Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ABRIL 2016

“Tuguti nga Makapanghikot sing Bug-os ang Pagbatas”

“Tuguti nga Makapanghikot sing Bug-os ang Pagbatas”

“Tuguti nga makapanghikot sing bug-os ang pagbatas, agod mangin bug-os kamo kag maayo sa tanan nga paagi, nga wala sing kulang nga bisan ano.”—SANT. 1:4.

AMBAHANON: 135, 139

1, 2. (a) Ano ang matun-an naton sa pagbatas ni Gideon kag sang iya 300 ka soldado? (Tan-awa ang piktyur sa umpisa sini nga artikulo.) (b) Suno sa Lucas 21:19, ngaa importante gid ang pagbatas?

GRABE gid ang pagpakig-away sang mga soldado sang Israel nga ginpangunahan ni Hukom Gideon. Ginlagas nila ang ila kaaway nga mga soldado sang Midian kag ang mga kaalyado sini sa bilog nga gab-i sa kalayuon nga 32 ka kilometro! Ginsugid sang Biblia ang masunod nga natabo: “Dayon nakalab-ot si Gideon sa Jordan kag nagtabok upod ang 300 ka lalaki. Kapoy na sila.” Pero wala pa nagdaug si Gideon kag ang iya mga soldado, kay mga 15,000 pa ang nabilin sa ila mga kaaway. Nahibaluan gid sang mga Israelinhon nga indi sila dapat mag-untat bangod tinuig sila nga ginpigos sang mga Midianhon. Gani, para mapierde ang ila mga kaaway, ‘padayon sila nga naglagas’ kag nasakop nila ang Midian.—Huk. 7:22; 8:4, 10, 28.

2 Grabe man ang aton pagpakig-away subong. Ang kaaway naton amo si Satanas, ang iya kalibutan, kag ang aton pagkadihimpit. Ang iban sa aton madugay na nga nagapakig-away, kag nagmadinalag-on kita bangod sang bulig ni Jehova. Pero kon kaisa, mahimo nga ginakapoy na kita sa pagpakig-away kag sa paghulat sa katapusan sini nga sistema sang mga butang. Indi pa bug-os ang aton  kadalag-an. Nagpaandam si Jesus nga makaeksperiensia kita sang mabudlay nga mga pagtilaw kag mapintas nga pagtratar samtang nagakabuhi sa katapusan nga mga adlaw. Pero, nagsiling man sia nga malampuwasan naton ini kon magbatas kita. (Basaha ang Lucas 21:19.) Ano ang pagbatas? Ano ang makabulig sa aton nga makabatas? Ano ang matun-an naton sa mga nagbatas? Kag paano naton ‘tugutan nga makapanghikot sing bug-os ang pagbatas’?—Sant. 1:4.

ANO ANG PAGBATAS?

3. Ano ang pagbatas?

3 Sa Biblia, ang pagbatas wala lamang nagakahulugan sang pag-agwanta sang pagtilaw ukon mabudlay nga kahimtangan. Nadalahig sa sini ang aton hunahuna kag tagipusuon, ukon ang aton reaksion sa kabudlayan. Kon nagabatas ang isa, nagapakita sia sang kaisog, kalig-on, kag pasensia. Ang pagbatas amo ang “panimuot nga nagabulig nga antuson ang mga butang, indi bangod wala ka sing mahimo, kundi bangod sang daku nga paglaum,” siling sang isa ka reperensia. “Isa ini ka kinaiya nga nagabulig sa isa ka tawo nga atubangon ang problema. Isa ini ka kinaiya nga nagabulig nga tamdon ang pinakamabudlay nga pagtilaw nga isa ka kalipay bangod sa pihak sang kasakit makita mo ang kadalag-an.”

