Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ENERO 2016

Ang Espiritu Nagahatag sing Pamatuod sa Aton Espiritu

Ang Espiritu Nagahatag sing Pamatuod sa Aton Espiritu

“Ang espiritu mismo nagahatag sing pamatuod sa aton espiritu nga kita mga anak sang Dios.”—ROMA 8:16.

AMBAHANON: 109, 108

1-3. Ano ang mga natabo sang Pentecostes amo nga nangin pinasahi ini nga adlaw, kag paano sini gintuman ang gintagna sa Kasulatan? (Tan-awa ang piktyur sa umpisa sini nga artikulo.)

DOMINGO sadto, mga alas nuebe sang aga. Pinasahi ini nga Domingo para sa mga yara sa Jerusalem. Kapiestahan sadto kag adlaw man nga inugpahuway. Mahimo gid nga tapos na ang paghalad sa templo nga regular nga ginahimo kon aga. Nalangkag ang tanan samtang nagahanda ang mataas nga saserdote sa paghalad sang dulot nga hinabog nga duha ka tinapay nga may lebadura. Naghalin ini sa una nga patubas sang trigo. (Lev. 23:15-20) Ginapahibalo sini nga paghalad ang pagsugod sang pag-ani sang trigo. Tuig 33 C.E. sadto, kag adlaw sang Pentecostes.

2 Samtang nagakatabo ini sa templo, may mahanabo nga mas importante, indi sa templo, kundi sa isa ka kuarto sa ibabaw sa siudad. Nagtipon ang mga 120 ka Cristiano kag “nagpadayon sa pagpangamuyo.” (Binu. 1:13-15) Mahanabo sa ila ang pareho sa ginahimo sang mataas nga saserdote kon Pentecostes, kag matuman man ang gintagna ni manalagna Joel mga 800 ka tuig ang nagligad. (Joel 2:28-32; Binu. 2:16-21) Ano ayhan ang importante nga matabo?

 3 Basaha ang Binuhatan 2:2-4. Ginbubo ang balaan nga espiritu sang Dios sa sini nga mga Cristiano nga nagtipon sa kuarto sa ibabaw. (Binu. 1:8) Dayon nagpanagna sila, ukon nagpanaksi, parte sa makatilingala nga mga butang nga ila nakita kag nabatian. Ginpaathag ni apostol Pedro sa kadam-an nga nagtipon sang ulihi kon ano ang kahulugan sang natabo. Dayon ginsilingan niya sila: “Maghinulsol kamo, kag magpabawtismo kamo sa ngalan ni Jesucristo para sa kapatawaran sang inyo mga sala, kag mabaton ninyo ang wala sing bayad nga dulot sang balaan nga espiritu.” Sa amo nga adlaw, mga 3,000 ang naghinulsol, dayon ginbawtismuhan sila, kag nabaton nila ang ginsaad nga balaan nga espiritu.—Binu. 2:37, 38, 41.

4. (a) Ngaa dapat kita mangin interesado sa natabo sang Pentecostes? (b) Madamo nga tuig antes sini, ano pa ang importante nga hitabo nga mahimo natabo sa amo man nga adlaw? (Tan-awa ang endnote.)

4 Ngaa importante gid sa aton ang Pentecostes 33 C.E.? Indi bangod sang natabo sa templo sa Jerusalem, kundi bangod gintuman ni Jesucristo, bilang ang daku nga Mataas nga Saserdote, ining matagnaon nga sulundan. [1] Naghalad ang mataas nga saserdote sang duha ka malaragwayon nga tinapay kay Jehova sa sini nga adlaw. Ang tinapay nga may lebadura nga ginhalad sa templo nagarepresentar sa hinaplas nga mga disipulo nga ginpili halin sa makasasala nga katawhan para mangin gin-adoptar nga mga anak sang Dios. Sila ang nahauna sa “una nga mga bunga” halin sa katawhan nga magakadto sa langit sa ulihi kag magagahom sa Ginharian nga magapakamaayo sa matinumanon nga katawhan. (Sant. 1:18; 1 Ped. 2:9) Gani may epekto gid sa aton kabuhi ang mga natabo sadto nga adlaw, may paglaum man kita nga mangin kaupod ni Jesus sa langit ukon mabuhi sing wala katapusan sa paraiso nga duta!

