Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) SEPTIEMBRE 2016

Ang Imo Bala Pamayo Nagahimaya sa Dios?

Ang Imo Bala Pamayo Nagahimaya sa Dios?

“Himua ang tanan para sa himaya sang Dios.”—1 COR. 10:31.

AMBAHANON: 34, 61

1, 2. Ngaa mataas ang mga talaksan sang mga Saksi ni Jehova parte sa pamayo? (Tan-awa ang piktyur sa umpisa sini nga artikulo.)

“INDI pormal ang ila pamayo, ilabi na kon mainit,” report sang isa ka Dutch nga pamantalaan parte sa miting sang mga lider sang mga relihion. “Pero indi amo sini ang nagakatabo sa kombension sang mga Saksi ni Jehova. . . . Ang mga lalaki pati na ang kabataan naga-amerikana kag nagakurbata, kag ang bayo sang mga babayi pati na ang kabataan nga mga babayi . . . malaba pero manami tan-awon.” Pirme ginadayaw ang mga Saksi ni Jehova sa ila pagpamustura nga “talahuron, nga may kaugdang kag maayo nga hunahuna . . . sa paagi nga nagakaigo sa mga . . . nagapangangkon nga nagasimba sa Dios.” (1 Tim. 2:9, 10, footnote) Ang ginpatuhuyan diri ni apostol Pablo amo ang mga babayi, pero nalakip man sa sini nga prinsipio ang Cristianong mga lalaki.

2 Ang mga talaksan ni Jehova sa pamayo importante sa aton subong iya katawhan, kag subong Dios nga aton ginasimba, importante man ini sa iya. (Gen. 3:21) Maathag nga ginapakita sang Kasulatan nga ang Soberano sa bug-os nga uniberso may maayo nga mga talaksan nga dapat sundon sang iya mga alagad parte sa pamayo kag pamustura. Gani indi lang kita makapagusto sang  luyag naton. Dapat naton talupangdon kon ano ang gusto sang Soberanong Ginuong Jehova.

3. Ano ang matun-an naton parte sa pamayo suno sa Kasuguan sang Dios sa mga Israelinhon?

3 Halimbawa, gin-amligan sang Kasuguan sang Dios ang mga Israelinhon sa imoral nga pagkabuhi sang mga tawo sa mga pungsod sa palibot nila. Ginapakita sang Kasuguan nga ginakangil-aran ni Jehova ang pagsuksok sang babayi sing bayo sang lalaki, kag sang lalaki sing bayo sang babayi—ginatawag ini subong nga unisex fashion. (Basaha ang Deuteronomio 22:5.) Suno sa kasuguan, maathag nga indi gusto sang Dios ang pamayo nga masal-an ang lalaki nga babayi kag ang babayi nga lalaki, ukon indi na makilala kon lalaki bala sila ukon babayi.

4. Ano ang makabulig sa mga Cristiano nga makapili sang nagakaigo nga pamayo?

4 May mga prinsipio sa Pulong sang Dios nga makabulig sa mga Cristiano sa pagpili sang nagakaigo nga pamayo. Magamit ini bisan diin man kita, ano ang aton kultura, ukon bisan ano ang klima. Indi na naton kinahanglan sang malaba nga listahan sang kon ano ang nagakaigo kag indi nagakaigo nga pamayo. Masuksok man naton ang gusto naton basta nahisuno lang ini sa mga prinsipio sa Kasulatan. Binagbinagon naton ang pila sini nga makabulig sa aton sa paghibalo “kon ano ang maayo kag kalahamut-an kag himpit nga kabubut-on sang Dios” kon nagapili kita sang aton isuksok.—Roma 12:1, 2.

ANG NAGAKAIGO PARA SA MGA MINISTRO SANG DIOS

5, 6. Ano dapat ang epekto sang aton pamayo sa iban?