4. Paano makabulig ang gugma para makabatas?

4 Makabatas ang isa ka Cristiano bangod sang gugma. (Basaha ang 1 Corinto 13:4, 7.) Bangod sang aton gugma kay Jehova, mabatas naton ang bisan ano nga nahisuno sa iya kabubut-on. (Luc. 22:41, 42) Ang aton gugma sa aton mga kauturan nagabulig sa aton nga batason ang ila pagkadihimpit. (1 Ped. 4:8) Bangod sang aton gugma sa aton bana ukon asawa, mabatas naton ang “kapipit-an” nga naeksperiensiahan bisan sang malipayon nga mga mag-asawa kag mapabakod ang aton pag-asawahay.—1 Cor. 7:28.

ANO ANG MAKABULIG SA IMO NGA MAKABATAS?

5. Ngaa si Jehova ang pinakamaayo nga makabulig sa aton agod makabatas kita?

5 Mangayo sing kusog kay Jehova. Si Jehova “ang Dios nga nagapabakod sa aton kag nagabulig sa aton sa pagbatas.” (Roma 15:5) Sia lamang ang bug-os nga nakahangop sang aton sitwasyon, ginabatyag, kag pagkatawo. Gani, sia ang pinakamaayo nga makabulig sa aton agod makabatas kita. “Ginahatag niya ang handum sang mga nagakahadlok sa iya,” siling sang Biblia. “Ginapamatian niya ang ila pagpangayo sing bulig kag ginaluwas niya sila.” (Sal. 145:19) Pero, paano sabton sang Dios ang aton pangamuyo nga hatagan kita sing kusog agod makabatas?

6. Subong sang ginsaad sang Biblia, paano si Jehova ‘magahimo sang lulutsan’ sa aton mga pagtilaw?

6 Basaha ang 1 Corinto 10:13. Kon mangayo kita sing bulig kay Jehova agod maatubang ang mga pagtilaw, ‘magahimo sia sang lulutsan.’ Ginabag-o bala ni Jehova ang kahimtangan para madula ang pagtilaw? Posible. Pero, sa kalabanan nga sitwasyon, nagahimo sia sang lulutsan “agod mabatas [naton] ini.” Ginapabakod kita ni Jehova agod ‘makabatas kita sing bug-os nga may pagpailob kag kalipay.’ (Col. 1:11) Indi gid pagtugutan ni Jehova nga mabutang kita sa sitwasyon nga indi na kita makapabilin nga matutom sa iya, bangod nahibaluan gid niya ang aton pisikal, mental, kag emosyonal nga mga limitasyon.

7. Iilustrar kon ngaa kinahanglan naton ang espirituwal nga pagkaon para makabatas.

7 Palig-una ang imo pagtuo paagi sa espirituwal nga pagkaon. Para makataklad sa Mount Everest, nga amo ang pinakamataas nga bukid sa kalibutan, nagakinahanglan ang manugtaklad sang mga 6,000 ka kalori kada adlaw, kag sobra ini sa kinahanglan sang isa ka tawo. Kinahanglan sang mga manugtaklad nga magkaon sing pagkaon nga may madamo nga kalori para makataklad kag malab-ot ang putukputukan. Gani, kinahanglan  man naton magkaon pirme sang madamo nga espirituwal nga pagkaon agod makabatas sa aton Cristiano nga pagkabuhi kag malab-ot ang aton tulumuron. Dapat gid kita maghatag sing tion sa pagbasa, pagtuon, kag pagtambong sa Cristianong mga miting. Ginapalig-on sini nga mga hilikuton ang aton pagtuo paagi sa ‘pagkaon nga nagahatag sang kabuhi nga wala sing katapusan.’—Juan 6:27.

8, 9. (a) Suno sa Job 2:4, 5, ano ang nadalahig kon ginatilawan kita? (b) Kon ginatilawan ka, ano nga eksena ang mahimo mo imadyinon?

