Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ABRIL 2016

 SUGILANON SANG KABUHI

Mag-ulutod nga Madre nga Nangin Saksi

Mag-ulutod nga Madre nga Nangin Saksi

“INDI ako pag-istoryaha,” singgit sang akon manghod nga si Araceli. “Indi ko gusto nga makabati parte sa imo relihion. Naugot ako sa sini. Akig ako sa imo!” Nasakitan gid ako sang nabatian ko ini nga mga tinaga, kag madumduman ko ini gihapon bisan 91 anyos na ako subong. Pero nangin matuod sa amon ang ginasiling sang Manugwali 7:8 nga “mas maayo pa ang katapusan sang isa ka butang sangsa pamuno sini.”—Felisa.

Felisa: Debotado gid ang pamilya nga gindak-an ko. Mga pari ukon nagaobra para sa simbahan ang akon 13 ka paryente. Ang pakaisa sang akon iloy isa ka pari kag manunudlo sa isa ka eskwelahan sang mga Katoliko, kag sang napatay sia, ginrekomendar ni Pope John Paul II nga himuon sia nga santo. Pigado man ang amon pamilya. Panday sang salsalon ang akon amay, kag nagatrabaho sa uma ang akon iloy. Ako ang subang sa ila walo ka kabataan.

Nagsugod ang Inaway Sibil sa Espanya sang 12 anyos ako. Pagkatapos sang inaway, ginpriso ang akon amay bangod kontra sa diktatoryal nga gobierno ang iya mga ideya. Nabudlayan gid si Nanay sa pagtrabaho para makakaon kami tanan, gani ginsilingan sia sang iya abyan nga paistaron sa isa ka kombento sa Bilbao, Espanya, ang akon tatlo ka manghod nga babayi nga sanday Araceli, Lauri, kag Ramoni. May bastante sila nga pagkaon didto.

Araceli: Nabudlayan gid kami nga magbulag sa amon pamilya kay 14 anyos pa lang ako sadto, si Lauri 12 anyos, kag si Ramoni 10 anyos. Pagpaninlo ang amon obra sa Bilbao. Pagligad sang duha ka tuig, ginsaylo kami sang mga madre sa daku nga kombento sa Zaragoza diin ginaatipan ang mga tigulang. Ginpaobra kami nga mga bata nga magpaninlo sa kusina, kag makakalapoy gid ini.

Felisa: Nagdesisyon si Nanay kag ang akon tiyo nga pari sa amon lugar nga pakadtuon man ako sa Zaragoza upod sa akon mga manghod, para ipalayo ako sa isa ka lalaki sa amon lugar nga naluyag sa akon. Gusto ko magtener sa kombento bangod relihioso gid ako. Nagakadto ako sa Misa kada adlaw,  kag gusto ko man mangin misyonero pareho sa akon pakaisa sa Aprika.

Wala: Ang kombento sa Zaragoza, Espanya; tuo: Ang Nácar-Colunga nga badbad sang Biblia

Wala gid ako ginpalig-on sang mga madre nga alagaron ang Dios sa iban nga pungsod, kag daw priso ako sa kombento. Gani pagligad sang isa ka tuig, nagpauli ako sa amon lugar kag gin-atipan ang akon tiyo nga pari. Ako ang nagaobra sa balay para sa iya, kag nagarosaryo kami kada gab-i. Nanamian man ako nga butangan sang mga bulak ang simbahan kag dekorasyunan ang mga rebulto ni Maria kag sang mga “santos.”

Araceli: Nagbag-o ang amon kabuhi sa kombento sa tapos sang akon una nga panumpa para mangin madre. Nagdesisyon ang mga madre nga magpabilin sa Zaragoza si Ramoni, sayluhon sa Valencia si Lauri, kag ako naman sa Madrid, diin ginhimo ko ang akon ikaduha nga panumpa. May mga ilistaran para sa mga estudyante, mga tigulang, kag iban pa nga bisita ang kombento sa Madrid, gani madamo gid sang obra didto. Nag-obra ako sa ospital sang kombento.

Naglaum gid ako nga manami ang kabuhi sang isa ka madre. Abi ko makabasa na ako kag makatuon sa Biblia. Pero wala gid sang nagaistorya parte sa Dios ukon kay Jesus, kag wala namon ginagamit ang Biblia. Nakatuon lang ako sang Latin nga lenguahe, gintun-an ko ang kabuhi sang mga “santos,” kag ginsimba si Maria. Halos sa tanan nga tion nagatrabaho kami sing todo.

Nabalaka gid ako, gani gin-istorya ko ang madre superyora. Ginhambalan ko sia nga gusto ko maghalin agod buligan ang akon pamilya sangsa buligan ang iban nga magmanggaranon sa indi husto nga paagi. Ginpriso niya ako sa selda kay abi niya magbag-o pa ang akon desisyon nga maghalin sa kombento.

