Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ABRIL 2016

Ngaa Dapat Kita Magtipon Para Magsimba?

Ngaa Dapat Kita Magtipon Para Magsimba?

“Padayon sila nga nag-ukod . . . sa pagpakig-upod.”—BINU. 2:42.

AMBAHANON: 20, 119

1-3. (a) Paano ginapabaloran sang mga Cristiano ang ila pagtilipon? (Tan-awa ang piktyur sa umpisa sini nga artikulo.) (b) Ano ang binagbinagon naton sa sini nga artikulo?

SANG 17 anyos pa lang si Corinna, gin-aresto kag ginpriso sa isa ka labor camp sang Soviet Union ang iya iloy. Wala madugay, sia naman ang gintapok sa Siberia, linibo ka kilometro halin sa ila lugar. Gintratar sia subong ulipon, kag kon kaisa ginapaobra sia sa gua pero ang iya ginasuksok indi bastante sa tuman nga katugnaw. Bisan pa sining mabudlay nga kahimtangan, determinado gihapon si Corinna kag ang isa pa ka utod nga babayi nga magtambong sa miting sang kongregasyon.

2 “Gab-i pa kami naghalin sa amon ginatrabahuan,” paathag ni Corinna, “kag naglakat sing 25 ka kilometro pakadto sa estasyunan sang tren. Naghalin ang tren sa alas dos sang kaagahon, kag anom ka oras ang amon biyahe kag naglakat pa kami sing napulo ka kilometro pakadto sa duog tilipunan.” May pulos bala ini? Si Corinna nagsiling: “Sa miting, nagtuon kami sang Ang Lalantawan kag nag-amba sing mga ambahanon sa Ginharian. Nagpalig-on gid ini sa amon kag nagpabakod sa amon pagtuo.” Bisan pa tatlo ka adlaw ang nagligad kag makabalik sa trabaho si Corrina kag ang kaupod niya, wala ina matalupangdan sang nagadumala sang uma.

 3 Ginapabaloran gid sang katawhan ni Jehova ang ila pagtilipon. Sa tapos matukod ang Cristianong kongregasyon, “nag-ukod . . . sa pagpakig-upod” ang mga sumulunod ni Jesus. (Binu. 2:42) Mahimo nga gusto mo man magtambong sing regular sa mga miting sang kongregasyon. Pero, nagaatubang ang tanan nga Cristiano sang mga kabudlayan. Mahimo nga nabudlayan kita magtambong sa mga miting bangod sang aton trabaho, kasakuon, ukon kalapyo bangod sang aton mga buluhaton kada adlaw. Ano ang makabulig sa aton agod malampuwasan ini nga mga kabudlayan kag makatambong sing regular sa mga miting? [1] Paano naton mabuligan ang aton mga ginatun-an sa Biblia kag ang iban pa nga mahangpan ang importansia sang pagtambong sa mga miting? Binagbinagon naton sa sini nga artikulo ang walo ka rason kon ngaa dapat kita magtipon para magsimba. Gingrupo ini nga mga rason sa tatlo ka kategoriya: ang epekto sa imo, ang epekto sa iban, kag ang epekto kay Jehova kon magtambong ka sa mga miting. [2]

ANG EPEKTO SA IMO

4. Paano kita ginatudluan sa aton pagtilipon parte kay Jehova?

4 Ginatudluan kita sa mga miting. Ginatudluan kita sa tagsa ka miting sang kongregasyon parte sa aton Dios nga si Jehova. Halimbawa, ginbinagbinag sang kalabanan nga kongregasyon ang libro nga Mangin Suod kay Jehova sa Pagtinuon sang Kongregasyon sa Biblia sing halos duha ka tuig. Indi bala nga nagbakod pa gid ang imo gugma sa imo Amay sa langit paagi sa pagtuon sa mga kinaiya sang Dios, upod sa tinagipusuon nga mga komento sang imo mga kauturan? Nagadugang man ang aton ihibalo sa Pulong sang Dios paagi sa pagpamati sing maayo sa mga pamulongpulong, mga pasundayag, kag pagbasa sa Biblia. (Neh. 8:8) Halimbawa, hunahunaa ang espirituwal nga mga hiyas nga imo natukiban kada semana samtang nagahanda ka kag nagapamati sa talalupangdon nga mga punto sa pagbasa sa Biblia!

