Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Mayo 2016

Ginabag-o Bala Gihapon sang Biblia ang Imo Kabuhi?

Ginabag-o Bala Gihapon sang Biblia ang Imo Kabuhi?

“Bag-uha na ninyo ang inyo panghunahuna.”—ROMA 12:2.

AMBAHANON: 61, 52

1-3. (a) Pagkatapos sang aton bawtismo, ano nga mga pagbag-o ang mabudlay himuon? (b) Kon nabudlayan kita nga maghimo sing mga pagbag-o, ano ang mahimo naton ipamangkot? (Tan-awa ang mga piktyur sa umpisa sini nga artikulo.)

SANG matun-an ni Kevin [1] ang kamatuoran, ginhandum niya ang suod nga kaangtanan kay Jehova. Pero, tinuig na sia nga nagasugal, nagapanigarilyo, nagapahubog, kag nagadroga. Agod kahamut-an sang Dios, dapat untatan ni Kevin ining mga buhat nga supak sa Kasulatan. Nahimo niya ini paagi sa bulig ni Jehova kag sang gahom sang Iya nasulat nga Pulong nga sarang makapabag-o.—Heb. 4:12.

2 Pagkatapos mabawtismuhan si Kevin, nag-untat bala sia sa pagbag-o sang iya kabuhi? Wala, kay dapat pa niya palambuon kag pauswagon ang iya Cristianong mga kinaiya. (Efe. 4:31, 32) Halimbawa, natalupangdan niya nga madali sia maakig kag nabudlayan sia sa pagkontrol sini. Gin-aku ni Kevin, “Mas mabudlay ang pagkontrol sang akon kaakig sangsa pag-untat sang akon mga bisyo sang una!” Nahimo ni Kevin ang kinahanglan nga mga pagbag-o  paagi sa hanuot nga pangamuyo kag maid-id nga pagtuon sa Biblia.

3 Pareho kay Kevin, madamo sa aton ang kinahanglan maghimo sing daku nga mga pagbag-o antes sang aton bawtismo agod mapahisuno naton ang aton kabuhi sa mga ginapatuman sang Biblia. Pagkatapos sang bawtismo, narealisar naton nga dapat pa kita maghimo sing gamay nga mga pagbag-o agod mailog naton sing maayo ang Dios kag ang Cristo. (Efe. 5:1, 2; 1 Ped. 2:21) Halimbawa, mahimo nga palareklamo kita, nahadlok kita sa mga tawo, mahilig kita magkutsokutso, ukon may iban pa kita nga kaluyahon. Mas nabudlayan bala kita sa paghimo sing gamay nga mga pagbag-o? Mahimo magpalibog ka, ‘Nakahimo na ako sing daku nga mga pagbag-o, pero ngaa nabudlayan gid ako sa paghimo sing gamay nga mga pagbag-o? Ano ang himuon ko para padayon nga mabag-o sang Biblia ang akon kabuhi?’

MANGIN REALISTIKO

4. Ngaa indi naton mapahamut-an si Jehova sa tanan nga tion?

4 Nakilala naton si Jehova kag ginahigugma naton sia, gani handum gid naton nga himuon ang kalahamut-an sa iya. Pero bisan pa hanuot gid ang aton handum, indi naton mapahamut-an ang Dios sa tanan nga tion bangod indi kita himpit. Pareho kita kay apostol Pablo, nga nagsulat: “Ang handum sa paghimo sing maayo yari sa akon, apang indi ko mahimo ang akon ginahandum.”—Roma 7:18; Sant. 3:2.

5. Ano nga mga pagbag-o ang aton ginhimo antes kita ginbawtismuhan, pero ano nga mga kaluyahon ang mahimo padayon naton nga ginapakigbatuan?

5 Ginbiyaan na naton ang sala nga mga buhat nga mahimo mangin rason nga sikwayon kita sa Cristianong kongregasyon. (1 Cor. 6:9, 10) Pero, indi gihapon kita himpit. (Col. 3:9, 10) Gani indi realistiko magpaabot nga pagkatapos sang aton bawtismo, ukon bisan gani madugay na kita sa kamatuoran, indi na kita makahimo sing sala, mapaslawan, ukon makahunahuna sang malain nga mga motibo kag huyog. Ang matuod, tinuig naton nga dapat pakigbatuan ang pila ka kaluyahon.

