Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ENERO 2016

Pagpangabudlay Upod sa Dios—Rason nga Magkalipay

Pagpangabudlay Upod sa Dios—Rason nga Magkalipay

“Bangod nagapangabudlay kami kaupod niya, ginahingyo man namon kamo nga indi pagwasihon ang katuyuan sang wala tupong nga kaayo sang Dios nga inyo nabaton.”—2 COR. 6:1.

AMBAHANON: 75, 74

1. Bisan pa si Jehova ang Supremo nga Dios, sa ano niya gin-agda ang iban?

SI Jehova ang Supremo nga Dios, ang Manunuga sang tanan nga butang, kag wala sing limitasyon ang iya kaalam kag gahom. Nahangpan ini ni Job sang ulihi. Sang ginpamangkot ni Jehova si Job parte sa Iya mga tinuga, nagsabat si Job: “Nahibaluan ko na karon nga masarangan mo himuon ang tanan nga butang kag wala sing butang nga ginahunahuna mo nga indi mo mahimo.” (Job 42:2) Bisan pa mahimo ni Jehova ang bisan ano nga gusto niya—nga wala sing bulig sang iban—halin pa sang una, mahigugmaon na niya nga gin-agda ang iban nga magpangabudlay upod sa iya para matuman ang iya katuyuan.

2. Sa ano nga importante nga hilikuton gin-agda ni Jehova si Jesus?

2 Una nga gintuga sang Dios ang iya bugtong nga espiritu nga Anak. Gintugutan ni Jehova ang iya Anak nga magpangabudlay upod sa iya sa pagtuga sa iban pa nga butang sa langit kag sa duta. (Juan 1:1-3, 18) Nagsulat si apostol Pablo parte kay Jesus: “Paagi sa iya gintuga ang tanan iban pa nga butang sa langit kag sa duta, ang mga butang nga makita kag indi makita, mga trono man ini ukon  mga pagkaginuo ukon mga panguluhan ukon mga awtoridad. Ang tanan iban pa nga butang gintuga paagi sa iya kag para sa iya.” (Col. 1:15-17) Gani, ginpadunggan ni Jehova ang iya Anak paagi sa paghatag sa iya sang importante nga bahin sa pagpanuga kag paagi sa pagsugid sini sa iban.

3. Sa ano nga hilikuton gin-agda ni Jehova si Adan, kag ngaa?

3 Gin-agda man ni Jehova ang mga tawo nga magpangabudlay upod sa iya. Halimbawa, gintugutan niya si Adan nga ngalanan ang mga sapat. (Gen. 2:19, 20) Mahimo gid nga nalipay si Adan nga panilagan ini nga mga tinuga, tun-an ang mga kinaiya sini, kag magpili sang nagakabagay nga ngalan para sa kada isa! Puede ngalanan ni Jehova ang mga sapat kay sia ang nagtuga sini. Pero mahigugmaon niya ini nga ginpahimo kay Adan. Ginhatagan man sang Dios si Adan sing kahigayunan nga himuon nga paraiso ang bilog nga duta pareho sang Eden. (Gen. 1:27, 28) Makapasubo kay ginpili ni Adan nga indi magpangabudlay upod sa Dios, kag nagresulta ini sang kapahamakan sa iya kag sa tanan niya nga kaliwat.—Gen. 3:17-19, 23.

4. Paano nagpangabudlay ang iban upod sa Dios para matuman ang iya kabubut-on?

4 Sang ulihi, gin-agda sang Dios ang iban pa nga magpangabudlay upod sa iya para matuman ang iya katuyuan. Naghimo si Noe sang arka kag paagi sini naluwas sia kag ang iya pamilya sa bug-os kalibutan nga Anaw. Ginluwas ni Moises ang pungsod sang Israel sa Egipto. Gintuytuyan ni Josue ini nga pungsod pasulod sa Ginsaad nga Duta. Gintukod ni Solomon ang templo sa Jerusalem. Si Maria nangin iloy ni Jesus. Tanan sila nga matutom kag ang madamo pa nga iban nagpangabudlay upod kay Jehova para matuman ang iya kabubut-on.

5. Sa ano nga hilikuton kita makapakigbahin, kag kinahanglan bala ini ipahimo ni Jehova sa aton? (Tan-awa ang piktyur sa umpisa sini nga artikulo.)