8 Hunahunaa ang isyu parte sa integridad. Nagaantos ang isa ka alagad ni Jehova kon ginatilawan sia. Pero nadalahig man sa sini ang iya integridad. Mapakita naton nga ginakilala naton si Jehova bilang Soberano sang bug-os nga uniberso paagi sa aton reaksion sa pagtilaw. Ginpamatukan ni Satanas ang pagkasoberano ni Jehova kag ginyaguta sia: “Ihatag sang tawo ang tanan nga yara sa iya tungod sa iya kabuhi. Apang untaya ang imo kamot kag haliti ang iya [ni Job] tul-an kag unod, kag pat-od gid nga sikwayon ka niya.” (Job 2:4, 5) Suno kay Satanas, nagaalagad ang mga tawo kay Jehova para lang sa ila kaayuhan. Nagbag-o na bala si Satanas? Wala gid! Pagligad sang ginatos ka tuig, sang gintagbong si Satanas halin sa langit, gintawag gihapon sia nga “manugsumbong sang aton mga kauturan sa atubangan sang aton Dios sa adlaw kag gab-i!” (Bug. 12:10) Wala nalipatan ni Satanas ang isyu parte sa integridad. Gusto gid niya nga mangampo kita kon ginatilawan kag sikwayon naton ang pagkasoberano sang Dios.

9 Gani kon ginatilawan ka, imadyina ining indi makita nga eksena. Ara sa isa ka bahin si Satanas kag ang iya mga demonyo nga nagapaluya sang imo buot kag nagapaabot nga mangampo ka. Sa pihak nga bahin, ara si Jehova, ang nagagahom niya nga Anak, ang ginbanhaw nga mga hinaplas, kag ang linaksa nga mga anghel. Ginapalig-on ka nila, kag nalipay sila bangod sang imo pagbatas kada adlaw kag pagsakdag sa pagkasoberano ni Jehova. Dayon mabatian mo ang pangabay ni Jehova: “Magmaalam ka, anak ko, kag pasadyaha ang akon tagipusuon, agod masabat ko sia nga nagayaguta sa akon.”—Hulu. 27:11.

10. Paano mo mailog si Jesus sa pagpokus sa padya sang pagbatas?

10 Magpokus sa padya sang pagbatas. Ibutang ta nga madugay ka na nga nagalakbay, kag nag-untat ka sa tungatunga sang malaba nga tanel. Madulom ang imo palibot. Pero nagasalig ka nga kon padayon ka nga maglakbay, makakita ka liwat sang kasanag. Kon kaisa, mahimo nga magbatyag ka man nga daw indi mo masarangan ang imo mga problema. Mahimo nga amo man sina ang ginbatyag ni Jesus. ‘Ginpakalain sia sang mga makasasala,’ ginpakahuy-an, kag ginpatay sa “usok sang pag-antos.” Amo gid ini ang pinakamabudlay nga bahin sang iya pagkabuhi sa duta! Pero, ginbatas ini tanan ni Jesus “tungod sa kalipay nga ginbutang sa iya atubangan.” (Heb. 12:2, 3) Nagpokus sia sa padya nga mabaton niya kon magbatas sia, ilabi na sa iya pagpakabalaan sa ngalan sang Dios kag pagbindikar sa pagkasoberano ni Jehova. Temporaryo lang ang mga pagtilaw kay Jesus, pero wala sing katapusan ang iya padya sa langit. Mahimo nga mabudlay gid ang mga pagtilaw sa imo subong. Pero, tandai nga temporaryo lang ini samtang yara ka sa dalanon padulong sa kabuhi nga wala sing katapusan.

“ANG MGA NAGBATAS”

11. Ngaa dapat naton binagbinagon ang eksperiensia sang “mga nagbatas”?

11 Wala kita nagaisahanon sa pagbatas sang mga pagtilaw. Agod palig-unon ang mga Cristiano nga batason ang mga pagtilaw halin kay Satanas, si apostol Pedro nagsulat: “Magtindog kamo batok sa iya kag mangin malig-on sa pagtuo, bangod nahibaluan ninyo nga ang amo man nga sahi sang mga pag-antos naeksperiensiahan man sang tanan ninyo nga kauturan sa bug-os nga kalibutan.” (1 Ped. 5:9) Ang eksperiensia sang “mga  nagbatas” nagatudlo sa aton nga magpabilin nga malig-on, nagapasalig sa aton nga magamadinalag-on kita, kag nagapahanumdom sa aton nga padyaan ang aton katutom. (Sant. 5:11) Binagbinagon naton ang pila ka halimbawa. [1]

