Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Abril 2016

Ang Pagpakita sing Pagtuo Nagapahamuot sa Dios

Ang Pagpakita sing Pagtuo Nagapahamuot sa Dios

“Mangin mga manug-ilog sang mga nagapanubli sang mga saad paagi sa pagtuo kag paghulat sing mapinasensiahon.”—HEB. 6:12.

AMBAHANON: 86, 54

1, 2. Ano nga kabudlayan ang gin-atubang ni Jefte kag sang iya anak?

GINAKULBAAN nga ginahulat sang isa ka dalaga ang iya amay halin sa inaway. Pag-abot sang iya amay nga madinalag-on, malipayon nga ginsugata sia sang iya anak. Imbes nga magsaot kag mag-amba nga may kalipay upod sa iya anak, gingisi niya ang iya duguon nga bayo kag nagsiling: “Anak ko! Ginpasubo mo gid ako.” Dayon may ginhambal ang iya amay nga magabag-o sang kabuhi niya, nga tuhay sa iya mga ginahandum kag ginalauman nga normal nga kabuhi. Pero, wala sing pangalag-ag nga ginpalig-on niya ang iya amay nga himuon ang iya ginpanumpa kay Jehova. Ang iya sabat nagpakita sang iya daku nga pagtuo. Nagasalig sia nga para gid sa iya kaayuhan ang ginapangabay ni Jehova. (Huk. 11:34-37) Daku gid ang kalipay sang amay bangod ang kahanda sang iya anak sa pagsakdag sa iya desisyon nagapahamuot kay Jehova.

2 Nagsalig si Jefte kag ang iya mahinadlukon sa Dios nga anak sa mga pamaagi ni Jehova, bisan pa mabudlay ini himuon. Kumbinsido sila nga takus gid sa bisan ano nga sakripisyo ang pagpahamuot sa Dios.

3. Paano makabulig sa aton subong ang halimbawa ni Jefte kag sang iya anak?

 3 Nakahibalo kita nga indi pirme mahapos ang padayon nga pagpakita sing pagtuo kay Jehova. Dapat kita “makig-away sing lakas para sa pagtuo.” (Jud. 3) Agod mabuligan kita, binagbinagon naton ang mga kabudlayan nga nalandas ni Jefte kag sang iya anak. Paano nila ginpakita ang pagtuo kay Jehova?

NAGPAKITA SING PAGTUO WALA SAPAYAN SANG IMPLUWENSIA SANG KALIBUTAN

4, 5. (a) Ano ang ginsugo ni Jehova sa mga Israelinhon sang nagsulod sila sa Ginsaad nga Duta? (b) Suno sa Salmo 106, ano ang natabo sa mga Israelinhon bangod wala sila magtuman?

4 Kada adlaw, mahimo nga ginapamensar ni Jefte kag sang iya anak ang malain nga resulta sang pagsupak kay Jehova. Mga 300 ka tuig ang nagligad, ginsugo ang ila mga katigulangan nga papason ang tanan nga pagano nga mga pumuluyo sa Ginsaad nga Duta. (Deut. 7:1-4) Bangod wala magtuman ang mga Israelinhon, madamo sa ila ang nagsunod sa sala nga ginahimo sang mga Canaanhon, subong sang pagsimba sa mga diosdios kag paghimo sang imoral nga mga buhat.—Basaha ang Salmo 106:34-39.

5 Ini nga pagrebelde nagresulta sa kaakig ni Jehova, gani wala na niya sila gin-amligan. (Huk. 2:1-3, 11-15; Sal. 106:40-43) Mabudlay gid sadto para sa mahinadlukon sa Dios nga mga pamilya nga magpabilin nga matutom kay Jehova! Pero, ginpakita sang Biblia nga may mga tawo sadto nga nakahimo sini, pareho kay Jefte kag sang iya anak, kag sanday Elkana, Hana, kag Samuel, nga determinado nga pahamut-an ang Dios.—1 Sam. 1:20-28; 2:26.

