Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Mayo 2016

Paano Ka Nagahimo sing Desisyon?

Paano Ka Nagahimo sing Desisyon?

“Padayon nga hantupa ninyo kon ano ang kabubut-on ni Jehova.”—EFE. 5:17.

AMBAHANON: 69, 57

1. Ano ang pila ka halimbawa sang mga sugo sa Biblia, kag ano ang mga benepisyo kon tumanon naton ini?

GINHATAGAN kita ni Jehova sing espesipiko nga mga sugo nga nasulat sa iya Pulong. Halimbawa, gindumili niya ang seksuwal nga imoralidad, pagsimba sa mga diosdios, pagpangawat, kag pagpahubog. (1 Cor. 6:9, 10) Naghatag man si Jesucristo, ang Anak sang Dios, sa iya mga sumulunod sining serioso pero makakulunyag nga sugo: “Kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila sa ngalan sang Amay kag sang Anak kag sang balaan nga espiritu. Tudlui ninyo sila nga tumanon ang tanan nga ginsugo ko sa inyo. Kag dumduma ninyo nga kaupod ninyo ako sa tanan nga tion tubtob sa hingapusan sang sistema sang mga butang.” (Mat. 28:19, 20) Proteksion gid ang mga sugo sang Dios! Kon tumanon naton ini, magadugang ang aton kompiansa, magaayo ang aton panglawas, kag mangin mas malipayon ang aton pamilya. Labaw sa tanan, kon tumanon naton ang mga sugo ni Jehova, lakip ang sugo nga magbantala, kahamut-an niya kita kag pakamaayuhon.

2, 3. (a) Ngaa wala sing espesipiko nga sugo ang Biblia sa kada sitwasyon sa aton kabuhi? (b) Ano nga mga pamangkot ang binagbinagon sa sini nga artikulo? (Tan-awa ang piktyur sa umpisa sini nga artikulo.)

2 Pero, may pila ka sitwasyon nga wala sing espesipiko nga sugo ang Biblia. Halimbawa, wala sing detalyado nga sugo ang Kasulatan parte sa pamayo nga nagakaigo sa mga Cristiano. Paano sini ginapakita ang kaalam ni Jehova? Indi palareho ang mga estilo kag  kustombre sa nagkalainlain nga lugar sa kalibutan kag nagabag-o man ini pagligad sang tion. Kon ginsulat sa Biblia ang listahan sang nagakaigo nga pamayo kag pamustura, indi na ini nagakaigo subong. Amo man sini ang rason kon ngaa wala naghatag ang Pulong sang Dios sang madamo nga sugo sa mga Cristiano parte sa pagpili sing obra, pagpabulong, kag kalingawan. Ang kada isa kag ang mga ulo sang pamilya may kahilwayan sa paghimo sing desisyon parte sa sini.

3 Buot bala silingon nga indi importante kay Jehova kon paano kita nagahimo sing mga desisyon, nga ang pila sa sini mahimo may daku nga epekto sa aton kabuhi? Kahamut-an bala sang aton Amay sa langit ang bisan ano nga desisyon basta wala lang kita sing ginasupak nga sugo sa Biblia? Kon wala sing espesipiko nga sugo ang Biblia, paano naton mahibaluan nga mahamuot si Jehova sa aton mga desisyon?

IMPORTANTE BALA KON PAANO KITA NAGAHIMO SING DESISYON?

4, 5. Paano makaapektar sa aton kag sa iban ang aton mga desisyon?

4 Nagapati ang iban nga indi importante ang aton ginahimo nga mga desisyon. Pero, agod makahimo sing maalamon nga mga desisyon nga makapahamuot kay Jehova, dapat naton binagbinagon ang mga kasuguan kag mga prinsipio sa iya nasulat nga Pulong kag tumanon ini. Halimbawa, agod kahamut-an sang Dios, dapat naton tumanon ang iya kasuguan parte sa dugo. (Gen. 9:4; Binu. 15:28, 29) Ang pangamuyo makabulig sa aton nga makahimo sing mga desisyon nga nahisuno sa mga prinsipio kag mga kasuguan sa Kasulatan.

