Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! HUNYO 2015

 BULIG PARA SA PAMILYA | PAG-ASAWAHAY

Paano Mo Matuman ang Imo Panumpa

Paano Mo Matuman ang Imo Panumpa

NGAA ISA KA HANGKAT?

Sang adlaw sang inyo kasal, nanumpa ka. Tubtob buhi ka, dapat mo tumanon ina nga panumpa—ang pangako nga unungan mo ang imo tiayon kag solbaron ang mga problema nga magautwas.

Apang pagligad sang mga tinuig, ang indi paghangpanay nagahalit sa inyo relasyon. Determinado ka bala nga tumanon gihapon ang imo panumpa sa imo tiayon?

ANO ANG DAPAT MO MAHIBALUAN?

Ang panumpa kaangay sang isa ka angkla nga makapalig-on sang inyo pag-asawahay

Ang inyo panumpa amo ang solusyon, indi ang problema. Madamo nga tawo karon ang indi gusto nga may obligasyon sila. Ginapaanggid sang iban ang panumpa nga daw isa ka gapos nga nagapugong lang sa imo sa paghimo sing malain. Sa baylo, kabiga ini nga isa ka angkla nga makapalig-on sa inyo pag-asawahay. Ang isa ka asawa nga si Megan nagsiling, “Kon mag-utwas ang problema, ang isa sa pinakamaayo nga butang parte sa panumpa amo ang paghibalo nga wala sing isa sa inyo ang magabulag.” * Ang pagsalig nga ang pag-asawahay may kasiguruhan—bisan pa may mga problema ini—magahatag sa inyo sing mabakod nga rason nga solbaron ang mga problema.—Tan-awa ang kahon nga “ Panumpa kag Katutom.”

Tandai: Kon may mga problema ang inyo pag-asawahay, subong na ang tion nga pabakuron ang inyo panumpa sa baylo nga duhaduhaan ini. Paano mo ina mahimo?

 ANO ANG MAHIMO MO?

Usisaa ang imo pagtamod. “Mag-asawa tubtob buhi.” Nagapabatyag bala ini sa imo nga napikuta ka, ukon may kalig-unan? Kon may problema kamo, ang inyo bala solusyon amo ang pagbulagay dayon? Para magbakod ang inyo panumpa, importante nga tamdon ninyo ang pag-asawahay subong permanente.—Prinsipio sa Biblia: Mateo 19:6.

Usisaa ang imo gindak-an. Ang imo nakita sa imo mga ginikanan, mahimo may epekto sa imo pagtamod sa panumpa. “Sang gamay pa ako nagdiborsio ang akon mga ginikanan,” siling sang isa ka asawa nga si Lea, “kag nabalaka ako nga ina nga hitabo may negatibo nga epekto sa akon pagtamod sa panumpa.” Makasalig ka nga may mahimo ka agod indi ini matabo sa imo pag-asawahay. Indi mo kinahanglan nga suliton ang mga sala sang imo mga ginikanan!—Prinsipio sa Biblia: Galacia 6:4, 5.

Usisaa ang imo ginahambal. Kon nagabaisay kamo nga mag-asawa, likawi ang paghambal sang mga butang nga hinulsulan mo sa ulihi, subong sang “Bulagan ko ikaw! ukon, Mangita ako sang iban nga magapalangga sa akon!” Ini nga mga tinaga nagapaluya sa inyo panumpa, kag imbes nga masolbar ang inyo problema, padayon na lang kamo nga mag-insultuhanay. Sa baylo sang masakit nga mga tinaga, mahimo ka magsiling: “Pareho kita nga akig. Ano ang aton himuon para masolbar ini nga problema?”—Prinsipio sa Biblia: Hulubaton 12:18.

Himua ang mga butang nga makapabakod sang imo panumpa. Magbutang sing piktyur sang imo tiayon sa imo lamesa sa ulubrahan. Mag-istorya sing positibo nga mga butang tuhoy sa inyo pag-asawahay. Tinguhai nga magtawag sa imo tiayon kada adlaw kon malayo ka sa iya. Pirme gamita ang “kami,” kag magsiling, “kami sang akon asawa” ukon “kami sang akon bana.” Paagi sini, mapakita mo sa iban, kag mapahanumdom mo ang imo kaugalingon, nga may panumpa ka sa imo tiayon.

Mangita sing maayo nga mga huwaran. Makig-istorya sa hamtong nga mga mag-asawa nga nangin madinalag-on sa pag-atubang sa ila mga problema. Pamangkuta sila, “Daw ano ka importante para sa inyo ang inyo panumpa, kag paano ini nakabulig sa inyo pag-asawahay?” Ang Biblia nagsiling: “Subong nga ang salsalon mapatalom sang salsalon, mapatalom man sang tawo ang iya abyan.” (Hulubaton 27:17) Ginahunahuna ini nga prinsipio, ngaa indi mangayo sing bulig sa mga nagmadinalag-on sa ila pag-asawahay?

^ par. 7 Ginatugutan sang Biblia ang pagbulagay kon ang isa ka tiayon nakahimo sing seksuwal nga imoralidad. Tan-awa ang artikulo nga “Ang Pagtamod sang Biblia—Pagpanghilahi” sa sini nga isyu sang Magmata!

Magtuon sing Dugang Pa

Magmatutom sa Isa kag Isa

Mapakita lang bala ang katutom sa pag-asawahay paagi sa paglikaw sa pagpanghilahi?

Hupti ang Katutom sa Imo Tiayon

Ano ang nagapabakod sa pag-asawahay? Ano ang makaguba sini? Paano ka makapabilin nga matutom sa imo tiayon?

Makabulig Bala ang Biblia Para Magmalipayon ang Akon Pamilya?

Ang maalamon nga laygay sang Biblia nakabulig na sa minilyon ka lalaki kag babayi para mangin malipayon ang ila pamilya.

Paano ang mga Prinsipio sa Biblia Makabulig sa Aton?

Ginpaathag ni Jesus kon ngaa kinahanglan naton ang panuytoy kag kon ano ang duha ka panguna kag pinakaimportante nga prinsipio sa Biblia.