5 Ginaagda kita subong ni Jehova nga sakdagon sing bug-os ang Mesianiko nga Ginharian. May madamo nga paagi sang sagrado nga pag-alagad. Ang pila sini indi mahimo sang iban nga Cristiano, pero tanan kita makapakigbahin sa pagbantala sang maayong balita sang Ginharian. Indi ini kinahanglan ipahimo ni Jehova sa aton. Puede man sia maghambal sing direkta sa mga tawo sa duta bisan didto sia sa langit. Nagsiling si Jesus nga mapasinggit ni Jehova ang mga bato parte sa Mesianiko nga Hari. (Luc. 19:37-40) Pero gintugutan kita ni Jehova nga mangin iya “mga masigkamanugpangabudlay.” (1 Cor. 3:9) Nagsulat si apostol Pablo: “Bangod nagapangabudlay kami kaupod niya, ginahingyo man namon kamo nga indi pagwasihon ang katuyuan sang wala tupong nga kaayo sang Dios nga inyo nabaton.” (2 Cor. 6:1) Ang pagpangabudlay upod sa Dios isa ka daku gid nga kadungganan nga makapahalipay sa aton. Binagbinagon naton ang pila ka rason kon ngaa.

ANG PAGPANGABUDLAY UPOD SA DIOS NAGAPAHALIPAY SA ATON

6. Paano ginlaragway sang panganay nga Anak sang Dios ang ginbatyag niya sang nagpangabudlay sia upod sa iya Amay?

6 Halin pa sang una, nalipay ang mga alagad ni Jehova sa pagpangabudlay upod sa iya. Ang panganay nga espiritu nga Anak sang Dios, nga ginlaragway bilang himpit nga halimbawa sang kaalam, nagsiling: “Ginhimo ako ni Jehova subong panugod sang iya dalanon . . . Yara na ako sadto sa tupad niya subong batid nga manugpangabudlay. Ako gid ang iya kalipay sa adlaw-adlaw; nalipay man ako pirme sa atubangan niya.” (Hulu. 8:22, 30) Sang nagpangabudlay si Jesus upod sa iya Amay, nalipay sia sa iya hinimuan kag sa paghibalo nga nalipay si Jehova sa iya. Malipay man bala kita?

May mas makalilipay pa bala sangsa tudluan ang iban sang kamatuoran? (Tan-awa ang parapo 7)

7. Ngaa nagapahalipay sa aton ang pagbantala?

7 Nagsiling si Jesus nga malipayon kita kon nagahatag kita kag nagabaton. (Binu. 20:35)  Nalipay kita sa pagbaton sang kamatuoran kag sa pagsugid sini sa iban. Samtang ginasugid naton sa iban ang kamatuoran sang Biblia, makita naton ang mga ginagutom sa espirituwal nga nalipay nga makilala ang aton Dios kag mahangpan ang hamili nga mga kamatuoran sa iya Pulong. Natandog ang aton tagipusuon nga makita nga ginabag-o nila ang ila hunahuna kag pagkabuhi. Nahibaluan naton nga importante gid ang pagbantala sang maayong balita. Ginahatagan sini sing paglaum nga mabuhi sing wala katapusan ang mga nagpasag-uli sa Dios. (2 Cor. 5:20) May mas makalilipay pa bala nga hilikuton sangsa buligan ang mga tawo nga magbag-o para mabuhi sing wala katapusan?

8. Ano ang ginsiling sang iban parte sa ila kalipay sa pagpangabudlay upod kay Jehova?

8 Nalipay kita kon magpamati ang mga tawo sa mensahe nga aton ginabantala, kag nalipay man kita kay nahibaluan naton nga nahamuot si Jehova kag ginaapresyar niya ang pagpanikasog naton sa pag-alagad sa iya. (Basaha ang 1 Corinto 15:58.) Si Marco, nga taga-Italya, nagsiling: “Nalipay gid ako kay nahibaluan ko nga ginahatag ko ang akon pinakamaayo kay Jehova kag indi sa isa nga malipat sa akon ginhimo.” Pareho man sa iya ang ginsiling ni Franco, nga nagaalagad man sa Italya: “Ginapahanumdom kita ni Jehova adlaw-adlaw paagi sa iya Pulong kag espirituwal nga mga aman nga palangga niya kita kag importante ang tanan nga ginahimo naton para sa iya, bisan pa pamatyag naton daw wala pulos ang aton pagpanikasog. Amo sini kon ngaa ang pagpangabudlay upod sa Dios nagapahalipay sa akon kag nagahatag sang katuyuan sa akon kabuhi.”

ANG PAGPANGABUDLAY UPOD SA DIOS NAGAPASUOD SA ATON SA IYA KAG SA IBAN

9. Daw ano kasuod sanday Jehova kag Jesus, kag ngaa?

9 Kon nagapangabudlay kita upod sa mga ginahigugma naton, nagasuod kita sa ila kag mahibaluan naton ang ila personalidad kag mga kinaiya. Mahibaluan naton indi lamang ang gusto nila himuon kundi kon paano man nila ini ginahimo. Mahimo nga nagpangabudlay si Jesus upod kay Jehova sing binilyon ka tuig, gani nangin mabakod kag malig-on ang ila gugma kag pagpalangga sa isa kag isa. Ginlaragway ni Jesus kon daw ano sila kasuod: “Ako kag ang Amay isa.” (Juan 10:30) Nahiusa gid sila kag pirme magkaupod nga nagapangabudlay.