5 Ang importante nga mga desisyon makaapektar sa aton espirituwalidad. Ang kada desisyon nga ginahimo naton mahimo may maayo ukon malain nga epekto sa aton kaangtanan kay Jehova. Ang maayo nga desisyon magapabakod sang aton kaangtanan sa Dios, pero ang indi maayo nga desisyon makaguba sini. Dugang pa, ang indi maayo nga desisyon mahimo makahalit sa espirituwalidad sang iban, ayhan may masaklaw ukon masandad, ukon mabahinbahin ang kongregasyon. Huo, importante gid kon paano kita nagahimo sing desisyon.—Basaha ang Roma 14:19; Galacia 6:7.

6. Sa ano naton dapat ibase ang aton mga desisyon?

6 Ano ang himuon naton sa mga sitwasyon nga wala sing espesipiko nga sugo ang Biblia? Responsibilidad sang kada isa sa aton nga usisaon sing maayo ang kahimtangan kag maghimo sing desisyon base sa kon ano ang kahamut-an kag pakamaayuhon ni Jehova, indi sa kon ano lang ang aton luyag.—Basaha ang Salmo 37:5.

HANTUPA KON ANO ANG KABUBUT-ON NI JEHOVA

7. Kon wala sing espesipiko nga sugo ang Biblia, paano naton mahibaluan ang luyag ni Jehova nga himuon naton?

7 Mahimo magpalibog ka, ‘Sa isa ka sitwasyon nga wala sing espesipiko nga sugo ang Biblia, paano naton mahibaluan ang luyag ni Jehova nga himuon naton?’ Ang Efeso 5:17 nagasiling: “Padayon nga hantupa ninyo kon ano ang kabubut-on ni Jehova.” Kon wala sing espesipiko nga sugo ang Biblia, paano naton mahantop kon ano ang kabubut-on sang Dios? Paagi sa pagpangamuyo sa iya kag pagpagiya sa iya balaan nga espiritu.

8. Paano ginhantop ni Jesus ang luyag ni Jehova nga himuon niya? Maghatag sing halimbawa.

8 Binagbinaga kon paano ginhantop ni Jesus ang luyag sang iya Amay nga himuon niya. Sa duha ka hitabo, nangamuyo anay si Jesus kag milagruso nga ginpakaon niya ang madamo nga tawo. (Mat. 14:17-20; 15:34-37) Pero, sang gingutom sia kag ginsulay sang Yawa sa kamingawan nga himuon nga tinapay ang mga bato, wala niya ginhimo ini. (Basaha ang Mateo 4:2-4.) Bangod pamilyar si Jesus sa panghunahuna sang iya Amay,  nahibaluan niya nga indi niya dapat paghimuon nga tinapay ang mga bato. Huo, nahantop ni Jesus nga indi nahisuno sa kabubut-on sang Dios kon gamiton niya ang iya gahom para sa iya personal nga interes. Ginpakita niya nga nagasalig sia nga tuytuyan sia kag amanan ni Jehova.

9, 10. Ano ang makabulig agod makahimo kita sing maalamon nga mga desisyon? Iilustrar.

9 Agod makahimo kita sing maalamon nga mga desisyon, pareho kay Jesus, dapat kita magsalig sa panuytoy ni Jehova. Dapat naton sundon ini nga laygay: “Magsalig ka kay Jehova sa bug-os mo nga tagipusuon, kag indi ka magsalig sa imo kaugalingon nga paghangop. Hunahunaa sia sa tanan mo nga dalanon, kag tadlungon niya ang imo mga banas. Indi ka maghunahuna nga maalam ka na gid. Magkahadlok ka kay Jehova kag indi ka maghimo sing malain.” (Hulu. 3:5-7) Ang paghibalo sang panghunahuna ni Jehova paagi sa pagtuon sa Biblia makabulig sa aton nga mahantop ang luyag niya nga himuon naton sa isa ka sitwasyon. Kon mangin pamilyar kita sa panghunahuna ni Jehova, mangin sensitibo pa gid ang aton tagipusuon sa iya panuytoy.—Ezeq. 11:19, footnote.

