Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN NUM. 1 2016

 ANG BIBLIA NAGAPABAG-O SANG KABUHI

Hatagi Ako sing Isa Lang ka Tuig nga Kalinong kag Kalipay

Hatagi Ako sing Isa Lang ka Tuig nga Kalinong kag Kalipay
  • NATAWO: 1971

  • PUNGSOD: PRANSIA

  • KABUHI SANG UNA: KRIMINAL, IMORAL, KAG NAGADROGA

ANG AKON NAGLIGAD:

Nagaistar kami sa Tellancourt, isa ka baryo sa aminhan-nasidlangan sang Pransia. Ang akon amay Pranses, kag ang akon iloy Italyana. Sang otso anyos ako, nagsaylo kami sa imol nga lugar malapit sa siudad sang Roma sa Italya. Mabudlay ang pangabuhi didto. Pirme nagasinggitanay ang akon mga ginikanan bangod sang problema sa kuarta.

Sang 15 anyos ako, ginsilingan ako sang akon iloy nga makig-abyan sa iban. Gani pirme ako nagalakat kag labi nga nagadugay antes ako makapauli. Sang ulihi, nakaupod ko ang malain nga mga tawo. Isa ka adlaw, ginpalapitan ako sang isa ka tawo nga daw mainabyanon man. Gintanyagan niya ako sing mga droga, kag ginbaton ko ini kay gusto ko ipakita nga adulto na ako. Wala madugay nahuyog ako sa droga kag imoralidad. Madamo nga beses nga gin-abusuhan ako sa sekso. Indi na importante sa akon ang kabuhi; wala na ako sing labot kon mabuhi man ako ukon mapatay. Desperado na ako. Sang 16 anyos ako, nagtinguha ako sa paghikog paagi sa pag-inom sing isa ka botelya nga whiskey kag naglumpat sa linaw. Subong resulta, na-coma ako sing tatlo ka adlaw.

Ginpabaloran ko na ang kabuhi, pero nangin masingki man ako kag nagapanonto. Nagatanyag ako nga makigsekso sa mga tawo, ginapadroga sila sa ila balay, dayon ginakawat ang ila malahalon nga pagkabutang. Gingamit ako sang dalagku nga mga sindikato para magbaligya sang droga sa bilog nga Italya. Pirme ako nagakadakpan sang mga pulis. Daw wala sing pulos kag wala sing pasingadtuan ang akon kabuhi. Pero, nagapati ako nga may rason kon ngaa nagakabuhi ako. Nangamuyo ako sa Dios nga hatagan ako sing isa lang ka tuig nga kalinong kag kalipay.

KON PAANO GINBAG-O SANG BIBLIA ANG AKON KABUHI:

Sang 24 anyos ako, nagplano ako nga magsaylo sa England. Bangod sang akon ginhimo sa mga nagabaligya sang droga, ara sa katalagman ang akon kabuhi. Antes ako maghalin, ginbisitahan ko ang akon iloy kag nakibot ako sang nakita ko si Annunziato Lugarà nga nagaistorya sa iya parte sa Biblia. * Bangod nahibaluan ko nga kriminal sia sang una, hinadlukan ako kag ginpamangkot ko sia  kon ngaa ara sia didto. Ginsugiran niya ako parte sa daku nga pagbag-o nga ginhimo niya sa iya kabuhi para mangin isa ka Saksi ni Jehova, kag ginpapromisa niya ako nga makig-istorya sa mga Saksi pag-abot ko sa England. Nagpasugot ako. Pero, sang nakaabot na ako didto, nagbalik ako sa malain nga pagkabuhi.

Isa ka adlaw, nakilala ko ang isa ka Saksi nga nagatanyag sing Lalantawan kag Magmata! nga mga magasin sa masako nga kalye sa London. Bangod nadumduman ko ang ginpromisa ko kay Annunziato, ginpangabay ko ang Saksi nga tudluan ako sa Biblia.

Nagdayaw gid ako sa akon natun-an sa Biblia. Halimbawa, natandog gid ako sa ginasiling sang 1 Juan 1:9 parte sa Dios: “Kon itu-ad naton ang aton mga sala, matutom sia kag matarong, gani patawaron niya kita sa aton mga sala kag tinluan.” Daku gid ang epekto sini nga teksto sa akon bangod pamatyag ko mahigko ako bangod sang akon pagkabuhi. Nagtambong ako gilayon sa mga pagtilipon sa Kingdom Hall sang mga Saksi ni Jehova. Gin-abiabi gid ako sang mga Saksi. Sang nakita ko ang ila suod nga pag-abyanay, nga madugay ko na nga ginahandum, luyag ko gid nga mangin bahin sang ila kongregasyon nga daw pamilya.

Bisan pa wala ako nabudlayan masyado nga untatan ang pagdroga kag biyaan ang imoral nga pagkabuhi, nabudlayan gid ako nga bag-uhon ang akon personalidad. Nahibaluan ko nga kinahanglan respetuhon kag hatagan ko sing konsiderasyon ang mga tawo. Ang matuod, ginapakigbatuan ko gihapon ang malain nga mga batasan. Pero paagi sa bulig ni Jehova, nag-uswag ako. Sa sulod sang anom ka bulan sugod sang nagtuon ako sa Biblia, nabawtismuhan ako bilang Saksi ni Jehova sang 1997.

MGA BENEPISYO:

Pagkatapos sang bawtismo, ginpangasawa ko si Barbara, nga bag-o lang man nangin Saksi ni Jehova. Sang nakita sang akon abyan sang una ang akon daku nga pagbag-o, nagtuon man sia sa Biblia. Sang ulihi, nangin isa sia ka Saksi kag ang iya magulang nga babayi. Dayon nagtuon man sa Biblia ang utod nga babayi sang akon lola, nga sobra na 80 anyos, kag nabawtismuhan sia antes napatay.

Nagaalagad ako karon bilang gulang sang kongregasyon sa amon lugar, kag kami sang akon asawa nagaalagad subong bug-os tion nga mga ministro, nga nagabulig sa pagtudlo sang Biblia sa mga tawo nga nagahambal sing Italian sa London. Kon kaisa, nasubuan ako bangod sang akon pagkabuhi sang una, pero ginasuportahan gid ako ni Barbara. Natigayon ko na karon ang malig-on nga pamilya nga akon ginahandum, kag ang mahigugmaon nga Amay nga akon ginapangita. Nangabay ako sa Dios nga hatagan ako sing isa lang ka tuig nga kalinong kag kalipay, pero sobra pa ang ginhatag niya sa akon!

Natigayon ko na karon ang malig-on nga pamilya nga akon ginahandum, kag ang mahigugmaon nga Amay nga akon ginapangita

^ par. 10 Tan-awa ang artikulo nga “Ang Biblia Nagapabag-o sang Kabuhi—May Pusil Ako Bisan Diin Magkadto,” panugiron ni Annunziato Lugarà, sa Hulyo 1, 2014, nga isyu sang Ang Lalantawan, pahina 8-9.

Magtuon sing Dugang Pa

Ngaa Indi Dapat Mangampo?

Ngaa ginatamod sang iban nga abyan ang kamatayon?