Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NUM. 1 2016

 BULIG PARA SA PAMILYA | PAMATAN-ON

Kon Paano Makakita sing Matuod nga Abyan

Kon Paano Makakita sing Matuod nga Abyan

NGAA ISA KA HANGKAT?

Bangod sa teknolohiya mas mahapos na karon makakomunikar sa mas madamo nga tawo. Apang ang inyo kaangtanan mahimo nga indi mabakod. Amo ini ang ginsiling sang isa ka pamatan-on nga lalaki: “Pamatyag ko indi mabakod ang akon kaangtanan sa akon mga abyan. Sa pihak nga bahin, may suod nga mga amigo si Tatay sa sulod na sang mga dekada!”

Ngaa isa ka hangkat karon ang pagtigayon sing mabakod kag malipayon nga pag-abyanay?

ANO ANG DAPAT MO MAHIBALUAN?

Ang teknolohiya mahimo nga isa sa rason sini. Bangod sang text, social network, kag iban pa nga social media, daw nagapabilin ang pag-abyanay bisan pa wala sila nagakitaay. Ang maayo nga pag-istoryahanay ginbuslan sang nagaarak nga mga text kag tweet. “Ang tawo halos indi na magkitaay sing personal agod mag-istoryahanay,” siling sang libro nga Artificial Maturity. “Mas madamo nga tion ang ginagamit sang mga estudyante sa pag-atubang sa iskren kag gamay lang ang ila tion sa isa kag isa.”

Kon kaisa, bangod sa teknolohiya mahimo hunahunaon mo nga suod na gid kamo sang imo mga abyan. “Sining karon lang,” siling sang 22 anyos nga si Brian, * “narealisar ko nga ako lang pirme ang nagauna sa pag-text sa akon mga abyan agod kamustahon sila. Dayon gin-untatan ko ang pag-text sa ila agod mahibaluan kon pila sa ila ang mauna sa pag-text sa akon. Ang matuod, gamay gid lang. Gani narealisar ko nga indi man gid gali kami suod sang pila ko ka abyan.”

Apang indi bala ang pag-text kag ang social media nagabulig sa imo nga makapakig-angot sa mga tawo kag mapabakod sini ang inyo pag-abyanay? Huo—ilabi na kon abyan mo ina nga mga tawo sa personal. Pero sa masami, ang social media daw nagahimo sing taytay pakadto sa iban pero wala ka nagapalapit sa ila.

 ANO ANG MAHIMO MO?

Hibalua ang kahulugan sang matuod nga abyan. Ginalaragway sang Biblia ang isa ka abyan subong tawo nga “mas suod pa sangsa isa ka utod.” (Hulubaton 18:24) Amo bala sina nga abyan ang gusto mo? Amo ka bala sina nga sahi sang abyan? Agod mabuligan ka nga masabat ina nga mga pamangkot, isulat ang tatlo ka kinaiya nga gusto mo sa imo abyan. Dayon isulat ang tatlo mo ka kinaiya nga nagapabakod sang pag-abyanay. Pamangkuta ang imo kaugalingon: ‘Sin-o sa akon mga abyan sa Internet ang nagapakita sing mga kinaiya nga ginapabaloran ko sa isa ka abyan? Ano nga mga kinaiya ko ang mahimo isiling sang akon mga abyan nga makapabakod sang amon pag-abyanay?’—Prinsipio sa Biblia: Filipos 2:4.

Maghimo sing prioridad. Ang mga pag-abyanay sa Internet masami nga nabase sa inyo pareho nga interes, kaangay sang kalingawan. Apang mas importante nga pareho kamo sing mga prinsipio sangsa pareho kamo sing mga interes. “Mahimo nga indi madamo ang akon abyan,” siling sang 21 anyos nga si Leanne, “pero ang akon mga abyan nagabulig sa akon nga mangin mas maayo nga tawo.”—Prinsipio sa Biblia: Hulubaton 13:20.

Maglagaw kag makig-abyan. Wala na sing mas maayo pa sangsa personal nga pag-istoryahanay, diin maobserbahan mo kag sang imo kaistorya ang tono sang inyo tingog, inyo pangguyahon, kag hulag sang lawas.—Prinsipio sa Biblia: 1 Tesalonica 2:17.

Maghimo sing sulat. Mahimo nga daw dinumaan na ini, pero paagi sa pagsulat ginapabatyag mo sa isa ka tawo nga ginahatagan mo sia sang imo wala nabahin nga atension. Ina nga atension talagsa na lang karon bangod madamo sing ginaobra ang mga tawo. Halimbawa, sa iya libro nga Alone Together, si Sherry Turkle nagsulat parte sa isa ka pamatan-on nga lalaki nga nagsiling nga wala sia sing nadumduman nga naghatag sing sulat sa iya. Nagapatuhoy sa tion nga ang mga tawo nagahimo sing sulat, sia nagsiling: “Nahidlaw ako sa sina nga tion bisan wala pa ako natawo sadto.” Ngaa indi paggamiton ining ‘dumaan nga teknolohiya’ agod makakita sing mga abyan?

Ang leksion: Ang matuod nga pag-abyanay wala lang nagabakod sa pagkamustahanay. Nagakinahanglan ini nga ikaw kag ang imo abyan magapakita sing gugma, empatiya, pagpasensia, kag pagpatawad. Ina nga mga kinaiya nagapahalipay sa mag-abyan. Apang mabudlay ina ipakita kon sa Internet lang kamo nagaistoryahanay.

^ par. 8 Gin-islan ang iban nga ngalan sa sini nga artikulo.

Magtuon sing Dugang Pa

Malain Bala nga Mangin Popular?

Lainlain ang paagi sang mga tin-edyer para mangin popular sila. Malain bala pirme nga mangin popular?

Kon Paano Atubangon ang Kasubo

Ang wala untat nga kasubo indi maayo sa panglawas, daw pareho ini sa pagpanigarilyo sing 15 ka sigarilyo kada adlaw. Paano mo malikawan ang pagbatyag nga nagaisahanon kag masubuan?