6, 7. (a) Ano ang nagpaposible nga mangin abyan naton si Jehova bisan pa indi kita himpit? (b) Ngaa indi kita dapat mangalag-ag nga magpangayo sing patawad kay Jehova?

6 Ang aton napanubli nga pagkadihimpit indi dapat makasablag sa aton pagpakig-abyan kay Jehova ukon sa aton padayon nga pag-alagad sa iya. Binagbinaga ini: Sang ginbuyok kita ni Jehova, nahibaluan niya nga makasala kita kon kaisa. (Juan 6:44) Bangod nahibaluan sang Dios ang aton mga kinaiya kag mabasa niya ang aton tagipusuon, pat-od gid nga nahibaluan man niya kon ano nga mga kaluyahon ang aton ginapakigbatuan. Gani nahibaluan niya nga may mga tion nga makasala kita sa iya. Pero, gusto gihapon ni Jehova nga mangin abyan niya kita.

7 Bangod sang gugma sang Dios, ginhatagan niya kita sing hamili nga regalo nga amo ang halad-gawad sang iya pinalangga nga Anak. (Juan 3:16) Pasad sa sining hamili nga aman, mahimo kita patawaron ni Jehova kon hinulsulan naton ang aton nahimo nga sala, gani makasalig kita nga abyan gihapon naton sia. (Roma 7:24, 25; 1 Juan 2:1, 2) Dapat bala kita magbatyag nga indi kita takus sa sini nga aman bangod makasasala kita? Indi! Daw pareho lang ina sa pagpangindi nga hinawan ang aton mahigko nga kamot. Gin-aman ang gawad para sa mahinulsulon nga mga makasasala. Nagapasalamat gid kita, kay paagi sa gawad mangin abyan naton si Jehova bisan pa indi kita himpit.—Basaha ang 1 Timoteo 1:15.

8. Ngaa indi naton dapat pagbalewalaon ang aton mga kaluyahon?

8 Pero, wala naton ginabalewala ang aton mga kaluyahon. Kon gusto naton palambuon ang aton pagpakig-abyan kay Jehova, dapat kita manikasog nga ilugon sing maayo ang Dios kag ang Cristo kag tinguhaan naton nga mangin sahi sang tawo nga ginakahamut-an  nila. (Sal. 15:1-5) Panikasugan man naton nga pakigbatuan ang aton makasasala nga mga huyog, kag dulaon ini kon posible. Bisan pa madugay na kita sa kamatuoran ukon bag-o lang kita nabawtismuhan, dapat ‘padayon kita nga magpasibu.’—2 Cor. 13:11.

9. Paano naton nahibaluan nga padayon kita nga makasuklob sang bag-o nga personalidad?

9 Kinahanglan ang padayon nga panikasog agod ‘makapasibu’ kag mapakita “ang bag-o nga personalidad.” Ginpahanumdom ni Pablo ang iya mga masigkatumuluo: “Gintudluan kamo nga ubahon ninyo ang daan nga personalidad nga nahisuno sa inyo paggawi sadto, nga ginapalain pa gid sang madaya nga mga handum sini. Padayon nga bag-uha ninyo ang inyo panghunahuna, kag isuklob ang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efe. 4:22-24) Ang ekspresyon nga “padayon nga bag-uha” nagapahangop nga ang pagsuklob sang bag-o nga personalidad isa ka padayon nga proseso. Makapalig-on ini, kay ginapasalig sini sa aton nga bisan madugay na kita nga nagaalagad kay Jehova, padayon gihapon naton nga mapalambo kag mapauswag ang Cristianong mga kinaiya sa aton bag-o nga personalidad. Huo, padayon nga mabag-o sang Biblia ang aton kabuhi.

NGAA MABUDLAY GID INI?

10. Ano ang dapat naton himuon agod padayon kita nga makahimo sing pagbag-o sa bulig sang Biblia, kag ano ang mahimo naton ipamangkot?

10 Dapat kita magpanikasog kon luyag naton nga padayon kita nga bag-uhon sang Pulong sang Dios. Pero ngaa dapat gid kita magpanikasog? Indi bala nga dapat mahapos lang kuntani ang aton espirituwal nga pag-uswag kay ginapakamaayo man ni Jehova ang aton panikasog? Ngaa indi na lang pagdulaon ni Jehova ang aton malain nga mga huyog agod indi na kita mabudlayan sa pagpakita sang diosnon nga mga kinaiya?

