Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Num. 5 2016

 ANG BIBLIA NAGAPABAG-O SANG KABUHI

Maakigon Gid Ako kag Bayolente

Maakigon Gid Ako kag Bayolente
  • NATAWO: 1974

  • PUNGSOD: MEXICO

  • KABUHI SANG UNA: BAYOLENTE NGA PAMATAN-ON, STREET FIGHTER

ANG AKON NAGLIGAD:

Natawo ako sa Ciudad Mante, ang matahom nga lugar sang estado sang Tamaulipas, Mexico. Halos tanan nga tawo diri mga maalwan kag mabuot. Pero makapasubo nga bangod sa mga sindikato, delikado ini nga siudad.

Ikaduha ako sa apat ka mag-ulutod nga lalaki. Ginpabunyagan ako sang akon mga ginikanan sa Iglesia Katolika, kag sang ulihi nangin isa ako sa mga manug-amba sa simbahan. Gusto ko gid nga malipay ang Dios sa akon kay nakulbaan ako nga hukman kag ibutang sa kalayuhon nga impierno tubtob san-o.

Sang lima ako ka tuig, ginbayaan kami ni Tatay. Grabe gid ang akon kasubo kag pamatyag ko may kulang gid sa akon kabuhi. Indi ko maintiendihan kon ngaa ginbayaan niya kami kay palangga man namon sia katama. Pirme wala si Nanay sa balay kay nagaobra sia para masuportahan kami nga apat.

Ginhingalitan ko ini nga sitwasyon. Wala ako nagasulod sa klase kag nagaupod ako sa mga mas magulang sa akon nga kabataan. Gintudluan nila ako mamuyayaw, manigarilyo, mangawat, kag mang-away. Bangod gusto ko mangibabaw sa iban, nagtuon ako sing boksing, wrestling, karate, kag kon paano maggamit sing mga armas. Nangin bayolente ako nga pamatan-on. Pirme lang ako nadalahig sa mga tiruhay, kag makapila ka bes nga nasapwan na lang ako sa dalan nga nagapaligo sang akon kaugalingon nga dugo. Grabe gid ang kasubo ni Nanay kon makita niya ako nga amo sini kag kinahanglan niya ako dal-on sa ospital!

Sang 16 anyos ako, nagkadto sa amon balay ang akon amigo sadto nga si Jorge. Nagsiling sia nga isa sia ka Saksi ni Jehova kag may gusto sia isugid sa amon nga importante nga mensahe. Ginpaathag niya sa amon ang iya mga pagpati nga ginagamit ang Biblia. Wala ko pa gid ini mabasa, kag gusto ko gid mahibaluan ang ngalan sang Dios kag ang iya mga katuyuan. Gintanyagan kami ni Jorge sing pagtuon sa Biblia. Kag ginbaton namon ini.

KON PAANO GINBAG-O SANG BIBLIA ANG AKON KABUHI:

Naumpawan gid ako sang natun-an ko nga wala gali ginatudlo sang Biblia ang parte sa kalayuhon nga impierno. (Salmo 146:4; Manugwali 9:5) Bangod sini, nadula na ang akon indi husto nga kahadlok sa Dios. Sa baylo, nakita ko sia bilang mahigugmaon nga Amay nga gusto ang pinakamaayo para sa iya kabataan.

 Samtang nagapadayon ako sa pagtuon sa Biblia, narealisar ko nga dapat ko bag-uhon ang akon personalidad. Dapat ko palambuon ang pagkamapainubuson kag untatan na ang pagkabayolente. Ang laygay sang 1 Corinto 15:33 nakabulig sa akon. Nagasiling ini: “Ang pagpakig-upod sa malain nga mga tawo nagapalain sang mapuslanon nga mga batasan,” ukon, subong sang ginasiling sang footnote, “nagaguba sang maayo nga moral.” Narealisar ko nga kon gusto ko bag-uhon ang akon personalidad, dapat indi na ako makig-upod sa mga tawo nga indi maayo nga impluwensia sa akon. Gani wala na ako nagapakig-upod sa akon mga abyan sang una, kundi sa mga miembro na sang matuod nga Cristianong kongregasyon kay wala nila ginasolbar ang mga indi pag-intiendihanay paagi sa pagtapungulay ukon pagkabayolente, kundi paagi sa pag-aplikar sang mga prinsipio sa Biblia.