10 Sa pag-ilustrar: Halimbawa, may isa ka asawa nga naga-shopping. May nakita sia nga sapatos nga nanamian niya, pero mahal ini. Gani ginpamangkot niya ang iya kaugalingon, ‘Ano ang batyagon sang akon bana kon maggasto ako sing amo sini kadaku?’ Mahimo nga nahibaluan niya ang sabat, bisan pa wala ang iya bana. Paano? Bangod sa ila pag-updanay, nangin pamilyar sia sa panghunahuna sang iya bana parte sa ila limitado nga badyet. Paagi sini, nahantop niya ang batyagon sang iya bana kon baklon niya ang sapatos. Sing kaanggid, kon mangin pamilyar pa gid kita sa panghunahuna kag dalanon ni Jehova, mapauswag naton ang aton ikasarang nga mahantop ang luyag sang aton Amay sa langit nga himuon naton sa nagkalainlain nga sitwasyon.

PAANO MO MAHIBALUAN ANG PANGHUNAHUNA NI JEHOVA?

11. Ano ang mahimo naton ipamangkot sa aton kaugalingon kon nagabasa kita ukon nagatuon sa Biblia? (Tan-awa ang kahon nga “ Kon Nagatuon sa Pulong sang Dios, Pamangkuta ang Imo Kaugalingon.”)

11 Para mangin pamilyar kita sa panghunahuna ni Jehova, dapat nga prioridad naton ang personal nga pagtuon. Kon nagabasa kita ukon nagatuon sa Pulong sang Dios, pamangkuton naton ang aton kaugalingon, ‘Ano ang ginasugid sini parte kay Jehova, sa iya matarong nga mga dalanon, kag sa iya panghunahuna?’ Dapat may panimuot kita pareho sang kay salmista David, nga nag-amba: “Ipakita sa akon ang imo mga dalanon, O Jehova; tudlui ako sang imo mga banas. Tuytuyi ako sa imo husto nga dalanon kag tudlui ako, kay ikaw ang Dios sang akon kaluwasan. Sa imo nagasalig ako sa bug-os nga adlaw.” (Sal. 25:4, 5) Samtang ginapamalandungan mo ang mga teksto sa Biblia, mahimo mo binagbinagon ini nga mga pamangkot: ‘Paano ko maaplikar ini nga impormasyon sa akon pamilya? Diin ko ini maaplikar? Sa puluy-an? Sa ulubrahan? Sa eskwelahan? Sa ministeryo?’ Kon mahibaluan na naton kon diin maaplikar ang impormasyon, mas mahapos na hantupon kon paano ini iaplikar.

12. Paano makabulig ang aton mga publikasyon kag mga miting agod mahibaluan ang panghunahuna ni Jehova parte sa madamo nga sitwasyon?

12 Ang isa pa ka paagi para mangin pamilyar pa gid kita sa panghunahuna ni Jehova amo ang pagtalupangod sing maayo sa base sa Biblia nga mga panuytoy sang iya organisasyon. Halimbawa, ginhimo ang Watch Tower Publications Index kag ang Giya sa Pagtuon Para sa mga Saksi ni Jehova agod buligan kita nga matun-an ang panghunahuna ni Jehova parte sa madamo nga sitwasyon nga dapat kita ang magdesisyon. Makabenepisyo man kita sa pagpamati sing maayo kag pagpakigbahin sa Cristianong mga miting. Kon  pamalandungan naton ang mga ginatudlo sa mga miting, mabuligan kita sini nga mas mahantop ang panghunahuna ni Jehova kag makahunahuna kita pareho sa iya. Kon panginpuslan naton ang tanan nga espirituwal nga pagkaon nga ginaaman ni Jehova, mangin pamilyar pa gid kita sa iya mga dalanon. Subong resulta, makahimo kita sing mga desisyon nga pakamaayuhon sang aton mahigugmaon nga Dios.

