Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) AGOSTO 2016

Padayon nga Mag-uswag sa Espirituwal

Padayon nga Mag-uswag sa Espirituwal

“Mag-ukod ka sa pagbasa sing dayag, sa paglaygay, kag sa pagpanudlo.”—1 TIM. 4:13.

AMBAHANON: 45, 70

1, 2. (a) Paano nagakatuman ang Isaias 60:22 sa sining tion sang katapusan? (b) Ano ang kinahanglanon sang dutan-on nga bahin sang organisasyon ni Jehova subong?

“ANG diutay mangin isa ka libo kag ang gamay nga pungsod mangin gamhanan.” (Isa. 60:22) Ini nga tagna nagakatuman sa sining katapusan nga mga adlaw. Sang 2015 nga tuig sang pag-alagad, 8,220,105 ka manugbantala sang Ginharian ang aktibo sa bilog nga kalibutan! Ang katapusan nga bahin sini nga tagna dapat magpalig-on sa tanan nga Cristiano, kay ang aton Amay sa langit nagsiling: “Ako, si Jehova, magapadasig sini sa nagakaigo nga tion sini.” Pareho sang mga pasahero sa salakyan nga nagadasig ang dalagan, mabatyagan naton ang pagdasig sang pagbantala kag pagpanudlo nga hilikuton. Ano ang reaksion naton sa sini nga pagdasig? Ginahimo bala naton ang aton bug-os nga masarangan bilang makugi nga mga manugbantala sang Ginharian? Madamo nga kauturan ang nag-alagad bilang regular ukon auxiliary payunir. Kag indi bala nga nalipay gid kita nga madamo ang nag-alagad kon diin mas daku ang kinahanglanon ukon nagpakigbahin sa iban pa nga teokratikong hilikuton?

2 Bangod sini nga pag-uswag, kinahanglan ang madamo nga manugdumala. Kada tuig, mga 2,000 ka kongregasyon ang nagadugang. Kon halimbawa 5 ka gulang ang kinahanglan magtatap sang isa ka bag-o nga kongregasyon, 10,000 ka ministeryal nga alagad  ang dapat mangin kalipikado nga manugtatap kada tuig. Ginapakita sini nga linibo ka utod nga lalaki ang dapat mangin kalipikado nga ministeryal nga alagad. Luwas pa sa sini, lalaki man kita ukon babayi, ‘madamo kita sing mahimo sa hilikuton sang Ginuo.’—1 Cor. 15:58.

KON ANO ANG BUOT SILINGON SANG PAG-USWAG SA ESPIRITUWAL

3, 4. Ano ang buot silingon sang pag-uswag sa espirituwal para sa imo?

3 Basaha ang 1 Timoteo 3:1. Ang Griego nga tinaga para sa “nagatinguha” nagakahulugan sing paglab-ot sa isa ka butang nga ayhan mabudlay lab-uton. Paagi sa paggamit sini nga tinaga, ginpadaku ni apostol Pablo nga ang pag-uswag sa espirituwal nagakinahanglan sing pagpanikasog. Imadyina ang isa ka utod nga lalaki nga nagahunahuna sang iya mabulig sa kongregasyon. Mahimo nga indi pa sia ministeryal nga alagad, pero narealisar niya nga kinahanglan niya palambuon ang espirituwal nga mga kinaiya. Una, nanikasog sia nga mangin kalipikado nga ministeryal nga alagad. Sang ulihi, ginhandum niya nga mangin kalipikado nga manugtatap. Sa kada kahimtangan, nanikasog gid sia nga malab-ot ang mga kalipikasyon para sa dugang nga responsibilidad sa kongregasyon.

4 Sing kaanggid, ang mga kauturan nga nagahandum magpayunir, mangin Bethelite, ukon magboluntaryo sa mga pagpanukod sang mga Kingdom Hall dapat man magtinguha agod malab-ot nila ini. Binagbinagon naton kon paano kita tanan ginapalig-on sang Pulong sang Dios nga mag-uswag sa matuod nga pagsimba.

PANIKASUGI NGA PADAYON NGA MAG-USWAG SA ESPIRITUWAL

5. Paano magamit sang mga pamatan-on ang ila kusog sa pag-alagad sa Ginharian?

5 Ang mga pamatan-on madamo sing mahimo sa pag-alagad kay Jehova bangod sang ila kusog. (Basaha ang Hulubaton 20:29.) Ang pila ka pamatan-on sa Bethel nagaimprinta kag nagahimo sang mga Biblia kag mga literatura. Madamo nga pamatan-on ang nagapakigbahin sa pagpanukod kag pagmentinar sang mga Kingdom Hall. Kon may mga kalamidad, ang mga pamatan-on nagabulig sa mga nahalitan upod ang mas eksperiensiado nga mga Saksi. Kag madamo nga pamatan-on nga payunir ang nagabantala sang maayong balita sa mga tumandok kag sa mga tawo nga halin sa iban nga pungsod kag tuhay sing lenguahe.

