Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MAYO 2016

Dapat magpagiya ang mga Cristiano sa ila nahanas sa Biblia nga konsiensia kon nagapakig-angot sa mga opisyal sang gobierno

Mga Pamangkot Gikan sa mga Bumalasa

Mga Pamangkot Gikan sa mga Bumalasa

Paano mahibaluan sang isa ka Cristiano kon bala nagakaigo nga maghatag sing regalo ukon tip sa mga empleyado sang gobierno?

Madamo sing dapat binagbinagon. Ang mga Cristiano kinahanglan mangin bunayag. Responsibilidad nila nga tumanon ang kasuguan sang pungsod basta wala ini nagasumpakil sa kasuguan ni Jehova. (Mat. 22:21; Roma 13:1, 2; Heb. 13:18) Ginatahod man nila ang lokal nga mga kustombre kag reaksion sang mga tawo, kag ‘ginahigugma nila ang ila isigkatawo subong sang ila kaugalingon.’ (Mat. 22:39; Roma 12:17, 18; 1 Tes. 4:11, 12) Ini nga mga prinsipio makabulig sa mga Cristiano sa bilog nga kalibutan sa pagdesisyon kon bala nagakaigo nga maghatag sing regalo ukon tip sa ila lugar.

Sa madamo nga lugar, ang isa ka tawo indi kinahanglan maghatag sing bisan ano sa mga empleyado sang gobierno para sa ila serbisyo. Ginasuelduhan sila sang gobierno, kag wala sila nagapangayo ukon nagapaabot nga hatagan sing bisan ano nga dugang sa ila sueldo. Sa madamo nga pungsod, may kasuguan nga nagadumili sa mga empleyado sang gobierno nga mangayo ukon magbaton sing bisan ano para sa ila obra, bisan ginahimo nila sing husto ang ila responsibilidad. Ang isa ka regalo ginakabig nga hamham, bisan pa nga wala ini sing epekto sa ila serbisyo. Kon amo sini ang kahimtangan, indi nagakaigo para sa isa ka Cristiano nga maghatag sing regalo ukon tip sa mga empleyado sang gobierno.

Sa iban nga mga lugar nga wala sini nga kasuguan, ukon may ara sini pero wala ginapatuman sing estrikto, ginatamod sang mga empleyado sang gobierno nga puede sila makabaton sing regalo ukon tip. Sa pila ka pungsod, ginagamit sang mga opisyal sang gobierno ang ila posisyon para makakuarta ukon makapangayo sing pabor sa mga tawo nga ila kuntani serbisyuhan, kag indi sila magserbisyo kon indi sila makabaton sing regalo. Gani, nagapangayo sing tip ang mga opisyal nga nagahatag sing lisensia sa kasal, nagabaton sing buhis, nagahatag sing permit, kag iban pa. Kon wala sing tip, ginahungod sang mga opisyal nga pabudlayan ang mga pumuluyo nga matigayon  ang legal nga serbisyo, ukon wala gid nila sila ginaserbisyuhan. Sa isa gani ka pungsod, ang mga bombero indi mag-umpisa sa pagpatay sang kalayo kon indi anay sila makabaton sing daku nga tip.

May mga tion nga nagakaigo maghatag sing regalo bilang pagpasalamat sa legal nga serbisyo

Kon amo sini ang kahimtangan, nagapati ang iban nga kinahanglan maghatag sing tip. Para sa isa ka Cristiano, mahimo niya kabigon ang tip bilang dugang nga bayad nga kinahanglan para matigayon ang legal nga serbisyo. Pero kon lapnag ang korapsion, kinahanglan mangin maathag sa isa ka Cristiano kon ano ang nagakaigo kag indi nagakaigo suno sa pagtamod sang Dios. Indi gid nagakaigo nga maghatag sing tip para paboran sa ilegal nga paagi. Ang pila ka tawo nagahatag sing tip sa opisyal para sa serbisyo nga indi sila kalipikado, ukon ginatanyagan nila sing “tip” ang pulis ukon inspektor para indi sila mamultahan. Siempre, indi nagakaigo ang paghatag sing “regalo” bilang hamham, kag indi man nagakaigo ang pagbaton sini. Ginapatiko sini nga mga buhat ang hustisya.—Ex. 23:8; Deut. 16:19; Hulu. 17:23.

Bangod sang ila nahanas sa Biblia nga konsiensia, ang kalabanan sang hamtong nga mga Cristiano wala nagahatag sa mga opisyal nga nagapangayo sing tip. Para sa ila, daw pareho lang nga ginakunsinti nila ang korapsion kon maghatag sila. Gani, wala sila nagahatag sing bisan ano nga regalo.

