Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Num. 6 2016

Dugwak

Ang Aton Matun-an sa mga Pispis

Ang Aton Matun-an sa mga Pispis

“Palihug, pamangkuta . . . ang mga pispis sa langit, kag sugiran ka nila. Sin-o sa ila ang wala makahibalo nga si Jehova mismo ang naghimo sini?”—Job 12:7, 9.

SOBRA sa 3,000 ka tuig ang nagligad, narealisar sang patriarka nga si Job nga madamo kita sing matun-an sa mga pispis sa langit parte sa mga binuhatan sang Dios. Bangod man sang ila mga kinaiya, ginagamit sila sa mga ilustrasyon kag mga pagpaanggid. Madamo sa ginasiling sang Biblia parte sa mga pispis sa langit ang nagatudlo sa aton sang importante nga mga leksion sa kabuhi kag sa aton kaangtanan sa Dios. Binagbinagon naton ang pila sini.

KON DIIN NAGAPUGAD ANG MGA SALIMBABATANG

Salimbabatang

Pamilyar sa mga taga-Jerusalem ang mga salimbabatang, nga masami nagapamugad sa idalom sang balisbisan sang mga tinukod. Ang iban nagapamugad sa templo ni Solomon. Mahimo nga nakita sang mga salimbabatang nga nagapamugad sa templo kada tuig nga indi sila mahalitan diri, amo nga mapadaku nila ang ila mga boto sing maayo.

Ang nagkomposo sang Salmo 84—isa sa mga anak nga lalaki ni Kora nga nagaalagad sa templo sing isa ka semana kada anom ka bulan—nakatalupangod sini nga mga pugad. Bangod handum gid niya nga makatigayon sing permanente nga puluy-an sa balay ni Jehova kaangay sang mga salimbabatang, nagsiling sia: “Tuman katahom sang imo daku nga tabernakulo, O Jehova sang mga kasuldadusan! Nagakahidlaw gid ako, huo, nagapalangluya ako sa paghandum sa mga luwang ni Jehova . . . Bisan ang pispis may pugad didto amo man ang salimbabatang, didto ginaatipan sini ang iya boto malapit sa imo halangdon nga halaran, O Jehova sang mga kasuldadusan, nga akon Hari kag akon Dios!” (Salmo 84:1-3) Ginahandum kag ginaapresyar man bala naton kag sang aton mga kabataan ang regular nga pagpakig-upod sa katawhan sang Dios?—Salmo 26:8, 12.

NAHIBALUAN SANG DUGWAK ANG IYA TION

“Ang dugwak sa kalangitan nakahibalo sang mga panag-on sini,” siling sang manalagna nga si Jeremias. Mahimo nga nakita niya ang paglupad sang mga dugwak sa Ginsaad nga Duta. Kon tigpamulak, sobra sa 300,000 ka puti nga dugwak ang nagalakbay halin sa Aprika pakadto sa Naaminhan nga Europa nga nagaagi sa Nalupyakan sang Jordan. Ang ila orasan sa lawas amo ang nagapahibalo sa ila nga magbalik sa lugar nga ginapangitlugan nila sa tion sang tig-ilinit. Pareho sa iban pa nga nagalakbay nga pispis, ‘nagabalik sila sa husto nga tion.’—Jeremias 8:7.

“Dalayawon gid ang paglakbay sang mga pispis bangod duna ini sa ila,” siling sang Collins Atlas of Bird Migration. Ginhatagan ni Jehova nga Dios ang nagalakbay nga mga pispis sang duna nga kaalam parte sa mga panag-on, apang ginhatagan niya ang tawo sang ikasarang sa paghangop sang mga tion kag mga panag-on. (Lucas 12:54-56) Indi pareho sa duna nga kaalam sang dugwak, ang ihibalo sang Dios makabulig sa mga tawo nga mahangpan ang kahulugan sang mga hitabo sa aton tion. Ang mga Israelinhon sa panahon ni Jeremias wala gid nakahangop sina nga mga tanda. Ginpaathag sang Dios ang kabangdanan sini nga problema, nga nagasiling: “Ginsikway nila  ang pulong ni Jehova, gani maalam gid bala sila?”—Jeremias 8:9.

Madamo kita sing pamatuod nga nagakabuhi na kita subong sa ginatawag sang Biblia nga “katapusan nga mga adlaw.” (2 Timoteo 3:1-5) Ilugon mo bala ang dugwak kag talupangdon ‘ang panag-on’?

