Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ABRIL 2016

Ginagamit Mo Bala Para sa Maayo ang Imo Imahinasyon?

Ginagamit Mo Bala Para sa Maayo ang Imo Imahinasyon?

ANO ang isa ka butang nga nagabug-at lamang sing mga isa ka kilo kag tunga pero ginapatuhuyan subong “ang pinakamasibod nga butang nga natukiban naton sa aton uniberso”? Ang utok sang tawo. Dalayawon gid ini. Samtang nagadamo ang aton nabal-an parte sini, mas ginaapresyar pa gid naton ang “makatilingala” nga mga binuhatan ni Jehova. (Sal. 139:14) Binagbinaga ang isa sa mga ikasarang sang aton utok—ang imahinasyon.

Ano ang imahinasyon? Suno sa isa ka diksionaryo, amo ini “ang imo ikasarang nga maghanduraw ukon magpamensar sang bag-o kag makalilipay nga mga butang, ukon mga hitabo nga wala mo pa naeksperiensiahan.” Base sa sini, indi bala nga ginagamit mo pirme ang imo imahinasyon? Halimbawa, may nabasahan ka bala ukon nabatian parte sa isa ka lugar nga wala mo pa nakadtuan? Indi bala nga gin-imadyin mo ini nga lugar? Ang matuod, ginagamit naton ang aton imahinasyon kon ginahanduraw naton ang isa ka butang nga wala ukon indi naton makita, mabatian, matilawan, matandog, ukon mapanimahuan.

Ginabuligan kita sang Biblia nga maapresyar nga gindesinyo kag gintuga ang tawo sa larawan sang Dios. (Gen. 1:26, 27) Indi bala nagakahulugan man ini nga si Jehova may imahinasyon man? Bangod gintuga kita ni Jehova nga may imahinasyon, makatarunganon lamang nga magpaabot sia nga gamiton naton ini agod mahangpan ang iya kabubut-on. (Man. 3:11) Agod mahimo ina, paano naton magamit para sa maayo ang aton imahinasyon, kag ano dapat ang aton likawan?

INDI MAAYO NGA PAGGAMIT SANG IMAHINASYON

(1) Ang pagdalamguhanon sa indi husto nga tion ukon sang indi maayo nga mga butang.

Indi sala ang pagdalamguhanon. May mga ebidensia pa gani nga makabulig ini. Pero, ang Manugwali 3:1 nagasiling nga “may tion para sa tagsa ka hilikuton.” Gani, posible man ang paghimo sang mga hilikuton sa indi husto nga tion. Halimbawa, makabulig bala ang imahinasyon kon tugutan naton ang aton hunahuna nga maglagaw sa tion sang mga miting sang kongregasyon ukon personal nga pagtuon sa Biblia? Serioso nga nagpaandam si Jesus nga makatalagam gid kon maghunahuna kita sang indi maayo nga mga butang, kaangay sang imoral nga mga pantasya. (Mat. 5:28) May mga butang nga kon handurawon naton maakig gid si Jehova. Ang imoral nga mga pantasya mahimo magresulta sa imoral nga mga buhat. Gani indi gid pagtuguti ang imo imahinasyon nga magpahilayo sa imo kay Jehova!

(2) Paghunahuna nga makahatag sing dayon nga kalig-unan ang materyal nga manggad.

Mapuslanon gid ang materyal nga mga butang. Pero, mapaslawan lang kita kon maghunahuna kita nga makahatag ini sa aton sing matuod nga kalig-unan kag kalipay. Ang maalam  nga si Solomon nagsulat: “Ang manggad sang manggaranon amo ang iya mabakod nga siudad; ginahunahuna niya nga kaangay ini sang pader nga nagaamlig sa iya.” (Hulu. 18:11) Halimbawa, binagbinaga ang natabo sang Septiembre 2009 sang sobra 80 porsiento sang Manila ang ginbaha bangod sa mabunok nga ulan. Nakalikaw bala ang mga manggaranon? Ang isa ka manggaranon nga tawo nga halos nadulaan sang tanan nga pagkabutang nagsiling, “Bangod sa baha, nangin palareho ang tanan, kay nabudlayan kag nag-antos ang mga imol kag manggaranon.” Mahimo mahapos lang hunahunaon nga ang materyal nga mga butang makahatag sing matuod nga proteksion kag kalig-unan. Pero ang matuod indi gid.

(3) Indi nagakaigo nga kabalaka sa mga butang nga mahimo indi man matabo.

Ginlaygayan kita ni Jesus nga likawan ang sobra nga ‘pagkabalaka.’ (Mat. 6:34) Kon pirme kita nagakabalaka, pirme man naton ginagamit ang aton imahinasyon. Gani, makakalapoy gid kon ginahunahuna naton ang mga problema nga wala pa ukon indi man matabo. Ginapakita sang Kasulatan nga nagaresulta lamang ini nga kabalaka sang kaluya sang buot kag depresyon pa gani. (Hulu. 12:25, footnote) Importante gid nga iaplikar ang laygay ni Jesus nga likawan ang sobra nga pagkabalaka kag atubangon lang ang problema sa sina nga adlaw.

MAAYO NGA PAGGAMIT SANG IMAHINASYON

(1) Paghantop kag paglikaw sa makatalagam nga mga sitwasyon.

