Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) PEBRERO 2016

Magtuon sa Mainunungon nga mga Alagad ni Jehova

Magtuon sa Mainunungon nga mga Alagad ni Jehova

“Ano ang ginapatuman sa imo ni Jehova? Amo ang pagpakita sing hustisya, ang paghigugma sa pagkamainunungon, kag ang paglakat sing maugdang upod sa imo Dios!”—MIQ. 6:8.

AMBAHANON: 63, 43

1, 2. Paano ginpakita ni David nga mainunungon sia sa Dios? (Tan-awa ang piktyur sa umpisa sini nga artikulo.)

SANG isa ka malinong nga gab-i, nagtiid sanday David kag Abisai pasulod sa kampo sang 3,000 ka soldado nga nagakatulog. Nakita nila sa tunga sang kampo si Hari Saul nga mahamuok ang tulog. Naglakbay sia sa kamingawan sang Juda agod pangitaon kag patyon si David. Ginhutikan ni Abisai si David: “Tuguti ako, palihug, nga ilansang ko [si Saul] sa duta paagi sa isa lang ka bangkaw, kag indi na kinahanglan nga suliton ko pa ini.” Makapakibot ang sabat ni David! “Indi sia paghaliti, kay sin-o nga tawo ang maghalit sa hinaplas ni Jehova nga indi makasala? . . . Indi ko mahimo sa atubangan ni Jehova nga halitan ang hinaplas ni Jehova!”—1 Sam. 26:8-12.

2 Nahangpan ni David kon ano ang buot silingon sang pagkamainunungon sa Dios. Indi gid niya gusto nga halitan si Saul. Ngaa? Bangod si Saul ang hinaplas sang Dios nga hari sang Israel. Ginatahod sang mainunungon nga mga alagad ni Jehova ang iya mga ginatangdo. Ang matuod, ginapatuman ni Jehova nga ang tanan niya  nga katawhan ‘maghigugma sa pagkamainunungon.’—Basaha ang Miqueas 6:8.

3. Paano ginpakita ni Abisai nga mainunungon sia kay David?

3 Gintahod ni Abisai si David. Halimbawa, sang gintinguhaan ni David nga taguon ang iya pagpakighilahi kay Bat-seba, ginsugo niya ang utod ni Abisai nga si Joab nga pat-uron nga mapatay sa inaway si Urias nga bana ni Bat-seba. (2 Sam. 11:2-4, 14, 15; 1 Cron. 2:16) Mahimo nga nahibaluan ini ni Abisai, pero padayon niya nga gintahod si David bilang gintangdo sang Dios nga hari. Wala man gingamit ni Abisai ang iya awtoridad bilang lider sang militar agod mangin hari sang Israel. Sa baylo, gin-amligan niya si David batok sa mga traidor kag sa iban pa nga kaaway.—2 Sam. 10:10; 20:6; 21:15-17.

4. (a) Paano ginpakita ni David nga mainunungon sia sa Dios? (b) Kay sin-o mga halimbawa ang binagbinagon man naton?

4 Ang indi pagtugot ni David nga halitan si Hari Saul nagapakita nga si David isa ka mainunungon nga alagad ni Jehova. Sang pamatan-on pa si David, nagpakig-away sia sa higante nga Filistinhon nga si Goliat, nga nagyaguta kag ‘naghangkat sa kasuldadusan sang buhi nga Dios’! (1 Sam. 17:23, 26, 48-51) Sang nangin hari si David kag nakahimo sia sing mabug-at nga mga sala nga pagpakighilahi kag pagpatay, ginbaton niya ang pagsabdong ni manalagna Natan kag naghinulsol sia. (2 Sam. 12:1-5, 13) Sang tigulang na si David, mainunungon gihapon sia sa Dios. Halimbawa, maalwan sia nga nag-amot para sa pagpatindog sang templo ni Jehova. (1 Cron. 29:1-5) Huo, nakahimo si David sing serioso nga mga sala, pero mainunungon sia sa Dios. (Sal. 51:4, 10; 86:2) Samtang ginabinagbinag naton ang iban pa nga hitabo sa kabuhi ni David kag sang iya mga kadungan, sabton naton ini nga mga pamangkot: Sin-o dapat ang unahon naton nga unungan? Ano nga mga kinaiya ang kinahanglan para mangin mainunungon kita?

SIN-O DAPAT ANG UNAHON NATON NGA UNUNGAN?