6-8. (a) Paano ginbag-o sang isa ka pamatan-on ang iya pag-alagad sa Dios, kag ano ang resulta? (b) Paano naton ‘matilawan kag makita nga si Jehova maayo’?

6 Mahimo nga gusto mo gid alagaron ang Dios sing bug-os tagipusuon. Pero ano abi kon pareho kamo sing ginabatyag sang isa ka utod nga si Aaron? Bisan pa nagdaku sia sa Cristiano nga pamilya, gin-aku niya, “Natak-an ako sa mga miting kag sa pagbantala.” Luyag niya mangin malipayon sa pag-alagad sa Dios pero natingala sia kon ngaa indi sia malipayon. Ano ang ginhimo niya?

7 Naghimo si Aaron sing espirituwal nga rutina nga nagalakip sang pagbasa sing Biblia, paghanda para sa mga miting, kag pagkomento sa sini. Nangin regular sia sa iya pagpangamuyo. Samtang nagadugang ang iya gugma kay Jehova, nagauswag man sia sa espirituwal. Sugod sadto, nalipay na si Aaron magpayunir, magbulig sa mga nahalitan sang kalamidad, kag magbantala sa iban nga pungsod. Nagaalagad subong si Aaron sa Bethel kag isa sia ka gulang. Ano ang ginabatyag niya sa iya ginhimo? “‘Natilawan ko kag nakita nga si Jehova maayo.’ Bangod sang iya pagpakamaayo, daku gid ang pagpasalamat ko sa iya amo nga ginadugangan ko pa ang akon pag-alagad, kag nagresulta ini sa mas madamo nga pagpakamaayo.”

8 Nag-amba ang salmista: “Ang mga nagapangita kay Jehova indi pagkulangon sing maayo nga butang.” (Basaha ang Salmo 34:8-10.) Huo, ang mga makugi nga nagaalagad  kay Jehova indi gid niya pagpaslawon. Kita mismo ‘nakatilaw kag nakakita nga si Jehova maayo’ samtang ginahimo naton ang aton bug-os nga masarangan sa pag-alagad sa iya. Kag kon ginasimba naton ang Dios sing bug-os kalag, indi malaragway ang aton kalipay.

MAGPADAYON BISAN PA KINAHANGLAN MAGHULAT

9, 10. Ngaa importante nga makahibalo ka ‘maghulat’?

9 Samtang ginalab-ot mo ang imo tulumuron, dapat makahibalo ka ‘maghulat.’ (Miq. 7:7) Pirme ginabuligan ni Jehova ang iya matutom nga mga alagad, samtang ginatugutan niya nga maghulat sila antes makapribilehiyo ukon magbag-o ang kahimtangan. Nagsaad sia kay Abraham nga hatagan sia sing anak, pero kinahanglan niya magtuo kag maghulat sing mapinasensiahon. (Heb. 6:12-15) Bisan pa naghulat si Abraham sing tinuig antes matawo si Isaac, wala magluya ang iya pagtuo, kag wala sia ginpaslaw ni Jehova.—Gen. 15:3, 4; 21:5.

10 Indi mahapos ang maghulat. (Hulu. 13:12) Pero, kon pirme naton pamensaron ang mga kapaslawan, magaluya ang aton pagtuo. Gani, mas maayo nga gamiton naton ang aton tion sa paglab-ot sang espirituwal nga mga kalipikasyon. Talupangda ang tatlo ka paagi nga mahimo ini.

11. Ano ang espirituwal nga mga kinaiya nga mahimo naton palambuon, kag ngaa importante ini nga mga kinaiya?

11 Palambua ang espirituwal nga mga kinaiya. Kon basahon naton kag pamalandungan ang Pulong sang Dios, makatigayon kita sing kaalam, paghangop, ihibalo, ikasarang sa paghunahuna, maligdong nga hunahuna, kag makadesisyon kita sing maayo. Ini nga mga  kinaiya importante para sa mga nagapanguna sa matuod nga pagsimba. (Hulu. 1:1-4; Tito 1:7-9) Samtang ginabasa naton ang aton mga publikasyon nga nabase sa Biblia, mahantop naton ang panghunahuna sang Dios sa madamo nga butang. Adlaw-adlaw nagadesisyon kita parte sa kalingawan, pamayo kag pamustura, paggamit sang kuarta, kag pagpakig-angot sa iban. Kon iaplikar naton ang aton mga natun-an sa Biblia, makadesisyon kita nga makapahamuot kay Jehova.