5 Gintuytuyan si apostol Pablo nga ipadaku ang importante nga prinsipio sa 2 Corinto 6:4. (Basaha.) Mahibaluan ang aton personalidad sa aton pamayo. Ang mga tawo nagabase sang ila opinyon parte sa aton sa kon ano ang “makita sang mata.” (1 Sam. 16:7) Gani bangod mga ministro kita sang Dios, indi puede nga makapagusto na kita sang aton bayo. Dapat suno ini sa mga prinsipio sa Biblia para malikawan naton ang mga bayo nga pikit, silangon, ukon nagahurma. Gani indi kita magsuksok sang mga bayo nga kitaon ukon hilmunon ang pribado nga bahin sang aton lawas. Dapat indi masaw-ahan sa aton pamayo ang mga nagatulok sa aton.

6 Tahuron pa gid kita bilang mga ministro sang Soberanong Ginuong Jehova kon mahipid kita, matinlo, kag nagakaigo ang aton pamayo kag pamustura. Mahimo pa gani nga luyag nila makilala ang Dios nga ginasimba naton. Dugang pa, tahuron man ang ginarepresentar naton nga organisasyon kon nagakaigo ang aton pamayo. Gani mahimo nga mas madamo ang magapamati sa nagaluwas nga mensahe nga ginasugid naton.

7, 8. Diin kita dapat magsuksok sing nagakaigo nga pamayo?

7 Obligasyon naton sa aton balaan nga Dios, sa aton mga kauturan, kag sa mga tawo nga aton ginapanaksihan nga magsuksok kita sang bayo nga nagakabagay sa mensahe nga ginadala naton kag para mahimaya si Jehova. (Roma 13:8-10) Importante gid ini kon nagapakigbahin kita sa Cristianong mga hilikuton, pareho sang pagtambong sa mga miting ukon pagbantala. Dapat mamayo kita “sa paagi nga nagakaigo sa mga [tawo] nga nagapangangkon nga nagasimba sa Dios.” (1 Tim. 2:10) Siempre, ang bayo nga puede sa isa ka lugar mahimo nga indi puede sa iban nga lugar. Amo kon ngaa nga ginabinagbinag sang katawhan ni Jehova sa bilog nga kalibutan ang kustombre sa ila lugar para wala sing may masandad.

Ginatahod bala ang Dios nga imo ginarepresentar bangod sang imo pamayo? (Tan-awa ang parapo 7, 8)

8 Basaha ang 1 Corinto 10:31. Kon nagatambong  kita sa mga asembleya kag kombension, dapat nagakaigo ang aton pamayo sa baylo nga ilugon naton ang sobra nga mga estilo nga uso sa kalibutan. Dapat indi kita magsuksok sing sobra ka kaswal ukon baraghal sa sulod ukon sa gua sang aton dalayunan, kag kon nagalagawlagaw kita para indi kita mahuya magpakilala nga mga Saksi ni Jehova. Indi pa kita magduhaduha manaksi kon may kahigayunan.

9, 10. Ngaa may epekto ang Filipos 2:4 sa aton ginasuksok?

9 Basaha ang Filipos 2:4. Ngaa dapat talupangdon sang mga Cristiano ang epekto sang ila pamayo sa ila masigkasumilimba? Ang isa ka rason amo nga ginapanikasugan gid sang katawhan sang Dios nga sundon ang laygay sang Biblia: “Gani, patya ninyo ang mga bahin sang inyo lawas nga may dutan-on nga huyog subong sang seksuwal nga imoralidad, kahigkuan, indi mapunggan nga kailigbon sa sekso.” (Col. 3:2, 5) Indi naton gusto nga mabudlayan ang aton masigkasumilimba nga sundon ining laygay. Ang mga kauturan nga nagsikway sang imoral nga pagkabuhi mahimo nga nagapakigbato pa gihapon sining makasasala nga mga huyog. (1 Cor. 6:9, 10) Dapat indi naton sila pagpabudlayan sa ila pagpanikasog.

10 Kon kaupod naton ang aton mga kauturan, dapat ang aton pamayo makaamot sa katinlo sa moral sang kongregasyon. Himuon naton ini bisan indi tion sang miting. Puede kita makapili sang  aton isuksok. Pero tanan kita may responsibilidad nga magsuksok sang mga panapton nga magapahapos sa iban nga magpabilin nga putli kag masunod ang mga talaksan sang Dios sa ila panghunahuna, panghambal, kag paggawi. (1 Ped. 1:15, 16) Ang matuod nga gugma wala “nagagawi sing indi nagakaigo, wala ini nagapangita sang kaugalingon nga kaayuhan.”—1 Cor. 13:4, 5.