5. Ano ang matun-an naton kay Abisai?

5 Sang nagtiid si Abisai sa kampo ni Saul, indi husto ang ginpili niya nga unahon nga unungan. Bangod mainunungon sia kay David, gusto gid patyon ni Abisai si Hari Saul, pero ginpunggan sia ni David, kay nakahibalo sia nga sala ang “maghalit sa hinaplas ni Jehova.” (1 Sam. 26:8-11) Nagatudlo ini sa aton sang isa ka importante nga leksion: Kon kinahanglan naton magpili kon sin-o dapat ang unahon naton nga unungan, kinahanglan naton pamalandungan ang mga prinsipio sa Biblia nga makabulig sa aton.

6. Bisan pa natural lang nga mangin mainunungon kita sa aton pamilya kag mga abyan, ngaa dapat kita maghalong?

6 Ang pagkamainunungon nagahalin sa tagipusuon, ugaling kay madaya ang aton tagipusuon. (Jer. 17:9) Gani, ang isa nga mainunungon sa Dios mahimo man mag-unong sa iya suod nga abyan ukon paryente bisan pa nagahimo ini sang malain. Kon ang isa nga suod sa aton magbiya sa kamatuoran, kinahanglan gid naton dumdumon nga si Jehova pirme ang dapat unahon naton nga unungan.—Basaha ang Mateo 22:37.

7. Paano ginpakita sang isa ka sister nga mainunungon sia sa Dios sa mabudlay nga sitwasyon?

7 Kon ma-disfellowship ang aton suod nga paryente, mahimo matilawan ang aton pagkamainunungon. Halimbawa, ang isa ka sister nga si Anne [1] gintawgan sang iya iloy nga na-disfellowship. Luyag sang iloy nga bisitahon si Anne kay nasakitan sia nga indi niya makaupod ang iya pamilya. Nasubuan gid si Anne sa pangabay sang iya iloy kag nagpromisa sia nga sulatan niya sia sang iya sabat. Antes sia nagsulat, ginrepaso niya anay ang mga prinsipio sa Biblia. (1 Cor. 5:11; 2 Juan 9-11) Sa iya sulat, mainayuhon nga ginpahanumdom ni Anne ang iya iloy nga sia mismo ang nagbugto sang iya kaangtanan sa iya pamilya bangod sang iya sala kag wala sia naghinulsol.  “Magbalik ka kay Jehova kay amo lamang ini ang paagi nga madula ang sakit nga imo nabatyagan,” sulat ni Anne.—Sant. 4:8.

8. Ano nga mga kinaiya ang makabulig sa aton nga mangin mainunungon sa Dios?

8 Ang pagkamainunungon sang mga kadungan ni David nagapadaku sang tatlo ka kinaiya nga makabulig sa aton nga mangin mainunungon sa Dios. Ini amo ang pagpaubos, kaayo, kag kaisog. Binagbinagon naton ang kada isa.

KINAHANGLAN ANG PAGPAUBOS

9. Ngaa gintinguhaan ni Abner nga patyon si David?

9 Sang nagapakig-istorya si David kay Hari Saul kag ginabitbit niya ang ulo ni Goliat, indi magkubos sa duha ka tawo ang mahimo nga didto man. Ang isa amo ang anak ni Saul nga si Jonatan, nga nagpakigkatipan sa iya abyan nga si David. Ang isa pa amo si Abner nga pangulo sang mga soldado. (1 Sam. 17:57–18:3) Sang ulihi, ginbuligan ni Abner si Saul sa iya pagtinguha nga patyon si David. “May mapintas nga mga tawo nga nagatinguha sang akon kabuhi,” sulat ni David. (Sal. 54:3; 1 Sam. 26:1-5) Ngaa tuhay ang pagtamod ni Jonatan kay David sa pagtamod ni Abner? Pareho kay Jonatan, nahibaluan man ni Abner nga ginpili sang Dios si David nga mangin hari sang Israel. Sang mapatay si Saul, nagpaubos kuntani si Abner kag nangin mainunungon sa Dios paagi sa pagsuporta kay David, imbes nga kay Is-boset nga anak ni Saul. Sang ulihi, naghulid si Abner sa babayi ni Hari Saul, kay mahimo ginahandum man niya nga mangin hari.—2 Sam. 2:8-10; 3:6-11.