ANG PAGHAPLAS SANG ESPIRITU

5. Ngaa masiling naton nga indi palareho ang paghaplas sa tanan nga hinaplas?

5 Kon isa ikaw sa mga disipulo sadto nga may nagatungtong nga dila nga daw kalayo sa imo ulo, indi mo gid malipatan ini nga adlaw. Indi gid ikaw magduhaduha nga ginhaplasan ka sang balaan nga espiritu, ilabi na kon nabaton mo man ang milagruso nga dulot nga makahambal sang iban nga lenguahe. (Binu. 2:6-12) Pero ang tanan bala nga hinaplas sang balaan nga espiritu ginhaplasan pareho sa nauna nga mga 120 ka disipulo? Indi. Ang iban nga didto sa Jerusalem sadto nga adlaw ginhaplasan sang ginbawtismuhan sila. (Binu. 2:38) Wala sang nagtungtong nga dila nga daw kalayo sa ila ulo. Kag indi tanan nga hinaplas nga Cristiano ang ginhaplasan sa tion nga ginbawtismuhan sila. Ginhaplasan sang balaan nga espiritu ang mga Samaritano pagkatapos sila mabawtismuhan. (Binu. 8:14-17) Sa tumalagsahon nga paagi, ginhaplasan sang balaan nga espiritu si Cornelio kag ang iya panimalay antes pa sila ginbawtismuhan.—Binu. 10:44-48.

6. Ano ang nabaton sang tanan nga hinaplas, kag ano ang epekto sini sa ila?

6 Gani indi palareho ang paagi sang paghaplas. Mahimo nga marealisar gilayon sang iban nga hinaplas sila, pero ang iban sing amat-amat. Ano man ang ila kahimtangan, nabaton nila ang ginlaragway ni apostol Pablo: “Sang nagtuo kamo, ginpat-inan kamo paagi sa iya sang ginsaad nga balaan nga espiritu, nga isa ka pauna nga garantiya sang aton palanublion.” (Efe. 1:13, 14) Ining pinasahi nga pagpanghikot sang balaan nga espiritu daw pauna nga bayad, isa ka garantiya sa kon ano ang magaabot. Bangod sini nga garantiya nga nabaton sang isa ka hinaplas nga Cristiano, kumbinsido sia nga hinaplas sia.—Basaha ang 2 Corinto 1:21, 22; 5:5.

7. Ano ang dapat himuon sang tagsa ka hinaplas nga Cristiano para mabaton niya ang iya padya sa langit?

 7 Ang Cristiano bala nga nakabaton sini nga garantiya sigurado na nga mapalangit? Indi. Sigurado sia nga gin-agda sia. Pero mabaton lamang niya ang iya padya sa langit sa ulihi kon mangin matutom sia. Amo ini ang paathag ni Pedro: “Gani, mga kauturan, himua gid ninyo ang inyo bug-os nga masarangan agod mapat-od ninyo ang pagtawag kag pagpili sa inyo, kay kon padayon ninyo ini nga ginahimo, indi gid kamo mapaslawan. Ang matuod, sa sini nga paagi pakamaayuhon gid kamo kag magasulod sa wala katapusan nga Ginharian sang aton Ginuo kag Manluluwas nga si Jesucristo.” (2 Ped. 1:10, 11) Gani dapat gid panikasugan sang tagsa ka hinaplas nga Cristiano nga magpabilin nga matutom. Kay kon indi, mawasi niya ang iya padya bisan pa gintawag sia, ukon gin-agda, sa langit.—Heb. 3:1; Bug. 2:10.

PAANO INI MAHIBALUAN SANG ISA?

8, 9. (a) Ngaa mabudlay sa kalabanan ang paghangop sang paghaplas sang espiritu? (b) Paano mahibaluan sang isa nga gin-agda sia sa langit?

