Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Magmata!  |  Mayo 2015

 TOPIKO SA KOBER

Paglaum sang mga Wala sing Puluy-an kag mga Imol

Paglaum sang mga Wala sing Puluy-an kag mga Imol

Si Joe isa ka beterano nga soldado sa Estados Unidos. Bangod sang natabo nga trahedya sa iya kag sa iya pamilya nadulaan sia sing balay sa sulod sang mga 18 ka tuig. Isa ka tuig sia nga nagakadto sa publiko nga librarya sa ila lugar kag kon kaisa nagapakig-istorya sia sa nagabantay sa librarya. Ina nga mga pag-istoryahanay nagbag-o sang iya kabuhi.

Si Martín, nga isa ka pamatan-on sa Argentina, nagbatyag nga wala sia sing kaangtanan sa Dios. Para sa iya, ang kabuhi daw wala sing katuyuan. Sa iya pagpangita sing kahulugan sang kabuhi, naghalin sia sa ila balay kag nag-istar sa higad sang baybay. Apang imbes nga makakita sing mga sabat sa iya mga pamangkot, labi pa sia nga napung-awan. Nagahibi sia nga nagapakitluoy sa Dios: “Kon nagaluntad ka, palihug buligi ako nga makita ka.” Ano ang resulta? Tan-awon naton.

NANUHAYTUHAY ang rason kon ngaa wala sing balay ang mga tawo. Ang pila pareho kay Joe, nakaeksperiensia sing mga trahedya. Ang iban kaangay ni Martín, indi lang gusto sang “normal” nga kabuhi, kay daw wala ini sing kahulugan. Ang iban naman wala sing puluy-an bangod sa kaimulon, kalamidad, kapintas sa puluy-an, pag-abuso sa droga ukon alkohol, balatian sa hunahuna, kakulang sing barato nga balay, ukon pagkadula sang trabaho.

Ang problema nga wala sing puluy-an nga ginahunahuna sadto nga nagakatabo lang sa mga pungsod nga imol ukon may inaway ukon nagausmod ang ekonomiya, “nangin daku na nga problema sang mga tawo sa kalabanan nga manggaranon nga pungsod,” siling sang propesor sa sikolohiya nga si Paul Toro. * Ang mga rason mahimo maglakip sa mga pagsulundan sang gobierno tuhoy sa pagbulig sa mga pamilya nga diutay sing kita kag ang indi gid alalangay nga kinitaan.

Madamo nga tawo ang nabalaka sa palaabuton. Apang naghaganhagan ang kabalaka sang pila bangod sang pagbinagbinag sang ginasiling sang Biblia parte sa palaabuton—ang topiko nga aton binagbinagon karon. Mabuligan man kita sang Biblia subong paagi sa paghatag sa aton sing maayo nga mga prinsipio sa pagkabuhi—mga  prinsipio nga makapauswag sang aton kahimtangan sa kabuhi kag emosyonal nga kapagros, pareho sang natukiban nanday Joe kag Martín.

GINBAG-O SANG BIBLIA ANG IYA KABUHI

“Sa banta ko maalam si Joe, maayo sia sing batasan kag mapainubuson,” siling ni Cindi, nga pirme makakita sa iya sa librarya nga ginaubrahan ni Cindi. Subong Saksi ni Jehova, ginhatagan niya si Joe sing mga kopya sang Lalantawan kag Magmata! nga magasin kag gin-agda sia nga magtambong sa pagtilipon sang mga Cristiano. Ginpakig-angutan sia diri sing mainayuhon kag matinahuron, gani nagtambong sia sing regular. Ginbaton man niya ang gintanyag nga personal nga pagtuon sa Biblia.

Bangod sang pagtuon ni Joe sang Biblia, natigayon niya ang pagtahod sa kaugalingon

Nalugpayan gid si Joe sa iya natun-an, kag gin-aplikar niya ang mga panudlo sang Biblia, bisan pa nagakinahanglan ini sang daku nga mga pagbag-o sa iya kabuhi. Halimbawa, natun-an niya nga ang kabuhi isa ka dulot sang Dios, gani dapat ini pabaloran. (Salmo 36:9) Natun-an man niya nga ang pagpanigarilyo nagahigko sa lawas. Gani nag-untat sia sa pagpanigarilyo suno sa prinsipio sa 2 Corinto 7:1: “Tinluan naton ang aton kaugalingon sa tanan nga nagapahigko sang lawas.” Bangod sini, nangin maayo ang panglawas ni Joe kag nakakinot pa sia.

