wala man kami nagapangampanya agod magpasar sing kasuguan para ipatuman ang amon moral kag relihioso nga mga pagpati sa komunidad. Sa baylo, ginatahod namon ang iban nga relihion pareho sang pagtahod nga ginapaabot namon sa ila.—Mateo 7:12.

Ini nga artikulo nagaunod sing pila ka impormasyon halin sa amon opisyal nga website, jw.org/hil. Para sa dugang nga impormasyon, kadtui ang PARTE SA AMON > PIRME GINAPAMANGKOT.

^ 1. Sa sina nga rason, wala kami nagapamatok—pareho sang ginahimo sang pila ka creationist—sa masaligan nga research sa siensia nga nagapakita nga binilyon na ka tuig ang edad sang duta.

^ 2. Ang Bag-ong Kalibutan nga Badbad may isa pa ka kinatuhayan: Ginapanagtag ini nga wala sing bayad. Gani minilyon ang nakabasa sang Biblia sa ila mismo nga lenguahe. Ang Bag-ong Kalibutan nga Badbad mabasa na karon sa 130 ka lenguahe. Mabasa mo man ini online sa www.jw.org/hil.

^ 3. Ang isa ka paagi nga ginagamit namon ang donasyon amo ang paghatag sing bulig sa mga biktima sang kalamidad. (Binuhatan 11:27-30) Bangod mga boluntaryo ang nagapanghikot sa amon buluhaton, ang mga pundo direkta nga magasto sa pagbulig, indi sa sueldo sang mga nagadumala sini.

Magtuon sing Dugang Pa

Ano ang Ginahimo sa Kingdom Hall?

Tilawi nga magsulod para makita mo mismo.

Paano Ginahimo ang Pagtuon sa Biblia?

Sa bilog nga kalibutan, ang mga Saksi ni Jehova kilala sa ila ginatanyag nga libre nga pagtuon sa Biblia. Tan-awa kon paano ini ginahimo.

Ngaa Ginatawag Kami nga mga Saksi ni Jehova?

Binagbinaga ang tatlo ka rason kon ngaa ginpili namon ini nga ngalan.