Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Hunyo 2016

Indi Magpasandad sa mga Sala sang Iban

Indi Magpasandad sa mga Sala sang Iban

“Padayon nga . . . magpinatawaray kamo sing kinabubut-on.”—COL. 3:13.

AMBAHANON: 121, 75

1, 2. Ano ang gintagna sang Biblia parte sa pagdamo sang katawhan ni Jehova?

SA BILOG nga kalibutan, may isa ka organisasyon nga nagahigugma kay Jehova kag luyag nga alagaron sia. Nakilala sila nga mga Saksi ni Jehova. Bisan pa nga indi sila himpit kag nagasala man, pero ginatuytuyan sila sang balaan nga espiritu sang Dios amo nga nagauswag ang iya kongregasyon sa bug-os nga duta. Binagbinagon naton ang pila ka talalupangdon nga butang nga ginhimo ni Jehova sa iya indi himpit nga katawhan.

2 Diutay lang ang mga alagad sang Dios sang nagsugod ang katapusan nga mga adlaw sini nga sistema sang mga butang sang 1914. Pero ginpakamaayo ni Jehova ang ila pagbantala nga hilikuton. Sugod sadto, minilyon ang nakatuon sang mga kamatuoran sang Biblia kag nangin mga Saksi ni Jehova. Gintagna ni Jehova ining tumalagsahon nga pagdamo, sang nagsiling sia: “Ang diutay mangin isa ka libo kag ang gamay nga pungsod mangin gamhanan. Ako, si Jehova, magapadasig sini sa nagakaigo nga tion sini.” (Isa. 60:22) Nangin matuod ini sa sining katapusan nga mga adlaw. Ang matuod, madamo nga pungsod sa bilog nga duta ang mas diutay sing populasyon sangsa kadamuon sang katawhan sang Dios.

3. Paano ginpakita sang mga alagad sang Dios ang gugma?

 3 Ginbuligan man ni Jehova ang iya katawhan subong nga mapakita pa nila ang nagapanguna niya nga kinaiya nga amo ang gugma. (1 Juan 4:8) Si Jesus, nga nag-ilog sang gugma sang Dios, nagsiling sa iya mga sumulunod: “Ginahatag ko sa inyo ang isa ka bag-o nga sugo, nga maghigugmaanay kamo . . . Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:34, 35) Importante gid ini kay tuman kasingki ang pag-ilinaway sang mga pungsod base sa kasaysayan. Halimbawa, sang Bug-os Kalibutan nga Inaway II lang, mga 55 ka milyon ang napatay. Pero wala makigbahin ang mga Saksi ni Jehova sa sining inaway. (Basaha ang Miqueas 4:1, 3.) Amo nga ‘wala sila sing salabton sa dugo sang bisan sin-o nga tawo.’—Binu. 20:26.

4. Ngaa talalupangdon ang pagdamo sang katawhan ni Jehova?

4 Padayon ang pagdamo sang katawhan sang Dios bisan sa sining magamo nga kalibutan, nga suno sa Biblia ginakontrol ni Satanas, ang “dios sini nga sistema sang mga butang.” (2 Cor. 4:4) Ginamaniobra niya ang mga gumalahom kag ang media sini nga kalibutan. Pero indi niya mapauntat ang pagbantala sang maayong balita. Ginatinguhaan ni Satanas nga punggan ang mga tawo sa pagsimba kay Jehova kay nakahibalo sia nga malip-ot na lamang ang iya tion, kag ginahimo niya ini sa pila ka paagi.—Bug. 12:12.

MANGIN MATUTOM KA BALA?

5. Ngaa kon kaisa masaklaw kita sang iban? (Tan-awa ang piktyur sa umpisa sini nga artikulo.)

5 Ginapadaku sang Cristianong kongregasyon nga dapat higugmaon ang Dios kag ang isigkatawo. Ginsakdag ini mismo ni Jesus. Sang ginpamangkot kon ano ang pinakaimportante nga sugo, nagsiling sia: “‘Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang nahauna kag pinakaimportante nga sugo. Ang ikaduha, nga kaangay man sini, amo ini: ‘Higugmaa ang imo isigkatawo subong sang imo kaugalingon.’” (Mat. 22:35-39) Pero gin-athag sang Biblia nga bangod sang sala ni Adan, tanan kita natawo nga indi himpit. (Basaha ang Roma 5:12, 19.) Gani mahimo kon kaisa masaklaw kita sa ginahambal ukon ginahimo sang pila ka utod sa kongregasyon. Mahimo sini tilawan ang aton gugma kay Jehova kag sa iya katawhan. Ano ang aton himuon kon matabo ini? Ang Biblia nagasugid sa aton nga ang pila ka matutom nga alagad sang Dios sang una nakahambal ukon nakahimo sang mga butang nga makapasaklaw sa iban. Hibaluon naton kon ano ang aton matun-an sa natabo sa ila.

