Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! HULYO 2015

 TOPIKO SA KOBER | KONTROLADO MO BALA ANG IMO KABUHI?

Ang Kabudlayan: Negatibo nga Balatyagon

Ang Kabudlayan: Negatibo nga Balatyagon

APEKTADO ka bala sang mabaskog nga balatyagon—ayhan sang kasubo, kaakig, ukon hinakit? Kon amo, mahimo nga diutay na lang ang imo tion ukon kusog sa paghimo sing importante gid nga mga butang. Ano ang mahimo mo sa sini? *

HALIMBAWA SA BIBLIA: SI DAVID

Si Hari David nakaeksperiensia sing lainlain nga balatyagon—lakip na ang kabalaka kag kasubo. Ano ang nakabulig sa iya nga makapadayon sa iya hilikuton? Gintugyan ini ni David sa Dios. (1 Samuel 24:12, 15) Ginsulat man niya ang iya mga balatyagon. Bangod may pagtuo sia, pirme sia nagapangamuyo. *

ANG GINHIMO NI GREGORY

Subong sang ginsiling sa una nga artikulo, si Gregory may anxiety disorder. “Indi na husto ang akon sobra nga pagkabalaka kag indi ko na ini makontrol,” siling niya. Ano ang ginhimo ni Gregory? “Para mangin balanse ako liwat,” siling niya, “ginbaton ko ang bulig sang akon asawa kag mga abyan. Nagpabulong man ako kag gintun-an pa gid ang akon kahimtangan. Sang ginbag-o ko ang akon estilo sang pagkabuhi, nabatyagan ko nga makontrol ko na ang akon kahimtangan, indi nga ginakontrol ako sini. Bisan pa ginaatake ako sang akon balatian, nahibaluan ko na kon ano ang kabangdanan sini, kag kon paano ini atubangon.”

“Ang tagipusuon nga malipayon maayo nga bulong.”Hulubaton 17:22

ANG MAHIMO MO

Kon ginakontrol ka sang negatibo nga balatyagon, tilawi ang masunod:

  • Isulat ang imo ginabatyag.

  • Isugid ang imo ginabatyag sa imo suod nga paryente ukon abyan.

  • Batui ang imo ginabatyag. Halimbawa, pamangkuta ang imo kaugalingon, ‘May rason gid bala nga magbatyag ako sing negatibo sa akon kaugalingon?’

  • Indi paghupti ang kabalaka, kaakig, ukon hinakit. Sa baylo, gamita ang imo kusog sa paghimo sing mas mapuslanon nga butang. *

Ang Punto: Sa masami, ang negatibo nga balatyagon resulta, indi sang aton kahimtangan kundi sang aton pagtamod sa sini.

^ par. 3 Ang pila sang negatibo nga balatyagon mahimo nga resulta sang balatian nga kinahanglan ipabulong. Ang Magmata! wala nagaendorso sang bisan ano nga paagi sa pagbulong. Dapat binagbinagon sing maayo sang tagsa ka indibiduwal ang iya pililian antes maghimo sing personal nga desisyon.

^ par. 5 Madamo nga salmo sa Biblia ang mga pangamuyo ni David, nga iya ginsulat.

^ par. 13 Para sa dugang nga impormasyon, basaha ang topiko sa kober nga “Kon Paano Atubangon ang Kabalaka” sa Hulyo 1, 2015 nga Ang Lalantawan.

Magtuon sing Dugang Pa

“Ang Pagbinagbinag sang Tawo Nagapakuli sa Iya sa Pagpangakig”

Ang halimbawa sa kabuhi ni David, nga hari sa Israel, makabulig sa imo para makontrol ang kaakig kon masaklaw ka ukon maugot.

Mga Sekreto sang Malipayon nga Kabuhi

Makabulig gid bala sa imo ang kaalam sa Biblia para mangin malipayon? Ginabinagbinag sini nga artikulo ang apat ka prinsipio sa Biblia nga makabulig gid.

Makabulig Bala sa Akon ang Biblia Kon Gina-depress Ako?

May tatlo ka butang nga ginaaman ang Dios para buligan ang mga gina-depress.

Buligan Bala Ako sang Dios Kon Magpangamuyo Ako?

Nagaulikid gid bala ang Dios sa aton mga problema?