Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) AGOSTO 2016

Si Johannes Rauthe nga nagahanda sa pagbantala sang mga dekada 1920

 HALIN SA AMON ARCHIVE

“Nagapamunga Ako sa Kadayawan ni Jehova”

“Nagapamunga Ako sa Kadayawan ni Jehova”

“DAW indi salapakon ang tanan nga inaway sang una kon ipaanggid sa inaway nga nagakatabo subong sa Europa.” Amo sini ang paglaragway sang Septiembre 1, 1915, nga The Watch Tower sa una nga bug-os kalibutan nga inaway, nga mga 30 ka pungsod ang nadalahig. Bangod sang kagamo, ang The Watch Tower nagreport: “Ang pag-alagad [sa Ginharian] halos nag-untat, ilabi na sa Germany kag France.”

Sa tunga sang magamo nga kalibutan, wala mahangpan sing bug-os sang mga Estudyante sang Biblia ang prinsipio parte sa Cristianong neutralidad. Pero, determinado sila nga ibantala ang maayong balita. Nag-order si Wilhelm Hildebrandt sing mga kopya sang The Bible Students Monthly sa French nga lenguahe kay gusto gid niya mag-alagad para sa Ginharian. Ara sia sa France indi bilang colporteur (bug-os tion nga manugbantala), kundi bilang soldado sang Germany. Natingala ang mga taga-France kay ang ila kaaway nga soldado, nga nakauniporme pa, nagapaambit sa ila sing mensahe sang paghidait.

Ang mga sulat sang pila ka Estudyante sang Biblia sa Germany nga mabasa sa The Watch Tower nagapakita nga luyag nila magpaambit sang maayong balita sang Ginharian samtang nagaserbisyo sila sa militar. Si Utod Lemke nga nagserbisyo sa navy nagreport nga nangin interesado ang lima niya ka kaupod. “Bisan pa ara sa barko, nagapamunga ako sa kadayawan ni Jehova,” sulat niya.

Si Georg Kayser nga isa ka soldado nangin alagad sang matuod nga Dios. Paano ini natabo? Nakatigayon sia sing publikasyon sang mga Estudyante sang Biblia, dayon bug-os tagipusuon niya nga ginbaton ang kamatuoran parte sa Ginharian, kag wala na sia nag-entra sa inaway. Nangita sia sing obra nga indi sia pag-obligahon nga magpakig-away. Pagkatapos sang inaway, nangin makugi sia nga payunir sing madamo nga tinuig.

Bisan pa wala mahangpan sing bug-os sang mga Estudyante sang Biblia ang parte sa neutralidad, ang ila panimuot kag paggawi tuhay sangsa pagtamod kag ginahimo sang mga tawo nga nagasuporta sa inaway. Samtang ang mga pulitiko kag mga lider sang simbahan nagpakabahandi sang bandera sang ila pungsod, ang mga Estudyante sang Biblia naman nagsuporta sa “Prinsipe sang Paghidait.” (Isa. 9:6) Bisan pa wala masunod sing bug-os sang iban ang pagpabilin nga neutral, nangin determinado sila nga sundon ang sadsaran nga prinsipio sang neutralidad, subong  sang ginsiling sang Estudyante sang Biblia nga si Konrad Mörtter, “Maathag sa akon ang ginasiling sang Pulong sang Dios nga ang mga Cristiano indi dapat magpatay.”—Ex. 20:13. *

Si Hans Hölterhoff nga nagagamit sing cart para ibantala ang The Golden Age

Sa Germany, wala ginatugutan sang kasuguan ang mga indi luyag magsoldado bangod sa konsiensia. Sobra 20 ka Estudyante sang Biblia didto ang nangindi nga magserbisyo sa militar. Ang pila sa ila ginlakip sa mga may diperensia sa panghunahuna, pareho ni Gustav Kujath, nga ginbutang sa ospital para sa mga buang kag ginpatomar sang bulong nga pangpakalma. Ginpriso si Hans Hölterhoff kay nangindi man sia magsoldado. Samtang ara sa prisuhan, nangindi sia nga himuon ang mga obra nga nagasuporta sa inaway. Ginpasuksukan sia sang mga guardia sing straitjacket asta nga nagpalaminhod ang iya mga kamot kag tiil. Sang indi mapabag-o sang mga guardia ang iya desisyon, ginpahog nila sia nga patyon. Pero, nagpabilin nga matutom si Hans sa tion sang inaway.

Ang iban nga kauturan nga ginpatawag agod magsoldado nangindi nga mag-entra sa inaway kag nangabay sila sing obra nga indi sila madalahig sa direkta nga pagpakig-away. * Ang isa sa ila amo si Johannes Rauthe, nga ginpaobra sa mga riles. Si Konrad Mörtter ginpaobra sa ospital, kag si Reinhold Weber ginpaobra bilang nars. Nahaw-asan si August Krafzig kay ang ginhatag sa iya nga obra wala nagadalahig sing pagpakig-away. Ini nga mga Estudyante sang Biblia kag ang iban pa nga kaupod nila determinado nga alagaron si Jehova bangod sa ila gugma kag pagkamainunungon sa iya.

Bangod sang pamat-od sang mga Estudyante sang Biblia sa tion sang inaway, gin-imbestigar sila sang mga opisyal. Pagkasunod nga mga tinuig, ang mga Estudyante sang Biblia sa Germany ginpasakaan sing linibo ka kaso sa korte bangod sang ila pagbantala. Para mabuligan sila, ang sanga talatapan sa Germany naghimo sing legal department sa Bethel sa Magdeburg.

Amat-amat nga nahangpan sang mga Saksi ni Jehova ang parte sa Cristianong neutralidad. Sang magsugod ang ikaduha nga bug-os kalibutan nga inaway, nagpabilin sila nga neutral kag wala sila nag-entra sa bisan ano nga may labot sa militar. Gani, ginkabig sila nga kaaway sang gobierno sang Germany kag mapintas nga ginhingabot. Binagbinagon ini sa palaabuton nga serye sang “Halin sa Amon Archive.”—Halin sa amon archive sa Central Europe.

^ par. 7 Tan-awa ang kasaysayan sang mga Estudyante sang Biblia sa Britanya sa tion sang Bug-os Kalibutan nga Inaway I sa artikulo nga “Halin sa Amon Archive—Nagtindog Sila sing Malig-on sa ‘Oras sang Pagtilaw’” sa Mayo 15, 2013, nga isyu sang Ang Lalantawan.

^ par. 9 Ginpanugda ini sang Volume VI sang Millennial Dawn (1904) kag sang German nga edisyon sang Zion’s Watch Tower sang Agosto 1906. Ginbag-o sang The Watch Tower sang Septiembre 1915 ini nga pagtamod kag ginpanugda sini nga ang mga Estudyante sang Biblia indi dapat magsoldado. Pero, ini nga artikulo wala sa German nga edisyon.

Magtuon sing Dugang Pa

Ngaa Nagapabilin nga Neutral sa Pulitika ang mga Saksi ni Jehova?

Makatalagam bala sila sa seguridad sang pungsod?