Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Hunyo 2016

Batuna nga si Jehova ang Aton Maninihon

Batuna nga si Jehova ang Aton Maninihon

“O Jehova, . . . ikaw ang amon Maninihon; kami tanan binuhatan sang imo kamot.”—ISA. 64:8.

AMBAHANON: 89, 26

1. Ngaa si Jehova ang pinakaeksperto nga Maninihon?

SANG Nobiembre 2010, luyag baklon ang daga nga plorera nga ginhimo sang ika-18 nga siglo sa China sing halos 70 ka milyon ka dolyar didto sa London, England. Makadalayaw kon paano nakahimo ang maninihon sing matahom kag malahalon nga plorera halin sa ordinaryo nga daga. Pero wala sing maninihon nga mapaanggid kay Jehova. Sa katapusan nga bahin sang ikan-om nga adlaw sang pagpanuga, nagdihon ang Dios “halin sa yab-ok [daga] sang duta” sing himpit nga tawo kag ginhatagan niya sia sang ikasarang nga makapakita sang mga kinaiya sang iya Manughimo. (Gen. 2:7) Ining himpit nga tawo, nga si Adan, nga human sa duta matawag gid nga “anak sang Dios.”—Luc. 3:38.

2, 3. Paano naton mailog ang panimuot sang mahinulsulon nga mga Israelinhon?

2 Sang nagrebelde si Adan sa iya Manughimo, indi na sia anak sang Dios. Pero madamo sang kaliwat ni Adan ang nagpili kay Jehova nga ila Manuggahom. (Heb. 12:1) Paagi sa pagpasakop sa ila Manunuga, ginpakita nila nga sia ang luyag nila nga Amay kag Maninihon, indi si Satanas. (Juan 8:44) Ang ila katutom sa Dios nagapahanumdom sa aton sang ginsiling ni Isaias parte sa mahinulsulon nga mga Israelinhon: “O Jehova, ikaw ang amon Amay.  Kami ang daga, kag ikaw ang amon Maninihon; kami tanan binuhatan sang imo kamot.”—Isa. 64:8.

3 Ginatinguhaan subong sang tanan nga nagasimba kay Jehova sa espiritu kag kamatuoran nga ipakita ining mapainubuson kag mapinasakupon nga panimuot. Ginakabig nila nga dungog nga tawgon si Jehova nga ila Amay kag magpasakop sa iya subong ila Maninihon. Handa ka bala nga magpadihon sa Dios kag mangin mapuslanon nga suludlan para sa iya? Amo man bala sini ang imo pagkabig sa imo mga kauturan sa espirituwal nga padayon nga ginadihon sang Dios? Para matigayon naton ining husto nga panimuot, binagbinagon naton ang tatlo ka paagi nga nangin Maninihon naton si Jehova: Kon paano niya ginapili ang iya mga ginadihon, kon ngaa ginadihon niya sila, kag kon paano niya ini ginahimo.

GINAPILI NI JEHOVA ANG IYA MGA GINADIHON

4. Paano ginapili ni Jehova ang iya ginabuyok? Maghatag sing mga halimbawa.

4 Kon ginatalupangod ni Jehova ang mga tawo, wala sia nagatan-aw sa ila dagway. Sa baylo, ginausisa niya ang ila tagipusuon, ang nasulod nga pagkatawo. (Basaha ang 1 Samuel 16:7b.) Matuod ini sang gintukod sang Dios ang Cristianong kongregasyon. Madamo sang ginbuyok niya sa iya kag sa iya Anak ang daw wala sing pulos. (Juan 6:44) Isa sa ila amo ang Fariseo nga si Saulo, nga ‘manugpasipala, manughingabot, kag arogante nga tawo.’ (1 Tim. 1:13) Pero ang “nagausisa sang mga tagipusuon” wala nagkabig kay Saulo nga wala sing pulos nga daga. (Hulu. 17:3) Sa baylo, ginkabig sia sang Dios nga puede himuon subong mapuslanon nga suludlan, isa ka ‘pinili’ nga magapanaksi “sa mga pungsod, subong man sa mga hari kag sa mga anak ni Israel.” (Binu. 9:15) Ang iban nga gintamod sang Dios nga posible mangin mga suludlan “para sa dungganon nga katuyuan” naglakip sa mga palahubog, imoral, kag mga kawatan anay. (Roma 9:21; 1 Cor. 6:9-11) Sang gintun-an nila ang Pulong sang Dios, nagbakod ang ila pagtuo kay Jehova kag gintugutan nila sia nga dihunon sila.

5, 6. Paano ang aton pagsalig kay Jehova subong aton Maninihon may epekto sa aton panimuot sa (a) mga tawo sa aton teritoryo? (b) aton mga kauturan?

