Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HUNYO 2016

Diosnon nga Kinaiya nga Mas Hamili Sangsa Diamante

Diosnon nga Kinaiya nga Mas Hamili Sangsa Diamante

Hamili gid para sa mga tawo ang diamante. Nagalab-ot sa minilyon ka dolyar ang bili sini. Pero, sa pagtamod sang Dios, may mas hamili pa bala sangsa diamante ukon iban pa nga malahalon nga mga bato?

 Si Haykanush, nga isa ka di-bawtismado nga manugbantala sa Armenia, nakakita sing passport malapit sa ila balay. May unod ini nga pila ka debit card kag daku nga kantidad sang kuarta. Ginsugid niya ini sa iya bana, nga isa man ka di-bawtismado nga manugbantala.

Kinahanglan gid sini nga mag-asawa ang kuarta bangod sang ila utang; pero, nagdesisyon sila nga dalhon ang kuarta sa adres sa passport. Nakibot gid ang lalaki nga tag-iya sang passport, kag amo man ang iya pamilya. Ginpaathag ni Haykanush kag sang iya bana nga bunayag sila bangod nagatuon sila sa Biblia. Gingamit nila ini nga kahigayunan para panaksihan ang pamilya parte sa mga Saksi ni Jehova kag ginbilinan nila sila sing pila ka literatura.

Gusto sang pamilya nga hatagan si Haykanush sing kuarta bilang pasalamat, pero wala niya ini ginbaton. Pagkasunod nga adlaw, ang asawa sang lalaki nagkadto sa balay nanday Haykanush. May dala sia nga singsing nga diamante kag ginpilit niya si Haykanush nga batunon ini bilang pasalamat sang ila pamilya.

Pareho sini nga pamilya, madamo nga tawo ang makibot man sa pagkabunayag ni Haykanush kag sang iya bana. Pero nakibot bala si Jehova? Ano ang iya pagtamod sa ila pagkabunayag? Husto bala nga nangin bunayag sila?

MGA KINAIYA NGA MAS HAMILI SANGSA MATERYAL NGA MGA BUTANG

Indi mabudlay sabton ini nga mga pamangkot. Nagapati ang mga alagad sang Dios nga ang pagpakita sing mga kinaiya ni Jehova mas hamili sa iya panulok sangsa diamante, bulawan, ukon iban pa nga materyal nga mga butang. Huo, magkatuhay ang pagtamod ni Jehova kag sang kalabanan nga tawo sa kon ano ang hamili kag kon ano ang indi. (Isa. 55:8, 9) Para sa mga alagad ni Jehova, ang pagpabanaag sang iya mga kinaiya sa bug-os nila nga masarangan amo ang mas hamili.

Makita naton ini sa ginasiling sang Biblia parte sa paghantop kag kaalam. Ang Hulubaton 3:13-15 nagasiling: “Malipayon ang tawo nga nakaangkon sing kaalam kag ang tawo nga nakatigayon sing paghantop; kay ang pagtigayon sini mas maayo pa sangsa pagtigayon sing pilak, kag ang pagtigayon sini subong ginansia mas maayo pa sangsa pag-agom sing bulawan. Mas bilidhon pa ini sangsa mga korales; wala sang bisan ano nga puede mo handumon nga mapaanggid sa sini.” Maathag nga mas ginapabaloran ni Jehova ini nga mga kinaiya sangsa materyal nga mga bahandi.

Amo man bala sini ang pagkabunayag?

Si Jehova mismo bunayag; “indi [sia] makabutig.” (Tito 1:2) Kag gintuytuyan niya si apostol Pablo sa pagsulat sa Hebreo nga mga Cristiano sang unang siglo: “Padayon kamo nga magpangamuyo para sa amon, kay nagasalig kami nga may bunayag kami nga konsiensia, kag luyag namon magkabuhi sing bunayag sa tanan nga butang.”—Heb. 13:18.

Maayo nga halimbawa si Jesucristo sa pagkabunayag. Isa ka bes, nagsiling ang Mataas nga Saserdote nga si Caifas: “Ginapasumpa ko ikaw sa atubangan sang buhi nga Dios nga maghambal ka sing matuod kag isugid sa amon kon bala ikaw ang Cristo, ang Anak sang Dios!” Bunayag si Jesus kag ginsugid niya ang matuod nga sia ang Mesias, bisan pa nahibaluan niya nga mahimo sia isumbong sang Sanhedrin nga nagapasipala sia kag mahimo sia patyon.—Mat. 26:63-67.

Kamusta kita? Kon may kahigayunan nga makakuarta kita, pero kinahanglan nga indi naton pag-isugid ang tanan nga impormasyon ukon bag-uhon naton ang pila ka detalye, mangin bunayag pa bala kita?

 NGAA MABUDLAY MANGIN BUNAYAG?

Ang matuod, mabudlay mangin bunayag sa sining katapusan nga mga adlaw kay madamo ang “mahigugmaon sa kaugalingon, mahigugmaon sa kuarta.” (2 Tim. 3:2) Ang problema sa pinansial kag pagpangita sang obra nagapabudlay sa isa ka tawo nga mangin bunayag. Madamo ang nagapati nga may rason sila nga mangawat, mangdaya, ukon maghimo sing indi bunayag nga mga buhat. Lapnag gid ini nga pagpati amo nga kon kuarta gani ang nadalahig, indi importante para sa madamo ang pagkabunayag. Bisan gani ang pila ka Cristiano nakahimo sing indi maayo nga mga desisyon kag bangod sa ‘pagpamentaha sa indi bunayag nga paagi’ nadula nila ang ila maayo nga tindog sa kongregasyon.—1 Tim. 3:8; Tito 1:7.

