Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) AGOSTO 2016

Ginahanas Mo Bala ang Iban?

Ginahanas Mo Bala ang Iban?

“Hatagan ko kamo sing maayo nga instruksion.”—HULU. 4:2.

AMBAHANON: 93, 96

1, 2. Ngaa dapat naton hanason ang iban sa paghimo sang teokratiko nga mga asaynment?

ANG pagbantala sang maayong balita sang Ginharian amo ang panguna nga hilikuton ni Jesus. Pero, nagpain sia sing tion sa paghanas sang iban nga mangin mga manugbantay kag manunudlo. (Mat. 10:5-7) Bisan pa masako si Felipe bilang ebanghelisador, ginbuligan niya ang iya apat ka anak nga babayi nga mangin epektibo sa pagsugid sa iban sang mga kamatuoran sa Kasulatan. (Binu. 21:8, 9) Daw ano ka importante ini nga mga paghanas subong?

2 Sa bilog nga kalibutan, nagadamo ang nagabaton sang maayong balita. Dapat mahangpan sang mga bag-uhan nga wala pa mabawtismuhan ang importansia sang personal nga pagtuon sa Biblia. Dapat man sila hanason sa pagbantala sang maayong balita sa iban kag sa pagtudlo sang kamatuoran. Sa aton mga kongregasyon, dapat palig-unon ang mga utod nga lalaki nga magpanikasog para makalipikar nga ministeryal nga alagad kag gulang. Paagi sa “maayo nga instruksion,” ang hamtong nga mga Cristiano makabulig sa mga bag-uhan nga mag-uswag sa espirituwal.—Hulu. 4:2.

 BULIGI ANG MGA BAG-UHAN SA PAGKUHA SING KUSOG KAG KAALAM SA PULONG SANG DIOS

3, 4. (a) Suno kay Pablo, ano ang kaangtanan sang pagtuon sa Kasulatan kag sang epektibo nga pagministeryo? (b) Antes naton mapalig-on ang mga nagatuon sang Biblia nga personal ini nga tun-an, ano anay ang himuon naton?

3 Daw ano ka importante ang personal nga pagtuon sa Kasulatan? Makita naton ang sabat sa sulat ni apostol Pablo sa iya mga masigka-Cristiano sa Colosas. Nagsiling sia: “Wala gid kami mag-untat sa pagpangamuyo para sa inyo kag sa pagpangabay nga mapuno kamo sing sibu nga ihibalo tuhoy sa [kabubut-on sang Dios] nga may bug-os nga kaalam kag espirituwal nga paghangop, agod maglakat nga takus kay Jehova sa tuyo nga pahamut-an sia sing bug-os samtang padayon kamo nga nagapamunga sa tagsa ka maayong buhat kag nagalambo sa sibu nga ihibalo tuhoy sa Dios.” (Col. 1:9, 10) Paagi sa sining sibu nga ihibalo, ang mga Cristiano sa Colosas mahimo ‘makalakat nga takus kay Jehova sa tuyo nga pahamut-an sia sing bug-os.’ Makabulig ini sa ila nga padayon nga ‘magpamunga sa tagsa ka maayong buhat,’ ilabi na sa pagbantala sang maayong balita. Agod maalagad si Jehova sing nagakaigo, ang isa dapat may ginasunod nga rutina sang pagtuon sa Biblia. Dapat naton buligan ang mga nagatuon sang Biblia nga mahangpan nga importante gid ini himuon.

4 Antes naton mabuligan ang iban nga makabenepisyo sa ila personal nga pagtuon sa Biblia, dapat anay kumbinsido kita nga mapuslanon ini. Ang matuod, dapat may iskedyul gid kita sang pagtuon sa Biblia. Gani pamangkuta ang imo kaugalingon: ‘Kon ang opinyon sang tagbalay wala nahisuno sa mga panudlo sang Kasulatan ukon mabudlay ang iya pamangkot, ang akon bala sabat nabase sa Biblia? Kon ginabasa ko ang pagbatas nanday Jesus, Pablo, kag iban pa sa ila ministeryo, ginapamalandungan ko bala kon paano ko ini mailog sa akon pag-alagad kay Jehova?’ Kinahanglan naton tanan ang ihibalo kag laygay halin sa Pulong sang Dios. Gani kon isugid naton sa iban kon paano kita nakabenepisyo sa aton personal nga pagtuon sa Biblia, mahimo naton sila mapalig-on nga mangin mapisan sa pagtuon sa Kasulatan.