5. Paano ka nabuligan sang mga miting nga iaplikar ang natun-an mo sa Biblia kag mag-uswag sa imo pagbantala?

5 Ginatudluan kita sa mga miting nga iaplikar ang mga prinsipio sa Biblia sa tanan nga bahin sang aton kabuhi. (1 Tes. 4:9, 10) Halimbawa, gindesinyo ang Pagtinuon sa Ang Lalantawan suno sa mga kinahanglanon sang katawhan sang Dios. Napalig-on ka bala sang isa ka Pagtinuon sa Ang Lalantawan nga binagbinagon ang imo mga tulumuron, patawaron ang imo utod, ukon pauswagon ang kalidad sang imo mga pangamuyo? Ginatudluan kita sa midweek miting para mag-uswag sa aton ministeryo. Natun-an naton kon paano magbantala sang maayong balita kag kon paano magtudlo sang mga prinsipio sa Kasulatan sing epektibo.—Mat. 28:19, 20.

6. Paano kita ginapalig-on kag ginapabakod sang aton mga miting?

6 Ginapalig-on kita sang mga miting. Ginapaluya kita sini nga sistema sang mga butang sa mental, sa emosyonal kag sa espirituwal. Pero ginapalig-on kita kag ginapabakod sang mga miting sang kongregasyon. (Basaha ang Binuhatan 15:30-32.) Masami naton nga ginarepaso ang katumanan sang mga tagna sa Biblia sa aton mga miting. Subong resulta, labi kita nga nagasalig nga matuman man ang mga ginsaad ni Jehova para sa palaabuton. Siempre, indi lang ang mga may bahin ang nagapalig-on sa aton kundi ang mga nagakomento man kag nagaamba sing tinagipusuon. (1 Cor. 14:26) Kag kon makig-istorya kita sa aton mga kauturan antes kag pagkatapos sang miting, nagasuod kita sa ila kag nalipay gid kita.—1 Cor. 16:17, 18.

7. Ngaa importante gid nga yara kita sa aton mga miting?

7 Ginatuytuyan kita sang balaan nga espiritu sa mga miting. Ang ginhimaya nga si Jesucristo nagsiling: “Ang makabati magpamati sing maayo sa ginasiling sang espiritu sa mga  kongregasyon.” (Bug. 2:7) Ginatuytuyan ni Jesus ang Cristianong kongregasyon paagi sa balaan nga espiritu. Kinahanglan naton ang balaan nga espiritu agod mabatuan ang mga tentasyon, mangin maisog kag handa sa aton ministeryo, kag makahimo sing maayo nga mga desisyon. Indi bala dapat nga panikasugan gid naton nga yara kita sa mga miting sang kongregasyon para mabaton naton ini nga espiritu?

ANG EPEKTO SA IBAN

8. Kon makita kita sa mga miting sang aton mga kauturan kag mabatian nila ang aton komento kag pag-amba, paano ini makabulig sa ila? (Tan-awa ang kahon nga “Nagaayo ang Pamatyag Niya.”)

8 Ginahatagan kita sang mga miting sing kahigayunan nga ipakita ang aton gugma sa aton mga kauturan. Hunahunaa ang mga problema nga ginabatas sang pila ka kauturan sa inyo kongregasyon. Nagsulat si apostol Pablo: “Kabalak-an naton ang isa kag isa.” Dayon ginpaathag ni Pablo nga mapakita naton nga nabalaka kita sa ila kon wala naton “ginapabay-an ang aton pagtilipon.” (Heb. 10:24, 25; footnote) Ang imo pagtambong sa mga miting nagapakita nga takus gid sang imo tion, atension, kag pagkabalaka ang imo mga kauturan. Dugang pa, mapalig-on mo sila paagi sa imo tinagipusuon nga mga komento kag pag-amba.—Col. 3:16.

9, 10. (a) Ipaathag kon paano kita mabuligan sang ginsiling ni Jesus sa Juan 10:16 nga mahangpan nga importante nga magtipon upod sa aton mga kauturan. (b) Kon yara kita pirme sa mga miting, paano naton mabuligan ang isa nga ginsikway sang iya pamilya?