Nahibaluan sang hamtong nga mga Cristiano nga ang paghatag sing regalo para paboran sa ilegal nga paagi pareho lang sa paghatag sing hamham. Pero ang iban mahimo maghatag sing regalo para sa legal nga serbisyo ukon para malikawan ang atrasado nga serbisyo, depende sa lokal nga mga kahimtangan kag reaksion sang mga tawo. Sa iban naman nga sitwasyon, pagkatapos sang libre nga pagpabulong sa pangpubliko nga ospital, ang pila ka Cristiano nagahatag sing regalo sa mga doktor kag nars bilang pagpasalamat. Ginahimo nila ini pagkatapos na nga mabulong sila, indi antes, para indi masal-an nga hamham ang ila regalo ukon nagapaabot sila sing pinasahi nga atension.

Indi naton mabinagbinag sa sini nga artikulo ang tanan nga posible nga kahimtangan sa kada pungsod. Gani, bisan ano man ang lokal nga mga kahimtangan, ang desisyon sang mga Cristiano dapat magresulta sa maayo nga konsiensia. (Roma 14:1-6) Dapat nila likawan ang ilegal nga mga buhat. (Roma 13:1-7) Dapat nila likawan ang paghimo sang bisan ano nga magapakahuya sa ngalan ni Jehova ukon makapasandad sa iban. (Mat. 6:9; 1 Cor. 10:32) Kag dapat makita sa ila desisyon nga ginahigugma nila ang ila isigkatawo.—Mar. 12:31.

 Paano mapakita sang mga kauturan ang ila kalipay kon ginpahibalo nga may nagpanumbalik?

Sa Lucas kapitulo 15, mabasa naton ang makatalandog nga ilustrasyon ni Jesus parte sa isa ka tawo nga may 100 ka karnero. Sang madula ang isa ka karnero, ginbiyaan niya ang 99 sa kamingawan kag ginpangita niya ang nadula ‘tubtob nakita niya ini.’ Nagsiling si Jesus: “Kon makita niya ini, pas-anon niya ini kag magkalipay sia. Kag sa iya pagpauli, tawgon niya ang iya mga abyan kag mga kasilingan, kag silingan sila, ‘Magkalipay kamo upod sa akon, kay nakita ko ang akon karnero nga nadula.’” Amo ini ang konklusion ni Jesus: “Sing kaanggid, nagasiling ako sa inyo, may daku pa nga kalipay sa langit tungod sa isa ka makasasala nga nagahinulsol sangsa 99 ka matarong nga indi kinahanglan maghinulsol.”—Luc. 15:4-7.

Ginapakita sang konteksto nga ginsiling ini ni Jesus agod tadlungon ang panghunahuna sang mga escriba kag mga Fariseo nga nagpakalain sa iya bangod nagpakig-upod sia sa mga manugsukot sing buhis kag mga makasasala. (Luc. 15:1-3) Ginpadaku ni Jesus nga may kalipay sa langit kon naghinulsol ang isa ka makasasala. Mahimo mamangkot kita, ‘Kon may kalipay sa langit, indi bala nga dapat may kalipay man sa duta kon naghinulsol ang isa ka makasasala, nagbag-o, kag nagtadlong sang iya banas?’—Heb. 12:13.

Kon may nagpanumbalik sa kongregasyon, rason gid ini nga magkalipay kita. Matuod, dapat padayon sia nga mangin matutom sa Dios. Pero antes sia nakapanumbalik, ginpamatud-an niya anay nga mahinulsulon sia, kag nalipay kita nga naghinulsol sia. Gani, kon ginpahibalo sang mga gulang nga may nagpanumbalik, mahimo magpamalakpak sing nagakaigo ang mga kauturan, kon gusto nila.

Ano mahimo ang rason sa ‘paglabugay’ sang tubig sa punong sang Bethzatha sa Jerusalem?

Sang tion ni Jesus, ang pila ka pumuluyo sang Jerusalem nagapati nga makapaayo ang tubig sa punong sang Bethzatha kon “malabugay” ini. (Juan 5:1-7) Gani, madamo nga may balatian ang nagakadto diri.

Ini nga punong ginagamit sang mga Judiyo sa ila mga ritwal sa pagpaninlo. Ang tubig diri nagahalin sa tupad sini nga suluptan sang tubig. Ang punong kag ang suluptan sang tubig bahin sang isa lang ka tinukod, kag suno sa natukiban, may dam sa tunga nila. May alagyan sang tubig sa dam pakadto sa idalom sang punong. Kon buksan ang buhangan sang dam, nagahuganas ang tubig pakadto sa punong, gani malabugay ang tubig.

Ang Juan 5:4, nga nagasiling nga isa ka anghel ang naglabugay sang tubig, indi makita sa masaligan nga Griego nga mga manuskrito, subong sang Codex ­Sinaiticus sang ikap-at nga siglo. Pero, napat-od naton nga gin-ayo ni Jesus sa Beth­za­tha ang tawo nga 38 ka tuig na nga nagamasakit. Nag-ayo gilayon ang tawo bisan pa wala sia maglusong sa punong.