12. Ano ang matun-an naton sa halimbawa sang mga kerubin nga ginbutang sa Eden?

12 Ang mga kerubin. Ang halimbawa sang pila ka espiritu nga mga tinuga nga una nga nakita sang tawo nagapalig-on sa aton nga magbatas sa mabudlay nga asaynment. “Nagbutang [si Jehova nga Dios] sa sidlangan sang hardin sang Eden sing mga kerubin kag sing nagadabdab nga espada nga nagatiyog sing padayon agod bantayan ang dalan pakadto sa kahoy sang kabuhi.” [2] (Gen. 3:24) Wala gintuga ang mga kerubin para sa sini nga asaynment! Kay man, ang sala kag pagrebelde indi bahin sang katuyuan ni Jehova sa mga tawo. Pero, wala kita sing mabasa nga nagreklamo ang mga kerubin nga indi sila bagay sa sini nga asaynment, bisan pa espiritu sila nga mga tinuga nga may mataas nga ranggo. Wala sila gintak-an kag nangampo. Sa baylo, wala nila ginbiyaan ang ila asaynment kag nagbatas sila sa sulod sang sobra 1,600 ka tuig asta matapos ini, nga mahimo sang panahon sang Baha!

13. Ngaa nabatas ni Job ang mga pagtilaw sa iya?

13 Ang patriarka nga si Job. Kon nasaklaw ka bangod sang masakit nga ginhambal sang isa ka abyan ukon miembro sang imo pamilya, may malala nga balatian, ukon nasubuan sang mapatay ang isa ka hinigugma, malugpayan ka sang halimbawa ni Job. (Job 1:18, 19; 2:7, 9; 19:1-3) Bisan pa wala nahibal-an ni Job ang rason sang iya kabudlayan, wala sia nangampo. Ngaa? Bangod “nagakahadlok sia sa Dios.” (Job 1:1) Determinado gid si Job nga pahamut-an si Jehova sa maayo kag indi maayo nga mga kahimtangan. Paagi sa bulig sang Dios, ginpamalandungan ni Job ang makatilingala nga mga butang nga nahimo na ni Jehova paagi sa Iya balaan nga espiritu. Nagdugang pa gid ang pagsalig ni Job nga dulaon ni Jehova ang mga pagtilaw sa iya sa husto nga tion. (Job 42:1, 2) Kag amo gid sini ang natabo. “Ginkuha ni Jehova ang kapipit-an ni Job kag ginpamanggaranon sia liwat. Ginhatagan ni Jehova si Job sing pagkabutang nga doble pa sa ginpanag-iyahan niya sang una.” “Napatay si Job nga tigulang na kag kontento sa iya kabuhi.”—Job 42:10, 17.

14. Suno sa 2 Corinto 1:6, paano nakabulig sa iban ang pagbatas ni Pablo?

14 Si apostol Pablo. Ginapamatukan ka bala ukon ginahingabot sang mga kaaway sang matuod nga pagsimba? Isa ka bala ka gulang sa kongregasyon ukon manugtatap sang sirkito nga nabug-atan na sang imo mga responsibilidad? Pamalandungi ang halimbawa ni Pablo. Madamo sia sing pagtilaw nga inagihan bangod  sang mapintas nga mga manughingabot, kag adlaw-adlaw man sia nga nabalaka sa mga kongregasyon. (2 Cor. 11:23-29) Pero wala sia nangampo, kag napabakod ang iban bangod sang iya halimbawa. (Basaha ang 2 Corinto 1:6.) Tandai nga ang imo pagbatas sa mga pagtilaw nagapalig-on man sa iban nga magbatas.

“MAKAPANGHIKOT” BALA SA IMO “SING BUG-OS” ANG PAGBATAS?

15, 16. (a) Ngaa dapat naton tugutan nga “makapanghikot sing bug-os ang pagbatas”? (b) Maghatag sing mga halimbawa kon paano naton ginatugutan nga “makapanghikot sing bug-os ang pagbatas.”

