Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Marso 2016

Kinabubut-on nga ginpasundayag ni Ezequiel ang pagkibon sa Jerusalem

Iluga ang Panimuot sang mga Manalagna

Iluga ang Panimuot sang mga Manalagna

PAREHO ka bala sa mga manalagna sang una? Ang Bag-ong Kalibutan nga Badbad sa “Glossary sang mga Termino sa Biblia” naghatag sang kahulugan sang manalagna: “Ang isa nga ginpahayagan sang Dios sang iya mga katuyuan. Ang mga manalagna nagapanghikot subong humalambal sang Dios, nga nagapaalinton indi lamang sang mga mahanabo kundi sang mga panudlo, mga sugo, kag mga paghukom man ni Jehova.” Bisan pa nga wala ka nagapanagna, nagabantala ka sang Pulong sang Dios kay humalambal ka sang Dios.—Mat. 24:14.

Pribilehiyo gid naton nga ipakilala sa iban ang aton Dios, nga si Jehova, kag tudluan sila parte sa kabubut-on niya sa katawhan! Kaupod naton sa sini nga hilikuton ang “anghel nga nagalupad sa tunga sang kalangitan.” (Bug. 14:6) Pero mahimo maatubang naton ang mga kabudlayan nga magadula sang aton apresasyon sa sining tumalagsahon nga pribilehiyo. Ano ang pila sini? Mahimo makapoy kita, magaluya ang aton buot, ukon magabatyag kita nga wala sing pulos. Amo man sini ang nabatyagan sang matutom nga mga manalagna sang una, pero wala sila mag-untat. Kag ginbuligan sila ni Jehova nga matapos ang ila mga asaynment. Binagbinagon naton ang pila sa ila para mailog naton.

NANIKASOG GID SILA

Mahimo nga nakapoy kita kon kaisa bangod sang aton matag-adlaw nga mga hilikuton kag daw ginatamad na kita magbantala. Siempre, kinahanglan naton magpahuway; bisan gani si Jesus kag ang iya mga apostoles nagpahuway man. (Mar. 6:31) Pero hunahunaa si Ezequiel sa Babilonia kag ang iya asaynment sa mga Israelinhon nga ginbihag gikan sa Jerusalem. Isa ka bes, ginsugo sia sang Dios nga magkuha sang tisa kag itigib sa sini ang siudad sang Jerusalem. Malaragwayon nga kibunon ni Ezequiel ining gintigib nga siudad paagi sa paghigda nga nagatakilid sa wala sing 390 ka adlaw kag paghigda nga nagatakilid sa tuo sing 40 ka adlaw. Ginsilingan  ni Jehova si Ezequiel: “Gapuson ko ikaw agod indi ka maglisuliso tubtob matapos mo ang mga adlaw sang pagkibon mo sa siudad.” (Ezeq. 4:1-8) Mahimo nga natalupangdan ini sang gintapok nga mga Israelinhon. Sobra isa ka tuig nga pagahimuon ni Ezequiel ining makakalapoy nga asaynment. Paano niya himuon ini nga asaynment?

Nahangpan ni Ezequiel kon ngaa ginpadala sia nga manalagna. Sang ginpadala si Ezequiel, ginsilingan sia sang Dios: “Magpamati man [ang mga Israelinhon] ukon indi, mahibaluan [nila] nga may manalagna sa tunga nila.” (Ezeq. 2:5) Ginadumdom niya pirme ang iya asaynment. Gani kinabubut-on nga ginpasundayag niya ang malaragwayon nga pagkibon sa Jerusalem. Nangin matuod gid sia nga manalagna. Nakalab-ot sa iya kag sa iya mga kaupod nga tinapok ang balita: “Nalaglag ang siudad!” Huo, narealisar sang mga Israelinhon nga may manalagna sa tunga nila.—Ezeq. 33:21, 33.

Nagapaandam kita subong sa mga tawo parte sa nagahilapit nga kalaglagan sang bug-os nga sistema sang mga butang ni Satanas. Bisan mahimo nga ginakapoy kita, ginagamit naton ang aton kusog sa pagbantala sang Pulong sang Dios, pagduaw liwat, kag pagdumala sing mga pagtuon sa Biblia. Samtang nagakatuman ang mga tagna parte sa hingapusan sining sistema, nalipay kita nga paagi sa aton ‘ginapahayag sang Dios ang iya mga katuyuan.’

NALANDAS NILA ANG KALUYA SANG BUOT

Nagapanikasog gid kita sa bulig sang espiritu ni Jehova; pero kon kaisa mahimo magluya ang aton buot bangod sang reaksion sang mga tawo sa aton mensahe. Kon amo sini, maayo nga dumdumon naton ang halimbawa ni manalagna Jeremias. Ginyaguta sia, gin-insulto, kag ginpakalain kay nagbantala sia sang mensahe sang Dios sa mga Israelinhon. Isa ka bes, nakasiling pa gani si Jeremias: “Indi na ako magsambit sa iya, kag indi na ako maghambal sa iya ngalan.” Si Jeremias tawo man nga may balatyagon kaangay naton. Pero wala sia mag-untat sa pagbantala sang mensahe sang Dios. Ngaa? Nagsiling pa ang manalagna: “Apang sa akon tagipusuon nangin pareho ini sang kalayo nga nagadabdab sa akon mga tul-an, kag ginkapoy ako sa pagpugong sini; indi ko na ini maagwanta.”—Jer. 20:7-9.

