Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Agosto 2015

 GINDESINYO BALA INI?

Ang Mechanical Gear sang Issus Leafhopper

Ang Mechanical Gear sang Issus Leafhopper

ANG mechanical gear ginapatihan nga ginhimo lang sang tawo. Apang indi ina matuod! Ang nagaangtanay nga mga gear nadiskobrehan sa buhi nga tinuga—ang boto sang Issus leafhopper ukon dahondahon, nga makita sa mga hardin sa bilog nga Europa. *

Ang boto nga dahondahon makalukso sa kadasigon nga asta sa 3.9 ka metro kada segundo, sa puersa nga halos 200 ka pilo sangsa puersa sang grabidad! Madula ini sa panulok mo sa isa lang ka pagpamisok. Makalukso ang dahondahon sa sini nga kadasigon bangod ang duha ka naulihi nga tiil sang insekto eksakto gid nga may pareho nga puersa kag dungan gid ini. Ano ang sekreto ngaa eksakto gid ini?

Binagbinaga: Nadiskobre sang mga sientipiko ang duha ka nagaangtanay nga gear sa puno sang duha ka naulihi nga tiil sang dahondahon. Kon maglukso ang insekto, ini nga mga gear amo ang nagakontrol sa duha ka tiil para eksakto nga dungan gid ini. Kay kon indi, magabalangbalang ini kon maglukso!

Kon maglukso ang dalagku nga mga tinuga, nagasalig sila sa ila sistema sang nerve para magdungan ang ila mga tiil. Apang sa boto nga dahondahon, ang signal sang nerve tuman kahinay. Gani ginagamit nila ang ila nagaangtanay nga duha ka gear. “Kinaandan na nga abi naton ang mga gear makita lang sa gindesinyo sang tawo nga makinaryas,” siling sang awtor kag researcher nga si Gregory Sutton. Ang rason, siling pa niya, amo nga “wala kita nangita sing maayo” sa iban.

Ano sa banta mo? Ang mga mechanical gear sang dahondahon resulta bala sang ebolusyon? Ukon gindesinyo ini?

^ par. 3 Ang mga gear nagakadula kon magdaku na ini nga insekto.

Magtuon sing Dugang Pa

LIBRO KAG BROSYUR

Gintuga Bala ang Kabuhi?

Importante gid kon ano ang imo ginapatihan parte sa pagsugod sang kabuhi.