MAGPAGIYA SA PANGHUNAHUNA NI JEHOVA KON NAGADESISYON

13. Ngaa makahimo kita sing maalamon nga desisyon kon binagbinagon naton ang panghunahuna ni Jehova? Maghatag sing halimbawa.

13 Binagbinaga ang isa ka halimbawa kon paano ang paghibalo sa panghunahuna ni Jehova makabulig sa aton nga makahimo sing maalamon nga mga desisyon. Bilang mga manugbantala sang Ginharian, mahimo nga ginahandum naton nga mangin regular payunir. Para mahimo ini, ginpasimple naton ang aton kabuhi. Pero, mahimo nabalaka kita kon bala mangin malipayon gid kita bisan pa nabuhinan ang aton kuarta kag pagkabutang. Matuod, wala man sing sugo ang Biblia nga dapat kita magpayunir; padayon kita nga makaalagad kay Jehova bilang matutom nga mga manugbantala. Pero, ginpasalig kita ni Jesus nga ang mga nagasakripisyo para sa Ginharian magabaton sing bugana nga pagpakamaayo. (Basaha ang Lucas 18:29, 30.) Dugang pa, ginapakita sang Kasulatan nga nahamuot si Jehova sa aton “kinabubut-on nga mga pagdayaw” sa iya, kag kon ginahimo naton sing malipayon ang aton masarangan para sa matuod nga pagsimba. (Sal. 119:108; 2 Cor. 9:7) Kon binagbinagon naton ini nga mga prinsipio sa Kasulatan, kag mangamuyo sing panuytoy, indi bala nga mahantop naton ang panghunahuna ni Jehova? Ang pagpamalandong sa sini makabulig sa aton nga makahimo sing desisyon nga maaplikar sa aton sitwasyon kag pakamaayuhon sang aton Amay sa langit.

14. Paano mo mahibaluan kon ang isa ka estilo sang bayo kalahamut-an kay Jehova?

14 Binagbinaga ang isa pa ka halimbawa: Ibutang ta nga nanamian ka sa estilo sang bayo nga mahimo makapasandad sa iban sa kongregasyon. Pero, wala sing espesipiko nga sugo ang Biblia nga nagadumili sa sini. Ano ang panghunahuna ni Jehova parte sa sini? Gin-inspirar si apostol Pablo sa paghatag sini nga laygay: “Ang mga babayi dapat man magpamayo sing nagakaigo, nga may kaugdang kag maligdong nga hunahuna, indi paagi sa mga estilo sang pagsalapid sing buhok kag pagsuksok sang mga bulawan ukon perlas ukon malahalon gid nga bayo, kundi sa paagi nga nagakaigo sa mga babayi nga nagapangangkon  nga nagasimba sa Dios, paagi sa maayong mga buhat.” (1 Tim. 2:9, 10) Naaplikar man ini nga laygay sa mga lalaki. Kon matutom kita nga alagad ni Jehova, importante sa aton indi lang ang aton personal nga luyag, kundi pati man ang epekto sang aton pamayo kag pamustura sa iban. Ang kaugdang kag gugma nagabulig sa aton nga pabaloran ang balatyagon sang mga kauturan, gani malikawan naton nga masaklaw ukon masandad sila. (1 Cor. 10:23, 24; Fil. 3:17) Kon binagbinagon naton ang ginasiling sang Kasulatan parte sa pamayo, mabuligan kita nga mahantop ang panghunahuna ni Jehova parte sa sini kag makahimo kita sing desisyon nga makapahamuot sa iya.

