Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! OKTUBRE 2015

 ANG PAGTAMOD SANG BIBLIA

Ebolusyon

Ebolusyon

Ang pila ka tawo nagasiling nga nagtuhaw lang ang kabuhi. Ang iban nagasiling nga ginsugdan lang sang Dios ang pagpanuga dayon gintugutan niya nga matabo ang proseso sang ebolusyon. Ano ang ginasiling sang Biblia?

Ang kasaysayan bala sa Biblia parte sa pagpanuga nagasikway sang posibilidad nga ang uniberso naporma paagi sa mabaskog katama nga paglupok?

Ang Biblia nagasiling lang: “Sa ginsuguran gintuga sang Dios ang langit kag ang duta.” (Genesis 1:1) Wala sini ginasugid kon paano gid gintuga sang Dios ang tanan nga butang. Gani bisan naporma ang aton uniberso sa mabaskog katama nga paglupok sa kahawaan, wala ini nagasumpakil sa ginasiling sang Biblia. Sa baylo, ang Genesis 1:1 nagsabat sang pamangkot, Sin-o ang nagpahanabo sang mabaskog katama nga paglupok?

Matuod, madamo nga mga sientipiko ang nagapati nga ang mabaskog katama nga paglupok natabuan lang kag wala ginplano nga hitabo nga nagresulta sa pagporma sang mga bituon kag mga planeta sa sulod sang madugay nga tion. Wala ginasuportahan sang Biblia ina nga pagpati kundi nagsiling ini nga ang Dios amo gid ang nagporma sang uniberso, naggamit man sia sing mabaskog katama nga paglupok ukon sing iban pa nga paagi sa pagtuga.

“Sa ginsuguran gintuga sang Dios ang langit kag ang duta.”Genesis 1:1.

Ginasiling bala sang rekord sa Biblia nga nagabag-o ang buhi nga mga tinuga pagligad sang mga tion?

Huo. Nagasiling ang Biblia nga gintuga sang Dios ang buhi nga mga tinuga “suno sa ila sahi.” (Genesis 1:11, 12, 21, 24, 25) May pagbag-o bala nga nagakatabo sa sulod sang isa ka sahi? Huo. Pero, ang naobserbahan bala nga pagbag-o sa sulod sang isa ka sahi nagapamatuod nga sa ulihi magatuhaw ang isa pa ka bag-o nga sahi? Wala.

Binagbinaga ang isa ka halimbawa: Sang dekada 1970, gintun-an sang mga researcher ang mga finch nga pispis sa Galápagos Islands. Natalupangdan nila nga may medyo daku sing tuktok nga mga finch nga makabato sa pagbag-o sang klima. Ang pila nagsiling nga pamatuod ini sang ebolusyon. Pero pamatuod bala ini sang ebolusyon, ukon pagpasibu lang sa kahimtangan? Pagligad sang mga tuig, nagdamo liwat ang mga finch nga gamay sing tuktok. Bangod sini nga eksperimento, si Jeffrey H. Schwartz, isa ka propesor sang antropolohiya, nagsiling nga bisan pa ang pagpasibu sa kahimtangan mahimo magbulig sa isa ka sahi nga makabato sa pagbag-o sang klima, “wala ini nagatuga sang bisan ano nga bag-o nga sahi.”

 Nagaugyunay bala ang Biblia kag ang teoriya sang ebolusyon?

Ang Biblia nagasiling nga “gintuga [sang Dios] ang tanan nga butang.” (Bugna 4:11) Wala sia ‘nagpahuway’ asta nga natapos ang iya pagpanuga. (Genesis 2:2) Maathag ang ginapahangop sini: Wala nagtuga ang Dios sing simple nga organismo kag dayon nagpahuway, ukon naghulat samtang ina nga organismo nagabag-o sa sulod sang minilyon ka tuig agod mangin lainlain nga sahi sang isda, amu, kag tawo. * Ina nga pagpati, nga ginatawag macroevolution, nagapanghiwala sa papel sang Manunuga, nga ginasiling sang Biblia nga “nagtuga sang langit, sang duta, sang dagat kag sang tanan nga mga butang nga yara sa sini.”—Bugna 10:6; Exodo 20:11.

“Takus ka, Jehova, nga amon Dios, nga magbaton sang himaya kag dungog kag gahom, bangod gintuga mo ang tanan nga butang.”Bugna 4:11.

Magtuon sing dugang: Ang Biblia nagasiling nga ang “indi makita nga mga kinaiya [sang Dios], . . . maathag nga makita halin pa sang pagtuga sa kalibutan, bangod makita ini sa mga butang nga gintuga.” (Roma 1:20) Ang pagtuon parte sa Dios nagahatag sing matuod nga kahulugan sa aton kabuhi, bangod may mahigugmaon sia nga katuyuan para sa tanan nga sinsero nga nagapangita sa iya. (Manugwali 12:13; Hebreo 11:6) Para sa dugang nga impormasyon, kadtui ang www.jw.org/hil ukon kontaka ang mga Saksi ni Jehova. Buksi ang PANUDLO SANG BIBLIA > SABAT SA MGA PAMANGKOT SA BIBLIA.

^ par. 12 Kabaliskaran sa ginasiling sang mga creationist, wala ginasuportahan sang Biblia ang ideya nga gintuga sang Dios ang duta sa sulod sang anom ka adlaw nga may tig-24 ka oras. Para sa dugang nga impormasyon, tan-awa ang pahina 24-27 sang brosyur nga Gintuga Bala ang Kabuhi? Ini nga brosyur ginabalhag sang mga Saksi ni Jehova kag ma-download ini sing libre sa www.jw.org/hil.

Magtuon sing Dugang Pa