5. Paano mo hanason ang mga bag-uhan nga maghimo sing iskedyul sa pagtuon sa Biblia?

5 Mahimo mamangkot ka, ‘Paano ko hanason ang akon ginatudluan nga tun-an ang Biblia sing regular?’ Ipakita sa iya kon paano maghanda sa inyo pagtuon. Mahimo mo ipanugda nga basahon niya ang mga topiko sa apendise sang Ano Gid ang Ginatudlo sang Biblia? nga libro kag ang mga teksto. Buligi sia nga handaan ang mga miting para makakomento. Palig-una sia nga basahon ang kada isyu sang Ang Lalantawan kag Magmata! Kon matigayon sa iya lenguahe ang Watchtower Library ukon ang Watchtower ONLINE LIBRARY, tudlui sia kon paano ini gamiton sa pagpangita sing mga sabat sa pamangkot sa Biblia. Kon himuon mo ini, manamian gid ang imo ginatudluan sa iya personal nga pagtuon sa Pulong sang Dios.

6. (a) Paano mo mabuligan ang imo ginatudluan nga pabaloran ang Biblia? (b) Kon ginapabaloran na sang nagatuon ang Biblia, mapahulag sia nga himuon ang ano?

 6 Siempre, indi naton dapat pagpiliton ang iban nga basahon kag tun-an ang Biblia. Sa baylo, hanason naton ang aton ginatudluan kon paano mag-research sa mga galamiton sa pagtuon nga gin-aman sang organisasyon ni Jehova para pabaloran pa gid niya ang Biblia. Sa ulihi, mabatyagan man sang sinsero nga nagatuon ang ginbatyag sang salmista nga nag-amba: “Maayo nga magpalapit sa Dios. Ginhimo ko ang Soberanong Ginuong Jehova nga akon dalangpan.” (Sal. 73:28) Ang serioso kag mapisan magtuon sang Biblia buligan sang espiritu ni Jehova.

HANASA ANG MGA BAG-UHAN SA PAGBANTALA KAG PAGTUDLO

7. Paano ginhanas ni Jesus ang mga manugbantala sang maayong balita? (Tan-awa ang piktyur sa umpisa sini nga artikulo.)

7 Sa Mateo kapitulo 10, naghatag si Jesus sing espesipiko nga mga instruksion sa iya 12 ka apostoles. [1] Namati ang mga apostoles ni Jesus samtang ginatudluan niya sila kon paano mangin epektibo sa pagbantala. Dayon nagkadto sila sa ila teritoryo. Nakatuon sila sa mga pamaagi ni Jesus, gani nangin maayo sila nga manunudlo sang kamatuoran sa Kasulatan. (Mat. 11:1) Mahanas man naton ang aton mga ginatudluan sang Biblia nga mangin epektibo nga manugbantala sang maayong balita. Binagbinagon naton ang duha ka paagi nga mabuligan sila.

8, 9. (a) Paano gin-istorya ni Jesus ang mga tawo sa iya pagministeryo? (b) Paano naton mabuligan ang bag-o nga mga manugbantala nga ilugon ang paagi ni Jesus sa pag-istorya sa mga tawo?

8 Istoryaha ang mga tawo. Masami nga ginaistorya ni Jesus ang mga tawo parte sa Ginharian. Halimbawa, nangin makawiwili ang iya pag-istorya sa isa ka babayi sa bubon ni Jacob malapit sa siudad sang Sicar, kag maayo ang resulta sini. (Juan 4:5-30) Gin-istorya man niya si Mateo Levi nga manugsukot sing buhis. Malip-ot lang ang mabasa sa mga Ebanghelyo parte sa sini nga pag-istoryahanay, pero ginbaton ni Mateo ang pangagda ni Jesus nga mangin sumulunod niya. Sa sinalusalo sa balay ni Mateo, naistorya sia ni Jesus sing mas malawig kag ang iban pa.—Mat. 9:9; Luc. 5:27-39.

9 Isa pa ka bes, si Natanael nga negatibo ang pagtamod sa mga taga-Nazaret, mainabyanon nga gin-istorya ni Jesus. Bangod sini, nagbag-o ang iya pagtamod. Bisan pa taga-Nazaret si Jesus, namat-od si Natanael nga hibaluon pa gid ang iya ginatudlo. (Juan 1:46-51) Gani may rason gid kita nga hanason ang bag-o nga mga manugbantala sa pag-istorya sa mga tawo sa mainabyanon kag relaks nga paagi. [2] Kon buligan naton sila nga himuon ini, malipay gid sila kon mangin interesado ang sinsero nga mga tawo nga ginpakitaan nila sing kaayo kag gin-istorya sing mainabyanon.

10-12. (a) Paano ginpalambo ni Jesus ang interes sang iban sa maayong balita? (b) Paano naton mabuligan ang bag-o nga mga manugbantala nga mag-uswag ang ila ikasarang bilang manunudlo sang kamatuoran sa Biblia?