10. Ngaa nagasuod kita sa Dios kag sa iban kon nagabantala kita?

10 Ginpangabay ni Jesus si Jehova nga bantayan ang iya mga disipulo. Ngaa? Nangamuyo sia: “Agod mangin isa sila subong nga kita isa.” (Juan 17:11) Kon ginasunod naton ang mga talaksan sang Dios kag nagapakigbahin kita sa pagbantala, mahangpan naton ang iya matahom nga mga kinaiya. Matun-an naton kon ngaa maalamon magsalig sa iya kag magsunod sa iya panuytoy. Kon magpalapit kita sa Dios, nagasuod sia sa aton. (Basaha ang Santiago 4:8.) Nagasuod man kita sa aton mga kauturan bangod pareho nga mga kabudlayan kag kalipay ang aton naeksperiensiahan kag pareho ang aton mga  tulumuron. Huo, magkaupod kita nga nagapangabudlay, nagakalipay, kag nagabatas. Si Octavia, nga taga-Britanya, nagsiling: “Ang pagpangabudlay upod kay Jehova nagapasuod sa akon sa iban bangod indi hapaw ang akon pagpakig-abyan kag kaangtanan sa ila kundi nabase ini sa pareho nga tulumuron kag katuyuan.” Amo man bala sini ang imo ginabatyag? Indi bala nga nagasuod ka man sa iban kon makita mo nga nagapanikasog sila nga pahamut-an si Jehova?

11. Ngaa magasuod pa gid kita kay Jehova kag sa aton mga kauturan sa bag-o nga kalibutan?

11 Mahimo nga mabakod subong ang aton gugma sa Dios kag sa aton isigkatawo, pero mas magabakod pa ini sa matarong nga bag-o nga kalibutan. Hunahunaa ang himuon naton sa palaabuton! Abiabihon naton ang mga pagabanhawon kag tudluan sila parte kay Jehova. Himuon man naton nga paraiso ang duta. Importante ini nga mga hilikuton kag makalilipay gid nga magpangabudlay sing nahiusa kag amat-amat nga mangin himpit kon maggahom na ang Mesianiko nga Ginharian! Magasuod pa gid ang pamilya sang tawo sa kada isa kag sa ila Dios, nga pat-od nga ‘magahatag sang handum sang tagsa ka buhi nga butang.’—Sal. 145:16.

ANG PAGPANGABUDLAY UPOD SA DIOS NAGAAMLIG SA ATON

12. Paano nagaamlig sa aton ang pagbantala?

12 Dapat naton amligan ang aton espirituwalidad. Bangod nagakabuhi kita sa kalibutan nga ginagamhan ni Satanas nga Yawa kag indi kita himpit, madali kita maimpluwensiahan sang sala nga panghunahuna kag paggawi sang kalibutan. Mapaanggid ang espiritu sang kalibutan sa sulog sang suba nga nagaanod sa aton sa direksion nga indi naton gusto. Para indi maanod, dapat naton sugataon ang sulog kag maglangoy sing todo. Sing kaanggid, dapat gid kita magpanikasog nga indi madala sang espiritu sang kalibutan ni Satanas. Kon nagabantala kita sa iban, nagakonsentrar kita sa importante kag mapuslanon nga mga butang sa espirituwal, indi sa panghunahuna nga makaguba sang aton pagtuo. (Fil. 4:8) Ginapabakod sang pagbantala ang aton pagtuo, kay ginapahanumdom sini sa aton ang mga saad sang Dios kag ang iya mahigugmaon nga mga talaksan. Nagabulig man ini para indi maguba ang aton espirituwal nga hinganib.—Basaha ang Efeso 6:14-17.

13. Ano ang ginsiling sang isa ka Saksi sa Australia parte sa nabulig sa iya sang pagbantala?

13 Kon masako kita sa pagbantala kag sa iban pa nga hilikuton sa espirituwal, wala na kita sing tion nga mabalaka sing tuman sa aton mga problema, kag nagaamlig ini sa aton. Si Joel, nga taga-Australia, nagsiling: “Ang pagbantala nagabulig sa akon nga mangin realistiko. Bangod sini, makita ko ang mga problema sang mga tawo kag ang benepisyo nga nabaton ko sa pagsunod sang mga prinsipio sa Biblia sa akon kabuhi. Ang pagbantala nagabulig sa akon nga pirme magpaubos. Bangod sini, mas nagasalig ako kay Jehova kag sa akon mga kauturan.”

