Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Septiembre 2015

 ANG PAGTAMOD SANG BIBLIA

Kaimulon

Kaimulon

Wala sapayan sang sinsero nga mga panikasog nga masolbar ang kaimulon, minilyon gihapon sa bilog nga kalibutan ang imol.

Paano mangin malipayon ang imol?

ANG GINASILING SANG MGA TAWO

Madamo ang nagapati nga ang kalipay kag kaayawan matigayon paagi sa materyal nga kahamungayaan kag ang matuod nga kadalag-an nabase sa kon daw ano kadamo ang kuarta sang isa. Bangod ang mga imol wala sing tinapusan ukon wala makaeskwela, indi makapabulong sing maayo, kag indi makatigayon sang iban pa nga benepisyo, indi mapaabot nga magmalipayon sila.

ANG GINASILING SANG BIBLIA

Ginatudlo sang Biblia nga ang matuod nga kalipay nagadepende indi sa manggad sang isa, kundi sa iya espirituwal nga kahimtangan kag kaangtanan sa iya Manunuga. Ang Biblia nagsiling: “Malipayon ang mga mahunahunaon sa ila espirituwal nga kinahanglanon.” (Mateo 5:3) Ano man ang kahimtangan sang isa sa pinansial, ang mga mahunahunaon sa ila espirituwal nagatinguha nga mahibaluan ang pagtamod sang Dios sa mga butang, amo nga matun-an nila ang mga kamatuoran sa Biblia nga nagahatag sing matuod nga lugpay kag malinong nga hunahuna. Amo ini ang nagahatag sing matuod nga kalipay.

Ang mga nakahangop kag nagasunod sa laygay sang Biblia mas nakahibalo kon paano atubangon ang kaimulon. Halimbawa, ang laygay sang Biblia nagapalig-on sa mga tawo nga likawan ang makahalalit nga mga bisyo subong sang pagpanigarilyo kag pagpahubog. Ini nga mga bisyo nagauyang sing kuarta kag mahimo magresulta sa mahal nga pagpabulong.Hulubaton 20:1; 2 Corinto 7:1.

Ang Biblia nagapaandam man sa makahalalit nga mga epekto sang kakagod kag materyalismo. (Marcos 4:19; Efeso 5:3) Ini nga laygay makabulig sa isa nga malikawan ang pag-uyang sing kuarta sa sugal ukon ang pagpalambo sing “gugma sa kuarta,” nga ginalaragway sang Biblia nga “gamot sang tanan nga sahi sang makahalalit nga butang.” (1 Timoteo 6:10) Ang Kasulatan nagapaandam: “Bisan pa ang tawo madamo sing pagkabutang, indi ini makahatag sa iya sang kabuhi.” (Lucas 12:15) Buot silingon, indi mabakal sang kuarta ang kabuhi. Apang ang pagkabuhi nahisuno sa maalamon nga laygay sang Biblia nagahatag sing kahulugan sa kabuhi kag nagaresulta sa matuod nga kalipay.

Ang mga imol kinahanglan gid magtinguha para makatigayon sing pagkaon, bayo, kag puluy-an, apang mahimo sila mangin malipayon paagi sa pagpalambo sing pagkakontento, paggamit sang ila kabuhi sa pagpahamuot sa ila Manunuga, kag pagkabuhi suno sa iya kabubut-on. Kumbinsido gid sila sa saad sang Biblia nga “ang pagpakamaayo ni Jehova amo ang nagapamanggad sa tawo, kag wala Sia nagadugang sing kasakit sa sini.”Hulubaton 10:22.

MGA TEKSTO NGA TANDAAN: “Malipayon ang mga mahunahunaon sa ila espirituwal nga kinahanglanon.”Mateo 5:3.

 Madula pa bala ang kaimulon?

ANG GINASILING SANG BIBLIA

Bisan pa wala nagmadinalag-on ang mga pagtinguha sang tawo nga dulaon ang kaimulon, sa nagakaigo nga tion, solbaron sang Dios ang gamot sang problema—ang huyog sang maiyaiyahon nga mga tawo kag mga gobierno nga unahon ang ila kaugalingon nga kaayuhan. (Manugwali 8:9) Buslan sang aton Manunuga ang maiyaiyahon nga mga gobierno sang tawo. Ang iya Ginharian, ukon langitnon nga gobierno, magahatag sang tanan nga kinahanglanon sang mga tawo sa bilog nga duta, nga wala sing pagpasulabi. Ang Biblia nagapromisa gid nga ang Hari sang Ginharian sang Dios magahatag sang mga kinahanglanon sang mga imol. “Luwason niya ang imol nga nagapangayo sing bulig . . . Kaluy-an niya ang kubos kag ang imol, kag luwason niya ang kabuhi sang mga imol.”Salmo 72:12-14.

Ang duta mangin matuod gid nga paraiso kag ang tanan may balay, pagkaon, kag wala na sing kaimulon. Sa libro sang Isaias sa Biblia, ang Dios nagsaad nga ang iya katawhan ‘magapatindog sing balay kag magapuyo sa sini, kag magatanom sila sing mga ulubasan kag magakaon sang bunga sini. Ang akon mga pinili magakalipay sa binuhatan sang ila kamot.’ (Isaias 65:21, 22) Sa baylo nga magbakabaka sa hawothawot nga kinitaan, ang tanan magakaon sa “isa ka sinalusalo sang bugana nga pagkaon.”Isaias 25:6.

NGAA IMPORTANTE INI?

Ang pagpamalandong sa saad sang Dios tuhoy sa isa ka kalibutan nga wala na sing kaimulon nagapasalig sa mga nagakabuhi sa mabudlay nga mga kahimtangan nga ang Dios nagaulikid gid sa ila kag malapit na matapos ang ila pag-antos. Ang paghunahuna sini nga paglaum makahatag sing kusog sa isa nga mabatas ang mabudlay nga mga sitwasyon karon.

MGA TEKSTO NGA TANDAAN: “Luwason niya ang imol nga nagapangayo sing bulig . . . Kaluy-an niya ang kubos kag ang imol, kag luwason niya ang kabuhi sang mga imol.”Salmo 72:12, 13.