5 Paano makabulig sa aton ini nga impormasyon? Bangod sa aton pagtuo sa ikasarang ni Jehova nga basahon ang mga tagipusuon kag buyukon ang iya ginapili, buligan kita sini nga indi paghukman ang iban sa aton teritoryo kag sa aton kongregasyon. Binagbinaga ang halimbawa ni Michael. Nagsiling sia: “Kon may mga Saksi ni Jehova nga luyag makig-istorya sa akon, nagatalikod dayon ako kag wala ko sila ginasapak. Kabugalon gid sa akon! Pero may pamilya ako nga nanamian bangod sang ila maayo nga paggawi. Isa ka adlaw, nakibot gid ako sang nahibaluan ko nga mga Saksi ni Jehova gali sila! Bangod sang ila paggawi, gin-usisa ko kon ngaa nangin malain ang akon pagtamod sa ila. Narealisar ko nga wala gali ini sing basihan kag hinuringhuring lang.” Para makilala pa gid sila, nagbaton sing pagtuon sa Biblia si Michael. Sang ulihi, nabawtismuhan sia kag nangin bug-os tion nga alagad.

6 Kon ginabaton naton si Jehova subong aton Maninihon, may epekto man ang aton pagtamod sa aton mga kauturan. Ginatamod bala naton sila pareho sa pagtamod sang Dios, nga wala pa matapos ang pagdihon sa ila? Makita niya kon ano gid sila nga sahi sang persona kag kon ano ang ila potensial. Gani ginatamod sila ni Jehova nga kalahamut-an kag wala niya ginatan-aw ang ila mga kakulangan. (Sal. 130:3) Mailog naton sia kon amo man sini ang aton pagtamod sa aton mga kauturan. Makasuportar pa gani kita sa aton Maninihon kon buligan naton sila nga  mag-uswag. (1 Tes. 5:14, 15) Dapat mangin maayong halimbawa ang mga gulang parte sa sini kay sila “mga dulot nga mga lalaki.”—Efe. 4:8, 11-13.

NGAA GINADIHON KITA NI JEHOVA?

7. Ngaa luyag mo ang pagdisiplina ni Jehova?

7 Ang iban nagsiling: ‘Narealisar ko lang nga maayo gid kay gindisiplina ako sang akon mga ginikanan sang may kabataan na ako.’ Samtang nagaedad kita, mapabaloran pa gid naton ang disiplina bangod nahibaluan naton nga pagpakita ini sang gugma. (Basaha ang Hebreo 12:5, 6, 11.) Huo, ginadihon kita ni Jehova kay palangga niya kita nga kabataan. Luyag niya nga mangin maalam kag malipayon kita kag nga palanggaon man naton sia. (Hulu. 23:15) Nasubuan sia kon nagaantos kita, kag indi niya luyag nga matabo sa aton ang natabo kay Adan.—Efe. 2:2, 3.

8, 9. Paano kita ginatudluan ni Jehova subong, kag paano ini nga edukasyon magapadayon sa palaabuton?

8 Antes naton nakilala si Jehova, mahimo madamo kita sing sapatsapaton nga mga kinaiya nga ginadumtan sang Dios! Pero gindihon niya kita kag ginbuligan nga magbag-o, kag bilang resulta, may maayo na kita nga mga kinaiya subong sang mga karnero. (Isa. 11:6-8; Col. 3:9, 10) Nagapuyo kita sa espirituwal nga paraiso. Amo ini ang pinasahi nga kahimtangan nga ginahimo ni Jehova subong para madihon kita. Bangod sini, nagabatyag kita sang kalig-unan bisan malaut ang aton palibot. Ang pila sa aton nga nagdaku sadto nga wala sing pagpalangga sa sulod sang pamilya nakaeksperiensia na sang pagpalangga. (Juan 13:35) Kag natun-an naton nga higugmaon man ang iban. Labaw sa tanan, nakilala naton si Jehova kag naeksperiensiahan naton ang iya pagpalangga subong isa ka amay.—Sant. 4:8.

9 Sa bag-ong kalibutan, maeksperiensiahan naton sing bug-os ang mga pagpakamaayo sang espirituwal nga paraiso. Kag matigayon man naton ang literal nga paraiso sa idalom sang paggahom sang Ginharian sang Dios. Sa sinang tion sang pagpasag-uli sa duta, padayon nga dihunon ni Jehova ang pumuluyo sini. Tudluan niya sila sa kasangkaron nga indi pa naton mahangpan subong. (Isa. 11:9) Dugang pa, himuon sang Dios ang aton hunahuna kag lawas nga mangin himpit, para mahangpan naton sing maayo ang iya panudlo kag mahimo naton sing bug-os ang iya kabubut-on. Gani padayon kita nga magpadihon kay Jehova, kag tamdon naton ini nga pagpakita niya sang iya gugma sa aton.—Hulu. 3:11, 12.