14. Ngaa ang pagpadayon naton sa pagbantala pamatuod nga yara sa aton ang espiritu sang Dios?

14 Ginapabakod man sang pagbantala ang aton pagsalig nga yara sa aton ang espiritu sang Dios. Binagbinaga ini: Halimbawa may gintanyag sa imo nga obra nga ipanghatag ang masustansia nga tinapay sa mga tawo sa inyo lugar. Indi ka pagsuelduhan kag indi man pag-ibalik sa imo ang imo magasto. Sa ulihi, mabal-an mo nga indi gali gusto sang kalabanan ang tinapay kag maugot pa gani ang iban sa imo kay ginpanghatag mo ini. Maagwanta mo bala ini nga obra? Basi maluyahan ka sa reaksion sang mga tawo kag mag-untat dayon. Pero, madamo sa aton ang nagapadayon sa pagministeryo sing tinuig na kag ginagamit naton ang aton kuarta kag  tion bisan pa ginayaguta kag ginapakalain kita sang mga wala nagaapresyar. Indi bala nga pamatuod ini nga ginabuligan kita sang espiritu sang Dios?

PAGPAKITA SANG ATON GUGMA SA DIOS KAG SA IBAN

15. Ano ang kaangtanan sang pagbantala sang maayong balita sa katuyuan sang Dios para sa katawhan?

15 Hunahunaa lang ang kaangtanan sang pagbantala sang maayong balita sa mahigugmaon nga katuyuan ni Jehova para sa katawhan. Katuyuan niya nga magpuyo sa duta ang mga tawo kag indi mapatay. Bisan pa nakasala si Adan, wala magbag-o ang katuyuan ni Jehova. (Isa. 55:11) Sa baylo, naghimo sia sang paagi para maluwas ang mga tawo sa sala kag kamatayon. Nagkadto si Jesus sa duta sa sini nga katuyuan kag ginhalad ang iya kabuhi para sa matinumanon nga mga tawo. Pero dapat nila mahangpan ang mga ginapatuman sang Dios sa ila para matuman nila sia. Gani gintudlo man ni Jesus sa mga tawo ang mga ginapatuman sang Dios, kag ginsugo niya ang iya mga disipulo nga himuon man ini. Paagi sa pagbulig sa iban nga magpasag-uli sa Dios, may direkta kita nga bahin sa iya mahigugmaon nga pagluwas sa katawhan sa sala kag kamatayon.

16. Ano ang kaangtanan sang aton pagbantala sa pinakaimportante nga mga sugo sang Dios?

16 Kon ginabuligan naton ang iban para matigayon nila ang wala katapusan nga kabuhi, ginapakita naton ang aton gugma sa aton isigkatawo kag kay Jehova, “nga ang kabubut-on amo nga ang tanan nga sahi sang tawo maluwas kag makadangat sa sibu nga ihibalo tuhoy sa kamatuoran.” (1 Tim. 2:4) Sang ginpamangkot si Jesus kon ano ang pinakaimportante sa tanan nga sugo nga ginhatag sa pungsod sang Israel, nagsabat sia: “‘Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang nahauna kag pinakaimportante nga sugo. Ang ikaduha, nga kaangay man sini, amo ini: ‘Higugmaa ang imo isigkatawo subong sang imo kaugalingon.’” (Mat. 22:37-39) Kon nagabantala kita, ginatuman naton ini nga mga sugo.—Basaha ang Binuhatan 10:42.

17. Ano ang masiling mo sa kadungganan nga magbantala sang maayong balita?

17 Ginpakamaayo gid kita! Ginhatagan kita ni Jehova sing hilikuton nga nagapahalipay sa aton, nagapasuod sa aton sa iya kag sa iban, kag nagaamlig sa aton sa espirituwal. Paagi sini, mapakita man naton ang aton gugma sa Dios kag sa aton isigkatawo. Indi palareho ang kahimtangan sang katawhan sang Dios sa bilog nga duta, pero minilyon sa ila, bata man ukon tigulang, manggaranon ukon imol, mabakod ukon maluya, ang nagatinguha nga ipaambit sa iban ang ila pagtuo. Mahimo gid nga magaugyon ka kay Chantel nga taga-Pransia. Nagsiling sia: “Ang pinakagamhanan nga Persona sa uniberso, ang Manunuga sang tanan nga butang, ang malipayon nga Dios, nagsiling sa akon: ‘Lakat ka! Maghambal ka! Ihambal sing tinagipusuon ang akon mensahe. Hatagan ko ikaw sang akon kusog, akon Pulong nga Biblia, bulig sang mga anghel, kaupdanan sa duta, paghanas, kag maathag nga mga instruksion sa nagakaigo nga tion.’ Daku gid nga pribilehiyo nga himuon ang ginapahimo ni Jehova sa aton kag magpangabudlay upod sa aton Dios!”