15, 16. (a) Ano ang ginabatyag ni Jehova kon nagapantasya kita parte sa imoral nga seksuwal nga mga buhat? (b) Kon nagapili sing kalingawan, paano naton mahibaluan ang kalahamut-an kay Jehova? (c) Kon nagaatubang sang importante nga mga desisyon, ano ang dapat himuon?

15 Ginapakita sang Biblia nga nasubuan si Jehova kay ‘ang huyog sang hunahuna kag tagipusuon sang tawo malain sa tanan nga tion,’ kag nasubuan man sia kon ang mga tawo nagahimo ukon nagahunahuna sing malain. (Basaha ang Genesis 6:5, 6.) Mahantop naton sa sini nga sayop ang pagpantasya parte sa imoral nga seksuwal nga mga buhat kay mahimo ini magdul-ong sa serioso nga sala nga ginadumilian sang Kasulatan kag wala ini nahisuno sa panghunahuna ni Jehova. Nagsulat si disipulo Santiago: “Ang kaalam nga halin sa langit una sa tanan putli, dayon mahidaiton, makatarunganon, handa sa pagtuman, puno sang kaluoy kag maayong mga bunga, wala sing ginapasulabi, kag indi salimpapaw.” (Sant. 3:17) Gani dapat naton sikwayon ang mga kalingawan nga nagapukaw sang sala nga panghunahuna kag huyog. Ang mahinantupon nga mga Cristiano indi na kinahanglan mamangkot kon bala nagakaigo ang isa ka libro, pelikula, ukon hampang nga nagapasanyog sang mga buhat nga ginadumtan ni Jehova. Maathag sa iya Pulong ang iya panghunahuna parte sa sini.

16 Madamo nga sitwasyon ang mahimo madesisyunan sa lainlain nga paagi, kag mahamuot gihapon si Jehova. Pero, kon nagaatubang sang importante nga mga desisyon, mas maayo nga mangayo sing laygay sa mga gulang ukon sa eksperiensiado nga mga Cristiano. (Tito 2:3-5; Sant. 5:13-15) Siempre, indi nagakaigo nga iban ang padesisyunon naton. Dapat hanason kag gamiton sang mga Cristiano ang ila mga ikasarang sa paghangop. (Heb. 5:14) Tanan kita dapat manghikot nahisuno sa ginsiling ni Pablo: “Ang kada isa magadala sang iya kaugalingon nga lulan sang responsibilidad.”—Gal. 6:5, footnote.

17. Ano ang mga benepisyo kon ang aton mga desisyon kalahamut-an kay Jehova?

17 Kon ibase naton ang aton mga desisyon sa panghunahuna ni Jehova, mas nagasuod kita sa iya. (Sant. 4:8) Matigayon naton ang iya kahamuot kag pagpakamaayo. Dayon magabakod ang aton pagtuo sa aton Amay sa langit. Gani, magpagiya kita sa mga kasuguan kag mga prinsipio sa Biblia, kay ginapakita sini ang panghunahuna sang Dios. Siempre, pirme kita may matun-an nga bag-o parte kay Jehova. (Job 26:14) Pero, kon manikasog kita, matigayon naton bisan subong pa lang ang kaalam, ihibalo, kag paghantop nga kinahanglan para makahimo sing maalamon nga mga desisyon. (Hulu. 2:1-5) Ang mga ideya kag mga plano sang indi himpit nga mga tawo nagabulubag-o, pero ginpahanumdom kita sang salmista: “Ang mga pamat-od ni Jehova magapadayon sa wala sing katubtuban; ang iya mga panghunahuna magapabilin sa tanan nga kaliwatan.” (Sal. 33:11) Gani, maathag nga makahimo kita sing pinakamaayo nga desisyon kon ipahisuno naton ang aton panghunahuna kag paggawi sa panghunahuna sang aton labing maalam nga Dios, si Jehova.