KON PAANO KITA GINADIHON NI JEHOVA

10. Paano ginsunod ni Jesus ang pasensia kag pagkaeksperto sang Gamhanan nga Maninihon?

10 Pareho sang eksperto nga maninihon, nahibaluan ni Jehova ang mga sahi sang “daga” kag kon paano ang pagdihon sini. (Basaha ang Salmo 103:10-14.) Nagapakig-angot sia sa kada isa sa aton suno sa aton mga kaluyahon, limitasyon, kag sa aton espirituwalidad. Ang iya pagtamod sa iya indi himpit nga mga alagad ginpakita sang iya Anak. Binagbinaga kon ano ang ginhimo ni Jesus sa mga kakulangan sang iya mga apostoles, ilabi na ang pagbinaisay nila pirme kon sin-o ang pinakamataas sa ila. Kon nasaksihan mo ang pagbaisay sang mga apostoles, tamdon mo bala sila nga mapainubuson kag mahapos dihunon? Amo sini ang pagtamod ni Jesus. Nahibaluan niya nga puede dihunon ang iya matutom nga mga apostoles paagi sa paglaygay sa ila nga may kaayo kag pasensia kag paagi sa pagsunod nila sang iya pagkamapainubuson. (Mar. 9:33-37; 10:37, 41-45; Luc. 22:24-27) Pagkatapos mabanhaw si Jesus, nabaton sang mga apostoles ang balaan nga espiritu kag wala na sila magbaisay kon sin-o sa ila ang pinakamataas. Sa baylo, nagpokus sila sa hilikuton nga ginhatag ni Jesus sa ila.—Binu. 5:42.

11. Ngaa masiling naton nga mahapos dihunon si David, kag paano naton sia mailog?

 11 Ginadihon subong ni Jehova ang iya mga alagad paagi sa iya Pulong, balaan nga espiritu, kag Cristianong kongregasyon. Madihon kita sang Pulong sang Dios kon ginabasa naton ini, ginapamalandungan, kag ginapangabay ang bulig ni Jehova nga iaplikar ini. “Madumduman ko ikaw samtang nagahigda ako,” sulat ni David. “Nagapamalandong ako sa imo sa kagab-ihon.” (Sal. 63:6) Nagsulat man sia: “Dayawon ko si Jehova, nga naghatag sa akon sing laygay. Bisan sa tion sang kagab-ihon, ginatadlong sini ang akon pinakamadalom nga panghunahuna.” (Sal. 16:7) Gintugutan ni David ang laygay sang Dios nga dihunon sini ang iya pinakamadalom nga panghunahuna kag balatyagon, bisan pa masakit ini. (2 Sam. 12:1-13) Maayo gid para sa aton ang halimbawa ni David sa pagpaubos kag sa pagpasakop! Nagapamalandong ka man bala sa Pulong sang Dios, nga ginatugutan ini sa pagdihon sa imo pinakamadalom nga panghunahuna? Mapauswag mo pa bala ini?—Sal. 1:2, 3.

12, 13. Paano kita ginadihon ni Jehova paagi sa balaan nga espiritu kag sa Cristianong kongregasyon?

12 Madihon kita sang balaan nga espiritu sa pila ka paagi. Halimbawa, makabulig ini sa aton nga mapalambo ang personalidad sang Cristo, nga nagapakita sang mga kinaiya nga ginapatubas sang espiritu sang Dios. (Gal. 5:22, 23) Ang isa sini amo ang gugma. Ginahigugma naton ang Dios kag luyag naton nga tumanon sia kag dihunon niya kay nahibaluan naton nga indi mabug-at ang iya mga sugo. Mapabakod man kita sang balaan nga espiritu agod indi kita madihon sang kalibutan kag sang malain nga espiritu sini. (Efe. 2:2) Si apostol Pablo, nga naimpluwensiahan gid sang bugalon nga mga lider sang relihion sang mga Judiyo sang pamatan-on sia, nagsulat sang ulihi: “Sa tanan nga butang may kusog ako paagi sa isa nga nagapabakod sa akon.” (Fil. 4:13) Gani pangayuon naton pirme ang balaan nga espiritu pareho ni Pablo. Pamatian gid ni Jehova ang sinsero nga mga pangamuyo sang mahagop.—Sal. 10:17.

