Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

MAGMATA! DISIEMBRE 2015

 TOPIKO SA KOBER | MAAYO NGA PAGTAMDANAY SA PULUY-AN

Kon Paano Mapalambo ang Maayo nga Pagtamdanay sang Pamilya

Kon Paano Mapalambo ang Maayo nga Pagtamdanay sang Pamilya

MAKABULIG bala ang Biblia agod mapalambo ang maayo nga pagtamdanay sa puluy-an? Palihug ipaanggid ang ginasiling sang Biblia sa komento sang mga gin-interbyu nga nakabulig sa ila. Binagbinaga kon diin sa sini ang makabulig sa imo nga malikawan ang indi paghangpanay, mangin maayo ang pagtamdanay, kag mapabakod ang kaangtanan.

 MGA PRINSIPIO SA BIBLIA NGA NAGAPALAMBO SING MAAYO NGA PAGTAMDANAY

PALAMBUA ANG POSITIBO NGA PAGTAMOD SA ISA KAG ISA.

“Indi maghimo sang bisan ano bangod sa huyog nga makigbais ukon bangod sa sobra nga pagpaimportante sa kaugalingon, kundi mapainubuson nga kabiga ang iban nga labaw sa inyo, samtang ginapangita ninyo indi lamang ang inyo personal nga kaayuhan, kundi ang iya man sang iban.”Filipos 2:3, 4.

“Nakita namon nga maayo nga tamdon ang imo tiayon nga mas importante sangsa imo kaugalingon kag sa iban.”—C. P., 19 ka tuig nga kasal.

MAMATI SING MAAYO UPOD ANG BUKAS NGA HUNAHUNA.

“Padayon nga ipahanumdom sa ila nga . . . indi mangin palaaway, kundi mangin makatarunganon, kag mangin malulo gid sa tanan.”Tito 3:1, 2.

“Malikawan ang problema kon magsabat kita sa aton tiayon nga wala nagabais. Importante nga mamati kita nga may bukas nga hunahuna kag tahuron ang iya pagtamod bisan pa wala kita nagaugyon sa sini.”—P. P., 20 ka tuig nga kasal.

PALAMBUA ANG PAGPAILOB KAG KALULO.

“Paagi sa pagpailob mahaylo ang kumander, kag ang dila nga malum-ok [“malulo,” footnote] makabali sang tul-an.”Hulubaton 25:15.

“Indi malikawan ang indi paghangpanay, pero ang epekto sini nagadepende sa amon panimuot. Dapat gid kami magpasensia. Kon magpasensia kami, natalupangdan namon nga mahapos lang husayon ang mga problema.”—G. A., 27 ka tuig nga kasal.

INDI MAGHAMBAL SING MASAKIT UKON MAGPANAKIT.

“Isikway ini tanan: kasingkal, kaakig, kalainan, masakit nga hambal, kag paghambal sing binastos.”Colosas 3:8.

“Nagadayaw gid ako sa pagpugong sa kaugalingon sang akon bana. Pirme sia kalmado kag wala gid niya ako ginasinggitan ukon ginainsulto.”—B. D., 20 ka tuig nga kasal.

MANGIN HANDA SA PAGPATAWAD KAG PAGHUSAY GILAYON SANG INDI PAGHANGPANAY.

“Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa.”Colosas 3:13.

“Indi pirme mahapos nga magpabilin nga kalmado kon akig ka, kag madali ka makahambal ukon makahimo sang mga butang nga makasakit sa imo tiayon. Sa sini nga mga kahimtangan, makabulig gid kon magpatawad ka. Imposible ang maayo nga pag-asawahay kon wala sing pagpatawad.”—A. B., 34 ka tuig nga kasal.

MAGHATAG KAG MAGPAAMBIT.

“Himua nga kinabatasan ang paghatag sa iban, kag sila magahatag sa inyo. . . . Kay kon ano nga talaksan ang ginagamit ninyo sa iban, amo man nga talaksan ang gamiton nila sa inyo.”Lucas 6:38.

“Nahibaluan sang akon bana kon ano ang makapahalipay sa akon, kag pirme niya ako ginasorpresa. Amo nga pirme ko man ginahunahuna, ‘Paano ko sia mapahalipay?’ Gani pirme kami nagakadlaw asta subong.”—H. K., 44 ka tuig nga kasal.

PADAYON NGA PALAMBUA ANG MAAYO NGA PAGTAMDANAY SA PULUY-AN

Ang mga gin-interbyu sang Magmata! pila lamang sa minilyon sa bilog nga kalibutan nga nabuligan sang Biblia nga magpalambo sing mga kinaiya nga makaamot sa maayo nga pagtamdanay sa puluy-an. * Bisan pa may pila sa ila pamilya nga wala nagakooperar, nakita nila nga takus gihapon panikasugan nga palig-unon ang paghidait bangod ang Biblia nagsaad: “May kalipay ang nagapalig-on sing paghidait.”—Hulubaton 12:20.

^ par. 24 Para sa dugang nga impormasyon kon paano mangin malipayon ang pamilya basaha ang kapitulo 14 sang libro nga Ano Gid ang Ginatudlo sang Biblia? nga ginabalhag sang mga Saksi ni Jehova. Buksi man ang PANUDLO SANG BIBLIA > BULIG PARA SA PAMILYA.

Magtuon sing Dugang Pa

MAGMATA!

Paano Magpatawad?

Ngaa mabudlay magpatawad? Hibalua kon paano makabulig ang laygay sang Biblia.

MAGMATA!

Paano Mangin Maayo nga Manugpamati?

Ang pagpamati indi lamang isa ka teknik, kundi pagpakita sang gugma. Hibalua kon paano mangin mas maayo nga manugpamati.