8 Mahimo nga mabudlay sa kalabanan nga alagad sang Dios subong ang paghangop sang paghaplas sang espiritu. Wala nila ini maeksperiensiahan. Ang orihinal nga katuyuan sang Dios amo nga mabuhi ang tawo sing wala katapusan diri sa duta. (Gen. 1:28; Sal. 37:29) Pinasahi nga kahimusan ang pagpili sa iban para maggahom bilang mga hari kag saserdote sa langit. Kon pilion ang isa nga mangin hinaplas, nagabag-o gid ang iya panghunahuna, pagtamod, kag paglaum.—Basaha ang Efeso 1:18.

9 Pero paano mahibaluan sang isa nga gin-agda sia sa langit kag nakabaton sia sang pinasahi nga garantiya? Maathag ang sabat sa ginsiling ni Pablo sa hinaplas nga mga kauturan sa Roma, nga “ginpili agod mangin mga balaan.” Nagsiling sia sa ila: “Ang espiritu sang Dios wala nagahimo sa aton nga mangin mga ulipon kag mahadlok kita liwat, kundi paagi sa sini nga espiritu ginaadoptar kita subong mga anak, kag ini nga espiritu nagapahulag sa aton sa pagsinggit: ‘Abba, Amay!’ Ang espiritu mismo nagahatag sing pamatuod sa aton espiritu nga kita mga anak sang Dios.” (Roma 1:7; 8:15, 16) Buot silingon, paagi sa balaan nga espiritu, ginaathag sang Dios sa isa nga gin-agda sia nga mangin manunubli sang Ginharian sa palaabuton.—1 Tes. 2:12.

10. Ano ang buot silingon sang 1 Juan 2:27 nga indi na kinahanglan nga may magtudlo sa isa ka hinaplas nga Cristiano?

10 Indi na kinahanglan sang mga nakabaton sining pinasahi nga pangagda sang Dios ang iban pa nga pamatuod. Indi na nila kinahanglan mamangkot sa iban kon hinaplas gid sila. Ginsigurado gid ini sa ila ni Jehova. Nagsiling si apostol Juan sa hinaplas nga mga Cristiano: “Ginhaplas kamo sang isa nga balaan, kag tanan kamo may ihibalo.” Nagsiling pa sia: “Kon tuhoy sa inyo, ang paghaplas nga nabaton ninyo halin sa iya nagapabilin sa inyo, kag indi na kinahanglan nga may magtudlo sa inyo; kundi ang paghaplas halin sa iya ang nagatudlo sa inyo tuhoy sa tanan nga butang kag ini matuod kag indi butig. Subong nga gintudluan kamo sini, magpabilin kamo nga nahiusa sa iya.” (1 Juan 2:20, 27) Kinahanglan sila tudluan sa espirituwal pareho man sa iban. Pero indi na kinahanglan nga pamatud-an sang iban nga hinaplas sila. Ang pinakagamhanan nga puersa sa uniberso ang nagpamatuod sini!

ANG “BAG-O NGA PAGKABUN-AG”

11, 12. Ano ang mahimo ipamangkot sang hinaplas nga Cristiano, pero ano ang wala gid niya ginaduhaduhaan?

11 Kon haplasan sang balaan nga espiritu  ang isa ka Cristiano, maeksperiensiahan niya ang tumalagsahon nga pagbag-o. Ginlaragway ini ni Jesus nga ‘pagkabun-ag liwat,’ ukon ‘pagkabun-ag halin sa ibabaw.’ [2] (Juan 3:3, 5; footnote) Nagsiling pa sia: “Indi ka matingala nga nagsiling ako sa imo: Dapat kamo mabun-ag liwat. Ang hangin nagahuyop kon diin sini luyag, kag mabatian mo ang tunog sini, apang wala mo mahibaluan kon diin ini nagahalin kag kon diin ini nagapadulong. Amo man ang tanan nga nabun-ag paagi sa espiritu.” (Juan 3:7, 8) Gani, imposible nga ipaathag sing bug-os ang nabatyagan sang hinaplas sa wala makaeksperiensia sini.

