Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Num. 4 2016

Ang Pinakamaayo nga Pagkumparar nga Mahimo Mo

Ang Pinakamaayo nga Pagkumparar nga Mahimo Mo

GINAKABIG mo bala ang imo kaugalingon nga isa ka Cristiano? Kon amo, nalakip ka sa sobra duha ka bilyon ka tawo sa duta—halos 1 sa kada 3—nga nagasiling nga sumulunod sila sang Cristo. Subong, linibo ka relihion ang ginatawag nga Cristiano, pero sarisari ang ila mga doktrina kag pagpati. Gani, ang imo pagpati mahimo nga lain sa pagpati sang iban nga nagasiling nga Cristiano man sila. Importante gid bala kon ano ang imo ginapatihan? Huo, importante gid—kon gusto mo himuon ang klase sang Cristianismo nga ginatudlo mismo sang Biblia.

Ang una nga mga sumulunod ni Jesucristo ginatawag nga mga “Cristiano.” (Binuhatan 11:26) Indi na nila kinahanglan ang iban pa nga ngalan kay isa lang sadto ang Cristiano nga pagtuo. Ang mga Cristiano nahiusa nga nagasunod sa mga panudlo kag instruksion sang Tagtukod sang Cristianismo nga si Jesucristo. Kamusta ang imo relihion? Nagapati ka bala nga ginatudlo sini ang panudlo sadto sang Cristo kag ang ginapatihan sang una nga mga sumulunod sang Cristo? Paano mo masiguro? May isa lang ka paagi. Gamita ang Biblia bilang basihan.

 Pamensari: Ginarespeto gid ni Jesus ang Kasulatan bilang Pulong sang Dios. Wala sia nalipay sa mga nagabalewala sa mga panudlo sang Biblia kag nagauna sang mga tradisyon sang tawo. (Marcos 7:9-13) Gani masiling gid naton nga ang mga pagpati sang matuod nga mga sumulunod ni Jesus nabase sa Biblia. Kon amo, dapat pamangkuton sang kada Cristiano ang iya kaugalingon, ‘Ang ginatudlo bala sang akon relihion nabase sa Biblia?’ Para masabat ini, mas maayo nga ikumparar mo ang ginatudlo sang imo relihion sa ginasiling sang Biblia.

Nagsiling si Jesus nga ang aton pagsimba sa Dios dapat nabase sa kamatuoran, sa kamatuoran nga ara sa Biblia. (Juan 4:24; 17:17) Si apostol Pablo nagsiling man nga ang aton kaluwasan nagadepende sa aton pagtuon sang “sibu nga ihibalo tuhoy sa kamatuoran.” (1 Timoteo 2:4) Gani, importante gid nga ang aton mga pagpati nabase sa sibu nga kamatuoran sa Biblia. Diri nasandig ang aton kaluwasan!

KON PAANO IKUMPARAR ANG ATON MGA PAGPATI SA GINASILING SANG BIBLIA

Palihug basaha ang masunod nga anom ka pamangkot kag ang sabat sang Biblia sa sini. Tan-awa ang mga bersikulo nga ginbutang diri, kag pamensari sing maayo ang mga sabat. Dayon pamangkuta ang imo kaugalingon, ‘Ang ginatudlo bala sang akon relihion nabase sa Biblia?’

Ining malip-ot nga quiz makabulig sa imo nga mahimo ang pinakamaayo nga pagkumparar. Gusto mo bala nga ikumparar ang panudlo sang imo relihion sa ginasiling sang Biblia? Ang mga Saksi ni Jehova nalipay sa pagbulig sa imo nga mausisa ang maathag nga kamatuoran sa Biblia. Kon gusto mo, pangabaya ang isa sa mga Saksi ni Jehova para sa libre nga pagtuon sa Biblia. Puede mo man mabisitahan ang amon website nga jw.org/hil.