10 Palambua ang interes. Malip-ot lang ang tion ni Jesus sa pagtuman sang iya ministeryo. Pero, nagpain sia sing tion para palambuon ang interes sang mga tawo sa maayong balita. Halimbawa, isa ka bes, nagsakay si Jesus sa sakayan kag gintudluan niya ang kadam-an. Dayon naghimo sia sing milagro para makakuha si Pedro sing madamo gid nga isda, kag ginsilingan niya sia: “Kutob karon magapangisda ka sang buhi nga mga tawo.” Ano ang resulta sang ginsiling kag ginhimo ni Jesus? “Ginpahigad [ni Pedro kag sang iya mga kaupod] ang mga sakayan sa baybayon, kag ginbayaan nila ang tanan nga butang kag nagsunod [kay Jesus].”—Luc. 5:1-11.

11 Si Nicodemo nga miembro sang Sanhedrin nangin interesado sa panudlo ni Jesus. Gusto niya madugangan ang iya nahibaluan pero nahadlok sia sa isiling sang iban kon  makita nila sia nga nagapakig-istorya kay Jesus. Mapasibusibuon si Jesus kag maalwan sa iya tion. Gab-i na nagpakigkita sa iya si Nicodemo para indi ini matalupangdan sang mga tawo. (Juan 3:1, 2) Ano ang matun-an naton sa sini? Ang Anak sang Dios naghatag sing tion para pabakuron ang pagtuo sang mga tawo. Indi bala nga dapat mangin mapisan man kita sa pagduaw liwat kag sa pagtudlo sang Biblia sa mga interesado?

12 Mapauswag sang bag-o nga mga manugbantala ang ila ikasarang bilang manunudlo sang kamatuoran sa Biblia kon updan naton sila sa ministeryo. Mabuligan naton sila nga duawon liwat bisan ang mga indi masyado interesado. Mahimo naton hagaron ang bag-o nga mga manugbantala nga updan kita sa aton mga ginaduaw liwat kag ginatudluan sang Biblia. Paagi sa sini nga paghanas kag pagpalig-on, handumon man sang mga bag-uhan nga duawon liwat ang iban kag tudluan sila sang Biblia. Matun-an man nila nga indi dayon mag-untat kundi mangin mapinasensiahon kag magpadayon sa ministeryo.—Gal. 5:22; tan-awa ang kahon nga “ Importante nga Magpadayon.”

HANASA ANG MGA BAG-UHAN SA PAGBULIG SA MGA KAUTURAN

13, 14. (a) Ano ang masiling mo parte sa mga naghimo sing daku nga sakripisyo para sa iban nga narekord sa Biblia? (b) Ano ang praktikal nga mga paagi para mahanas mo ang mga bag-uhan kag mga pamatan-on nga palanggaon ang mga kauturan?

13 Ginapalig-on kita sang Biblia nga magpakita sing ‘utudnon nga pagpalangga’ kag mag-alagad sa iban. (Basaha ang 1 Pedro 1:22; Lucas 22:24-27.) Ginhatag sang Anak sang Dios ang tanan, lakip ang iya kabuhi, sa pag-alagad sa iban. (Mat. 20:28) Si Dorcas ‘madamo sing maayo nga binuhatan kag mabinuligon sa mga imol.’ (Binu. 9:36, 39) Si Maria nga taga-Roma “nagpangabudlay gid” para sa mga kauturan sa kongregasyon. (Roma 16:6) Paano naton mabuligan ang mga bag-uhan nga mahangpan ang importansia sang pagbulig sa mga kauturan?

Hanasa ang mga bag-uhan nga palanggaon ang mga kauturan (Tan-awa ang parapo 13 kag 14)

14 Mahimo paupdon sang hamtong nga mga Saksi ang mga bag-uhan sa pagbisita sa mga nagamasakit kag mga tigulang. Kon nagakaigo, mahimo paupdon sang mga ginikanan ang ila kabataan. Kon ang isa ka gulang magadala sing pagkaon sa aton pinalangga nga mga tigulang ukon magakay-o sang ila balay, mahimo sia magpabulig sa mga pamatan-on ukon mga bag-uhan. Paagi sini, matun-an nila ang paghimo sang maayo sa iban. Samtang nagabantala sa ila teritoryo sa uma, ang isa ka gulang nagabisita sing makadali sa mga Saksi didto para kamustahon sila. Ang pamatan-on nga utod nga upod niya pirme nakatuon nga dapat palanggaon ang tanan sa kongregasyon.—Roma 12:10.