ANG AGILA NAGATULOK SA MALAYO

Agila

Madamo nga beses nga ginsambit ang agila sa Biblia, kag ining dalayawon nga pispis pirme makita sa Ginsaad nga Duta. Halin sa iya pugad sa mataas nga pil-as, ang agila ‘nagapangita sang iya dalagiton [kag] nagatulok sa malayo.’ (Job 39:27-29) Tama ka sipat ang panulok sang agila nga sarang sini makita ang kuneho bisan isa ka kilometro pa ang kalayuon.

Pareho sa agila nga may ikasarang nga ‘magtulok sa malayo,’ may ikasarang man si Jehova nga makita ang malayo pa nga palaabuton. Gani, si Jehova nagsiling: “Halin sa ginsuguran gintagna ko ang mahanabo, kag ang mga butang nga wala pa matabo.” (Isaias 46:10) Kon sundon naton ang laygay ni Jehova, makabenepisyo kita sa iya wala tupong nga kaalam kag paghangop.—Isaias 48:17, 18.

Ginpaanggid man sang Biblia ang mga nagasalig sa Dios sa mga agila: “Ang mga nagalaum kay Jehova maulian sing kusog. Magalupad sila nga daw may mga pakpak sang agila.” (Isaias 40:31) Ginagamit sang agila ang huyop sang mainit nga hangin para magtaas ang iya paglupad. Ginahumlad niya ang iya mga pakpak kag nagalibotlibot diri para magtaas pa gid ang iya paglupad. Wala nagasalig ang agila sa iya kusog sa paglupad sing mataas kag sing malayo. Sing kaanggid, ang mga nagasalig kay Jehova makapangayo man sing bulig sa iya bangod nagpromisa sia nga hatagan sila sing “gahom nga labaw sa kinaandan.”—2 Corinto 4:7, 8.

“KAANGAY SANG ISA KA MUNGA NGA NAGATIPON SANG IYA MGA PISO”

Munga kag mga piso

Antes sang iya kamatayon, nagtulok si Jesus sa kapital nga siudad sang mga Judiyo. Masinulub-on sia nga nagsiling: “Jerusalem, Jerusalem, ikaw nga nagapatay sang mga manalagna kag nagabato sang mga ginpadala sa imo! Makapila nga gintinguhaan ko nga tipunon ang imo mga anak kaangay sang isa ka munga nga nagatipon sang iya mga piso sa idalom sang iya mga pakpak! Apang indi kamo luyag sini.”—Mateo 23:37.

Isa sa mabaskog nga duna nga mga kinaiya sang mga pispis amo nga gusto gid nila proteksionan ang ila mga boto. Ang mga pispis sa duta, pareho sang munga nga manok, dapat mangin alisto sa mga katalagman. Kon makita sang munga nga may dapay nga nagalupadlupad sa ibabaw, nagapangutak ini para tawgon ang iya mga piso, dayon madinalagan ang mga piso sa idalom sang iya mga pakpak para maamligan. Makapasilong man sila diri kon mainit ang adlaw kag mabaskog ang ulan. Gusto man ni Jesus tanyagan ang pumuluyo sang Jerusalem sang espirituwal nga palasilungan kag proteksion. Ginaagda man kita ni Jesus subong nga magpalapit sa iya para maumpawan kag maproteksionan sa mga kabug-atan kag mga kabalaka sa kabuhi.—Mateo 11:28, 29.

Madamo gid kita sing matun-an sa mga pispis. Samtang ginaobserbahan mo ang ila mga kinaiya, dumduma ang mga pagpaanggid sang Kasulatan parte sa ila. Kabay nga ang salimbabatang makabulig sa imo nga apresyahon ang duog sang pagsimba kay Jehova. Kabay nga mangayo ka sing kusog sa Dios nga makabulig sa imo nga makapadayon kaangay sang agila. Kabay nga magpalapit ka man kay Jesus para sa espirituwal nga kamatuoran nga magaamlig sa imo pareho sang munga nga manok sa iya mga piso. Kag kabay nga ang dugwak magapahanumdom sa imo nga magpabilin nga alisto sa kahulugan sang mga hitabo sa kalibutan sa aton tion.

Magtuon sing Dugang Pa

MAAYONG BALITA HALIN SA DIOS!

Paano Ka Mangin Suod sa Dios?

Hibalua kon ginapamatian bala sang Dios ang tanan nga pangamuyo, kon paano kita dapat mangamuyo, kag kon ano pa ang aton himuon agod mangin suod sa Dios.