Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN NUM. 5 2016

 TOPIKO SA KOBER | DIIN KA MAKAKITA SING LUGPAY?

Kinahanglan Naton Tanan ang Lugpay

Kinahanglan Naton Tanan ang Lugpay

Nadumduman mo pa bala sang nakadasma ka sang bata ka pa? Mahimo napilasan ka sa kamot ukon sa tuhod. Nadumduman mo pa bala kon paano ka ginpaumpawan sang imo nanay? Mahimo gintinluan niya ang imo pilas kag ginbulong ini. Naghibi ka, pero bangod gin-uluuluhan ka niya kag ginhakos, naumpawan ka dayon. Sadto nga tion sang imo kabuhi, dali ka lang maumpawan.

Pero nagabudlay ang kabuhi samtang nagadaku kita. Mas mabug-at na ang mga problema, kag indi na madali makakita sing lugpay. Sing makapasubo, ang aton mga problema indi na mabulong sang uloulo kag hakos sang isa ka iloy. Binagbinaga ang pila ka halimbawa.

  • Naeksperiensiahan mo na bala ang kabudlayan bangod nadulaan ka sing trabaho? Si Julian nagsiling nga sang ginpahalin sia sa obra, nakibot gid sia amo nga naugot sia kag nabalaka. ‘Paano ko atipanon ang akon pamilya?’ pamensar niya. ‘Pagkatapos sang tinuig ko nga pagbakabaka sa obra, ngaa ginpahalin ako sang kompanya?’

  • Mahimo nagalalain ka bangod nabungkag ang inyo pag-asawahay. “Sang gulpi lang ako ginbayaan sang akon bana sang nagligad nga isa ka tuig kag tunga, grabe gid ang akon kasubo. Daw malupok ang akon dughan,” siling ni Raquel. “Nasakitan gid ako sa pisikal kag sa emosyonal. Ginkulbaan gid ako.”

  • Mahimo may grabe ka nga balatian nga daw wala na nagaayo. Ayhan may tion nga nabatyagan mo ang nabatyagan ni Job, nga nagsiling: “Ginakaugtan ko ang akon kabuhi; indi ko na luyag nga mabuhi pa.” (Job 7:16) Mahimo pareho kamo sing ginabatyag sang otsentahon nga si Luis, nga nag-aku, “Kon kaisa pamatyag ko daw ginahulat ko na lang ang akon kamatayon.”

  • Ukon basi napatay ang imo pinalangga kag nagapangita ka gid sing lugpay. “Sang napatay ang akon bata sa aksidente sa eroplano, daw indi ako magpati sang primero,” paathag ni Robert. “Dayon nabatyagan ko ang kasakit, ang kasakit nga ginapaanggid sang Biblia sa buno sang malaba nga espada.”—Lucas 2:35.

Si Robert, si Luis, si Raquel, kag si Julian nakakita sing lugpay sa sinang mabudlay nga mga kahimtangan. Nakilala nila ang pinakamaayo nga Persona nga makahatag sini—wala na sang iban pa kundi ang Labing Gamhanan nga Dios. Paano sia nagalugpay? Ihatag man bala niya ang lugpay nga kinahanglan mo?