10. Ngaa indi mainunungon sa Dios si Absalom?

10 Si Absalom nga anak ni David indi mainunungon sa Dios bangod indi sia mapainubuson. Nagtigayon pa gani si Absalom sing “kangga kag mga kabayo kag 50 ka lalaki nga nagadalagan sa unahan niya”! (2 Sam. 15:1) Ginkuha man niya ang suporta sang katawhan. Pareho kay Abner, gintinguhaan man niya nga patyon si David, bisan pa nahibaluan niya nga gintangdo ni Jehova si David nga mangin hari sang Israel.—2 Sam. 15:13, 14; 17:1-4.

11. Ano ang matun-an naton sa natabo kanday Abner, Absalom, kag Baruc?

11 Maathag nga ginapakita sang mga natabo kanday Abner kag Absalom nga ang sobra nga ambisyon mahimo bangdan nga ang isa indi na mangin mainunungon sa Dios. Siempre, indi gusto sang matutom nga mga alagad ni Jehova nga mangin maiyaiyahon sila kag malaut. Pero, ang handum nga magmanggaranon ukon mangin bantog sa sini nga kalibutan makahalit man sa espirituwalidad sang isa ka Cristiano. Sa wala mahibaluan nga rason,  ang sekretaryo ni manalagna Jeremias nga si Baruc temporaryo nga nalipat kon ano ang pinakaimportante. Amo ini ang laygay ni Jehova kay Baruc: “Gub-on ko ang akon gintukod, kag gabuton ko ang akon gintanom, ining bug-os nga duta. Apang nagapangita ka sing dalagku nga mga butang para sa imo kaugalingon. Indi ka na magpangita sina.” (Jer. 45:4, 5) Ginbaton ni Baruc ang pagtadlong sa iya. Maalamon gid nga tandaan naton ini nga laygay sang Dios samtang ginahulat naton ang katapusan sining malaut nga kalibutan!

12. Maghatag sing halimbawa kon ngaa indi puede nga mangin mainunungon kita sa Dios kon unahon naton ang aton personal nga handum.

12 Si Daniel, nga isa ka utod sa Mexico, kinahanglan magpili kon bala mangin mainunungon sia sa Dios ukon unahon niya ang iya personal nga handum. Luyag niya pangasaw-on ang indi tumuluo. Nagsiling si Daniel: “Ginasulatan ko gihapon sia bisan payunir na ako. Pero sang ulihi, nagpaubos ako kag ginsugid ko sa isa ka eksperiensiado nga gulang nga nabudlayan ako magdesisyon. Ginbuligan niya ako nga mahangpan nga agod ipakita nga mainunungon ako sa Dios, dapat ko untatan ang pagsulat sa babayi. Pagkatapos sang madamo nga pangamuyo nga nagahibi, wala ko na sia ginsulatan. Gani, nangin mas malipayon ako sa pag-alagad.” Sang ulihi, nakapangasawa si Daniel sang isa ka matutom nga utod, kag subong manugtatap na sia sang sirkito.

BULIG PARA MANGIN MAINAYUHON

Kon nahibal-an mo nga ang isa ka utod nakahimo sing serioso nga sala, mangin mainunungon ka bala sa iya paagi sa pagpalig-on sa iya nga magpabulig sa mga gulang? (Tan-awa ang parapo 14)

13. Sang nakasala si David, paano si Natan nangin mainunungon sa Dios kag kay David?

13 Ang pagkamainunungon kay Jehova makabulig agod mapakita ang nagakaigo nga pagkamainunungon sa iban. Mainunungon si manalagna Natan kay Jehova kag kay David. Nahibal-an ni Natan nga nagpakighilahi si David kag ginpat-od man niya nga mapatay sa inaway ang bana sang babayi. Sang ginpadala ni Jehova si Natan para sabdungon si David, maisog niya nga ginsabdong si David, bisan pa mainunungon sia kay David. Maalamon kag mainayuhon nga ginhimo ini ni Natan. Agod makita ni David kon daw ano kaserioso ang iya mga sala, naggamit si Natan sang ilustrasyon parte sa manggaranon nga tawo nga nagkuha sang ahaw isa lang ka kordero sang imol nga tawo. Sang naakig si David sa ginhimo sang manggaranon, nagsiling si Natan: “Ikaw ina nga tawo!” Nahangpan ini dayon ni David.—2 Sam. 12:1-7, 13.