6. Ano nga mga impluwensia sang kalibutan ang ginapasanyog subong, kag ano ang dapat naton himuon?

6 Nagakabuhi kita sa kalibutan nga pareho ang panghunahuna kag mga buhat sa dumaan nga Canaan. Ginapasanyog sang mga tawo ang pagpakigsekso, kasingki, kag materyalismo. Naghatag si Jehova sang maathag nga paandam sa aton, pareho sa ginhimo niya sa mga Israelinhon, agod amligan kita sa sina nga mga impluwensia. Ano ang matun-an naton sa mga sala sang mga Israelinhon? (1 Cor. 10:6-11) Dapat gid kita manikasog nga dulaon sa aton kabuhi ang panghunahuna nga pareho sa mga taga-Canaan. (Roma 12:2) Ginahimo gid bala naton ini?

NAGPAKITA SING PAGTUO WALA SAPAYAN SANG MALAIN NGA KAHIMTANGAN

7. (a) Ano ang ginhimo kay Jefte sang iya mismo katawhan? (b) Ano ang reaksion ni Jefte?

7 Sang panahon ni Jefte, gin-ulipon ang mga Israelinhon sang mga Filistinhon kag sang mga Ammonhon bangod sang ila pagkadimatinumanon. (Huk. 10:7, 8) Pero indi lang ang kaaway nga mga pungsod ang nagpabudlay kay Jefte kundi pati man ang iya mga utod kag ang mga lider sang Israel. Ginpalayas sia sang iya mga utod sa amay kay nahisa kag naakig sila sa iya. Gin-agaw nila ang iya kinamatarong bilang panganay. (Huk. 11:1-3) Wala niya gintugutan nga maapektuhan sang ila kapintas ang iya panimuot. Imbes nga magbalos kag indi pagsapakon ang pangabay sang mga gulang sang pungsod, ginbuligan niya sila. (Huk. 11:4-11) Ano ayhan ang nagbulig kay Jefte nga magdesisyon subong isa ka espirituwal nga tawo?

8, 9. (a) Ano nga mga prinsipio sa Mosaikong Kasuguan ang mahimo nagbulig kay Jefte? (b) Ano ang mas importante para kay Jefte?

8 Indi lang isa ka isganan nga hangaway si Jefte, nahibaluan man niya ang mga pagpakig-angot sang Dios sa Iya katawhan. Ang madalom nga ihibalo ni Jefte sa kasaysayan sang Israel nagtudlo sa iya kon ano ang husto kag sala sa panulok ni Jehova. (Huk. 11:12-27) Ang mga prinsipio sang Dios sa Mosaikong  Kasuguan nagdihon sa panghunahuna kag tagipusuon ni Jefte. Nahibaluan niya nga indi gusto ni Jehova nga maghinakit kita; sa baylo, ginapatuman sang Dios nga maghigugmaanay ang Iya katawhan. Nagatudlo man ang Kasuguan nga dapat buligan sang isa ang mga nagakinahanglan, bisan yadtong “nagadumot” sa iya.—Basaha ang Exodo 23:5; Levitico 19:17, 18.

9 Ang halimbawa sang mga matutom kaangay ni Jose nga nagpakita sang kaluoy sa iya mga utod, bisan “gindumtan nila sia,” mahimo nag-impluwensia man sa desisyon ni Jefte. (Gen. 37:4; 45:4, 5) Ang pagpamalandong sa ila mga halimbawa mahimo nagbulig kay Jefte nga himuon ang gusto ni Jehova. Nasakitan gid si Jefte sa ginhimo sang iya mga utod, pero wala ini nagpugong sa iya nga alagaron si Jehova kag ang Iya katawhan. (Huk. 11:9) Ang pagpangapin sa ngalan ni Jehova mas importante para kay Jefte sangsa bisan ano nga personal nga mga problema. Bangod determinado gid sia nga ipakita ang iya pagtuo kay Jehova, nagresulta ini sang maayo para sa iya kag para sa iban.—Heb. 11:32, 33.

10. Bilang mga Cristiano, paano kita mabuligan sang mga prinsipio sang Dios?

10 Tugutan bala naton ang halimbawa ni Jefte nga magtandog sang aton tagipusuon? Mahimo nakaeksperiensia kita sang malain nga kahimtangan ukon indi maayo nga pagtratar sang Cristianong mga utod. Kon natabo ini sa aton, indi naton pagtugutan nga punggan kita sini nga mga kabudlayan sa pagtambong sa mga miting ukon sa pag-alagad kay Jehova kag sa pagpakig-upod sing bug-os sa kongregasyon. Ilugon naton si Jefte, kag sundon ang mga talaksan sang Dios. Magabulig ini sa aton nga malampuwasan ang mabudlay nga mga kahimtangan kag mangin maayo nga halimbawa.—Roma 12:20, 21; Col. 3:13.