12. Paano mapamatud-an sang mga kauturan nga masaligan sila?

12 Pamatud-i nga masaligan ka. Kon ginhatagan kita sing bisan ano nga teokratiko nga asaynment, dapat naton himuon ang aton pinakamaayo. Subong gobernador, dapat hatagan ni Nehemias sing responsibilidad ang pila sa katawhan sang Dios. Sin-o ang ginpili niya? Ang mga mahinadlukon sa Dios kag masaligan. (Neh. 7:2; 13:12, 13) Subong, “ginalauman nga ang mga tulugyanan mangin matutom” man. (1 Cor. 4:2) Ang ila maayong mga buhat matalupangdan gid.—Basaha ang 1 Timoteo 5:25.

13. Paano mo mailog ang halimbawa ni Jose kon indi maayo ang pagtratar sa imo sang iban?

13 Tuguti si Jehova nga hanason ka. Ano ang himuon mo kon indi maayo ang pagtratar sa imo sang isa ka utod? Mahimo mo ini ipatalupangod gilayon sa iya. Pero, kon kaisa, ang pag-insister nga sala sia kag husto ka nagapalala lang sang problema. Sang ginmaltratar si Jose sang iya mga utod, wala sia naghinakit. Sang ulihi, ginpasibangdan si Jose kag ginpriso bisan wala sia sing sala. Nagsalig sia kay Jehova sa sining mabudlay nga mga tion. Ano ang resulta? “Ginpaputli sia sang pulong ni Jehova.” (Sal. 105:19) Sang matapos ang mga pagtilaw, handa na si Jose nga hatagan sing pinasahi nga asaynment. (Gen. 41:37-44; 45:4-8) Kon nagaatubang ka sing mabug-at nga mga problema, magpangamuyo sing kaalam, manghikot kag maghambal sing mainayuhon, kag mangayo sa Dios sing kusog. Buligan ka ni Jehova.—Basaha ang 1 Pedro 5:10.

MAG-USWAG SA IMO PAGMINISTERYO

14, 15. (a) Ngaa dapat naton ‘hatagan sang dalayon nga igtalupangod’ ang aton paagi sang pagbantala? (b) Paano ka makapasibu sa nagabag-o nga kahimtangan? (Tan-awa ang piktyur sa umpisa sini nga artikulo kag ang kahon nga “ Gusto Mo Bala Tilawan ang Iban nga Paagi?”)

14 Ginpalig-on ni Pablo si Timoteo: “Mag-ukod ka sa pagbasa sing dayag, sa paglaygay, kag sa pagpanudlo. Hatagi sang dalayon nga igtalupangod ang imo kaugalingon kag ang imo panudlo.” (1 Tim. 4:13, 16) Si Timoteo eksperiensiado na nga manugbantala sadto. Pero, mangin epektibo lang ang iya ministeryo kon ‘hatagan niya sang dalayon nga igtalupangod’ ang iya panudlo. Indi niya puede irason nga depende na sa mga tawo kon mamati sila ukon indi sa iya naandan nga paagi sang pagtudlo. Agod malab-ot ang tagipusuon sang mga tawo, kinahanglan pasibuon niya ang iya paagi sang pagtudlo sa ila kinahanglanon. Subong mga manugbantala sang Ginharian, dapat amo man ang himuon naton.

15 Kon nagapamalaybalay kita, masami nga wala sing tawo ang mga balay. Sa pila ka lugar, indi kita makasulod sa mga apartment kag guardiado nga mga komunidad. Kon may amo sini sa inyo teritoryo, ngaa indi mo pagtilawan ang nagkalainlain nga paagi sang pagbantala sang maayong balita?

16. Ngaa epektibo ang pagpanaksi sa publiko nga mga lugar?

16 Ang pagpanaksi sa publiko nga mga lugar isa ka maayo gid nga paagi sang pagpalapnag sang maayong balita. Madamo nga Saksi ang nangin epektibo sa sini kag maayo ang mga resulta. Ginapalapitan nila ang mga tawo sa mga estasyunan sang tren kag terminal sang bus, sa mga tiendahan kag parke, kag iban pa nga publiko nga mga lugar. Mahimo sugdan sang isa ka mahinantupon nga Saksi ang pag-istorya sa isa ka tawo paagi sa pagkomento sa balita, pagdayaw sa iya bata, ukon pagpamangkot  parte sa iya obra. Samtang nagadugay ang ila pag-istoryahanay, mahimo magsambit ang manugbantala sing teksto sa Biblia kag pangabayon ang opinyon sang tawo. Masami nga nagapadayon ang paghambalanay sa Biblia depende sa komento sang tawo.