Bangod napahulag sang laygay sang Biblia nga dapat naton himuon ang aton masarangan nga atipanon ang aton mga kinahanglanon, nangita sing obra si Joe. * (1 Tesalonica 4:11, 12) “Ang pinakamaayo nga mahimo sang tawo amo nga magkaon sia kag mag-inom kag magkalipay sa iya ginpangabudlayan,” siling sang Manugwali 2:24. Ina nga kalipay resulta man sang pagtahod sa kaugalingon, kay ang bunayag nga obra nagapadungog sa aton. Kag makabulig pa kita sa mga nagakinahanglan.—Efeso 4:28.

Bangod sinsero si Joe, “ginbaton sia sang kongregasyon,” siling ni Cindi, kag “ginbuligan sia sang pila nga makatigayon sing maayo nga balay kag iban pa nga benepisyo nga puede niya makuha.” Padayon ang pag-uswag ni Joe kag sang ulihi nabawtismuhan sia subong Saksi ni Jehova. Sa karon, ginasugid niya ang iya eksperiensia kon nagapalig-on sia sa iban nga magkuha sing kaalam halin sa Dios nga masapwan sa Biblia.—Hulubaton 3:13, 14.

NASAPWAN NIYA ANG KATUYUAN SANG KABUHI

Gusto mahibaluan ni Martín ang kahulugan sang kabuhi sang 20 anyos sia. “Gin-usisa ko ang mga relihion kag mga pilosopiya kag naggamit sing droga,” siling niya, “kag nagalaum ako nga mapun-an ang nabatyagan ko nga daw kulang sa akon kabuhi, pero wala gid ini nakabulig.” Nag-istar sia sa California, U.S.A. sing makadali kag dayon nagkadto sa Hawaii. “Abi ko nasapwan ko na ang paraiso,” siling niya. Pero ang matahom nga talan-awon wala nakabulig sa iya. “Grabe gid ang kapung-aw ko,” siling niya, “amo nga nagpamensar pa gani ako nga maghikog.” Sa amo sina nga sitwasyon nga naghilibion sia kag nagpakitluoy sa Dios, “Kon nagaluntad ka, palihug buligi ako nga makita ka.”

Si Martín may positibo na karon nga pagtamod sa kabuhi

Nadumduman ni Martín nga antes sini may nabasahan sia nga karatula nga “Kingdom Hall of Jehovah’s Witnesses.” Nagkadto sia didto para magtambong sa pagtilipon sang mga Cristiano. “Nagsulod ako nga malaba ang buhok kag buranguson, kag binulan na nga wala ako nakailis,” siling niya. “Pero, gin-abiabi gihapon nila ako.” Ginbaton ni Martín ang personal nga pagtuon sa Biblia kag  ginalakat lang niya pirme halin sa iya “balay” sa baybay pakadto sa plasa agod magtuon sing Biblia.

Sa katapusan, nasabat na gid man ang mga pamangkot ni Martín. Subong resulta, wala na sia ginapung-awan kag nabatyagan niya ang kalipay nga ginsiling ni Jesus: “Malipayon ang mga mahunahunaon sa ila espirituwal nga kinahanglanon.”—Mateo 5:3.

“Nagdayaw gid ang mga tawo sa akon pagbag-o”

Wala magdugay, nagbag-o gid ang pagtamod ni Martín sa kabuhi samtang ginaaplikar niya ang mga prinsipio sa Biblia nga nakabulig man kay Joe, nga ginsambit kaina. Gin-asikaso na ni Martín ang iya hitsura, kag ginbuligan sia sang mga Saksi nga makakita sing obra kag maistaran. “Sadto, nakilal-an ako nga lihuliho sa plasa,” siling niya, “pero karon nagdayaw gid ang mga tawo sa akon pagbag-o.”

Sang ulihi, nagpauli si Martín sa Argentina, kag nabawtismuhan sia didto subong Saksi ni Jehova. Ginapabaloran niya karon ang pribilehiyo sa pagbulig sa mga ginagutom sa espirituwal nga masapwan ang mga sabat sa importante nga mga pamangkot sa kabuhi.