9 Ginapahiusa kita sang mga miting sa aton mga kauturan. (Basaha ang Juan 10:16.) Ginpaanggid ni Jesus ang iya kaugalingon sa isa ka manugbantay, kag ang iya mga sumulunod sa isa ka panong sang mga karnero. Binagbinaga ini: Kon ang duha ka karnero ara sa bungyod, dayon ang duha pa ka karnero ara sa nalupyakan, kag ang isa pa gid nagahalab sa iban nga lugar, masiling bala naton nga ining lima ka karnero bahin sang isa ka panong? Ululupod nga ginaatipan sang manugbantay ang isa ka panong sang mga karnero. Gani, kon hungod naton nga ginapain ang aton kaugalingon, indi naton masunod ang aton Manugbantay. Dapat kita magtipon upod sa iban nga mga Cristiano agod mangin bahin sang “isa ka panong” nga ginaatipan sang “isa ka manugbantay.”

10 Kon nagatambong kita sa miting, nagabulig kita nga mahiusa ang aton mga kauturan. (Sal. 133:1) Ang pila sa aton mga kauturan ginsikway sang ila mismo mga ginikanan kag mga utod. Pero, nagsaad si Jesus nga hatagan niya sila sang espirituwal nga pamilya nga magahigugma kag magaatipan sa ila. (Mar. 10:29, 30) Kon regular ka nga magtambong sa mga miting, mahimo ka mangin amay, iloy, ukon utod sang isa sa sining mga pinalangga! Indi bala nga ginapalig-on kita sini nga panikasugan nga makatambong sa tanan nga miting?

 ANG EPEKTO KAY JEHOVA

11. Paano kita ginabuligan sang mga miting nga ihatag kay Jehova ang para sa iya?

11 Ginahatag naton kay Jehova ang para sa iya kon magtambong kita sa mga miting. Dapat naton dayawon, himayaon, pasalamatan, kag padunggan si Jehova, bangod sia ang aton Manunuga. (Basaha ang Bugna 7:12.) Kon nagapangamuyo kita, nagaamba, kag nagahambal parte kay Jehova sa aton mga miting, ginahatag naton ang para gid kay Jehova, ang aton pagsimba. Ginapabaloran naton ang pribilehiyo nga padunggan ang Isa nga daku gid ang nahimo para sa aton.

12. Ano ang ginabatyag ni Jehova kon tumanon naton ang sugo niya nga magtambong sa mga miting?

12 Dapat man naton tumanon si Jehova. Ginsugo niya kita nga indi pagpabay-an ang aton pagtilipon, ilabi na sa sining tion sang katapusan. Kon sundon naton ini nga sugo, mahamuot gid si Jehova. (1 Juan 3:22) Makita niya kag ginapabaloran ang aton panikasog nga makatambong sa tanan nga miting.—Heb. 6:10.

13, 14. Paano kita nagasuod kay Jehova kag kay Jesus kon yara kita sa mga miting?

13 Ginapakita sang aton pagtambong sa mga miting nga gusto naton mangin suod kay Jehova kag sa iya Anak. Sa aton mga miting, ginatuytuyan kita sang aton Daku nga Instruktor paagi sa iya Pulong, ang Biblia. (Isa. 30:20, 21) Makasiling pa gani ang mga indi tumuluo nga nagatambong sa aton mga miting: “Ang Dios yara gid sa inyo.” (1 Cor. 14:23-25) Ginapakamaayo ni Jehova ang mga miting paagi sa iya balaan nga espiritu kag ginatuytuyan niya ang programa sang pagtudlo sang Kasulatan. Gani kon yara kita sa mga miting, nagapamati kita kay Jehova kag mabatyagan naton ang iya mahigugmaon nga pag-atipan. Sa amo, nagasuod kita sa iya.

14 Si Jesus nagsiling: “Kon diin may duha ukon tatlo nga nagatipon sa akon ngalan, yara ako sa tunga nila.” (Mat. 18:20) Ang prinsipio sa ginsiling ni Jesus naaplikar man sa aton mga miting. Bilang ulo sang kongregasyon, ang Cristo “nagalakat sa tunga” sang mga kongregasyon sang katawhan sang Dios. (Bug. 1:20–2:1) Hunahunaa ini! Si Jehova kag si Jesus gid mismo ang nagapabakod sa aton sa Cristianong mga miting. Ano sa banta mo ang ginabatyag ni Jehova kon makita niya nga gusto gid naton mangin suod sa iya kag sa iya Anak?