11-13. Ngaa gusto ni Jehova nga manikasog gid kita para madaug ang aton mga kaluyahon?

11 Kon pamalandungan naton ang uniberso, makita naton nga gamhanan gid si Jehova. Halimbawa, ginhimo niya ang adlaw nga puno sing enerhiya. Kada segundo, nagapatubas ang adlaw sing grabe nga kapawa kag init. Gamay lang nga bahin sini nga enerhiya ang kinahanglan agod masakdag ang kabuhi sa duta. (Sal. 74:16; Isa. 40:26) Nalipay man si Jehova sa paghatag sing nagakaigo nga kusog sa iya mga alagad sa duta nga nagakinahanglan sini. (Isa. 40:29) Huo, mahimo kita hatagan sang Dios sing kusog agod mahapos naton nga madaug ang tanan nga kaluyahon kag indi na naton pagsuliton ang aton mga sala. Ngaa wala niya ini ginhimo?

12 Ginhatagan kita ni Jehova sing isa ka dalayawon nga regalo nga amo ang kahilwayan sa pagpili. Kon pilion naton ang paghimo sang kabubut-on sang Dios kag panikasugan gid naton ini, ginapakita naton ang aton tudok nga gugma kay Jehova kag ang aton handum nga pahamut-an sia. Ginapakita man naton nga ginasakdag naton ang iya pagkasoberano. Ginhangkat ni Satanas ang kinamatarong sang pagkasoberano ni Jehova, gani ang aton kinabubut-on nga panikasog para sakdagon ini ginapabaloran gid sang aton mapinalanggaon kag mainapresyahon nga Amay sa langit. (Job 2:3-5; Hulu. 27:11) Pero, kon ginhimo ni Jehova nga indi na kita magpanikasog nga daugon ang aton makasasala nga mga huyog agod pahamut-an sia, mangin wala sing pulos ang aton katutom kag ang bisan ano nga himuon naton sa pagsakdag sang iya pagkasoberano.

13 Gani, ginasilingan kita ni Jehova nga ‘panikasugan gid’ ang pagpalambo sang diosnon nga mga kinaiya. (Basaha ang 2 Pedro 1:5-7; Col. 3:12) Ginapaabot niya nga panikasugan naton nga kontrolon ang aton mga panghunahuna kag balatyagon. (Roma 8:5; 12:9) Kon ginahimo naton ang aton bug-os nga masarangan, malipay gid kita kay marealisar  naton nga ginabag-o gihapon sang Biblia ang aton kabuhi.

TUGUTI ANG PULONG SANG DIOS NGA PADAYON NGA MAGBAG-O SA IMO

14, 15. Ano ang himuon naton agod mapalambo ang mga kinaiya nga nahamut-an ni Jehova? (Tan-awa ang kahon nga “ Ginbag-o sang Biblia kag Pangamuyo ang Ila Kabuhi.”)

14 Ano ang himuon naton agod mapalambo ang diosnon nga mga kinaiya kag mapahamut-an si Jehova? Dapat naton padayunon ang aton ginsugdan nga pagbag-o. Dapat padayon kita nga manikasog kag magsunod sa mga instruksion sang Dios, kay ang Roma 12:2 nagsiling: “Untati na ninyo ang pagpadihon sa mga dalanon sang katawhan sini nga sistema sang mga butang, kundi bag-uha na ninyo ang inyo panghunahuna, agod mapamatud-an ninyo sa inyo kaugalingon kon ano ang maayo kag kalahamut-an kag himpit nga kabubut-on sang Dios.” Ginabuligan kita ni Jehova paagi sa iya Pulong kag balaan nga espiritu nga mahantop ang iya kabubut-on, himuon ini, kag maghimo sang kinahanglan nga mga pagbag-o sa aton kabuhi nahisuno sa iya mga talaksan. Nalakip sa aton pagpanikasog ang pagbasa sing Biblia adlaw-adlaw, pagpamalandong sa Kasulatan, kag pagpangamuyo para sa balaan nga espiritu. (Luc. 11:13; Gal. 5:22, 23) Kon magpatuytoy kita sa balaan nga espiritu sang Dios kag ipahisuno naton ang aton panghunahuna sa pagtamod ni Jehova nga mabasa sa iya Pulong, ang aton panghunahuna, panghambal, kag paggawi mangin kalahamut-an pa gid sa iya. Pero, dapat kita gihapon magbantay agod indi kita madaug sang aton mga kaluyahon.—Hulu. 4:23.

