Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) MARSO 2016

Hibalua ang praktikal, emosyonal, kag espirituwal nga bulig nga kinahanglan sang imo mga kauturan

Makabulig Ka Bala sa Inyo Kongregasyon?

Makabulig Ka Bala sa Inyo Kongregasyon?

ANTES sia nagkayab sa langit, nagsiling si Jesus sa iya mga disipulo: “Mangin saksi ko kamo . . . tubtob sa pinakamalayo nga bahin sang duta.” (Binu. 1:8) Paano ginsunod sang mga Cristiano sang una ini nga sugo?

Nagsiling si Martin Goodman nga isa ka propesor sa Oxford University nga “sa emperyo sang Roma sadto, ang pagbatyag nga may obligasyon amo ang kinatuhayan sang mga Cristiano sa iban nga relihion lakip na ang mga Judiyo.” Naglakbay si Jesus sa madamo nga lugar para magbantala. Sa pag-ilog sa iya, nahangpan sang matuod nga mga Cristiano nga ang pagpalapnag sang “maayong balita sang Ginharian sang Dios” nagalakip sang pagpangita sang mga katawhan nga nagahandum nga mahibaluan ang kamatuoran sa Biblia. (Luc. 4:43) Isa ini sa mga rason kon ngaa ang Cristianong kongregasyon sang unang siglo may mga “apostoles,” nga literal nga nagapatuhoy sa mga ginpadala nga tiglawas. (Mar. 3:14) Ginsugo ni Jesus ang iya mga sumulunod: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko.”—Mat. 28:18-20.

Wala na sing nabilin sa 12 ka apostoles ni Jesus diri sa duta subong, pero madamo sa mga alagad ni Jehova ang nagpakita sang espiritu sang pagmisyonero. Sa pangagda nga pasangkaron ang ila pagbantala nga hilikuton, sila nagsabat: “Yari ako! Ipadala ako!” (Isa. 6:8) Nagsaylo ang iban sa malayo nga mga pungsod, kaangay sa mga linibo nga naggradweyt sa Gilead School. Ang iban naman nagsaylo sa lain nga lugar sa ila mismo pungsod. Nagtuon naman sang iban nga lenguahe ang madamo para mangin bahin sang mga kongregasyon kag mga grupo nga nagatatap sang mga kinahanglanon sa sina nga lenguahe. Ini nga mga utod nga nagsaylo sa kon diin may daku nga kinahanglanon ukon nagtuon sang iban nga lenguahe mahimo yara sa mabudlay nga  mga kahimtangan. Ang pagkamasinakripisyuhon makabulig sa ila nga mapakita ang ila gugma kay Jehova kag sa ila isigkatawo. Sang nahandaan na nila ini, nagdesisyon sila nga magbulig. (Luc. 14:28-30) Daku gid nga bulig ang ginahimo sini nga mga utod.

Pero magkatuhay ang mga kahimtangan. May mga Saksi nga indi makasaylo sa lugar nga mas daku ang kinahanglanon ukon makatuon sang iban nga lenguahe. Gani, mapakita bala naton ang espiritu sang pagmisyonero sa aton mismo kongregasyon?

MANGIN MISYONERO SA INYO KONGREGASYON

Gamita ang imo kahimtangan subong agod makabulig sa nagakinahanglan

Makita gid ang espiritu sang pagmisyonero sa mga Cristiano sang unang siglo, pero mahimo nga ang kalabanan sa ila nagpabilin sa ila lugar. Pero, ang laygay nga ginhatag kay Timoteo maaplikar sa ila kag sa tanan nga alagad sang Dios: “Himua ang hilikuton sang isa ka ebanghelisador, kag tumana sing bug-os ang imo ministeryo.” (2 Tim. 4:5) Ang sugo nga ibantala ang mensahe sang Ginharian kag tudluan ang mga tawo nga mangin disipulo naaplikar sa tanan nga Cristiano bisan diin man sila. Dugang pa, puede man kita mangin misyonero sa aton mismo kongregasyon.

