Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! OKTUBRE 2015

 BULIG PARA SA PAMILYA | PAMATAN-ON

Kon Magbalik Ka sa Inyo Balay

Kon Magbalik Ka sa Inyo Balay

NGAA ISA KA HANGKAT?

Ginatawag sila nga “boomerang nga henerasyon”—mga lamharon nga nagbiya sa ila balay agod mangabuhi sing kinaugalingon pero nagpauli bangod namigado. Natabo na bala ini sa imo?

Bisan pa palangga mo ang imo mga ginikanan, mabudlay gihapon ang pagbalik sa inyo balay. Halimbawa, ang isa ka dalaga nga si Sarah * nagsiling: “Ang pagkabuhi sing kinaugalingon nagdugang sang akon pagsalig sa kaugalingon bangod wala na ako nagadepende sa iban. Gani pamatyag ko daw bata ako kon magpauli ako sa balay.” Amo man sini ang ginbatyag sang isa ka soltero nga si Richard. “Indi ko gusto magpauli sa balay,” siling niya, “apang indi ko masuportahan ang akon kaugalingon. Napaslawan gid ako.”

Kon amo man sini ang imo sitwasyon, ini nga artikulo makabulig sa imo nga mangabuhi liwat sing kinaugalingon.

NGAA NAGAKATABO INI?

Problema sa kuarta. Madamo nga mga lamharon ang nakibot gid sang narealisar nila nga magasto gid ang pagkabuhi sing kinaugalingon. “Naubos ang tanan ko nga sinuptan sa pagsuporta sa akon kaugalingon,” siling ni Richard nga ginsambit kaina. Amo man sini ang natabo kay Shaina, isa ka dalaga nga naghalin sa ila balay sa edad nga 24 kag nagpauli pagligad sang isa ka tuig kag tunga. “Kuntani gingasto ko sing nagakaigo ang akon kuarta,” siling niya. “Naghalin ako sa balay nga wala sing kuarta, kag nagpauli ako nga madamo sing utang.” *

Problema sa trabaho. Bisan naplano sing maayo ang pagkabuhi sing kinaugalingon, maguba ini nga plano kon madulaan ang isa sing obra—amo ini ang natabo kay Shaina. “Naggradwar ako sa isa ka kurso sa patag sang medisina, kag dayon nagsulod ako sa ahensia nga nagbulig sa akon nga makakita sing obra,” siling niya. “Apang sang nadula ko ang akon obra, wala na ako sing nahimo. Nagaistar ako sa uma nga wala sing maobrahan nga bagay sa akon tinapusan!”

Indi realistiko nga pagpaabot. Ang pila sa mga lamharon nag-obra nga indi handa sa kon ano ang nadalahig sa pagpangita sing palangabuhian. Masami nga ang ila obra mas mabudlay sangsa ginapaabot nila. Nadiskobrehan nila nga ang ila ginakalangkagan nga pagkinaugalingon indi na makalilipay. Wala gid sila maghunahuna nga ang isa ka adulto madamo sing problema.

 ANO ANG MAHIMO MO?

Istoryaha ang imo mga ginikanan parte sa pagpauli mo sa inyo balay. Istoryahi ninyo ini: Daw ano kadugay nga magatener ka sa inyo balay? Samtang yara ka sa inyo, paano ka makaamot sa mga galastuhan sa balay? Ano nga mga ulubrahon sa balay ang imo mahimo? Ano ang sarang mo mahimo agod masuportahan liwat ang imo kaugalingon? Bisan ano man ang imo edad, dumduma nga nagbalik ka sa poder sang imo ginikanan kag dapat mo sila tumanon.—Prinsipio sa Biblia: Exodo 20:12.

Tun-i kon paano mo gamiton ang imo kuarta. Ang libro nga The Complete Guide to Personal Finance: For Teenagers and College Students nagsiling: “Ang paagi sang paggasto mo sang imo kuarta may daku nga epekto kon bala magamadinalag-on ka ukon indi sa pag-uyat sang imo kuarta. . . . Importante nga mahangpan mo ang ideya nga indi ka maggasto sang imo kuarta sa mga butang nga indi mo man kinahanglanon.”—Prinsipio sa Biblia: Lucas 14:28.

Mangayo sing masaligan nga laygay. Ang imo mga ginikanan ukon ang iban pa nga adulto makabulig sa imo kon paano maggamit sang imo kuarta, magbadyet, kag magbayad sang mga balayran. “Nagbalik ako sa umpisa,” siling sang isa ka dalaga nga si Marie. “Ginbuligan ako sang akon abyan nga ilista ang mga kinahanglanon kag indi kinahanglanon nga mga galastuhan. Daw indi ako makapati—kalabanan sa akon ginagastuhan indi gid kinahanglanon! Natun-an ko man nga palambuon ang kinaiya nga kinahanglanon gid sa pagkabuhi sing kinaugalingon—ang pagdisiplina sa kaugalingon.”—Prinsipio sa Biblia: Hulubaton 13:10.

Ang mas importante amo nga mangin maayo ka sa imo ginahimo sangsa kon ano ang imo ginahimo

Mangita sing obra. Gamita ang tion nga para kuntani sa pag-obra sa pagpangita sing obra. Paandam: Madamo nga tawo ang mahimo magsiling sa imo “sunda ang imo handum” nga propesyon. Apang kon ang pangitaon mo amo lang ang ginahandum mo nga obra, diutay lang ang puede mo maaplayan kag indi mo makita ang puede mo obrahan nga yara lang sa imo atubangan! Sa baylo nga uyangan ang imo tion sa pagpokus sa isa lang ka sahi sang obra, mangita man sing iban nga obra. Dumduma, ang mas importante amo nga mangin maayo ka sa imo ginahimo sangsa kon ano ang imo ginahimo. Ang matuod, naobserbahan nga kon mas madamo nga eksperiensia kag ikasarang ang natigayon sang mga nagaobra, mas nangin malipayon sila sa ila obra. Indi kinahanglan nga ang ginahimo mo amo gid ang nanamian mo agod manamian ka sa ginahimo mo!

^ par. 5 Gin-islan ang mga ngalan sa sini nga artikulo.

^ par. 8 Ang mga estudyante sa kolehiyo sa Estados Unidos masami nagaatubang sing amo man sini nga kabudlayan. Suno sa isa ka report sang The Wall Street Journal, ang isa ka estudyante nga nagapangutang, nagagradwar nga may utang nga mga $33,000.

Magtuon sing Dugang Pa

Ang Ginasiling sang Biblia Parte sa Obra

Importante bala kon ano ang imo obra?