Gani kon magluya ang aton buot bangod sa reaksion sang mga tawo sa aton mensahe, mabatuan naton ini paagi sa pagpamalandong sa mensahe nga aton ginabantala. Ini nga mensahe mangin kaangay sa ‘kalayo nga nagadabdab sa aton mga tul-an.’ Kon basahon naton ang Biblia kada adlaw, mahuptan naton nga nagadabdab ini nga kalayo.

NALANDAS NILA ANG NEGATIBO NGA MGA BALATYAGON

Ang pila ka Cristiano nga ginhatagan sing asaynment nabalaka kon paano nila ini himuon kag kon ngaa ginhatag ini sa ila. Daw amo sini ang ginbatyag ni manalagna Oseas. Ginsugo sia ni Jehova: “Lakat ka, magpangasawa ka sing isa ka babayi nga magapakighilawas kag mag-anak ka sing mga anak sa iya pagpakighilawas.” (Os. 1:2) Handurawa kon ano ang imo batyagon kon mangasawa ka pero silingan ka sang Dios nga mangin makihilawason ang imo asawa! Ginbaton ni Oseas ang asaynment. Ginpangasawa niya si Gomer, kag nagbata sia sing lalaki. Sang ulihi, nagbata sia sang babayi kag isa pa ka lalaki kag maathag nga ining duha ka bata indi iya ni Oseas. Ginsilingan ni Jehova si Oseas nga ang iya palangasaw-on ‘magalagas sang iya mga kahagugma.’ Talupangda nga madamo ang iya “mga kahagugma.” Dayon tinguhaan niya nga magbalik kay Oseas. Kon ikaw ina nga manalagna, batunon mo bala liwat ang imo asawa? Amo gid sini ang ginsugo ni Jehova kay Oseas! Mahal pa gani ang pagbakal sang manalagna sa iya asawa.—Os. 2:7; 3:1-5.

Mahimo nagpalibog si Oseas kon ano ang kaayuhan sa pagtuman niya sang iya asaynment. Pero sang gintuman niya ini, ginbuligan niya kita nga mahangpan ang kasakit nga ginbatyag sang Labing Gamhanan sang nagluib ang Israel sa iya. Kag may nagbalik gid man sa Dios nga mga Israelinhon nga bunayag sing tagipusuon.

Wala sing isa subong ang ginhambalan sang Dios nga ‘magpangasawa sing isa ka babayi nga magapakighilawas.’ Pero ano ang matun-an naton sa kahanda ni Oseas nga batunon ina nga asaynment? Ang isa sini amo nga dapat handa kita nga ibantala ang maayong balita sang Ginharian  “sing dayag kag sa mga balay” bisan nabudlayan pa kita. (Binu. 20:20) Mahimo nga nabudlayan ka sa pila ka pamaagi sa pagbantala sang Ginharian. Madamo ang nagsiling nga nanamian sila magtuon sang Biblia sa mga Saksi ni Jehova pero indi gid sila magpamalaybalay para ipalapnag ang mensahe. Pero sang ulihi madamo sa ila ang naghimo sang abi nila daw indi gid nila mahimo sang una. May natun-an ka bala sa sini?

May matun-an pa gid kita nga leksion sa pagbaton ni Oseas sang mabudlay nga asaynment. Puede man sia makapangindi sa sining simbuliko nga drama nga nagadalahig sa iya asawa. Mahibaluan ayhan sang mga tawo ang parte sa sini nga sugo kon wala ini ginsulat ni Oseas? Mahimo nga may kahigayunan man kuntani kita nga makapanaksi parte kay Jehova nga kita lang ang nakahibalo. Natabo ini kay Anna, isa ka estudyante sa hayskul sa Estados Unidos. Ginsilingan sang maestra ang mga estudyante nga isulat ang ila pagpati parte sa pila ka topiko ukon isyu kag kumbinsihon nila ang ila mga klasmeyt. Puede nga indi magpanaksi si Anna. Pero ginkabig niya nga naghalin sa Dios ini nga kahigayunan. Bangod ginakulbaan sa mahimo matabo, nangamuyo sia kay Jehova amo nga nagdugang ang iya handum nga hingalitan ini nga kahigayunan. Ang tema sang iya ginsulat amo ang “Ebolusyon: Binagbinaga ang Pamatuod.”

Ginailog sang Saksi nga mga pamatan-on ang panimuot sang mga manalagna—maisog nila nga ginapakilala ang aton Manunuga nga si Jehova

Sang ginbasa ni Anna ang iya sinulatan, ginbais sia sang isa niya ka klasmeyt nga nagapati sa ebolusyon. Napaathag sing maayo ni Anna ang iya pagpati. Nagdayaw ang iya maestra amo nga ginpili ang iya sinulatan nga amo ang labing makapakumbinsi. Sugod sadto, ginahambalan na pirme nanday Anna kag sang klasmeyt niya nga nagbais sa iya ang parte sa pagpanuga. Bangod ginbaton ni Anna ining “asaynment” kay Jehova, sia nagsiling, “Wala na ako nahadlok subong magbantala sang maayong balita.”

Bisan pa nga indi kita mga manalagna, kon ilugon naton ang pagsakripisyo sang mga manalagna pareho nanday Ezequiel, Jeremias, kag Oseas, mangin madinalag-on man kita sa paghimo sang kabubut-on ni Jehova subong! Sa tion sang pangpamilya nga pagsimba ukon sa personal nga pagtuon, puede mo bala malakip ang iban nga mga manalagna sang una kag pamalandungan kon paano mo mailog ang ila mga halimbawa?