Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN NUM. 1 2016

 TOPIKO SA KOBER | NGAA DAPAT MANGIN BUNAYAG?

Kon Ngaa Importante nga Mangin Bunayag

Kon Ngaa Importante nga Mangin Bunayag

“Nagasalig kami nga may bunayag kami nga konsiensia, kag luyag namon magkabuhi sing bunayag sa tanan nga butang.”—Hebreo 13:18.

Sa Biblia, ang orihinal nga Griegong tinaga nga ginabadbad kon kaisa nga “bunayag,” literal nga nagakahulugan sing “mapuslanon gid.” Mahimo man ini nagakahulugan sing matahom tulukon may kaangtanan sa moral.

Ginaaplikar gid sang mga Cristiano ang ginasiling ni apostol Pablo: “Luyag namon magkabuhi sing bunayag sa tanan nga butang.” Ano ang nadalahig sa sini?

PAGPAKIG-AWAY SA KAUGALINGON

Kalabanan nga tawo nagapangespiho kada aga antes sila maglakat. Ngaa? Bangod luyag nila nga maayo ang ila hitsura. Pero indi lang estilo sang buhok ukon pamayo ang importante. Ang aton nasulod nga pagkatawo makapatahom ukon makapalaw-ay sang aton hitsura.

Ang Pulong sang Dios maathag nga nagasiling nga may huyog kita sa paghimo sing malain. “Ang huyog sang tagipusuon sang tawo malain halin pa sa iya pagkabata,” siling sang Genesis 8:21. Gani, agod mangin bunayag, dapat naton pakigbatuan ang aton huyog sa pagpakasala. Maathag nga ginlaragway ni apostol Pablo ang iya pagpakig-away sa sala. Nagsiling sia: “Sa akon tagipusuon, nagakalipay gid ako sa kasuguan sang Dios, apang nakita ko sa akon lawas ang isa pa ka kasuguan nga nagapakig-away sa kasuguan sang akon hunahuna. Ini nga kasuguan amo ang sala nga yara sa akon lawas kag ginakontrol ako sini.”—Roma 7:22, 23.

Halimbawa, kon ang aton tagipusuon nagadikta sa aton nga maghimo sing malain kag may huyog kita nga mangin indi bunayag, indi kita dapat magpadala sa sini. Mahimo pa kita makapili. Kon pilion naton nga sikwayon ang malain nga panghunahuna, makapabilin kita nga bunayag bisan pa madamo sing indi bunayag.

PAGDAUG SA PAGPAKIG-AWAY

Agod mangin bunayag, kinahanglan naton ang malig-on nga talaksan sa moral. Pero makapasubo nga madamo nga tawo ang nagahinguyang sing tion sa pagdesisyon sa ila ‘talaksan sa pamayo’ sangsa paghunahuna parte sa personal nga talaksan sa moral. Bangod sini, ginapakamatarong nila ang pagkadibunayag nga nahisuno sa ila sitwasyon. Ang libro nga The (Honest) Truth About Dishonesty nagsiling: “Sa masami, nagapangdaya kita sa kasangkaron nga nagabatyag kita nga bunayag gihapon.” Pero may masaligan bala nga talaksan nga makabulig sa aton sa pagdesisyon kon ano nga pagkadibunayag—kon may ara gid man—ang ginabaton? Pat-od nga may ara.

Nasapwan sang minilyon ka tawo sa kalibutan nga masaligan gid nga talaksan ang Biblia. Ang Biblia may talaksan sa moral nga indi gid matupungan. (Salmo 19:7) Nagahatag ini sa aton sing masaligan nga panuytoy sa pamilya, obra, moralidad, kag espirituwalidad. Epektibo gid ini halin sang una. Ang mga kasuguan kag mga prinsipio sini maaplikar sa tanan  nga tawo, pungsod, rasa, kag tribo. Paagi sa pagbasa sa Biblia, pagpamalandong sa ginasiling sini, kag pag-aplikar sa laygay sini, mahanas naton ang aton tagipusuon nga mangin bunayag kag matarong.

Pero indi lang ang pagtigayon sing sibu nga ihibalo sa Biblia ang makabulig sa aton nga madaug ang pagpakig-away sa pagkadibunayag. Kay man, nagakabuhi kita sa kalibutan nga manubo sing moral kag nagaipit sa aton nga batunon ang malain nga mga talaksan sini. Gani dapat kita mangamuyo sing bulig kag pagsakdag sang Dios. (Filipos 4:6, 7, 13) Paagi sini, may kaisog kita nga manindugan sa kon ano ang matarong kag mangin bunayag sa tanan nga butang.

