Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Num. 4 2016

Maabot Ayhan ang Tion nga Wala Na sing Pagpamintas?

Maabot Ayhan ang Tion nga Wala Na sing Pagpamintas?

Nabiktima ka na bala ukon ang imo kapamilya sang pagpamintas? Nahadlok ka bala nga basi maeksperiensiahan mo ini? Ang pagpamintas isa ka “nagalala nga problema sa kapagros sang mga tawo sa bilog nga kalibutan.” Ari ang pila ka halimbawa.

PAGSAKIT SA MIEMBRO SANG PAMILYA KAG PAG-ABUSO SA SEKSO: “Isa sa kada tatlo ka babayi ang nakaagi nga ginsakit ukon gin-abusuhan sa sekso sang ila partner,” report sang United Nations. Masubo pa gid, kay “ginabulubanta nga sa bilog nga kalibutan, isa sa kada lima ka babayi ang nabiktima sang pagpanglugos ukon luguson kuntani.”

KRIMEN: Ginreport nga sobra 30,000 ka mapintas nga mga gang ang nagahimo sing krimen sa United States. Sa Latin America, halos 1 sa kada 3 ka tawo ang ginreport nga nangin biktima sang mapintas nga krimen.

PAGPATAY: May tuig sining karon lang, nga ginbulubanta nga halos tunga sa milyon ka tawo ang ginpatay. Sobra pa ini sa napatay sa mga inaway. Ang Southern Africa kag Central America ang may pinakamataas nga aberids sang ginpamatay, sobra apat ka beses nga mas mataas sangsa aberids sa bilog nga kalibutan. Sobra 100,000 ka tawo ang ginpatay sa Latin America sa sulod lang sang isa ka tuig, kag mga 50,000 sa Brazil lamang. May makita ayhan nga permanente nga solusyon sa sini?

MAUNTAT PA AYHAN ANG PAGPAMINTAS?

Ngaa may pagpamintas gid bisan diin? Madamo ang ginatudlo nga rason. Lakip sa sini ang tension nga resulta sang indi patas nga pangabuhi kag ekonomiya, pag-abuso sa makahulubog nga ilimnon kag droga, pagbalewala sa kabuhi sang iban, impluwensia sa mga bata sang mapintas nga mga adulto, kag ang realidad nga ang mga kriminal daw wala ginasilutan.

Matuod, nakontrol gid man ang pagpamintas sa iban nga bahin sang kalibutan. Sa grabe ka gutok nga siudad sang São Paulo, sa Brazil, ginreport nga ang pagpamatay nagnubo sing mga 80 porsiento sang nagligad nga napulo ka tuig. Pero, komon gihapon ang tanan nga klase sang mapintas nga krimen sa sini nga siudad, kag ang ratio sang pagpatay 10 porsiento gihapon sa kada 100,000 ka pumuluyo. Kon amo, ano ang kinahanglan para mauntat gid ang pagpamintas?

Ang permanente nga solusyon sa pagpamintas may labot sa mga tawo—sa ila pamatasan kag pagtan-aw sa mga butang. Para magbag-o ang mapintas nga mga tawo, ang ila mga kinaiya pareho sang bugal, kasakon, kag pag-iyaiya dapat buslan sang gugma, pagrespeto, kag kabalaka sa iban.

Ano ang makapahulag sa isa ka tawo nga himuon ining daku nga pagbag-o? Pamensari ang ginatudlo sang Biblia:

  • “Ini ang kahulugan sang gugma sa Dios, nga tumanon naton ang iya mga sugo.”—1 Juan 5:3.

  • “Ang kahadlok kay Jehova nagakahulugan sing pagdumot sa malain.” *Hulubaton 8:13.

Ang gugma sa Dios kag ang kahadlok nga mapaakig sia makabulig bisan sa mapintas kaayo nga mga tawo nga magbag-o. Indi ini hapaw lang nga pagbag-o  kundi bug-os nga pagbag-o sang ila personalidad. Posible gid bala ini?

Si Alex * nga taga-Brazil napriso sing 19 ka tuig bangod sa mga krimen nga iya nahimo. Nangin isa sia sa mga Saksi ni Jehova sang tuig 2000, sang makatuon sia sing Biblia upod sa mga Saksi. Nabag-o gid bala niya ang iya mapintas nga pamatasan? Huo, kag ginhinulsulan gid ni Alex ang tanan nga kalainan nga nahimo niya. Nagsiling sia: “Ginahigugma ko gid ang Dios kay nabatyagan ko nga napatawad na ako. Ang pagpasalamat kag gugma kay Jehova nakabulig sa akon nga magbag-o.”