Tatlo ka beses ako ginpagua sang mga madre sa selda para hibaluon kon nagbag-o na ang akon desisyon. Bangod wala nagbag-o ang akon desisyon, ginsugo nila ako nga magsulat, “Mahalin ako bangod luyag ko nga alagaron si Satanas sa baylo sang Dios.” Nakibot gid ako sa sini. Gusto ko gid maghalin sa kombento, pero indi ko gid mahimo nga isulat ini nga mga tinaga. Sang ulihi, nangabay ako nga makaistorya sa pari. Ginsugid ko sa pari ang natabo. Naglisensia sia sa obispo nga ibalik ako sa kombento sa Zaragoza. Pagligad sang pila ka bulan didto, ginpasugtan ako nga maghalin. Wala madugay pagkatapos sini, naghalin man si Lauri kag si Ramoni sa kombento.

ANG “GINADUMILIAN” NGA LIBRO NAGPABAHINBAHIN SA AMON

Felisa

Felisa: Sang ulihi, namana ako kag nagsaylo sa Cantabria. Regular gihapon ako nga nagakadto sa  mga Misa. Isa ka Domingo, nakabati ako sang isa ka pahibalo sa pulpito. Nakibot ako sang nagsinggit ang akig nga pari, “Tan-awa ini nga libro!” kag ginpakita ang libro nga Ang Kamatuoran nga Nagadul-ong sa Kabuhi nga Dayon. Nagsiling pa sia, “Kon hatagan kamo sini nga libro, ihatag ini sa akon ukon ihaboy ninyo ini!”

Wala ako sini nga libro, pero gusto ko gid makatigayon sini. Pagligad sang pila ka adlaw, may duha ka babayi nga mga Saksi nga nagkadto sa balay kag gintanyagan nila ako sang “ginadumilian” nga libro. Ginbasa ko dayon ini nga libro sa sina mismo nga gab-i, kag pagbalik nila, nagsugot ako nga magtuon sa Biblia upod sa ila.

“Ginadumilian” nga libro

Wala madugay, nalab-ot sang kamatuoran ang akon tagipusuon. Ginbuslan sang tudok nga gugma kay Jehova kag kakugi sa ministeryo ang akon pagkadebotado sang una. Nabawtismuhan ako sang 1973. Gintinguhaan ko gid nga isugid ang kamatuoran sa akon pamilya bisan diutay lang ang akon kahigayunan. Grabe gid ang ila pagpamatok sa akon, ilabi na ang manghod ko nga si Araceli nga ginsambit ko sa umpisa.

Araceli: Nangin maakigon ako bangod sang akon malain nga inagihan sa kombento. Pero, nagakadto gihapon ako sa Misa kada Domingo, kag nagarosaryo kada adlaw. Nagpangayo ako sing bulig sa Dios bangod handum ko gid nga mahangpan ang Biblia. Pero sang ginsugid sang akon magulang nga si Felisa ang iya bag-o nga pagpati, wala gid ako nag-ugyon sa iya bangod daw panatiko sia maghambal.

Araceli

Pagligad sang pila ka tuig, nagbalik ako sa Madrid para mag-obra, kag nakapamana ako. Amat-amat nga nagtubo sa akon ang pangduhaduha. Natalupangdan ko nga wala ginaaplikar sang regular nga mga nagakadto sa Misa ang ila natun-an sa mga Ebanghelyo. Gani, nag-untat ako sa pagsimba. Wala na ako nagapati sa mga “santos,” sa pagkompisar, ukon sa impierno. Kag ginpanghaboy ko ang akon tanan nga imahen kag rebulto. Indi ako sigurado kon husto ang akon ginahimo. Nasubuan gid ako, pero padayon ako nga nagapangamuyo sa Dios: “Gusto ko ikaw makilala. Buligi ako!” Nadumduman ko nga pila ka beses na nga nagkadto ang mga Saksi ni  Jehova sa balay, pero wala ko gid sila ginpasulod. Wala gid ako sing salig sa bisan ano nga relihion.

Sang mga 1980, nagsugod sa pagtuon sa Biblia upod sa mga Saksi ang akon mga manghod, si Lauri nga nagaistar sa Pransia kag si Ramoni nga nagaistar sa Espanya. Naghunahuna ako nga ginpatalang man sila pareho kay Manang Felisa. Nakilala ko sang ulihi ang akon kaingod nga si Angelines, kag nangin suod ko nga abyan. Saksi ni Jehova man sia. Pila ka beses ako gintanyagan ni Angelines kag sang iya bana nga magtuon sa Biblia. Nahantop nila nga bisan nagapangindi ako, gusto ko gid magtuon sa Biblia. Sang ulihi, ginsilingan ko sila: “Sige, matuon ako. Pero Biblia ko lang ang gamiton ta.” Ginapatuhuyan ko ang akon Nácar-Colunga nga badbad sang Biblia.