Pero, ang kalabanan nga Cristiano nagailog kay Jesus. Narealisar nila nga ang diosnon nga mga kinaiya mas importante sangsa bisan ano nga manggad ukon bentaha. Gani, ang pamatan-on nga mga Cristiano wala nagapangopya ukon nagapangodigo sa eskwelahan para magtaas ang ila grado. (Hulu. 20:23) Matuod, indi sa tanan nga tion padyaan ang aton pagkabunayag, subong sang natabo kay Haykanush. Pero, ang pagkabunayag amo ang husto nga himuon sa panulok sang Dios, kag nagaresulta ini sa matinlo nga konsiensia, nga bilidhon gid.

Maathag ini nga makita sa natabo kay Gagik. Nagsiling sia: “Antes ako mangin Cristiano, nagaobra ako sa isa ka daku nga kompanya nga ang tag-iya nagalikaw sa pagbayad sing buhis paagi sa indi pagreport sang matuod nga kinitaan sang kompanya. Bilang manedyer, ginabayaran ko ang tax auditor para pabay-an lang niya ang pagpangdaya sang kompanya. Bangod sini, nakilala ako nga indi bunayag nga tawo. Sang natun-an ko ang kamatuoran, gin-untatan ko ini, bisan pa nga daku ang sueldo sa sini nga obra. Sa baylo, nagpatindog ako sang akon negosyo. Sugod sa umpisa, legal ko nga ginparehistro ang akon kompanya kag ginbayaran ko ang tanan ko nga buhis.”—2 Cor. 8:21.

Nagsiling si Gagik: “Mga katunga na lang sang sueldo ko sang una ang akon kinitaan subong, gani mabudlay ang pag-aman sa akon pamilya. Pero, mas malipayon ako. Matinlo ang akon konsiensia sa atubangan ni Jehova. Maayo ako nga halimbawa sa akon duha ka bata nga lalaki, kag may mga pribilehiyo ako sa kongregasyon. Sa mga tax auditor kag sa iban nga akon ginatransaksion sa negosyo, kilala na ako bilang isa ka bunayag nga tawo.”

GINABULIGAN KITA NI JEHOVA

Palangga ni Jehova ang mga nagapatahom sang iya panudlo paagi sa pagpakita sang iya tumalagsahon nga mga kinaiya, lakip ang pagkabunayag. (Tito 2:10) Gin-inspirar niya si Hari David sa paghatag sini nga pasalig: “Nangin pamatan-on ako kag karon tigulang na, apang wala pa ako makakita sang matarong nga ginpabay-an, ukon sang iya mga anak nga nagapangayukayo sing tinapay.”—Sal. 37:25.

Naeksperiensiahan ini mismo sang matutom nga si Rut. Gin-unungan niya ang iya tigulang na nga ugangan nga si Noemi. Nagsaylo sia sa Israel para simbahon ang matuod nga Dios. (Rut 1:16, 17) Nangin bunayag si Rut kag nangin mapisan sa pagpanaghaw suno sa kahimusan sang Kasuguan. Pareho sang natabo sang ulihi kay David, wala ginpabay-an ni Jehova sanday Rut kag Noemi. (Rut 2:2-18) Pero indi materyal lang ang gin-aman ni Jehova kay Rut. Ginpili pa niya sia nga mangin katigulangan ni Hari David kag bisan sang ginsaad nga Mesias!—Rut 4:13-17; Mat. 1:5, 16.

Ang pila ka alagad ni Jehova mahimo nabudlayan sa pagtigayon sang ila matag-adlaw nga mga kinahanglanon. Nagapangabudlay  sila sing lakas kag nangin mapisan sa baylo nga magpatawhay lang paagi sa indi bunayag nga obra. Gani ginapakita nila nga mas hamili sangsa materyal nga butang ang tumalagsahon nga mga kinaiya sang Dios, lakip ang pagkabunayag.—Hulu. 12:24; Efe. 4:28.

Pareho ni Rut, ang mga Cristiano sa bilog nga kalibutan nagapati nga buligan sila ni Jehova. Nagasalig gid sila sa Isa nga nagsaad sa iya Pulong: “Indi ko gid kamo pagbayaan, kag indi ko gid kamo pagpabay-an.” (Heb. 13:5) Pirme ginpakita ni Jehova nga masarangan niya magbulig sa bunayag nga mga imol kag gusto niya nga himuon ini. Nangin matuod ang iya saad nga amanan niya sila sang ila matag-adlaw nga mga kinahanglanon.—Mat. 6:33.

Huo, mahimo pabaloran sang mga tawo ang diamante kag iban pa hamili nga butang. Pero makasalig kita nga, para sa aton Amay sa langit, mas hamili pa sa iya ang pagpakita naton sang pagkabunayag kag sang iban pa niya nga kinaiya sangsa hamili nga mga hiyas!

Kon bunayag kita, may matinlo kita nga konsiensia kag kahilwayan sa paghambal sa ministeryo