Si César nga taga-Brazil man, kawatan kag hold-aper. Amo sina ang iya kabuhi sa sulod sang mga 15 ka tuig. Ngaa nagbag-o sia? Sang ara sia sa prisuhan, naistorya sia sang mga Saksi ni Jehova, kag nagtuon man sia sing Biblia. Si César nagpaathag: “Subong ko lang nakita ang katuyuan sang kabuhi. Natun-an ko nga higugmaon ang Dios. Natun-an ko man nga kahadlukan sia, ang kahadlok nga makahimo liwat sing malain kag mapasubo si Jehova. Gusto ko gid nga ipakita ang akon pagpasalamat sa iya kaayo. Ini nga gugma kag kahadlok ang nagpahulag sa akon nga magbag-o.”

Tun-i kon ano ang himuon mo para makaistar ka sa isa ka kalibutan nga wala sing pagpamintas

Ano ang ginapakita sini nga mga eksperiensia? Nga ang Biblia may gahom sa pagbag-o sa kabuhi sang mga tawo, paagi sa pagpabag-o sang ila panghunahuna. (Efeso 4:23) Si Alex, nga ginsambit kaina, nagsiling pa gid: “Ang akon natun-an sa Biblia daw matinlo nga tubig nga ginbubo sa akon, nga amat-amat nga nagtinlo sa akon paagi sa pag-anod sang malain nga mga panghunahuna, nga abi ko indi ko na gid madula.” Huo, kon pun-on naton ang aton hunahuna sang matinlo nga mensahe sang Biblia, madula sini ukon maanod ang kalainan. Ang Pulong sang Dios may gahom sa pagtinlo. (Efeso 5:26) Bilang resulta, ang mapintas kag nagaiyaiya nga mga tawo nagabag-o, kag nangin maayo kag mahidaiton. (Roma 12:18) Naeksperiensiahan nila ang kalinong sa kabuhi sang ginsunod nila ang mga prinsipio sa Biblia.—Isaias 48:18.

Sobra sa walo ka milyon ka Saksi ni Jehova sa 240 ka pungsod ang nakakita sang sekreto para mauntat ang kapintas. Natun-an sang mga tawo halin sa tanan nga rasa kag halin sa tanan nga klase sang pangabuhi kag gindak-an ang gugma kag kahadlok sa Dios, paghigugmaanay, kag pagkabuhi sing mahidaiton subong bilog kalibutan nga pamilya. (1 Pedro 4:8) Sila ang buhi nga ebidensia nga posible gid ang isa ka kalibutan nga wala sing pagpamintas.

ANG KALIBUTAN NGA WALA SING PAGPAMINTAS MALAPIT NA!

Ang Biblia nagpromisa nga sa indi madugay dulaon sang Dios ang tanan nga pagpamintas sa duta. Ining mapintas nga kalibutan nagapadulong sa ‘adlaw sang paghukom sang Dios kag sang paglaglag sa mga indi diosnon nga katawhan.’ (2 Pedro 3:5-7 Wala na sing mapintas nga mga tawo nga magapaantos sa iban. Paano naton masiguro nga gusto sang Dios nga pauntaton kag dulaon ang pagpamintas?

Ang Biblia nagasiling nga ginadumtan sang Dios ang nagahigugma sa kasingki ukon kapintas. (Salmo 11:5) Ginahigugma sang Manunuga ang paghidait kag katarungan. (Salmo 33:5; 37:28) Gani, indi niya pagpasugtan nga magpadayon asta san-o ang mapintas nga mga tawo.

Huo, ang malinong nga bag-ong kalibutan malapit na. (Salmo 37:11; 72:14) Tun-i pa gid kon ano ang imo himuon para makaistar ka sa sina nga kalibutan nga wala sing pagpamintas.

^ par. 14 Gin-islan ang mga ngalan.

Magtuon sing Dugang Pa

SABAT SA MGA PAMANGKOT SA BIBLIA

Paghidait sa Duta—Paano?

Hibalua ang promisa sang Dios nga paghidait sa kalibutan paagi sa iya Ginharian.

MAGMATA!

Kon Ano ang Ginasiling sang Biblia Parte sa Kasingki

Paano ginatamod sang Dios ang kasingki? Mahimo bala magbag-o ang masingki nga mga tawo?