NAGAKAIGO NGA PAMAYO SUNO SA KAHIMTANGAN

11, 12. Ano ang nagakaigo naton nga binagbinagon kon nagapamensar kita sang aton isuksok?

11 Kon nagapamensar kon ano ang isuksok, dapat talupangdon sang mga alagad sang Dios nga “may tion para sa tagsa ka hilikuton kag tagsa ka buluhaton.” (Man. 3:1, 17) Mahimo ipahisuno naton ang aton ginasuksok sa klima, panag-on, kag sa nagkalainlain nga kahimtangan. Pero ang mga talaksan ni Jehova wala nagabag-o bisan ano ang klima.—Mal. 3:6.

12 Sa mainit nga klima, mabudlay gid man nga mapabilin naton ang aton pamayo nga mangin talahuron kag nagakaigo. Gani ginaapresyar gid sang aton kauturan nga indi kita magsuksok sang tama ka pikit ukon tama ka halog. (Job 31:1) Dugang pa, dapat maugdang ang aton ginasuksok kon nagapaligo sa dagat ukon sa swimming pool. (Hulu. 11:2, 20) Bisan pa madamo sa kalibutan ang nagasuksok sang indi maugdang nga inugpaligo, dapat pakamaayuhon naton nga ang aton ginasuksok magadayaw sa aton balaan nga Dios, nga si Jehova.

13. Ano ang epekto sang laygay sa 1 Corinto 10:32, 33 sa pagpili naton sang panapton?

13 May isa pa gid ka importante nga prinsipio nga makabulig sa aton nga magpili sang nagakaigo nga pamayo. Parte ini sa konsiensia sang iban—masigkasumilimba man sila ukon indi. (Basaha ang 1 Corinto 10:32, 33.) Responsibilidad gid naton nga likawan ang mga panapton nga makapasandad sa iban. “Himuon sang kada isa sa aton kon ano ang maayo sa iya isigkatawo, agod pabakuron sia,” sulat ni Pablo. Naghatag dayon sia sining rason: “Kay bisan ang Cristo wala magpahamuot sa iya kaugalingon.” (Roma 15:2, 3) Huo, gin-una ni Jesus ang pagbulig sa iban sangsa iya kaugalingon nga kaayuhan—ang pagbulig sa ila amo ang iya paagi sa paghimo sang kabubut-on sang Dios. Gani, dapat indi kita magsuksok sang naluyagan naton nga mga panapton kon mangin kabangdanan lang ini nga indi kita pagbatunon sang aton mga ginapanaksihan.

14. Paano mahanas sang mga ginikanan ang ila kabataan nga mahimaya ang Dios paagi sa ila pamayo?

14 Responsibilidad sang Cristianong mga ginikanan nga tudluan ang ila pamilya nga iaplikar ang mga prinsipio sa Biblia. Nalakip sa sini ang pagpat-od nila nga ginatinguhaan nila sang ila kabataan nga mapasadya ang tagipusuon sang Dios paagi sa ila maugdang nga pamayo kag pamustura. (Hulu. 22:6; 27:11) Paagi sa maayo nga halimbawa sa ila kabataan kag paglaygay sa ila sing mahigugmaon kag paghatag sing praktikal nga mga instruksion, mapatudok pa gid sang mga ginikanan sa ila kabataan ang pagtahod sa balaan nga Dios. Makalilipay gid kon tudluan sang mga ginikanan ang ila kabataan kon diin sila mangita kag kon ano nga mga panapton ang nagakaigo isuksok! Indi dapat pagpilion sang kabataan ang naluyagan lang nila nga panapton kundi dapat nila pilion ang mga panapton nga nagapahamuot kay Jehova nga Dios nga ila ginarepresentar.