Kon didto ka sa Israel sang panahon ni Eli kag sang iya mga anak, ano ayhan ang imo reaksion sa ila ginhimo? (Tan-awa ang parapo 6)

6. Paano nga wala madisiplina ni Eli ang iya mga anak?

6 Halimbawa, wala gintuman sang duha ka anak sang Mataas nga Saserdote nga si Eli ang mga kasuguan ni Jehova. Aton mabasa: “Ang mga anak ni Eli malaut nga mga lalaki; wala nila ginatahod si Jehova.” (1 Sam. 2:12) Bisan pa ang ila amay nanguna sa pagsuporta sang matuod nga pagsimba, nakahimo sing serioso nga mga sala ang iya duha ka anak. Nahibaluan ini ni Eli pero wala niya sila gindisiplina sing maayo. Gani ginsilutan sang Dios ang panimalay ni Eli. (1 Sam. 3:10-14) Sang ulihi, wala gintugutan nga mangin mataas nga saserdote ang iya mga kaliwat. Kon didto ka sang panahon ni Eli, ano ayhan ang imo reaksion kay wala niya ginsapak ang mga sala sang iya mga anak? Mauntat ka bala sa pag-alagad sa Dios?

7. Ano ang serioso nga sala ni David, kag ano ang ginhimo sang Dios sa iya?

7 Ginpalangga ni Jehova si David, kay “kalahamut-an [sia] sa iya tagipusuon.” (1 Sam. 13:13, 14; Binu. 13:22) Pero sang ulihi,  nagpakighilawas si David kay Bat-seba, kag nagbusong si Bat-seba. Natabo ini samtang ara sa inaway ang iya bana nga si Urias. Sang nagpauli si Urias, ginsilingan sia ni David nga maghulid kay Bat-seba para kuno abi si Urias ang amay sang ginabusong ni Bat-seba. Wala ginhimo ni Urias ang ginsiling ni Hari David, gani ginmaniobra sang hari nga mapatay sia sa inaway. Nag-antos gid si David bangod sang iya sala. Sunodsunod nga kagamo ang nag-abot sa iya kag sa iya panimalay. (2 Sam. 12:9-12) Pero, ginkaluy-an sia sang Dios kay ‘bug-os tagipusuon’ sia nga nagsunod kay Jehova. (1 Hari 9:4) Kon nagakabuhi ka sadto upod sa katawhan sang Dios, ano ayhan ang imo reaksion? Masandad ka bala sa malain nga ginhimo ni David?

8. (a) Paano napaslawan si apostol Pedro nga tumanon ang iya ginsiling? (b) Bisan pa nakasala si Pedro, ngaa padayon sia nga gingamit ni Jehova?

8 Ang isa pa ka halimbawa sa Biblia amo ang natabo kay apostol Pedro. Ginpili sia ni Jesus nga mangin apostol; pero kon kaisa, may mahambal ukon mahimo si Pedro nga ginahinulsulan niya sa ulihi. Halimbawa, nagsiling si Pedro nga indi gid niya pagbiyaan si Jesus bisan pa himuon ini sang iban. (Mar. 14:27-31, 50) Pero, sang gindakop si Jesus, ginbiyaan sia sang tanan nga apostoles, lakip si Pedro. Sulitsulit pa gani nga ginpanghiwala ni Pedro si Jesus. (Mar. 14:53, 54, 66-72) Pero, naghinulsol si Pedro, kag padayon sia nga gingamit ni Jehova. Kon isa ikaw sa mga disipulo sadto, maapektuhan bala ang imo katutom kay Jehova bangod sang ginhimo ni Pedro?