Mahimo makabulig ang pagpangita sang mga teksto kag pagkolekta sang mga artikulo parte sa imo kaluyahon, kag dayon repasuhon ini (Tan-awa ang parapo 15)

15 Magluwas sa pagbasa sing Biblia adlaw-adlaw, dapat naton tun-an ang Pulong sang Dios sa bulig sang aton Cristianong mga publikasyon sa tuyo nga mailog ang dalayawon nga mga kinaiya ni Jehova. Natalupangdan sang iban nga mapuslanon ang pagpangita sang mga teksto kag pagkolekta sang mga artikulo sa Ang Lalantawan ukon Magmata! nga makabulig sa pagpalambo sang Cristianong mga kinaiya ukon sa pagpakigbato sa espesipiko nga mga kaluyahon, kag dayon repasuhon ini.

16. Ngaa indi kita dapat maluyahan sing buot kon daw mahinay ang aton pagbag-o?

16 Kon daw mahinay ang imo espirituwal nga pag-uswag, dumduma nga nagakinahanglan ini sing tion. Ang pagpalambo sang espirituwal nga mga kinaiya isa ka padayon nga proseso. Dapat kita mangin mapailubon samtang ginatugutan naton ang Biblia nga padayon nga maghimo sing positibo nga mga pagbag-o sa aton kabuhi. Sa umpisa, mahimo nga dapat naton disiplinahon ang aton kaugalingon nga himuon ang mga ginapatuman sang Kasulatan. Pero, sa ulihi, mahapos kag daw awtomatiko na lang sa aton ang pagpakita sang diosnon nga mga kinaiya kay ang aton panghunahuna kag paggawi nahisuno na sa talaksan ni Jehova nga Dios.—Sal. 37:31; Hulu. 23:12; Gal. 5:16, 17.

 HUNAHUNAA ANG DALAYAWON NGA MGA PAGPAKAMAAYO SA ATON

17. Kon mainunungon kita kay Jehova, ano ang aton dalayawon nga palaabuton?

17 Sa ulihi, mangin himpit na ang mainunungon nga mga sumilimba ni Jehova kag magaalagad sila sa iya sing dayon. Sa sina nga tion, wala na kita sing kaluyahon nga dapat pakigbatuan, kag mahapos na lang sa aton nga ilugon si Jehova. Pero bisan subong, masimba naton ang aton mahigugmaon nga Dios paagi sa gawad. Mahimo naton ini bisan pa indi kita himpit kon padayon naton nga ginatugutan ang gahom sang iya Pulong nga bag-uhon kita.

18, 19. Paano naton mapat-od nga ang Biblia may gahom nga makahimo sing padayon nga pagbag-o sa aton kabuhi?

18 Si Kevin, nga ginsambit kaina, nagpanikasog gid para makontrol ang iya kaakig. Ginpamalandungan niya kag gin-aplikar ang mga prinsipio sa Biblia, kag ginbaton niya ang bulig kag laygay sang mga kauturan. Pagligad sang pila ka tuig, daku na ang ginbag-o ni Kevin. Sang ulihi, gintangdo sia nga ministeryal nga alagad, kag subong 20 ka tuig na sia nga gulang sa kongregasyon. Pero, padayon gihapon ang iya panikasog para indi sia madaug sang iya kaluyahon.

19 Ginapakita sang eksperiensia ni Kevin nga ang Biblia makabulig sa katawhan sang Dios nga padayon nga makahimo sing positibo nga mga pagbag-o sa ila kabuhi. Gani, tugutan naton ang Pulong sang Dios nga padayon kita nga bag-uhon para mangin suod pa gid kita kay Jehova. (Sal. 25:14) Pakamaayuhon gid ni Jehova ang aton mga panikasog, kag mangin maathag sa aton nga ang Biblia padayon nga makahimo sing pagbag-o sa aton kabuhi.—Sal. 34:8.

^ [1] (parapo 1) Gin-islan ang ngalan.