Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! HULYO 2015

 ANG PAGTAMOD SANG BIBLIA

Obra

Obra

Bisan pa dumaan nga libro ang Biblia, wala nagabag-o ang mga prinsipio sini. Ang ginasiling sini parte sa obra maaplikar gihapon karon pareho sang panahon nga ginsulat ini.

Ano ang nagakaigo nga pagtamod sa obra?

ANG GINASILING SANG IBAN

Para makapabilin ka sa imo obra, dapat amo ini ang pinakaimportante sa imo kabuhi. Bangod sini nga panimuot, nagabakabaka ang pila sa ila obra gani napabay-an na nila ang ila pamilya kag ikaayong lawas.

ANG GINASILING SANG BIBLIA

Ginapalig-on sang Biblia ang balanse nga pagtamod sa obra. Ginadayaw sini ang kapisan kag ginapakamalaut ang katamad. (Hulubaton 6:6-11; 13:4) Apang wala man ginapalig-on sang Biblia nga ubuson naton ang aton tion sa pag-obra sing bakabaka. Sa baylo, ginapalig-on sini nga dapat may tion kita sa paglingawlingaw. Ang Manugwali 4:6 nagasiling: “Mas maayo pa ang diutay nga pahuway sangsa tuman nga pagpangabudlay kag paglagas sa hangin.” Gani indi kita mangin tuman kasako sa obra kag mapabay-an naton ang aton pamilya kag ikaayong lawas. Wala gid sing kaayuhan kon halos patyon naton ang aton lawas sa obra!

“Ang pinakamaayo nga mahimo sang tawo amo nga magkaon sia kag mag-inom kag magkalipay sa iya ginpangabudlayan.”Manugwali 2:24.

 Importante bala kon ano ang imo obra?

ANG GINASILING SANG IBAN

Kon daku ang sueldo, maayo ang trabaho. Ina nga panimuot kag ang ganyat nga makakuarta sing mahapos, amo ang kabangdanan nga nagapangdaya ang iban kag nagaobra pa gani sing ilegal.

Ang iban nga naimpluwensiahan sang pilosopiya nga ‘lab-uta ang imo handum’ kag ‘himua ang gusto mo,’ nagabaton lamang sang makakulunyag nga obra. Kon indi nila magustuhan ang ila obra, ukon wala sila makunyag sa sini, ginakabig nila ini nga makatalaka. Subong resulta, negatibo ang ila pagtamod sa ila obra kag wala sila sing gana mag-obra. Mahimo pa gani nga indi nila pagbatunon ang maayo nga obra bangod pamatyag nila nagapakanubo ini sang ila dignidad.

ANG GINASILING SANG BIBLIA

Wala ginakahamut-an sang Biblia ang pagpangdaya ukon ang nagahalit sa mga tawo nga obra. (Levitico 19:11, 13; Roma 13:10) Ang maayo nga obra nagahatag sing benepisyo sa iban kag nagabulig sa nagaobra nga ‘mahuptan ang maayo nga konsiensia.’—1 Pedro 3:16.

Ginatudlo man sang Biblia nga ang obra may maayo nga katuyuan—indi lamang para malipay kita kundi para palangabuhian kag pagsuportar sa aton pamilya. Indi man malain nga malipay kita sa aton obra, pero dapat indi ini ang pinakaimportante sa aton kabuhi.

“Masako gid si Tatay. Luwas sa iya obra, may mga responsibilidad sia sa ginatambungan namon nga kongregasyon sang mga Saksi ni Jehova. Apang maukod si Tatay sa iya obra. Ginatapos niya ang dapat niya obrahon, kag may tion gihapon sia sa akon, sa akon magulang nga babayi, kag kay Nanay. Madamo sing hilikuton si Tatay, pero nahuptan niya ini nga balanse.”—Alannah.

Matuod, ang pagtaas sang presyo mahimo bangdan sang kabalaka kon paano naton mapaigo ang aton kita, pero ginapadaku sang Biblia ang pagkahaganhagan. Ini nagasiling: “Kon kita may pagkaon, kag panapton, mangin kontento na kita sa sini.” (1 Timoteo 6:8) Ini nga pinamulong wala nagapahangop nga dingutan naton ang aton kaugalingon. Apang dapat kita mangin realistiko kon ano ang aton masarangan kag ang kadamuon sang aton pagkabutang.—Lucas 12:15.

ANG KAHULUGAN SINI SA IMO

Mangin mapisan. Mangin interesado gid sa imo obra. Bisan pa ang imo obra daw manubo ukon indi amo sini ang imo ginahandum, tinguhai nga mangin eksperto sa sini. Ang mapisan nga pag-obra nagapabatyag sa imo nga may nahimuan ka, kag ang pagpauswag sang imo ikasarang mahimo makadugang sang imo kalipay sa pag-obra.

Mangin balanse man. Magpahuway kag magrelaks sing panalagsa. Mangin mas masadya pa gid ini sa tapos sang aton maukod nga pag-obra. Subong man, kon ginapangabudlayan naton ang pagtigayon sang aton mga kinahanglanon, makabatyag kita nga may pulos kita kag tahuron kita sang iban—lakip na sang aton pamilya.—2 Tesalonica 3:12.

“Indi gid kamo magkabalaka kag magsiling, ‘Ano ang aton kaunon?’ ukon, ‘Ano ang aton imnon?’ ukon, ‘Ano ang aton isuksok?’ . . . Nahibaluan sang inyo langitnon nga Amay nga kinahanglan ninyo ini tanan.”Mateo 6:31, 32.

Magtuon sing Dugang Pa

Mga Kinaiya nga Mapuslanon Tubtob San-o——Pagkabunayag

Nakaganar kuntani si Raquel kon ginbaton niya ang kickback, pero para sa iya, mas daku ang iya nabenepisyo kay ginpangindian niya ini.

Paano Matigayon ang Matuod nga Kadalag-an?

Lima ka praktikal nga panugda agod mangin matuod nga madinalag-on.