Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN NUM. 1 2016

 DUMAAN NGA KAALAM PARA SA MODERNO NGA PAGKABUHI

Indi Magkabalaka

Indi Magkabalaka

PRINSIPIO SA BIBLIA: “Untati ninyo ang pagkabalaka sa inyo kabuhi.”—Mateo 6:25.

Ano ang kahulugan sini? Ginsiling ini ni Jesus sa iya Sermon sa Bukid. Suno sa isa ka diksionaryo sa Biblia, ang Griegong berbo nga ginbadbad “magkabalaka” mahimo nagapatuhoy sa “normal nga reaksion sang tawo sa kapigaduhon, gutom kag iban pa nga problema sa adlaw-adlaw.” Sa masami, nalakip sa kabalaka ang pagkahangawa parte sa mahimo matabo sa palaabuton. Natural lang kag nagakaigo nga magkabalaka sa materyal nga mga kinahanglanon kag sa kaayuhan sang aton mga pinalangga. (Filipos 2:20) Pero sang nagsiling si Jesus, “indi gid kamo magkabalaka,” ginalaygayan niya ang iya mga sumulunod nga likawan ang sobra nga kabalaka—ang sobra nga kahadlok sa palaabuton nga makadula sang aton kalipay sa pagkabuhi karon.—Mateo 6:31, 34.

Praktikal pa bala ini subong? Maalamon gid nga sundon naton ang laygay ni Jesus. Ngaa? Ang pila ka reperensia nagasiling nga kon ang mga tawo magkabalaka sing sobra, ang ila sympathetic nervous system sigesige nga aktibo sa sini nga kahimtangan kag “nagaresulta ini sa mga balatian, subong sang ulser, sakit sa tagipusuon, kag hapo.”

Si Jesus naghatag sing mabakod nga rason nga likawan ang sobra nga kabalaka: Wala ini sing pulos. “Sin-o sa inyo ang makadugang sa iya kabuhi sing bisan isa lang ka maniko paagi sa pagkabalaka?” pamangkot ni Jesus. (Mateo 6:27) Ang sobra nga pagkabalaka indi makapalawig sang aton kabuhi sing bisan isa lang ka segundo, kag indi man ini makapauswag sang aton pagkabuhi. Isa pa, sa masami wala man nagakatabo ang aton ginakahangaw-an. Ang isa ka iskolar nagsiling: “Ang pagkabalaka sa palaabuton wala sing pulos, kag ang palaabuton masami nga mas maayo sangsa ginahunahuna naton.”

Paano naton malikawan ang pagkabalaka? Una, magsalig sa Dios. Kon ang Dios nagapakaon sa mga pispis kag ginapapanaptan sang katahom ang mga tanom, indi bala hatagan man niya sing mga kinahanglanon ang mga tawo nga ginauna sa ila kabuhi ang pagsimba sa iya? (Mateo 6:25, 26, 28-30) Ikaduha, kabalak-i lang ang subong nga adlaw. “Indi gid ninyo pagkabalak-i ang buas,” siling ni Jesus, “kay ang buas may kaugalingon nga mga kabalaka.” Nagaugyon ka bala nga “ang tagsa ka adlaw may kaugalingon nga mga palaligban”?—Mateo 6:34.

Paagi sa pagtuman sa maalamon nga laygay ni Jesus, malikawan naton nga mahalitan sa pisikal. Labaw sa tanan, matigayon naton ang kalinong—ang ginatawag sang Biblia nga “paghidait sang Dios.”—Filipos 4:6, 7.

Magtuon sing Dugang Pa

Saligan Mo Bala ang Dios?

Mangin malipayon ka kon makilala mo ang Dios bilang masaligan nga Abyan.