BENEPISYO SANG PAGKABUNAYAG

Si Hitoshi, nga ginsambit sa una nga artikulo, nakabenepisyo bangod sang iya reputasyon nga bunayag nga empleyado. Ginaapresyar gid sang iya amo subong ang iya pagkabunayag. “Nagapasalamat gid ako,” siling ni Hitoshi, “nga nakakita ako sing obra nga mahuptan ko ang matinlo nga konsiensia.”

Naeksperiensiahan man ini sang iban. Binagbinaga ang pila ka halimbawa sang mga nakabenepisyo sa pag-aplikar sang prinsipio sa Biblia nga “magkabuhi sing bunayag sa tanan nga butang.”

  • Matinlo nga Konsiensia

    “Nag-untat ako sa pag-eskwela sang 13 anyos ako agod mag-upod sa mga kawatan. Bangod sini, 95 porsiento sang akon kinitaan naghalin sa indi bunayag nga paagi. Sang ulihi, namana ako kag nagtuon kami sang akon bana sa Biblia upod sa mga Saksi ni Jehova. Natun-an namon nga ginadumtan ni Jehova * nga Dios ang indi bunayag nga mga buhat, gani ginbag-o namon ang amon pagkabuhi. Sang 1990, gindedikar namon ang amon kabuhi kay Jehova kag nagpabawtismo subong mga Saksi ni Jehova.”—Hulubaton 6:16-19.

    “Sang una, ang amon balay puno sing kinawatan, pero subong wala na ini; bangod sini matinlo na ang akon konsiensia. Kon dumdumon ko ang akon pagkadibunayag sa sulod sang madamo nga tinuig, nagapasalamat gid ako sa daku nga kaluoy ni Jehova. Mahamuok ang akon pagtulog bangod nahibaluan ko nga nahamuot na sa akon si Jehova.”—Cheryl, Ireland.

    “Sang nahibaluan sang akon amo nga wala ko ginbaton ang hamham sang isa ka kostumer, nagsiling sia sa akon: ‘Masaligan ka gid bangod sang imo Dios! Maayo gid kay diri ka nagaobra sa amon kompanya.’ Bangod bunayag ako sa tanan nga butang, matinlo ang akon konsiensia sa atubangan ni Jehova nga Dios. Nabuligan ko man ang akon pamilya kag ang iban nga himuon ini.”—Sonny, Hong Kong.

  • Malinong nga Hunahuna

    “Nagaobra ako bilang executive assistant sa isa ka internasyonal nga banko. Sa sini nga negosyo, mas importante nga magmanggaranon sangsa mangin bunayag. Ang lapnag nga pagtamod amo ang, ‘Ano ang malain sa diutay nga pagkadibunayag kon nagapamanggad ini kag nagabulig sa ekonomiya?’ Pero bangod bunayag ako, malinong ang akon hunahuna. Determinado ako nga magpabilin nga bunayag kag atubangon ang ano man nga resulta sini. Nahibaluan sang akon mga amo nga indi ako magbutig sa ila ukon para sa ila.”—Tom, Estados Unidos.

  • Pagtahod sa Kaugalingon

    “Ginsilingan ako sang akon superbisor nga magbutig parte sa pila ka suplay nga nadula, pero nangindi ako. Sang nabal-an kon sin-o ang nagkawat, ginpasalamatan ako sang akon amo kay bunayag ako. Kinahanglan gid ang kaisog para mangin bunayag sa indi bunayag nga kalibutan. Pero sa ulihi, matigayon naton ang pagsalig kag respeto sang iban.”—Kaori, Japan.

Ang matinlo nga konsiensia, malinong nga hunahuna, kag pagtahod sa kaugalingon—mga benepisyo ini nga nagapakita nga importante gid nga mangin bunayag. Indi bala?

^ par. 18 Jehova ang ngalan sang Dios suno sa Biblia.

Magtuon sing Dugang Pa

MAGMATA!

Mga Kinaiya nga Mapuslanon Tubtob San-o——Pagkabunayag

Nakaganar kuntani si Raquel kon ginbaton niya ang kickback, pero para sa iya, mas daku ang iya nabenepisyo kay ginpangindian niya ini.

MAAYONG BALITA HALIN SA DIOS!

Paano ang mga Prinsipio sa Biblia Makabulig sa Aton?

Ginpaathag ni Jesus kon ngaa kinahanglan naton ang panuytoy kag kon ano ang duha ka panguna kag pinakaimportante nga prinsipio sa Biblia.