NAHIUSA KAMI SANG ULIHI BANGOD SA BIBLIA

Felisa: Sang nabawtismuhan ako sang 1973, mga 70 lang ang Saksi sa siudad sang Santander, ang kapital sang probinsia sang Cantabria, Espanya. Malapad ang amon teritoryo, kag para mabantalaan ang bilog nga probinsia, nagasakay kami sa bus kag sang ulihi sa awto. Ginakadtuan namon ang kada isa sang ginatos ka baryo sa sini nga rehiyon.

Nagdumala ako sang madamo nga pagtuon sa Biblia kag sa sulod sang pila ka tuig, 11 sa ila ang nabawtismuhan. Kalabanan sa ila mga Katoliko. Debotado man ako sang una, gani dapat ko ipakita ang pagpasensia kag paghangop. Narealisar ko nga kinahanglan nila sing tion para bag-uhon ang ila madugay na nga ginapatihan kag dapat pahulagon sang Biblia kag sang balaan nga espiritu ni Jehova ang ila tagipusuon para mahangpan nila ang kamatuoran. (Heb. 4:12) Nabawtismuhan sang 1979 ang akon bana nga si Bienvenido nga pulis sang una, kag nagtuon man sa Biblia ang akon iloy antes sia napatay.

Araceli: Sang nagsugod ako sa pagtuon sa Biblia upod sa mga Saksi, daw wala ako salig sa ila. Pero samtang nagaligad ang mga semana, nagbag-o ang akon pagtamod. Nagdayaw gid ako sa mga Saksi bangod ginahimo gid nila ang ila ginabantala. Ginbuslan sang pagtuo ang akon pangduhaduha, kag nangin mas malipayon ako. Bisan ang akon mga kaingod nagsiling, “Araceli, maayo ang imo ginahimo, padayuna ina!”

Nadumduman ko ang akon pangamuyo, “Salamat gid, Jehova, bangod wala ka nangampo sa akon kag ginhatagan mo ako sing madamo nga kahigayunan nga makita ang akon ginapangita—ang matuod nga ihibalo sa Biblia.” Nangayo ako sing pasaylo sa akon magulang nga si Felisa bangod sa masakit nga mga tinaga nga nahambal ko sa iya. Sugod sadto, sa baylo nga magbaisay, pirme na kami nagahambalanay parte sa Biblia. Sang 1989, nabawtismuhan ako sa edad nga 61.

Felisa: Subong, 91 anyos na ako, balo kag maluya na. Pero nagabasa ako sang Biblia kada adlaw, nagatambong sa mga miting kag nagapakigbahin sa ministeryo tubtob sa akon masarangan.

Araceli: Nanamian gid ako magpanaksi sa tanan nga pari kag madre nga masugilanon ko sa ministeryo, ayhan bangod isa ako ka madre sang una. Nahatagan ko sila sang madamo nga publikasyon kag maayo ang amon pag-istoryahanay. Nadumduman ko ang ginsiling sang isa ka pari sa tapos sang pila ka beses nga pagbisita ko sa iya: “Nagaugyon gid ako sa imo Araceli, pero ano pa ang mahimo ko kay tigulang na ako? Ano ang isiling sang mga katapo sang akon parokya kag sang akon pamilya?” Nagsabat ako: “Ti, ano naman ang isiling sang Dios?” Masubo lang sia nga nagtangotango, pero wala pa sia sing kaisog sadto nga tion nga batunon ang kamatuoran.

Indi ko gid malipatan sang nagsiling ang akon bana nga gusto niya ako updan sa miting. Bisan pa sobra 80 anyos na sia, padayon sia nga nagtambong sa mga miting sugod sadto. Nagtuon sia sa Biblia kag nangin indi bawtismado nga manugbantala. Makalilipay gid ang amon pagministeryo sing magkaupod. Pero, napatay sia duha ka bulan antes sia mabawtismuhan.

Felisa: Nalipay gid ako nga makita ang akon tatlo ka manghod nga nangin Saksi, bisan pa ginpamatukan ako nila sang una. Nalipay gid kami nga magkaupod nga nagaistoryahanay parte sa amon pinalangga nga Dios nga si Jehova kag sa iya Pulong! Nahiusa gid man kami sang akon mga utod sa espirituwal. *

^ par. 29 Si Araceli 87 anyos, si Felisa 91 anyos, kag si Ramoni 83 anyos. Nagaalagad sila gihapon kay Jehova sing matutom. Sang 1990, napatay si Lauri nga matutom kay Jehova.