PAMATUOD SANG ATON PAGTUO ANG ATON PAGSAKRIPISYO

11, 12. Ano ang ginpanaad ni Jefte, kag ano ang kahulugan sini?

11 Narealisar ni Jefte nga kinahanglan niya ang bulig sang Dios agod mahilway ang Israel sa mga Ammonhon. Nagpanaad sia kay Jehova nga kon magdaug sia, ihalad niya kay Jehova, subong “dulot nga sinunog,” ang una nga maggua sa iya balay sa iya pagbalik halin sa pagpakig-away. (Huk. 11:30, 31) Ano ang kahulugan sina nga halad?

12 Makangilil-ad kay Jehova ang paghalad sing tawo. Gani, maathag nga indi luyag ni Jefte maghalad sing tawo. (Deut. 18:9, 10) Sa Mosaikong Kasuguan, ang dulot nga sinunog ginahatag sing bug-os kay Jehova. Gani, ang halad ni Jefte nagakahulugan nga ihatag niya ang tawo para mag-alagad sa Dios sing bug-os. Ginpahangop sini ang permanente nga pag-alagad sa tabernakulo. Ginbaton ni Jehova ang kondisyon ni Jefte kag ginpadaug sia paagi sa pagpatay kag pagpierde sa iya mga kaaway. (Huk. 11:32, 33) Pero sin-o ayhan ang tawo nga ihatag subong “dulot nga sinunog” sa Dios?

13, 14. Ano ang ginapakita sang ginsiling ni Jefte nga narekord sa Hukom 11:35 parte sa iya pagtuo?

13 Dumduma ang kahimtangan sa umpisa sini nga artikulo. Sang nagbalik si Jefte halin sa inaway, ginsugata sia sang iya pinalangga nga bugtong nga anak nga babayi! Ano ang himuon ni Jefte? Tumanon bala niya ang iya ginpanaad kag ihatag ang iya anak para mag-alagad sa tabernakulo sa bug-os niya nga kabuhi?

14 Sa liwat, gingiyahan si Jefte sang mga prinsipio sang Dios nga maghimo sang husto nga desisyon. Mahimo nga nadumduman niya ang ginsiling sa Exodo 23:19, nga nagasugo sa katawhan sang Dios nga ihatag ang ila pinakamaayo kay Jehova. Ginpakita man sang Kasuguan nga dapat tumanon sang  isa ka tawo ang iya ginpanaad. Nagsiling ini: “Kon ang isa ka tawo magpanaad kay Jehova . . . , indi niya dapat paglapason ang iya ginhambal. Himuon niya ang tanan nga ginpanaad niya.” (Num. 30:2) Kaangay sang matutom nga si Hana, nga mahimo kadungan niya, kinahanglan man tumanon ni Jefte ang iya ginpanaad, bisan pa nahibaluan niya ang resulta sini sa palaabuton niya kag sang iya anak. Wala na sia sang iban nga anak; ang iya lamang anak ang iya paglaum nga makahatag sa iya sang kaliwat nga magadala sang iya ngalan kag palanublion sa Israel. (Huk. 11:34) Pero sa katapusan sang Hukom 11:35, si Jefte nagsiling: “Nakapanumpa na ako kay Jehova kag indi ko na ini mabawi.” Ginkahamut-an sia kag ginpakamaayo sang Dios bangod sang iya pagtuo kag daku nga sakripisyo. Amo man bala sina ang imo himuon?

15. Ano ang ginpanaad naton, kag paano naton mapamatud-an ang aton pagtuo?

15 Sang nagdedikar kita sang aton kabuhi kay Jehova, nagpanaad kita nga himuon sing bug-os ang iya kabubut-on. Nahibaluan naton nga dapat kita magsakripisyo agod tumanon ina nga panaad. Pero, matilawan ang aton kahanda kon pangabayon kita nga himuon ang indi naton gusto. Mapamatud-an naton ang aton pagtuo kon magsakripisyo kita kag mag-alagad sa Dios bisan pa sa paagi nga wala naton naandan. Ang mga pagpakamaayo nga matigayon naton sa ulihi mas labaw pirme sa aton mga sakripisyo bisan ano pa ini kabudlay. (Mal. 3:10) Pero, kamusta naman ang anak ni Jefte?

