Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ABRIL 2016

Daw Tun-og Bala ang Imo Ministeryo?

Daw Tun-og Bala ang Imo Ministeryo?

IMPORTANTE gid ang aton ministeryo. Pero indi tanan nga ginabantalaan naton nagaapresyar sini. Bisan pa nagpakita sing interes ang iban sa mensahe sang Biblia, mahimo nga indi nila gusto magtuon sa Pulong sang Dios upod sa aton.

Amo ini ang natabo kay Gavin. Nagatambong sia sa mga miting sang kongregasyon, pero wala niya ginbaton ang tanyag nga magtuon sa Biblia. Sia nagsiling: “Diutay lang ang nahibaluan ko sa Kasulatan, kag nahuya ako nga mabal-an ini sang iban. Nakulbaan ako nga basi paentrahon ako sa isa ka relihion kag matuntuhan lang.” Ano sa banta mo? Indi na gid bala magbag-o si Gavin? Puede pa! Binagbinaga ang maayo nga epekto sang mga panudlo sang Biblia sa isa ka tawo. Ginsilingan ni Jehova ang iya katawhan sang una: “Ang akon mga pulong magatulo nga daw tun-og, pareho sang talithi sa hilamon.” (Deut. 31:19, 30; 32:2) Ang mga kinaiya sang tun-og nagalaragway kon paano naton mabuligan sing epektibo ang tanan nga sahi sang tawo sa aton ministeryo.—1 Tim. 2:3, 4.

 MINISTERYO NGA DAW TUN-OG—PAANO?

Ang tun-og mabugnaw. Amat-amat nga nagaporma ang tun-og halin sa alisngaw. Ang mga pulong ni Jehova ‘nagtulo nga daw tun-og’ bangod naghambal sia nga may kaayo, kalulo, kag may konsiderasyon sa iya katawhan. Ginailog naton sia kon ginatahod naton ang pagtamod sang iban. Ginapalig-on naton ang iban nga mangatarungan kag maghatag sang ila kaugalingon nga konklusion. Kon ipakita naton ini nga konsiderasyon, mas madali batunon ang aton ginahambal kag mas epektibo ang aton ministeryo.

Ang tun-og makaparepresko. Makaparepresko sa iban ang aton ministeryo kon hunahunaon naton kon paano mapalambo ang ila interes. Si Gavin, nga ginsambit kaina, wala ginpilit nga magtuon sa Biblia. Sa baylo, ang utod nga naistorya niya nga si Chris, nangita sing iban nga paagi agod mangin komportable si Gavin nga istoryahan ang Biblia. Ginpaathag ni Chris kay Gavin nga may tema ang Biblia kag ang paghibalo sini makabulig sa iya nga mahangpan sing maayo ang mga miting nga iya ginatambungan. Dayon, ginsugiran sia ni Chris nga ang mga tagna sa Biblia amo ang nagpakumbinsi sa iya nga matuod ang Biblia. Nagresulta ini sa madamo pa nga pagbinagbinag parte sa katumanan sang mga tagna. Narepreskuhan gid si Gavin sa sini nga mga paghambalanay kag sang ulihi ginbaton niya ang pagtuon sa Biblia.

Ang tun-og nagasakdag sang kabuhi. Kon tig-ilinit sa Israel, pila ka bulan nga wala sing ulan. Kon wala ang tun-og, malaya kag mapatay ang mga tanom. May espirituwal nga tiggulutom subong, suno sa gintagna ni Jehova. (Amos 8:11) Nagpromisa sia nga ang hinaplas nga mga ebanghelisador mangin “pareho sang tun-og halin kay Jehova” samtang ginawali nila ang mensahe sang Ginharian, kag kaupod nila ang “iban nga mga karnero.” (Miq. 5:7; Juan 10:16) Ginapabaloran bala naton ang mensahe sang maayong balita sang Ginharian subong bahin sang gin-aman ni Jehova nga espirituwal nga tun-og nga nagasakdag sang kabuhi?

Ang tun-og pagpakamaayo halin kay Jehova. (Deut. 33:13) Mahimo mangin pagpakamaayo ang aton ministeryo sa mga nagabaton sini. Amo gid ini ang nabaton ni Gavin. Nasabat ang tanan niya nga pamangkot paagi sa pagtuon sa Biblia. Madasig sia nga nag-uswag kag sang ulihi nagpabawtismo. Subong, malipayon sila sang iya asawa nga si Joyce nga nagapakigbahin sing bug-os sa pagbantala sang maayong balita sang Ginharian.

Ang mensahe sang Ginharian nga ginabantala sang mga Saksi ni Jehova daw tun-og nga nagabasa sang duta

IMPORTANTE GID ANG IMO MINISTERYO

Ang paghunahuna parte sa tun-og nagapalig-on man sa aton nga pabaloran ang aton personal nga pagpakigbahin sa ministeryo. Paano? Diutay lang ang epekto sang isa ka tulo sang tubig, pero kon tingbon ang minilyon ka tulo, mabasa sini ang duta. Sing kaanggid, ang ginahimo sang isa ka indibiduwal sa ministeryo daw diutay lang kon tan-awon. Pero kon tingbon ang panikasog sang tanan nga ministro ni Jehova, nagabulig ini para mapanaksihan ang “tanan nga pungsod.” (Mat. 24:14) Mangin isa ayhan ka pagpakamaayo ni Jehova sa iban ang aton ministeryo? Pagpakamaayo gid ini kon ang mensahe nga aton ginabantala pareho sang tun-og—mabugnaw, makaparepresko, kag nagasakdag sang kabuhi!