MANGIN MAALAMON SA PAGPILI

15. Ano ang makabulig sa aton nga mangin maalamon sa pagpili sang aton isuksok?

15 May praktikal nga panuytoy ang Pulong  sang Dios nga makabulig sa aton nga magpili sing maalamon para mahimaya ang Dios. Bisan pa amo sini, masuksok naton kon ano ang aton nanamian. Mahimo tuhay sa iban ang gusto naton kag ang masarangan naton baklon. Ano man ang kahimtangan, dapat mahipid ini, matinlo, maugdang, nagakabagay sa okasyon, kag wala sing masandad sa sini.

16. Ngaa takus gid ang panikasog sa pagbayo sing nagakaigo?

16 Indi gid man mahapos mangita sang maugdang kag nagakaigo nga panapton. Madamo nga balaligyaan ang nagadispley sang mga uso nga bayo, gani medyo mabudlay mangita sang maugdang nga mga palda, blusa, bayo, kag delargo nga indi pikit. Pero mahimo matalupangdan sang aton mga masigkasumilimba ang panikasog naton sa pagpangita sang matahom kag nagakaigo nga mga bayo kag apresyahon nila ini. Kag malipatan naton ang aton kabudlay sa pagpangita sang mga bayo kay nalipay kita nga napahamut-an naton ang aton mahigugmaon nga Amay sa langit.

17. Ano ang pila ka rason kon bala dapat may bigote ang isa?

17 Nagakaigo bala nga may bigote ang utod? Ginapatuman sa kasuguan nga ginhatag kay Moises nga dapat may bungot ukon burangos ang mga lalaki. Pero indi obligado ang mga Cristiano nga sundon ini nga kasuguan. (Lev. 19:27; 21:5; Gal. 3:24, 25) Sa pila ka kultura, ang nakortehan sing maayo nga bigote mahimo talahuron, kag mahimo indi ini makapugong sa mga tawo sa pagpamati sang mensahe sang Ginharian. Ang pila gani ka gintangdo nga mga utod may mga bigote. Pero ginpakamaayo sang iban nga indi magbigote. (1 Cor. 8:9, 13; 10:32) Sa iban nga kultura ukon lugar, kinabatasan nga wala sing bigote kag ginakabig nga indi ini nagakaigo sa Cristiano nga mga ministro. Ang matuod, mahimo nga makapugong ini sa isa nga madayaw ang Dios kag mangin salawayon pa sia.—Roma 15:1-3; 1 Tim. 3:2, 7.

18, 19. Paano makabulig ang Miqueas 6:8 sa pagtinguha naton nga ang aton pamayo mangin kalahamut-an sa Dios?

18 Nalipay kita nga wala sing detalyado nga listahan si Jehova parte sa aton pamayo kag pamustura. Sa baylo, ginhatagan niya kita sing kahilwayan sa pagpili kon ano ang aton luyag base sa mga prinsipio sa Biblia. Gani mapakita naton bisan sa aton pamayo kag pamustura nga luyag naton ‘maglakat sing maugdang upod sa aton Dios.’—Miq. 6:8.

19 Mapakita naton ang kaugdang kon batunon naton nga si Jehova putli kag balaan kag nga ang iya mga talaksan amo ang pinakamaayo nga panuytoy naton. Nalakip man sa pagkaugdang ang pagrespeto sa ginabatyag kag opinyon sang iban. Gani, ‘nagalakat kita sing maugdang upod sa Dios’ paagi sa pagkabuhi suno sa mataas niya nga mga talaksan kag sa pagrespeto naton sa ginabatyag sang iban.

20. Ano dapat ang epekto sa iban sang aton pamayo kag pamustura?

20 Dapat makita sang mga tawo sa aton pamayo nga kita mga sumilimba gid ni Jehova. Dapat makasiling bisan ang mga kauturan nga ginarepresentar gid naton ang aton matarong nga Dios. May mataas sia nga mga talaksan, kag nalipay kita sa pagsunod sa sini. Makalilipay gid nga bangod sang maayo nga pamayo kag paggawi sang mga kauturan, ang sinsero nga mga tawo nangin interesado sa mensahe sang Biblia kag nalipay sa sini si Jehova kay nahimaya sia. Ang pagpili sing maalamon sa aton ginasuksok magadala pirme sing himaya sa Isa nga nagasuksok mismo sang “kadungganan kag himaya.”—Sal. 104:1, 2.