Ginagamit ni Jehova ang Cristianong mga gulang sa pagdihon sa aton, pero dapat manghikot man kita (Tan-awa ang parapo 12 kag 13)

 13 Ginagamit ni Jehova ang Cristianong kongregasyon kag ang mga manugtatap sini para dihunon ang kada isa sa aton. Halimbawa, kon nahantop sang mga gulang nga may mga problema kita sa espirituwal, ginatinguhaan nila nga buligan kita, pero indi paagi sa ila kaalam. (Gal. 6:1) Sa baylo, mapainubuson nga nagapangamuyo sila sa Dios sing paghangop kag kaalam. Naga-research sila dayon sa Pulong sang Dios kag sa aton Cristianong mga publikasyon para mabuligan nila kita suno sa aton mga kinahanglanon. Kon magpalapit sila sa imo para buligan ka upod ang kaayo kag gugma, pareho sang estilo sang imo pamayo, batunon mo bala ang ila laygay bilang pagpabutyag sang Dios sang iya gugma sa imo? Kon batunon mo ini, mangin mahapos ka dihunon ni Jehova para sa imo kaayuhan.

14. Bisan pa nga may kinamatarong si Jehova sa pagdihon sang daga, paano niya ginatahod ang aton kahilwayan sa pagpili?

14 Kon nahangpan naton kon paano kita ginadihon sang Dios, mangin maayo ang aton kaangtanan sa mga masigkatumuluo. Mangin positibo man ang aton pagtamod sa mga tawo sa aton teritoryo, lakip ang aton mga estudyante sa Biblia. Sa panahon sang Biblia, wala dayon ginadihon sang maninihon ang daga nga iya nakutkot. Ginakuhaan niya anay ini sang mga bato kag iban pa nga higko. Amo man sini ang ginahimo sang Dios sa espirituwal sa mga tawo nga luyag magpadihon. Ginabuligan niya sila nga magbag-o, pero wala niya sila ginapilit. Ginapakita niya sa ila ang iya matarong nga mga talaksan kag sila ang magapamat-od kon luyag nila nga sundon ini kag bag-uhon ang ila kabuhi.

15, 16. Paano ginapakita sang mga estudyante sa Biblia nga luyag nila nga dihunon sila ni Jehova? Iilustrar.

15 Binagbinaga ang halimbawa ni Tessie, isa ka sister sa Australia. “Dali mahangpan ni Tessie ang kamatuoran sa Biblia,” siling sang sister nga nagtuon sa iya. “Pero mahinay ang iya pag-uswag sa espirituwal kag wala pa sia makatambong sa Cristianong mga miting! Gani pagkatapos nga ipangamuyo ini, namat-od na ako nga untatan ang pagtuon. Pero may makatilingala nga natabo. Nagtu-ad si Tessie sa akon samtang nagatuon kami sa Biblia. Pamatyag niya daw ipokrita sia kay nanamian sia manahor. Pero namat-od na sia nga untatan ini.”

16 Pagkatapos sadto, nagsugod na sa pagtambong sa Cristianong mga miting si Tessie kag ginapakita na niya ang Cristianong personalidad bisan pa nga ginayaguta sia sang iya mga kaupdanan sadto. Ang sister nagsiling: “Sang ulihi, ginbawtismuhan si Tessie kag nangin regular payunir, bisan pa nga may magagmay sia nga kabataan.” Maathag nga kon ang mga estudyante sa Biblia magbag-o para pahamut-an ang Dios, magasuod sia sa ila kag dihunon niya sila para mangin mapuslanon nga mga suludlan.

17. (a) Ngaa nalipay ka kay si Jehova ang imo Maninihon? (b) Ano ang masunod nga binagbinagon parte sa pagdihon?

17 Bisan subong, ang pila ka mga suludlan mahalungon gihapon nga ginadihon sang kamot. Sing kaanggid, mahalungon man kag mapinasensiahon nga ginadihon kita sang aton Maninihon paagi sa iya mga laygay, kag ginatalupangod niya sing maayo kon paano kita nagatuman sa iya. (Basaha ang Salmo 32:8.) Kumbinsido ka bala nga nagaulikid si Jehova sa imo? Makita mo bala nga ginadihon ka niya sing mahalungon? Kon amo, ano pa nga mga kinaiya ang magabulig sa imo nga mangin mahumok kag mahapos dihunon nga daga sa atubangan ni Jehova? Ano nga mga panimuot ang dapat mo likawan para indi ka magtig-a ukon mabudlay dihunon? Kag paano makabulig ang mga ginikanan kay Jehova sa pagdihon sang ila kabataan? Ipaathag ini sang masunod nga artikulo.