Halimbawa, dapat mangin mapasibusibuon ang isa ka misyonero sa bag-o nga mga kahimtangan sa iban nga pungsod. Bag-o gid para sa iya ang iya asaynment. Kamusta kita? Ano ang himuon naton kon indi kita makasaylo sa lugar nga mas daku ang kinahanglanon? Magahunahuna bala kita nga nakobrehan na naton pirme ang teritoryo sang aton kongregasyon? Ukon basi puede pa naton mapasibu ang aton mga pamaagi para malab-ot ang madamo nga tawo? Halimbawa, sang 1940, ginpalig-on ang mga utod nga magpain sang isa ka adlaw kada semana para sa pagpanaksi sa dalan. Makabantala ka bala sa sina nga paagi? Ukon puede ka bala makagamit sang mga cart nga ginadispleyhan sang literatura? Ang punto amo sini: Ginbinagbinag mo na bala ini nga mga paagi sa pagpresentar sang maayong balita, nga mahimo bag-o sa imo?

Palig-una ang iban nga ‘himuon ang hilikuton sang isa ka ebanghelisador’

Ang positibo nga panimuot makabulig sa aton nga mangin makugi kag malipayon sa pagministeryo. Ang kalabanan nga handa magsaylo sa mga lugar nga mas daku ang kinahanglanon ukon mag-alagad sa teritoryo nga tuhay ang lenguahe mga utod nga hamtong na sa espirituwal. Gani nangin pagpakamaayo sila sa madamo, pareho sang pagpanguna nila sa pagbantala nga hilikuton. Dugang pa, ginapangunahan sang mga misyonero ang mga kahimusan sa kongregasyon samtang indi pa kalipikado ang mga utod nga lalaki sa amo nga lugar. Kon ikaw lalaki kag bawtismado nga Saksi, “nagatinguha” ka bala  ukon handa nga mag-alagad sa imo masigkatumuluo sa inyo kongregasyon?—1 Tim. 3:1.

MANGIN “NAGAPABAKOD NGA BULIG”

Maghatag sang praktikal nga bulig

Luwas sa makugi nga pagpakigbahin sa pagministeryo sa latagon kag kahanda sa pagbaton sa mga responsibilidad sa kongregasyon, may mabulig pa kita sa aton kongregasyon. Ang bisan sin-o, bata man ukon tigulang, lalaki ukon babayi, mahimo mangin “nagapabakod nga bulig” sa mga utod nga nagakinahanglan.—Col. 4:11, footnote.

Agod makabulig kita sa aton masigkatumuluo, dapat hibaluon gid naton ang ila kahimtangan. Ginapalig-on kita sang Biblia nga “hunahunaon naton ang isa kag isa” sa aton pagtilipon. (Heb. 10:24) Wala ini nagakahulugan nga entrahan naton ang ila personal nga kabuhi, kundi dapat naton kilalahon ang aton mga kauturan kag hibaluon ang ila mga kinahanglanon. Mahimo nagakinahanglan sila sang praktikal, emosyonal, ukon espirituwal nga bulig. Indi lang ini responsibilidad sang mga gulang kag mga ministeryal nga alagad. Matuod nga may mga tion nga kinahanglan gid ang bulig sang bisan isa lang sining mga utod. (Gal. 6:1) Pero, tanan kita puede makabulig sa mga tigulang na nga mga kauturan, ukon sa mga pamilya, nga nagaatubang sang mga problema.

Palig-una ang mga nagaatubang sang mga problema sa kabuhi

Halimbawa, sang namigado si Salvatore, ginbaligya niya ang iya negosyo, balay, kag ang madamo nga pagkabutang sang iya pamilya. Nagpalibog sia kon paano atubangon sang iya pamilya ining mabudlay nga kahimtangan. Nakita sang isa ka pamilya sa ila kongregasyon nga kinahanglan nila sing bulig. Naghatag sila sing kuarta, ginbuligan nila si Salvatore kag ang iya asawa nga makakita sing obra, kag naghinguyang man sila sang pila ka gab-i para pamatian kag palig-unon ang iya pamilya. Nagbakod gid ang ila pag-abyanay. Bisan pa sadtong mabudlay nga mga inagihan, malipayon nga ginpabaloran sini nga mga pamilya ang tion nga ginhinguyang nila sa isa kag isa.

Nalipay ang matuod nga mga Cristiano nga isugid sa iban ang ila mga pagpati. Subong sang ginpakita ni Jesus, ginapahibalo gid naton sa tanan ang dalayawon nga mga promisa sang Biblia. Makasaylo man kita ukon indi, panikasugan gid naton nga himuon ang maayo sa tanan. Indi bala nga mahimo gid naton ini sa aton mismo kongregasyon? (Gal. 6:10) Kon himuon naton ini, mabatyagan naton ang kalipay sa paghatag kag mabuligan kita nga ‘padayon nga magpamunga sa tagsa ka maayong buhat.’—Col. 1:10; Binu. 20:35.