12 Mahimo mamangkot ang mga gin-agda: ‘Ngaa ako ang ginpili kag indi ang iban?’ Basi magduhaduha man sila kon bala takus sila sa sini. Pero wala sila nagaduhaduha nga gin-agda sila. Nalipay gid sila kag nagapasalamat sa sini. Nabatyagan nila ang ginbatyag ni Pedro sang nagsiling sia: “Dayawon ang Dios kag Amay sang aton Ginuong Jesucristo, kay suno sa iya daku nga kaluoy ginhatagan niya kita sang bag-o nga pagkabun-ag pakadto sa isa ka buhi nga paglaum paagi sa pagkabanhaw ni Jesucristo gikan sa mga patay, pakadto sa indi madinulunton, wala sing dagta, kag indi maalimunaw nga palanublion. Ginatigana ini sa langit para sa inyo.” (1 Ped. 1:3, 4) Kon ginabasa ini sang mga hinaplas, nahibaluan gid nila nga ginasugilanon sila sang ila Amay sa langit.

13. Ano ang pagbag-o sa hunahuna sang isa nga ginhaplasan sang balaan nga espiritu, kag ano ang kabangdanan sini?

13 Antes mabaton sini nga mga Cristiano ang pamatuod sang espiritu sang Dios, nagalaum gid sila nga mabuhi sing dayon sa duta. Ginapaabot nila ang tion nga tinluan ni Jehova ini nga duta, kag gusto nila nga matigayon ini nga pagpakamaayo sa palaabuton. Mahimo nga ginahanduraw na nila ang ila kaugalingon nga nagaabiabi sa ila mga pinalangga nga napatay. Ginapaabot nila nga mag-istar sa balay nga ginpatindog nila kag magkaon sang bunga sang mga kahoy nga gintanom nila. (Isa. 65:21-23) Ngaa nagbag-o ang ila hunahuna? Wala sila matak-an sini nga paglaum. Nagbag-o ang ila hunahuna indi bangod sang depresyon ukon problema. Indi buot silingon nga hinali lang sila nagbatyag nga makakalapoy ukon makatalaka ang wala katapusan nga kabuhi sa duta. Indi man nga gusto lang nila matilawan ang kabuhi sa langit. Sa baylo, nagbag-o sila bangod sang balaan nga espiritu nga wala lamang nagpili ukon nag-agda sa ila, kundi nagbag-o man sang ila hunahuna kag paglaum.

14. Paano ginatamod sang mga hinaplas ang ila kabuhi diri sa duta?

14 Masiling bala naton nga gusto mapatay sang mga hinaplas? Gintuytuyan si Pablo sa paghatag sini nga sabat: “Ang matuod, kita nga yari sa sini nga tolda nagaugayong, nga ginabug-atan. Indi man naton luyag nga ubahon ini, kundi luyag naton nga isuklob ang isa, agod ang mamalatyon mabuslan sang kabuhi.” (2 Cor. 5:4) Wala madula ang ila interes sa kabuhi subong, kag indi nila gusto nga mapatay dayon. Sa baylo, nalipay gid sila nga mag-alagad kay Jehova kada adlaw upod sang ila pamilya kag mga abyan. Pero, ano man ang ila ginahimo, ginadumdom nila ang ila matahom nga paglaum sa palaabuton.—1 Cor. 15:53; 2 Ped. 1:4; 1 Juan 3:2, 3; Bug. 20:6.

GIN-AGDA KA BALA?

