Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NUM. 1 2016

 ANG PAGTAMOD SANG BIBLIA

Langit

Langit

Ang langit isa ka topiko nga madamo sing espikulasyon kag ginabaisan gid. Apang ang ginatudlo sang Biblia parte sa sini tuhay gid sa ginatudlo sa madamo.

Ano ang langit?

ANG GINASILING SANG IBAN

Lainlain ang pagpati parte sa langit kag sa katuyuan sini. Halimbawa:

  • Madamo sa nagapangangkon nga mga Cristiano ang nagaugyon sa New Catholic Encyclopedia, nga nagatawag sa langit nga “katapusan nga puluy-an sang mga balaan nga napatay para sa Ginuo.”

  • Ang Judaismo nagapadaku gid sa presente nga kabuhi sangsa kabuhi sa tapos sang kamatayon, siling ni Rabbi Bentzion Kravitz. Pero nanugda sia nga “sa langit ang kalag makaeksperiensia sing pinakadaku nga kalipay—ang paghunahuna kag pagbatyag sing kasuod sa Dios nga wala sini mabatyagan sang una.” Apang, ginbaton ni Kravitz nga “bisan nagapati sa langit ang Judaismo, halos wala sing ginahambal ang Torah parte sa sini.”

  • Ang mga Hindu kag Budhista nagapati nga nagaluntad ang langit sa madamo nga espirituwal nga kahimtangan. Temporaryo lang ini nga teneran sang tawo, dayon matawo sia liwat sa duta ukon masaylo sa Nirvana ukon matigayon ang himpit nga kasanagan—kahimtangan nga mas mataas pa sa langit.

  • Ang pila wala nagapati sa bisan ano nga panudlo sang relihion parte sa langit kag nagasiling sila nga ini nga ideya binatabata.

Ang langit isa ka topiko nga madamo sing espikulasyon

ANG GINATUDLO SANG BIBLIA

Sa Biblia, indi lang isa ang kahulugan sang tinaga nga “langit.” Halimbawa:

  • Ang Genesis 1:20 (HIL) nagalaragway sa mga pispis nga ‘nagalupad sa kahawaan sang mga langit.’ Sa sini nga teksto, ang tinaga nga “langit” nagapatuhoy sa makita nga kahawaan.

  • Ginsambit sang Isaias 13:10 “ang mga bituon sang kalangitan kag ang mga konstelasyon sini”—nga ginatawag naton nga kahawaan.

  • Ang Biblia nagasiling parte sa “puluy-an sa langit” sang Dios kag nagasiling nga may “mga anghel sa langit.” (1 Hari 8:30; Mateo 18:10) Talupangda nga ang tinaga nga “langit” indi lang simbuliko, kundi nagapatuhoy sa aktual nga duog nga ginapuy-an. *

“Magtan-aw ka halin sa langit kag magtulok ka halin sa imo mataas nga puluy-an sang pagkabalaan kag pagkamahimayaon.”Isaias 63:15.

 Tanan bala nga mabuot nga tawo mapalangit kon mapatay?

Wala ginatudlo sang Biblia nga ang duta temporaryo nga puluy-an diin nagahulat kita sang aton kamatayon kag mapalangit kon mapatay. Ginapaathag sini nga ang kamatayon indi bahin sang orihinal nga katuyuan sang Dios sa mga tawo. Binagbinaga:

  • Ginsilingan sang Dios ang una nga mag-asawa: “Magpanganak kamo kag magdamo, pun-a ninyo ang duta.” (Genesis 1:28) Ang duta amo ang permanente nga puluy-an sang tawo, diin magapuyo sia sing dayon. Mapatay lang sila kon supakon nila ang Dios. Makapasubo nga nagsupak sila.—Genesis 2:17; 3:6.

  • Ang pagsupak sang una nga lalaki nagresulta sa kamatayon, indi lang sa ila nga mag-asawa kundi sa ila man kaliwatan. (Roma 5:12) Wala na bala sing paglaum ang mga tawo?

  • Ang Biblia nagasiling nga “may bag-o nga langit kag bag-o nga duta nga ginahulat naton suno sa iya saad.” * (2 Pedro 3:13) Paagi sa iya Ginharian, ipasag-uli sang Dios ang duta sa kahimtangan suno sa tuyo niya, “kag wala na sing kamatayon.” (Bugna 21:3, 4) Nagapatuhoy bala ini sa kabuhi sa langit ukon sa duta? Agod masiling nga ang isa ka butang “wala na,” dapat ara ini anay. Pero wala gid sing kamatayon sa langit. Gani, rasonable lang nga ini nga teksto nagapatuhoy sa matabo sa duta, nga gintuyo gid nga istaran naton kag ginahandum naton nga makaupod ang aton mga pinalangga. Ginasugid man sang Biblia nga ang mga patay buhion kag makaupod liwat sang ila mga pinalangga.—Juan 5:28, 29.

Madamo nga tawo ang nalipay sa paghibalo sa ginatudlo sang Biblia parte sa langit. Halimbawa, ang anay Katoliko nga si George nagsiling: “Nalugpayan ako sa ginatudlo sang Biblia parte sa kabuhi nga dayon sa duta. Mas rasonable ini sangsa mapalangit.” *

“Ang mga langit iya ni Jehova, apang ang duta ginhatag niya sa mga tawo.”Salmo 115:16.

^ par. 13 Siempre pa, espiritu ang Dios, indi pisikal. (Juan 4:24) Gani ang iya puluy-an dapat espirituwal nga duog nga napain sa aton pisikal ukon makita nga uniberso.

^ par. 19 Ang termino nga “bag-o nga duta” indi literal nga bag-o nga planeta; kundi simbuliko ini, nga nagapatuhoy sa katilingban sang tawo nga nagaistar sa duta nga ginakahamut-an sang Dios.—Salmo 66:4.

^ par. 20 Ginatudlo sang Biblia nga sa Ginharian sang Dios, 144,000 lang ka tawo ang ginpili nga maggahom sa langit upod kay Jesus.—1 Pedro 1:3, 4; Bugna 14:1.

Magtuon sing Dugang Pa

Ano ang Katuyuan sang Dios Para sa Duta?

Ginapaathag sang Biblia kon ngaa gintuga sang Dios ang duta, kon san-o madula ang pag-antos, kag kon ano ang matabo sa duta sa palaabuton kag sa mga nagaistar sa sini.

Ano ang Ginharian sang Dios?

Sin-o ang Hari sang Ginharian sang Dios, kag ano ang ginahimo sang Ginharian?