15. Ngaa importante nga mangin interesado ang mga gulang sa pag-uswag sang mga lalaki sa kongregasyon?

15 Bangod mga lalaki ang gintugyanan ni Jehova nga magtudlo sa kongregasyon, importante para sa mga utod nga lalaki nga mangin maayo nga manunudlo kon nagahatag sang ila bahin. Kon isa ikaw ka gulang, mahimo mo bala pamatian ang pagpraktis sang ministeryal nga alagad sa iya pamulongpulong? Paagi sa imo bulig, mahimo niya mapauswag ang iya ikasarang nga magtudlo sang Pulong sang Dios.—Neh. 8:8. [3]

16, 17. (a) Paano ginpakita ni Pablo nga interesado sia sa pag-uswag ni Timoteo? (b) Paano mahanas sing epektibo sang mga gulang ang mangin mga manugbantay sang kongregasyon sa ulihi?

16 Ang Cristianong kongregasyon nagakinahanglan sang madamo nga manugbantay, kag ang mga hatagan sini nga katungdanan sa ulihi dapat padayon nga hanason. Ginsilingan ni Pablo si Timoteo kon paano himuon ini nga paghanas: “Anak ko, padayon ka nga magbakod paagi sa wala tupong nga kaayo nga yara kay Cristo Jesus; kag itugyan ang mga butang nga nabatian mo sa akon, nga ginpamatud-an  sang madamo nga saksi, sa matutom nga mga lalaki agod mangin kalipikado gid sila nga itudlo ini sa iban.” (2 Tim. 2:1, 2) Nakatuon si Timoteo kay Pablo, nga isa ka gulang kag apostol. Ang mga pamaagi ni Pablo gin-ilog ni Timoteo sa iya ministeryo kag sa iban pa nga hilikuton sang sagrado nga pag-alagad.—2 Tim. 3:10-12.

17 Ang paghanas ni Pablo kay Timoteo indi natabuan lang. Ginpaupod gid niya si Timoteo. (Binu. 16:1-5) Mailog sang mga gulang si Pablo paagi sa pagpaupod sa kalipikado nga mga ministeryal nga alagad sa pag-shepherding, kon nagakaigo. Kon himuon ini sang mga gulang, makita sang mga ginahanas ang paagi sang pagtudlo, pagtuo, pagkamapinasensiahon, kag gugma nga dapat ipakita sang Cristianong mga manugtatap. Ini nga pamaagi nagahanas sa mangin mga manugbantay sang “panong sang Dios” sa ulihi.—1 Ped. 5:2.

ANG IMPORTANSIA SANG PAGHANAS SA IBAN

18. Ngaa dapat naton hatagan sing importansia ang paghanas sa iban sa pag-alagad kay Jehova?

18 Importante gid ang paghanas sa iban bangod sang nagadugang nga kinahanglanon sa kongregasyon kag pribilehiyo sa pag-alagad kay Jehova. Ang halimbawa ni Jesus kag ni Pablo sa paghanas epektibo gihapon subong. Luyag ni Jehova nga ang iya mga alagad mahanas sing maayo sa ila teokratikong mga asaynment. Ginhatagan kita sang Dios sing pribilehiyo nga buligan ang mga bag-uhan nga mapauswag ang ila mga ikasarang nga himuon ang mga hilikuton sa kongregasyon. Bangod nagalala ang kahimtangan sang kalibutan kag nagasangkad ang pagbantala nga hilikuton, ini nga paghanas importante kag dapat himuon gilayon.

19. Ngaa dapat kumbinsido ka nga mangin madinalag-on ang imo mga panikasog sa paghanas sa iban sa pag-alagad kay Jehova?

19 Ang paghanas sa iban nagakinahanglan sing tion kag panikasog. Pero si Jehova kag ang iya pinalangga nga Anak magabulig sa aton kag magahatag sa aton sing kaalam nga mahanas ang iban. Malipay gid kita nga ang aton mga ginabuligan padayon nga ‘nagapangabudlay sing lakas kag nagapanikasog.’ (1 Tim. 4:10) Kabay pa nga kita man magpadayon sa pag-uswag sa espirituwal samtang nagahimo kita sing sagrado nga pag-alagad kay Jehova.

^ [1] (parapo 7) Amo ini ang pila sa instruksion ni Jesus: (1) Ibantala ang husto nga mensahe. (2) Mangin kontento sa ginaaman ni Jehova. (3) Indi pagbaisa ang tagbalay. (4) Magsalig kay Jehova kon ginapamatukan. (5) Indi mahadlok.

^ [2] (parapo 9) Ang Magbenepisyo sa Pagpanudlo Sang Teokratikong Eskwelahan Para sa Ministeryo, p. 62-64, may maayo nga mga panugda kon paano mag-istorya sa mga tawo sa ministeryo.

^ [3] (parapo 15) Ginabinagbinag sang Magbenepisyo sa Pagpanudlo Sang Teokratikong Eskwelahan Para sa Ministeryo, p. 52-61, ang mga dapat himuon para mangin epektibo nga humalambal sa publiko.