9. Ngaa nagasalig ka nga makatarunganon pirme ang Dios?

9 Pila lang ini ka halimbawa sang mga tawo nga nakahimo sing mga butang nga nakasaklaw sa iban. Madamo pa nga alagad ni Jehova sadto kag sa aton tion ang nakahimo sing malain nga nakasaklaw sa iban. Kon matabo ini sa imo, ano ang imo mangin reaksion? Masandad ka bala sa ila mga sala, kag biyaan mo na si Jehova kag ang iya katawhan, kag indi ka na magpakig-upod sa kongregasyon? Ukon nagapati ka nga ginahatagan ni Jehova sing tion nga maghinulsol ang mga  nakasala, kag sa ulihi tadlungon niya ang kahimtangan sa makatarunganon nga paagi? Pero kon kaisa, ang mga nakahimo sing serioso nga mga sala wala nagahinulsol kag ginasikway nila ang kaluoy ni Jehova. Kon amo sini ang matabo, nagasalig ka bala nga maabot gid ang tion nga hukman sila ni Jehova, ayhan sikwayon sila sa kongregasyon?

HUPTI ANG KATUTOM

10. Ano ang reaksion ni Jesus sa sala ni Judas Iscariote kag ni Pedro?

10 Mabasa sa Biblia ang kasaysayan sang mga alagad sang Dios nga nagpabilin nga matutom kay Jehova kag sa iya katawhan bisan pa nakahimo sing serioso nga mga sala ang iban nila nga kaupdanan. Halimbawa, pagkatapos makapangamuyo sa iya Amay sa bug-os nga gab-i, ginpili ni Jesus ang iya 12 ka apostoles. Ang isa amo si Judas Iscariote. Sang ginluiban ni Judas si Jesus, wala niya gintugutan nga maapektuhan sini ang iya kaangtanan sa iya Amay, nga si Jehova; matuod man ini sang ginpanghiwala sia ni Pedro. (Luc. 6:12-16; 22:2-6, 31, 32) Nahibaluan ni Jesus nga indi dapat pagbasulon si Jehova ukon ang iya katawhan sa sala nga ginhimo sang iban. Ginpadayon ni Jesus ang iya tumalagsahon nga hilikuton wala sapayan sa mga kapaslawan sang pila niya ka sumulunod. Ginpadyaan sia ni Jehova paagi sa pagbanhaw sa iya, kag ginhimo niya sia nga Hari sa Ginharian sa langit.—Mat. 28:7, 18-20.

11. Ano ang gintagna sang Biblia parte sa mga alagad ni Jehova subong?

11 May basihan ang pagsalig ni Jesus kay Jehova kag sa iya katawhan, kag amo man kita. Kon binagbinagon naton ang mga nahimo ni Jehova paagi sa iya mga alagad sa sining katapusan nga mga adlaw, dalayawon gid ini. Wala na sing iban nga grupo nga nakabantala sing kamatuoran sa bilog nga kalibutan, kay ang nahiusa nga kongregasyon ni Jehova amo lang ang iya ginatuytuyan sa paghimo sini. Ginalaragway sang Isaias 65:14 ang espirituwal nga kahimtangan sang katawhan sang Dios subong: “Tan-awa! Ang akon mga alagad magasinggit sa kalipay bangod sang maayo nga kahimtangan sang tagipusuon.”

12. Paano naton dapat tamdon ang sala sang iban?

12 Nalipay gid ang mga alagad ni Jehova sa maayo nga mga butang nga ila ginahimo kay ginatuytuyan niya sila. Pero, ang katawhan sa kalibutan ni Satanas nagalalaw bangod sang nagalala nga kahimtangan. Kon makasala ang pila ka alagad sang Dios, indi gid maalamon kag rasonable nga basulon si Jehova ukon ang iya kongregasyon. Dapat naton huptan ang aton katutom kay Jehova kag sa iya kahimusan. Dapat man naton tun-an ang nagakaigo nga pagtamod ukon reaksion sa sala sang iban.

ANG NAGAKAIGO NGA REAKSION

13, 14. (a) Ngaa dapat kita mangin mapinasensiahon sa isa kag isa? (b) Ano nga saad ang dapat mangin maathag pirme sa aton?

13 Gani, ano ang dapat himuon kon ang isa ka alagad sang Dios may ginsiling ukon ginhimo nga nakasaklaw sa aton? Amo ini ang maayo nga prinsipio sang Biblia: “Indi ka mangakig dayon, kay ang nagapangakig dayon mga buangbuang.” (Man. 7:9) Dapat naton dumdumon nga mga 6,000 ka tuig na nga indi himpit ang katawhan, sugod pa sang natabo sa Eden. Indi kita tanan himpit amo nga makasala gid kita. Gani, indi kita dapat magpaabot nga indi makasala ang aton mga kauturan. Indi naton pagtugutan ang sala sang iban nga magdula sang aton kalipay nga bahin kita sang katawhan sang Dios sa sining katapusan nga mga adlaw. Mas malain pa gid kon masandad kita sa sala sang iban kag biyaan naton ang organisasyon ni Jehova. Kon matabo ini, madula naton  ang pribilehiyo sa paghimo sang kabubut-on sang Dios pati ang paglaum nga mabuhi sa bag-ong kalibutan sang Dios.

