Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2016

Madumduman Mo Bala?

Madumduman Mo Bala?

Nabasa mo na bala sing maayo ang ulihi nga mga gua sang Ang Lalantawan? Kon amo, tilawi kon masabat mo ang masunod nga mga pamangkot:

Ngaa ginsugo ni Jehova ang Israel sang una nga magpakig-away?

Mahigugmaon si Jehova. Pero, kon kaisa, ginatugutan niya nga magpakig-away ang iya katawhan kon mabutang sila sa katalagman bangod sa kalautan kag pagpamigos. Ang Dios ang nagadesisyon kon sin-o ang magapakig-away kag kon san-o magapakig-away.—w15 11/1, p. 4-5.

Ano ang dapat himuon sang mga ginikanan para mahanas ang ila mga tin-edyer nga alagaron si Jehova?

Dapat palanggaon sang mga ginikanan ang ila mga tin-edyer nga kabataan kag ipakita ang pagpaubos paagi sa ila halimbawa. Importante man nga magpakita sang paghantop ang mga ginikanan kag tinguhaan nga hangpon ang ila mga tin-edyer.—w15 11/15, p. 9-11.

Ngaa ang papa indi dapat pagkabigon nga nagbulos kay Pedro?

Ang Mateo 16:17, 18 wala nagsiling nga si apostol Pedro amo ang mangin ulo sang Cristianong kongregasyon. Ginapakita sang Biblia nga wala gintangdo si Pedro nga mangin superyor. Sa baylo, ginasugid sini nga si Jesus amo ang mangin sadsaran nga bato sang kongregasyon. (1 Ped. 2:4-8)—w15 12/1, p. 12-14.

Ano ang dapat naton binagbinagon antes kita maghambal?

Para magamit sa kaayuhan ang aton dila, dapat naton binagbinagon (1) kon san-o maghambal (Man. 3:7), (2) kon ano ang ihambal (Hulu. 12:18), kag (3) kon paano maghambal (Hulu. 25:15).—w15 12/15, p. 19-22.

Ano ang pila ka indi bunayag nga mga buhat nga dapat likawan sang mga Cristiano?

Dapat likawan sang matuod nga mga Cristiano ang pagbutig kag pagpasipala sa iban. Wala sila nagahambal sing indi matuod, ukon malain nga mga tinaga nga makaguba sa reputasyon sang iban, kag wala man sila nagapangdaya kag nagapangawat.—wp16.1, p. 5.

Sin-o ang “puno nga mga saserdote” nga ginsambit sa Biblia?

Ang ekspresyon nga “puno nga mga saserdote” maathag nga nagapatuhoy sa panguna nga mga saserdote, lakip ang mataas nga mga saserdote sang una nga ginpahalin.—wp16.1, p. 10.

Paano naton dapat tamdon ang nagakaon sang tinapay kag nagainom sang alak sa Memoryal?

Wala sila ginapakataas sang mga Cristiano. Indi gusto sang matuod nga mga hinaplas nga pakataason sila. Wala nila ginapanugidsugid sa iban ang ila dalayawon nga pribilehiyo. (Mat. 23:8-12)—w16.01, p. 23-24.

Ano ang matun-an naton sa pagpakig-abyan sang Dios kay Abraham?

Ang ihibalo ni Abraham parte sa Dios mahimo naghalin kay Sem. Kag ang pagpakig-angot sang Dios sa iya kag sa iya pamilya nagpabakod sang iya pagtuo. Mailog man naton si Abraham.—w16.02, p. 9-10.

Sin-o ang nagbutang sang mga kapitulo kag bersikulo sa Biblia?

Ang klerigo sang ika-13 nga siglo nga si Stephen Langton amo ang nagbahinbahin sang Biblia sa mga kapitulo. Ang mga manugkopya nga Judiyo amo ang una nga nagbahinbahin sang Hebreo nga Biblia sa mga bersikulo, kag sang ika-16 nga siglo, ginhimo man ini sang iskolar nga si Robert Estienne sa Cristianong Griegong Kasulatan.—wp16.2, p. 14-15.

Gindala gid bala ni Satanas si Jesus sa templo sang ginsulay niya sia?

Indi naton mapat-od. Ang Mateo 4:5 kag Lucas 4:9 mahimo hangpon nga si Jesus gindala didto paagi sa palanan-awon ukon mahimo nagtindog gid sia sa mataas nga bahin sang templo.—w16.03, p. 31-32.

Ngaa masiling naton nga daw tun-og ang aton Cristianong ministeryo?

Ang tun-og amat-amat nga nagaporma kag makaparepresko ini kag nagasakdag sang kabuhi. Ang tun-og pagpakamaayo halin sa Dios. (Deut. 33:13) Amo man sini ang epekto sang tingob nga pagpanikasog sang katawhan sang Dios sa ministeryo.—w16.04, p. 4.