Paano naton mapakita ang pagtuo nga pareho kay Jefte kag sa iya anak? (Tan-awa ang parapo 16 kag 17)

16. Ano ang reaksion sang anak ni Jefte sa ginpanaad sang iya amay? (Tan-awa ang piktyur sa umpisa sini nga artikulo.)

16 Mahimo nga mabudlay para sa anak ni Jefte nga batunon ang mga resulta sang ginpanaad sang iya amay. Tuhay ini sa ginpanaad ni Hana nga naghatag sa iya anak nga si Samuel para mag-alagad sa tabernakulo subong isa ka Nazareo. (1 Sam. 1:11) Ang isa ka Nazareo puede makapangasawa kag makatigayon sang pamilya. Pero, ang anak ni Jefte ginhatag sing bug-os subong “dulot nga sinunog”;  indi sia makapamana kag makatigayon sang pamilya. (Huk. 11:37-40) Bangod anak sia sang madinalag-on nga pangulo kag lider sang Israel, mahimo niya kuntani mapamana ang pinakamaayo nga lalaki sang pungsod. Pero subong, mangin kubos nga alagad na lang sia sa tabernakulo. Ano ang reaksion sang dalaga? Ginpakita niya nga ginauna niya ang pag-alagad kay Jehova sang nagsiling sia: “Amay ko, kon nakapanumpa ka na kay Jehova, himua sa akon ang ginpanumpa mo.” (Huk. 11:36) Ginsakripisyo niya ang iya natural nga mga handum nga makapamana kag makatigayon sang mga anak agod sakdagon ang matuod nga pagsimba. Paano naton mailog ang iya pagkamasinakripisyuhon?

17. (a) Paano naton mailog ang pagtuo ni Jefte kag sang iya anak? (b) Paano ka ginapalig-on sang Hebreo 6:10-12 nga mangin masinakripisyuhon?

17 Linibo ka bataon nga mga Cristiano subong ang kinabubut-on nga nagsakripisyo. Ang iban nagpabilin anay nga indi minyo kag ang mga minyo na nagdesisyon nga indi lang anay magbata agod maalagad nila sing bug-os si Jehova. Ginsakripisyo man sang mga may edad na ang ila tion agod mag-obra sa mga proyekto sang pagpanukod ukon mag-eskwela sa School for Kingdom Evangelizers kag mag-alagad sa mga lugar nga kinahanglan ang mas madamo nga manugbantala sang Ginharian. Ina nga tion mahimo kuntani nila gamiton sa pagpakig-upod sa ila mga anak kag mga apo. Ang iban nagsakripisyo para dugangan ang ila pagpakigbahin sa pag-alagad sa tion sang Memoryal. Ining bug-os tagipusuon nga pag-alagad nagapahalipay gid kay Jehova. Indi gid niya pagkalimtan ang ila binuhatan kag gugma para sa iya. (Basaha ang Hebreo 6:10-12.) Makasakripisyo ka pa gid bala agod maalagad si Jehova sing bug-os?

ANG NATUN-AN NATON

18, 19. Ano ang natun-an naton sa rekord sang Biblia parte kay Jefte kag sa iya anak, kag paano naton sila mailog?

18 Gintugutan ni Jefte ang panghunahuna ni Jehova nga maggiya sa iya mga desisyon bisan pa puno sang kabudlayan ang iya kabuhi. Wala sia nagpaimpluwensia sa kalibutan. Ang pagpaslaw sa iya sang iban wala nagpaluya sang iya determinasyon nga ipakita ang pagtuo. Ginpakamaayo ni Jehova ang mga sakripisyo ni Jefte kag sang iya anak. Gingamit niya sila agod sakdagon ang putli nga pagsimba. Ginsunod ni Jefte kag sang iya anak ang mga talaksan sang Dios bisan pa ang iban nagsikway sini.

19 Ginapalig-on kita sang Biblia nga “mangin mga manug-ilog sang mga nagapanubli sang mga saad paagi sa pagtuo kag paghulat sing mapinasensiahon.” (Heb. 6:12) Ginpamatud-an sang pagkabuhi nanday Jefte kag sang iya anak nga ang pagpakita sing pagtuo nagapahamuot sa Dios. Kabay nga ilugon naton ang ila halimbawa.