14 Para indi madula ang aton kalipay kag malig-on nga paglaum, dapat mangin maathag pirme sa aton ang makapaumpaw nga saad ni Jehova: “Tan-awa! Nagatuga ako sing bag-o nga langit kag bag-o nga duta; kag ang nagligad nga mga butang indi na pagdumdumon, ukon magpabilin sa tagipusuon.” (Isa. 65:17; 2 Ped. 3:13) Indi pagtuguti ang sala sang iban nga mag-upang sa imo nga matigayon ini nga mga pagpakamaayo.

15. Ano ang ginsiling ni Jesus nga himuon naton kon makasala ang iban?

15 Pero, bangod wala pa kita sa bag-ong kalibutan, dapat naton pamalandungan ang panghunahuna sang Dios parte sa nagakaigo nga himuon kon nasaklaw kita sa ginsiling ukon ginhimo sang iban. Halimbawa, ang isa ka prinsipio nga makabulig amo ang ginsiling ni Jesus: “Kon ginapatawad ninyo ang mga nakasala sa inyo, patawaron man kamo sang inyo langitnon nga Amay; apang kon wala ninyo ginapatawad ang mga nakasala sa inyo, indi man kamo pagpatawaron sang inyo Amay sa inyo mga sala.” Dumduma man nga sang namangkot si Pedro kon bala dapat kita magpatawad sing asta sa ‘pito ka beses,’ si Jesus nagsabat: “Nagasiling ako sa imo, indi pito ka beses, kundi 77 ka beses.” Maathag nga ginapahangop ni Jesus nga dapat handa kita pirme nga magpatawad; amo ini dapat ang panguna naton nga reaksion.—Mat. 6:14, 15; 18:21, 22.

16. Ano ang maayo nga halimbawa nga ginpakita ni Jose?

16 Ang isa ka maayo nga halimbawa sang nagakaigo nga reaksion kon makasala ang iban amo ang ginhimo ni Jose, nga panganay sa duha ka anak ni Jacob kay Raquel. Nahisa sa iya ang napulo niya ka utod sa amay kay sia ang paborito sang ila amay. Ginbaligya nila si Jose bilang ulipon. Pagkatapos sang madamo nga tuig, bangod sang maayo nga hinimuan ni Jose sa Egipto, ginhimo sia nga ikaduha nga manuggahom sang pungsod. Bangod sang tiggulutom, nagkadto sa Egipto ang mga utod ni Jose agod magbakal sing pagkaon pero wala nila sia makilala. Puede kuntani gamiton ni Jose ang iya awtoridad para balusan ang iya mga utod sa indi maayo nga pagtratar nila sa iya. Wala niya ginhimo ini. Sa baylo, gintilawan niya ang iya mga utod para mahibaluan kon nagbag-o na sila. Sang mapat-od ni Jose nga nagbag-o na sila, nagpakilala sia sa ila. Sang ulihi, nagsiling sia: “Indi kamo magkahadlok. Padayon nga hatagan ko kamo sing kalan-on kag ang inyo magagmay nga mga kabataan.” Nagdugang pa ang Biblia: “Ginpasalig sila ni Jose kag nalugpayan sila.”—Gen. 50:21.

17. Ano ang gusto mo himuon kon makasala sa imo ang iban?

17 Maayo man dumdumon nga bangod tanan kita makasala, mahimo nga masaklaw naton ang iban. Kon narealisar naton nga may nasaklaw kita, naglaygay ang Biblia nga kadtuan naton sia kag makighidait. (Basaha ang Mateo 5:23, 24.) Gusto naton nga ginapatawad kita sang iban, gani dapat amo man sini ang himuon naton sa ila. Ginapalig-on kita sang Colosas 3:13: “Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa. Subong nga si Jehova nagpatawad sing kinabubut-on sa inyo, amo man sini ang himuon ninyo.” Ang gugma sang isa ka Cristiano ‘wala nagaisip sang kahalitan,’ siling sang 1 Corinto 13:5. Kon ginapatawad naton ang iban, patawaron man kita ni Jehova. Gani, ano ang nagakaigo nga reaksion kon makasala sa aton ang iban? Bilang mga Cristiano, dapat naton ilugon ang kaluoy nga ginapakita sang aton Amay kon makasala kita.—Basaha ang Salmo 103:12-14.