ANG TANAN MAY BALAY NA KAG WALA NA SING IMOL

Si Jeremias, nga alagad sang Dios sadto, nagkabuhi sa tion nga grabe gid ang kabudlayan. Ginsalakay sang mapintas nga kaaway ang iya dutang natawhan kag madamo sa iya katawhan ang ginbihag kag gin-ulipon. (Panalambiton 1:3) Bisan pa naluwas si Jeremias, nadula ang halos tanan niya nga pagkabutang. Nasubuan gid sia kag nagpangamuyo: “Dumduma ang akon kabudlayan kag ang kahimtangan nga wala ako sing ilistaran.”—Panalambiton 3:19.

Walay sapayan sang iya pag-antos, wala nadulaan sing paglaum si Jeremias. Ngaa? Bangod nahibaluan niya nga indi sia pagbiyaan ni Jehova. (Jeremias 1:8) Isa pa, nagatuon  sia sang Kasulatan, nga nagasugid nga magaabot ang tion nga ang kaimulon kag pag-antos madula na kag buslan ini sang matuod nga paghidait kag kalig-unan.—Salmo 37:10, 11.

Ina nga mga kahimtangan matabo, indi sa panikasog sang mga tawo, kundi paagi sa himpit nga gobierno nga ginatawag Ginharian sang Dios. (Daniel 7:13, 14) Ang Hari sina nga Ginharian amo si Jesucristo, nga nagpakita sing daku nga kaluoy sa mga imol sang nangin tawo sia diri sa duta. (Lucas 7:22; 14:13) Sa iya paggahom, “magalambo ang matarong, kag magabugana ang paghidait . . . Luwason niya ang imol nga nagapangayo sing bulig, amo man ang kubos kag ang bisan sin-o nga wala sing nagabulig. Luwason niya sila sa pagpamigos kag sa pagpamintas.”—Salmo 72:7, 12, 14.

“Magapatindog sila sing balay kag magapuyo sa sini.”—Isaias 65:21

Ang Ginharian sang Dios amo ang sentro sang pagpanudlo ni Jesus. (Lucas 4:43) Gintudluan pa gani niya ang mga tawo nga mangamuyo: “Magkari ang imo Ginharian. Matuman ang imo kabubut-on sa duta subong sang sa langit.” (Mateo 6:9, 10) Ano ang kahimtangan sang pagkabuhi sa duta kon bug-os na nga maggahom ang Ginharian sang Dios? Ginahatagan kita sang Biblia sing ideya tuhoy sini. Halimbawa, nagasugid ini tuhoy sa mga sakop sang Ginharian sang Dios:

  • “Magapatindog sila sing balay kag magapuyo sa sini, kag magatanom sila sing mga ulubasan kag magakaon sang bunga sini. Indi sila magpatindog kag iban ang magapuyo, ukon magtanom kag iban ang magakaon. . . . Ang akon mga pinili magakalipay sa binuhatan sang ila kamot.”—Isaias 65:21, 22.

  • “Magapungko ang kada isa sa ila sa idalom sang ila puno sang ubas kag sa idalom sang ila kahoy nga higuera, kag wala sing magapahadlok sa ila, kay si Jehova sang mga kasuldadusan ang nagsiling sini.”—Miqueas 4:4.

Inang pat-od nga paglaum nagapalig-on sa aton sa tion sang mga pagtilaw. Ang mga prinsipio sang Biblia magabulig man sa aton nga makatigayon sing kabuhi nga may kahulugan kag kalipay bisan karon, pareho sang natukiban nanday Joe, Martín, kag sang madamo pa. Ang matuod, ang aton Manunuga, si Jehova nga Dios nagapasalig sa aton: “Ang nagapamati sa akon magakabuhi nga luwas sa katalagman kag wala sing ginakahadlukan nga kalalat-an.” (Hulubaton 1:33) Kabay nga mangin matuod ini nga pinamulong sa imo!

^ par. 6 Bangod sang inaway, kasingki, ukon paghingabot, minilyon ka tawo ang napilitan nga maghalin sa ila balay kag mangin mga refugee ukon nagaebakwit sa iban nga lugar. Ini nga problema ginbinagbinag sa Enero 22, 2002, nga Awake!

^ par. 11 Ang pila ka tawo gusto magtrabaho pero indi makasarang, ayhan bangod baldado sila, may balatian, ukon tigulang na. Wala nahamuot ang Dios sa mga “indi luyag mag-obra.”—2 Tesalonica 3:10.