Ang Kasulatan nagapalig-on sa aton nga magmaalam kag maghunahuna sing abanse. (Hulu. 22:3) Paagi sa aton imahinasyon, mabinagbinag naton sing abanse ang mangin resulta sang mga desisyon antes naton ini himuon. Halimbawa, kon gin-imbitar ka nga magtambong sa isa ka pagtilipon, paano ka mabuligan sang imo imahinasyon nga makadesisyon sing maalamon? Kon nabinagbinag mo na kon sin-o ang iban nga imbitado, kon ano kadaku ang pagtilipon, kag kon diin kag san-o ini hiwaton, hunahunaa ini: ‘Ano ang posible nga matabo sa sini nga pagtilipon?’ Mahanduraw mo bala nga isa ini ka maayo nga pagtilipon nga nahisuno sa mga prinsipio sa Biblia? Paagi sini mahanduraw mo ang posible nga matabo sa pagtilipon. Kon gamiton mo ang imo imahinasyon sa paghimo sang maalamon nga mga desisyon, malikawan mo nga mahalitan ang imo espirituwalidad.

(2) Pag-ensayo sa hunahuna kon paano atubangon ang mabudlay nga mga problema.

Nalakip man sa imahinasyon ang “ikasarang sa pag-atubang sa mga problema.” Ibutang ta nga wala kamo naghangpanay sang isa ka utod sa kongregasyon. Paano mo sia  palapitan agod makighidait? Madamo ang dapat binagbinagon. Paano sia nagapakig-istorya? San-o ang husto nga tion para istoryahan ang problema? Ano ang imo isiling kag paano mo ini ihambal? Kon gamiton mo ang imo imahinasyon, mahunahuna mo ang madamo nga paagi kon paano atubangon ang mga kahimtangan kag mapili mo ang pinakaepektibo nga paagi. (Hulu. 15:28, footnote) Ang paghunahuna sing maayo kon paano atubangon ang mabudlay nga kahimtangan magaresulta sa paghidait sa kongregasyon. Maayo gid ini nga paggamit sang imahinasyon.

(3) Pagpauswag sang imo personal nga pagbasa kag pagtuon sa Biblia.

Importante ang pagbasa sa Biblia kada adlaw. Pero, indi bastante ang pagbasa lang sa Biblia. Dapat naton hantupon ang praktikal nga mga leksion nga makita sa Biblia kag iaplikar ini sa aton kabuhi. Dapat naton maapresyar ang mga binuhatan ni Jehova paagi sa pagbasa sa Biblia. Mabuligan kita sang aton imahinasyon sa paghimo sini. Paano? Binagbinaga ang libro nga Iluga ang Ila Pagtuo. Ang pagbasa sa mga sugilanon sa sini nga libro magapukaw sang aton imahinasyon paagi sa pagbulig sa aton nga mahanduraw ang kahimtangan sang kada karakter sa Biblia. Ginabuligan kita nga makita ang mga talan-awon, mabatian ang mga tunog, mapanimahuan ang mga humot, kag mabatyagan ang mga ginabatyag sang mga karakter. Subong resulta, makita naton ang maayo nga mga leksion kag makapalig-on nga mga panghunahuna halin sa mga rekord sa Biblia nga sa banta naton nahibaluan na naton. Kon gamiton naton ang aton imahinasyon sa sini nga paagi, mapauswag gid ang aton personal nga pagbasa kag pagtuon sa Biblia.

(4) Pagpalambo kag pagpakita sang empatiya.

Ang empatiya isa ka maayo nga kinaiya nga amo ang pagbatyag naton sang kasakit sang iban sa aton tagipusuon. Dapat naton ilugon si Jehova kag si Jesus bangod nagpakita sila sang empatiya. (Ex. 3:7; Sal. 72:13) Paano naton mapalambo ini nga kinaiya? Ang paggamit sang aton imahinasyon amo ang isa sa pinakaepektibo nga paagi agod mapalambo naton ang empatiya. Mahimo wala naton naagyan ang kabudlayan sang isa naton ka utod. Pero, puede mo pamangkuton ang imo kaugalingon: ‘Kon yara ako sa sini nga sitwasyon, ano ang akon batyagon? Ano ang akon kinahanglan?’ Kon gamiton naton ang aton imahinasyon, makabulig ini sa aton nga mapalambo ang empatiya. Ang matuod, kon magpakita kita sang empatiya, magauswag gid ang tanan nga bahin sang aton Cristiano nga pagkabuhi, lakip ang aton ministeryo kag ang aton kaangtanan sa aton mga kauturan.

(5) Paghanduraw sang kabuhi sa bag-ong kalibutan.

Ginalaragway sang Kasulatan ang kabuhi sa bag-ong kalibutan nga ginsaad sang Dios. (Isa. 35:5-7; 65:21-25; Bug. 21:3, 4) Ginapanami pa gid ini sang aton mga publikasyon paagi sa matahom nga mga drowing. Ngaa? Ang mga piktyur nagapukaw sang aton imahinasyon kag nagabulig sa aton nga makita ang aton kaugalingon nga ginatigayon ang ginsaad nga mga pagpakamaayo. Nahibaluan ni Jehova, ang Manunuga sang imahinasyon, ang ikasarang sini. Kon gamiton naton ini sa pagpamalandong sa iya mga saad, magadugang pa gid ang aton pagsalig nga matuman ini nga mga saad kag magabulig man ini sa aton nga mangin matutom samtang ginabatas ang mga kabudlayan sa kabuhi.

Mahigugmaon nga ginhatagan kita ni Jehova sang dalayawon nga ikasarang nga gamiton ang aton imahinasyon. Makabulig gid ini sa aton pag-alagad sa iya. Kabay nga gamiton naton ini para sa maayo kada adlaw agod mapakita naton ang apresasyon sa Manughatag sini nga regalo.