14. Paano ka mangin mainunungon kay Jehova kag sa imo abyan ukon paryente?

14 Ang kaayo makabulig sa imo kon nagapili kon sin-o dapat ang unahon nga unungan.  Halimbawa, nahibal-an mo kag napat-od nga ang isa ka utod nakahimo sing serioso nga sala. Mahimo luyag mo mangin mainunungon sa iya, ilabi na kon suod mo sia nga abyan ukon paryente. Pero kon taguon mo ang iya sala, indi ka mainunungon sa Dios. Ang pagkamainunungon kay Jehova amo dapat ang imo unahon. Pareho kay Natan, mangin mainayuhon pero mangin malig-on man. Palig-una ang imo abyan ukon paryente nga magpabulig sa mga gulang. Kon indi niya ini paghimuon sa sulod sang makatarunganon nga kalawigon sang tion, ang pagkamainunungon sa Dios magapahulag sa imo nga isugid ini sa mga gulang. Kon himuon mo ini, mangin mainunungon ka kay Jehova kag mangin mainayuhon ka sa imo abyan ukon paryente, kay malulo sia nga tadlungon sang Cristiano nga mga gulang.—Basaha ang Levitico 5:1; Galacia 6:1.

KINAHANGLAN ANG KAISOG

15, 16. Ngaa kinahanglan ni Husai ang kaisog para mangin mainunungon sa Dios?

15 Kinahanglan ni Husai ang kaisog para mangin mainunungon sa Dios. Mainunungon sia nga abyan ni Hari David. Pero, sang madamo nga tawo ang nagdampig sa anak ni David nga si Absalom kag luyag sini mangin hari sa Jerusalem, natilawan ang pagkamainunungon ni Husai. (2 Sam. 15:13; 16:15) Si David nagpalagyo, pero ano ang himuon ni Husai? Madampig bala sia kay Absalom, ukon masunod sia sa tigulang nga hari nga nagpalagyo? Agod ipakita nga mainunungon sia sa hari nga gintangdo sang Dios, ginsugata ni Husai si David sa Bukid sang mga Olibo.—2 Sam. 15:30, 32.

16 Ginpangabay ni David si Husai nga magbalik sa Jerusalem, agod magpakunokuno nga dampig sia kay Absalom, kag agod paslawon ang laygay ni Ahitofel. Ginrisgo ni Husai ang iya kabuhi kag nangin mainunungon sia kay Jehova kag ginhimo niya ang ginpangabay ni David. Subong sang ginpangamuyo ni David, ang laygay sang maisog nga si Husai nagpaslaw sang laygay ni Ahitofel.—2 Sam. 15:31; 17:14.

17. Ngaa kinahanglan naton ang kaisog para mangin mainunungon?

17 Kinahanglan naton ang kaisog para mangin mainunungon kay Jehova. Madamo sa aton ang maisog nga nag-atubang sang pagpamatok sang mga miembro sang pamilya, mga katrabaho, ukon mga opisyal sang gobierno agod ipakita ang aton pagkamainunungon sa Dios. Halimbawa, si Taro, nga taga-Japan, mainunungon kag matinumanon sa iya mga ginikanan halin sang bata pa sia. Ginhimo niya ini indi lang bangod sang obligasyon. Luyag gid niya nga malipay ang iya mga ginikanan. Gani sang ginpamatukan nila ang iya pagpakig-upod sa mga Saksi ni Jehova, nabudlayan gid sia sa pagsugid sa ila sang iya desisyon nga magtambong sa Cristiano nga mga miting. Nagsiling si Taro: “Naakig gid sila amo nga tinuig ako nga wala gintugutan nga magbisita sa ila. Nagpangamuyo ako nga hatagan sing kaisog agod matuman ko ang akon desisyon. Subong, nagbag-o na ang ila panimuot, kag pirme na ako makabisita sa ila.”—Basaha ang Hulubaton 29:25.

18. Ano ang natun-an mo sa sini nga artikulo?

18 Pareho kanday David, Jonatan, Natan, kag Husai, kabay nga maeksperiensiahan man naton ang kalipay nga resulta sang pagkamainunungon kay Jehova. Sa pihak nga bahin, kabay nga mangin paandam sa aton ang mga indi mainunungon nga sanday Abner kag Absalom. Luyag gid naton mangin mainunungon kay Jehova, pareho kay David. Matuod, makasala kita bangod indi kita himpit. Pero, mapakita naton kay Jehova nga ang pagkamainunungon sa iya amo ang pinakaimportante sa aton.

^ [1] (parapo 7) Gin-islan ang pila ka ngalan.