17, 18. (a) Paano ka makatigayon sing kompiansa sa pagpanaksi sa publiko nga mga lugar? (b) Paano makabulig sa imo ministeryo ang panimuot ni David sa iya pagdayaw kay Jehova?

17 Kon nabudlayan ka sa pagpanaksi sa publiko nga mga lugar, magpadayon lang. Si Eddie nga payunir sa New York City nakulbaan mag-istorya sa mga tawo sa publiko nga lugar. Pero sang ulihi, may kompiansa na sia. Ano ang nakabulig sa iya? Nagsiling sia: “Sa amon pangpamilya nga pagsimba, naga-research kami sang akon asawa sang mga sabat sa mga pagpamatok kag opinyon sang mga tawo. Nagapamangkot man kami sa iban nga kauturan.” Subong, nanamian na si Eddie sa pagpanaksi sa publiko.

18 Samtang nagadugang ang imo ikasarang kag kompiansa sa pagbantala sang maayong balita, makita ang imo pag-uswag sa espirituwal. (Basaha ang 1 Timoteo 4:15.) Dugang pa, mahimaya mo ang aton Amay sa langit pareho ni David, nga nag-amba: “Dayawon ko si Jehova sa tanan nga tion; indi ako mag-untat sa pagdayaw sa iya. Ipabugal ko si Jehova; ang mga mahagop makabati kag magakasadya.” (Sal. 34:1, 2) Kag bangod sang imo ministeryo, mahimo nga mabuligan mo ang mga mahagop nga magbaton sang matuod nga pagsimba.

HIMAYAA ANG DIOS PAAGI SA PAG-USWAG SA ESPIRITUWAL

19. Ngaa mangin malipayon gihapon ang matutom nga alagad ni Jehova bisan pa mabudlay gid ang iya kahimtangan?

19 Nag-amba man si David: “Ang tanan mo nga binuhatan magahimaya sa imo, O Jehova, kag dayawon ka sang mga mainunungon sa imo. Ipahayag nila ang himaya sang imo pagkahari kag magahambal sila tuhoy sa imo pagkagamhanan, agod ipahibalo sa mga tawo ang imo gamhanan nga mga buhat kag ang himaya sang imo pagkahari.” (Sal. 145:10-12) Amo man sini ang ginabatyag sang tanan nga matutom nga Saksi ni Jehova. Pero ano abi kon nalimitehan sang balatian ukon katigulangon ang imo ministeryo? Dumduma pirme nga kon ginapaambit mo ang maayong balita sa mga nagaatipan sa imo kag sa iban, ining sagrado nga pag-alagad nagahimaya sa aton dalayawon nga Dios. Kon napriso ka bangod sa imo pagtuo, mahimo nga ginapaambit mo gihapon ang kamatuoran suno sa ginatugot sang imo kahimtangan, kag nagapasadya ini kay Jehova. (Hulu. 27:11) Matuod man ini kon padayon ka gihapon sa imo espirituwal nga rutina bisan pa indi Saksi ang imo pamilya. (1 Ped. 3:1-4) Bisan sa mabudlay gid nga mga kahimtangan, madayaw mo si Jehova kag mahimo ka mag-uswag sa espirituwal.

20, 21. Kon ginhatagan ka sing dugang nga hilikuton sa organisasyon ni Jehova, paano ka mangin pagpakamaayo sa iban?

20 Kon padayon ang imo pag-uswag sa espirituwal, pakamaayuhon ka gid ni Jehova. Paagi sa paghimo sing pila ka pagbag-o sa imo iskedyul ukon pagkabuhi, mahimo mo madugangan ang imo bahin sa pagpaambit sang hamili nga kamatuoran sang Dios sa mga tawo nga nagakinahanglan sing paglaum. Dugang pa, ang imo pag-uswag sa espirituwal kag pagsakripisyo daku gid ang mabulig sa mga kauturan. Kon mapainubuson ka nga nagapangabudlay sa kongregasyon, palanggaon ka, pasalamatan, kag sakdagon sang iban nga nagahigugma man kay Jehova.

21 Bisan pa madugay na kita ukon pila pa lang ka tuig nga nagaalagad kay Jehova, tanan kita makahimo sing pag-uswag sa aton pagsimba sa iya. Pero paano mabuligan sang hamtong nga mga Cristiano ang mga bag-uhan nga mag-uswag sa espirituwal? Binagbinagon naton ini sa masunod nga artikulo.