Ang isa pa ka teksto sa Biblia nga nakabulig sa akon amo ang Roma 12:17-19. Ini nagasiling: “Indi magbalos sing malaut sa malaut kay bisan sin-o. . . . Himua ang masarangan ninyo sa pagpakighidait sa tanan nga tawo. Indi kamo magtimalos, . . . kay nasulat na: ‘“Akon ang pagtimalos; ako ang magabalos,” siling ni Jehova.’” Nabaton ko nga si Jehova ang magasolbar sang inhustisya sa iya paagi kag tion. Amat-amat ko nga nadula ang pagkabayolente.

Indi ko malipatan ang natabo isa ka gab-i sang nagapauli ako. Ginbanggaan ako sang isa ka grupo sang mga pamatan-on nga kontra ko sang una, kag ginlampusan ako sa likod sang ila lider nga nagasinggit, “Batu!” Nangamuyo ako sing malip-ot kay Jehova nga nagapangabay nga mabatas ko lang yadto. Bisan pa daw mabalos na gid ako, nalagyo na lang ako. Pagkasunod nga adlaw, nasugata ko ang lider sina nga grupo. Daw balusan ko na gid sia, pero sa liwat nangamuyo ako sing mahipos kay Jehova nga nagapangabay sing bulig nga makontrol ko ang akon kaugalingon. Nakibot gid ako sang nagpalapit ang pamatan-on sa akon kag nagsiling: “Pasayluha ko sa natabo kagab-i. Ang matuod, gusto ko mangin pareho sa imo. Gusto ko magtuon sa Biblia.” Maayo lang gid kay nakontrol ko ang akon kaakig! Bangod sadto, nagtuon kami nga duha sa Biblia.

Makapasubo nga ang akon pamilya wala nagpadayon sa pagtuon sing Biblia sadto. Pero determinado ako nga magpadayon sa pagtuon kag indi pagtugutan ang bisan sin-o ukon bisan ano nga makapauntat sa akon. Nahibaluan ko nga ang pagpakig-upod pirme sa katawhan sang Dios makapaayo sa akon napilasan nga balatyagon kag sila ang pamilya nga kinahanglan ko. Padayon ako nga nag-uswag, kag sang 1991, nabawtismuhan ako bilang Saksi ni Jehova.

MGA BENEPISYO:

Maakigon ako sadto, dominante, kag bayolente. Pero ginbag-o sang Pulong sang Dios ang akon kabuhi. Subong, ginasugid ko ang mensahe sang Biblia parte sa paghidait sa mga gusto mamati. Nakapribilehiyo ako nga mag-alagad sing bug-os tion nga ministro sa sulod na sang 23 ka tuig.

Nakaagi ako boluntaryo sa sanga talatapan sang mga Saksi ni Jehova sa Mexico. Didto ko nakilala si Claudia, ang makugi nga Cristianong pamatan-on, kag nagpakasal kami sang 1999. Nagapasalamat gid ako kay Jehova kay ginhatagan niya ako sing mainunungon nga kaupod!

Nag-alagad kami nga duha sa Mexican Sign Language nga kongregasyon, nga nagabulig sa mga apa nga makilala si Jehova. Sang ulihi, gin-agda kami nga magsaylo sa Belize para tudluan ang mga tawo didto parte sa Biblia. Bisan pa mas simple ang amon kabuhi diri, natigayon namon ang tanan nga kinahanglanon para magmalipayon. Indi gid namon ini pag-ibaylo sa bisan ano.

Sang ulihi, ginpadayon ni Nanay ang pagtuon sa Biblia kag nabawtismuhan. Ang akon magulang nga lalaki, ang iya asawa, kag ang ila kabataan mga Saksi ni Jehova naman subong. Ang pila sa mga abyan ko sang una nga ginsugiran ko sang mensahe sang Ginharian nagaalagad naman kay Jehova.

Makapasubo nga napatay ang pila ka miembro sang amon pamilya kay wala nila ginbag-o ang ila pagkabayolente. Kon wala man ako nagbag-o, siguro pareho man sa ila ang akon nadangatan. Nagapasalamat ako kay Jehova kay ginbuyok niya ako sa iya kag sa iya mga sumilimba, nga mainayuhon kag mapinasensiahon nga nagtudlo sa akon sa pag-aplikar sang mga prinsipio sa Biblia.