15 Gintuytuyan sang Dios si Santiago nga magsulat: “Tuguti nga makapanghikot sing bug-os ang pagbatas.” Ngaa? Buligan kita sini nga ‘mangin bug-os kag maayo sa tanan nga paagi, nga wala sing kulang nga bisan ano.’ (Sant. 1:4) Paagi sa mga pagtilaw, makita naton ang aton mga kaluyahon ukon bahin sang aton personalidad nga dapat naton pauswagon. Kon ginabatas naton ang mga pagtilaw, magauswag kag mangin mas maayo ang aton personalidad subong Cristiano. Halimbawa, mahimo nga mangin mapinasensiahon, mainapresyahon, kag matinahuron pa gid kita.

Kon ginabatas naton ang mga pagtilaw, magauswag ang aton personalidad subong Cristiano (Tan-awa ang parapo 15 kag 16)

16 Mangin maayo gid kita nga mga Cristiano kon batason naton ang mga pagtilaw. Gani indi pagsikwaya ang mga prinsipio sa Kasulatan para lang mauntat ang mga pagtilaw nga ginaatubang mo. Halimbawa, nagapakigbato ka bala sa imoral nga panghunahuna? Magpangamuyo kag sikwaya ina nga mga panghunahuna sa baylo nga magpadaug sa tentasyon. Sa amo, mapabakod mo ang imo pagpugong sa kaugalingon. Ginapamatukan ka bala sang indi Saksi nga miembro sang imo pamilya? Padayuna ang imo bug-os tagipusuon nga pagsimba sa baylo nga mag-untat. Kon himuon mo ini, magabakod pa gid ang imo pagsalig kay Jehova. Tandai ini: Dapat kita magbatas agod kahamut-an sang Dios.—Roma 5:3-5; Sant. 1:12.

17, 18. (a) Iilustrar kon ngaa importante nga magbatas asta sa katapusan. (b) Ano ang aton masaligan samtang nagahilapit ang katapusan?

17 Dapat kita magbatas, indi sa pila lang ka tion, kundi asta sa katapusan. Sa pag-ilustrar: Imadyina nga nagkulob ang isa ka barko. Dapat maglangoy ang mga pasahero pakadto sa pangpang agod maluwas. Pareho lang ang madangatan sang pasahero nga nag-untat sa paglangoy bisan malapit na lang ang pangpang kag sang pasahero nga nag-untat sa paglangoy malayo sa pangpang. Gani determinado kita nga magbatas tubtob sa bag-ong kalibutan. Dira nagadepende ang aton kabuhi. Dapat naton ilugon ang panimuot ni apostol Pablo, nga duha ka beses nga nagsiling: “Wala kami nagauntat.”—2 Cor. 4:1, 16.

18 Makasalig gid kita nga buligan kita ni Jehova nga makabatas asta sa katapusan. Nagapati kita sa ginsiling ni Pablo sa Roma 8:37-39: “Nadaug naton ini tanan nga butang paagi sa isa nga naghigugma sa aton. Kay kumbinsido ako nga bisan ang kamatayon ukon ang kabuhi ukon ang mga anghel ukon ang mga panguluhan ukon ang mga butang karon ukon ang mga butang nga maabot ukon ang mga kagamhanan ukon ang kataason ukon ang kadalumon ukon ang iban pa nga tinuga indi makapugong nga mabaton naton ang gugma sang Dios nga ginapakita man ni Cristo Jesus nga aton Ginuo.” Matuod nga ginakapoy man kita kon kaisa. Pero, kabay nga magbatas kita asta sa katapusan, agod masiling man sa aton ang ginsiling parte kay Gideon kag sa iya mga soldado: “Padayon ang ila paglagas.”—Huk. 8:4.

^ [1] (parapo 11) Makapalig-on man kon binagbinagon mo ang pagbatas sang katawhan sang Dios subong. Halimbawa, mabasa sa Tuigan nga Libro sang 1992, 1999, kag 2008 ang makapabakod sing pagtuo nga mga report parte sa aton mga kauturan sa Etiopia, Malawi, kag Rusya.

^ [2] (parapo 12) Wala nagsiling ang Biblia kon pila ka kerubin ang ginhatagan sini nga asaynment.