15. Paano ginapakita sang aton pagtambong sa mga miting nga gusto naton tumanon ang Dios?

15 Ginapakita sang aton pagtambong sa mga miting nga ginasakdag naton ang pagkasoberano sang Dios. Ginsugo kita ni Jehova nga magtambong sa mga miting, pero wala niya kita ginapilit. (Isa. 43:23) Gani, nagadepende sa aton kon paano naton ipakita ang aton gugma kay Jehova kag ang aton pagsakdag sa iya paggahom. (Roma 6:17) Halimbawa, mahimo kita paobrahon sang aton amo bisan sa tion sang mga miting, gani indi na kita regular nga makatambong. Mahimo man kita pamatukan sang gobierno paagi sa pagpahog nga multahan kita, prisuhon, ukon silutan sing grabe pa gani kon magtipon kita para magsimba. Ukon basi masulay kita nga unahon ang kalingawan sangsa pagtambong sa miting. Sa sini nga mga sitwasyon, dapat kita magpili: Sin-o ang aton tumanon? (Binu. 5:29) Mapasadya naton ang tagipusuon ni Jehova kon sakdagon naton ang iya pagkasoberano.—Hulu. 27:11.

PADAYON NGA MAG-UKOD SA PAGTIPON SING TINGOB

16, 17. (a) Paano naton nahibaluan nga importante gid sa mga Cristiano sang unang siglo ang mga miting? (b) Paano gintamod ni Utod George Gangas ang Cristianong mga miting?

16 Wala nagtipon ang mga Cristiano sang una sa malip-ot lamang nga tion pagkatapos sang makatilingala nga milagro sang Pentecostes 33 C.E. “Padayon sila nga nag-ukod sa pagtuon sang mga ginatudlo sang mga apostoles, sa pagpakig-upod.” (Binu. 2:42) Ang Griego nga tinaga nga ginbadbad “nag-ukod”  nagakahulugan sing pagbatas ukon pagpadayon nga may pagpanikasog. Mabudlay para sa mga Cristiano sang una ang pagtambong sa mga miting bangod sang paggahom sang Roma kag pagpamatok sang mga lider sang relihion sang mga Judiyo. Pero, padayon sila nga nagtipon.

17 Ginaapresyar man sang mga alagad ni Jehova subong ang Cristianong mga miting. Si George Gangas, nga miembro anay sang Nagadumala nga Hubon sing sobra 22 ka tuig, nagsiling: “Para sa akon, makalilipay gid kag makapalig-on ang pagtipon upod sa mga kauturan. Gusto ko nga una nga mag-abot sa Kingdom Hall, kag ulihi nga magpauli, kon posible. Nalipay gid ako kon nagapakighambal sa katawhan sang Dios. Kon kaupod ko sila, daw kaupod ko ang akon pamilya, sa isa ka espirituwal nga paraiso.” Nagsiling pa sia: “Pareho sa kompas nga pirme natuon sa aminhan, pirme ko man ginahunahuna kag ginahandum ang pagtambong sa mga miting.”

18. Ano ang imo pagtamod sa aton mga miting, kag ano ang determinado mo nga himuon?

18 Amo man bala sina ang imo pagtamod sa aton pagtilipon para simbahon si Jehova? Gani, mangin determinado nga magbatas kag panikasugi nga makatambong ka sing regular sa mga miting. Sa amo, nagaugyon ka kay Hari David, nga nagsiling: “Ginahigugma ko, O Jehova, ang balay nga imo ginapuy-an.”—Sal. 26:8.

^ [1] (parapo 3) Indi makatambong sing regular ang pila naton ka kauturan bangod sang mga kahimtangan nga wala sila sing mahimo, pareho sang malala nga balatian. Makasalig sila nga nahangpan gid ni Jehova ang ila sitwasyon kag ginaapresyar gid niya ang ila masarangan sa pagsimba sa iya. Mahimo sila mabuligan sang mga gulang nga makabenepisyo sa espirituwal nga mga programa, ayhan makapamati sila paagi sa telepono ukon paagi sa pagrekord sa mga miting.

^ [2] (parapo 3) Tan-awa ang kahon nga “Mga Rason sa Pagtambong sa mga Miting.”