15. Ano nga mga kahimtangan ang wala nagapamatuod nga ginhaplasan sang balaan nga espiritu ang isa?

15 Nagapalibog ka bala kon nakabaton ka sining dalayawon nga pangagda? Pamalandungi  ining importante nga mga pamangkot. Tumalagsahon bala ang imo kakugi sa ministeryo? Maukod ka bala magtuon sa Pulong sang Dios, ilabi na sa “madalom nga mga butang sang Dios”? (1 Cor. 2:10) Ginapakamaayo gid bala ni Jehova ang imo ministeryo? Ginauna mo gid bala ang paghimo sang kabubut-on ni Jehova? Nagabatyag ka bala nga dapat mo gid buligan ang iban sa espirituwal? May nakita ka bala nga pamatuod nga ginbuligan ka ni Jehova? Kon huo ang imo sabat sa sini nga mga pamangkot, nagakahulugan bala ini nga gin-agda ka sa langit? Wala. Ngaa? Bangod indi lamang ang gin-agda sa langit ang nagabatyag sini. Ginahatagan man ni Jehova sang iya espiritu ang mga may paglaum nga mabuhi sing wala katapusan sa duta. Ang matuod, kon nagapalibog ka kon bala gin-agda ka sa langit, pamatuod ini nga wala ka gin-agda. Ang mga ginpili ni Jehova wala nagapalibog kon bala gin-agda sila ukon wala! Sigurado sila!

16. Ngaa masiling naton nga indi tanan nga nakabaton sang espiritu sang Dios ang gin-agda sa langit?

16 Sa Kasulatan, madamo nga halimbawa sang mga may pagtuo ang nakabaton sang balaan nga espiritu, pero ang ila paglaum indi sa langit. Isa ka halimbawa si Juan nga Manugbawtismo. Gindayaw gid sia ni Jesus pero ginsiling niya nga si Juan indi magagahom bilang hari sa langit. (Mat. 11:10, 11) Nakabaton man si David sang balaan nga espiritu. (1 Sam. 16:13) Nahangpan niya ang madalom nga mga butang sa espirituwal kag gintuytuyan man sia sa pagsulat sang pila ka bahin sang Biblia. (Mar. 12:36) Pero, sang Pentecostes, nagsiling si Pedro nga si David “wala magkayab sa langit.” (Binu. 2:34) Nakahimo sila sang gamhanan nga mga buhat kay ginbuligan sila sang balaan nga espiritu, pero wala ini naghatag sa ila sang pinasahi nga pamatuod nga ginpili sila para mabuhi sa langit. Wala ini nagakahulugan nga indi sila takus ukon kalipikado. Nagakahulugan lang ini nga banhawon sila ni Jehova para mabuhi sa paraiso nga duta.—Juan 5:28, 29; Binu. 24:15.

17, 18. (a) Ano nga padya ang ginalauman sang kalabanan nga alagad sang Dios subong? (b) Ano nga mga pamangkot ang binagbinagon naton sa masunod nga artikulo?

17 Ang kalabanan nga alagad sang Dios subong wala gin-agda sa langit. Pareho ang ila paglaum kanday David, Juan nga Manugbawtismo, kag sang iban pa nga matutom sang una. Pareho kay Abraham, nagalaum sila nga mabuhi bilang mga sakop sang Ginharian. (Heb. 11:10) Pila na lang sa mga ginpili para mabuhi sa langit ang nabilin sa duta sa sining tion sang katapusan. (Bug. 12:17) Nagakahulugan ini nga ang kalabanan sa 144,000 nga ginpili napatay na nga matutom.

18 Gani, paano dapat tamdon sang mga may paglaum nga mabuhi sa duta ang nagasiling nga gin-agda sia sa langit? Kon may utod sa inyo kongregasyon nga magkaon sang tinapay kag mag-inom sang alak sa Panihapon sang Ginuo, ano ang reaksion mo? Dapat ka bala mabalaka kon magdamo ang nagasiling nga hinaplas sila? Binagbinagon ini nga mga pamangkot sa masunod nga artikulo.

^ [1] (parapo 4) Mahimo nga ang Pentecostes amo man ang tion nga ginhatag ang Kasuguan sa Sinai. (Ex. 19:1) Gani, sa adlaw nga ginhimo ang Kasuguan nga katipan paagi kay Moises para sa Israel, posible nga ginhimo man ang bag-o nga katipan paagi kay Jesucristo para sa bag-o nga pungsod, ang espirituwal nga Israel.

^ [2] (parapo 11) Para sa dugang nga paathag sa kahulugan sang pagkabun-ag liwat, tan-awa ang Abril 1, 2009, nga Ang Lalantawan, p. 3-11.